“Si Haring Benjamin,” Mga Sugilanon sa Libro ni Mormon (2023)
Si Haring Benjamin
Pag-alagad sa mga tawo kag sa Dios
Si Haring Benjamin isa ka propeta sang Dios nga nagapamuno sa kadutaan sang Zarahemla. Nangabudlay sia todo para serbisyohan ang iya katawhan kag tudloan sila parte sa Dios. Sa bulig sang iban pa nga mga propeta sang Dios, ginhimo ni Benjamin ang Zarahemla nga malinong kag matawhay istaran.
Mga Pulong ni Mormon 1:17–18; Mosias 1:1–7
Tigulang na si Benjamin. Ginpangabay niya ang iya bata nga si Mosias nga tipunon ang mga tawo. Gusto ni Benjamin ihambal sa ila nga si Mosias na ang mangin bag-o nila nga hari.
Kadamo sang tawo nga nag-abot halin sa tanan nga kadutaan. Nagbutang sila sang ila mga tolda lapit sa templo para mamati kay Benjamin.
Naghambal si Benjamin halin sa tore para madamo nga tawo ang makabati sa iya. Siling ni Benjamin nga ginbuligan sia sang Dios nga pamunoan sila. Bilang hari, gintudloan niya sila nga tumanon ang mga kasuguan sang Dios. Wala niya ginkuha ang ila kuwarta ukon ginpaalagad sa iya. Kundi, nagtrabaho sia para serbisyohan ang iya katawhan kag ang Dios.
Ginhambal ni Benjamin nga kon ginaserbisyohan nila ang kada isa, ginaserbisyohan man nila ang Dios. Dayon ginhambal niya sa ila nga ang tanan nga ara sa ila halin sa Dios. Bilang balos, gusto sang Dios nga tumanon nila ang Iya mga kasuguan. Kon magtuman sila, hatagan sila sang Dios sang mas madamo pa nga bugay.
Ginhambal ni Benjamin sa ila nga indi na sia pwede nga mangin hari ukon manunudlo nila. Ang iya bata nga si Mosias na ang ila bag-o nga hari.
Dayon ginhambal ni Benjamin sa iya katawhan nga ginbisitahan sia sang isa ka anghel. Siling sang anghel nga ang Anak sang Dios nga si Jesucristo maabot sa duta. Magahimo sia sang mga milagro kag magpaayo sang mga tawo. Magaantos sia sang kasakit kag mapatay para luwason ang tanan nga tawo. Gintudlo ni Benjamin nga patawaron ni Jesus ang tanan nga magpati sa Iya kag maghinulsol.
Nagpati ang mga tawo sa gintudlo ni Benjamin sa ila parte kay Jesus. Kahibalo sila nga kinahanglan nila maghinulsol. Ang tanan nga tawo nagpangamuyo kag nangayo sa Dios sang kapatawaran. Pagkatapos nila nga magpangamuyo, nag-upod sa ila ang Espiritu sang Dios. Nakabatyag sila sang kalipay kag nakahibalo nga ginpatawad sila sang Dios tungod sang ila pagtuo kay Jesus.
Pamatyag sang mga tawo lain sila kag bag-o tungod sang ila pagtuo kay Jesus. Gusto na nila maghimo sang maayo sa tanan nga oras. Nagpromisa sila nga tumanon ang mga kasuguan sang Dios sa bilog nila nga kabuhi. Tungod nagpati sila kay Jesus kag naghimo sini nga promisa, gintawag sila nga katawhan ni Jesus.