“Si Haring Noe kag si Haring Limhi,” Mga Sugilanon sa Libro ni Mormon (2023)
Si Haring Noe kag si Haring Limhi
Pagpalagyo sa mga Lamanhon
Ginapamunoan ni Haring Noe ang isa ka grupo sang mga Nefinhon. Kadamo sang ginhimo niya nga malain, kag ang iban nga tawo akig sa iya. Isa ka tawo nga ang ngalan Gideon nakig-away kay Noe gamit ang espada. Nalagyo si Noe kag nagsaka sa tore. Sa ibabaw sang tore, nakita niya ang Lamanhon nga mga soldado nga nagapakadto. Nagpakuno-kuno si Noe nga nahadlok kuno abi para sa iya katawhan, para indi sia pagpatyon ni Gideon.
Nalagyo si Noe kag ang iya katawhan. Pero ginlagas sila sang mga Lamanhon kag ginpang-atake sila. Ginhambalan ni Noe ang mga lalaki nga bayaan na lang ang ila mga pamilya kag mag-upod sa iya.
Ang iban nga mga lalaki nalagyo upod kay Noe. Pero damo sa mga lalaki ang nagpabilin upod sa ila mga pamilya. Ginpili man sang bata ni Noe nga si Limhi nga magpabilin.
Madamo nga mga anak nga babayi ang nag-atubang sa mga soldado kag ginpangabay ang mga Lamanhon nga indi pagsakiton ang ila mga pamilya. Namati ang mga Lamanhon sa mga anak nga babayi kag gintugtan nga mabuhi ang mga Nefinhon. Sa baylo, ginpangdakop sang mga Lamanhon ang mga Nefinhon.
Ang mga lalaki nga nagpinalagyo gusto magbalik sa ila mga pamilya. Gintinguhaan sila nga punggan ni Noe, gani ginpatay sia sang mga lalaki. Dayon nagbalik sila sa ila mga pamilya.
Nalipay kaayo ang mga lalaki nga luwas sa katalagman ang ila mga pamilya. Ginsugid nila kay Gideon ang natabo kay Noe.
Ginpili sang mga tawo si Limhi nga mangin bag-o nila nga hari. Ginpromisa ni Limhi sa hari sang mga Lamanhon nga bayaran nila ang mga Lamanhon sang tunga sang tanan nila nga propiyedad. Sa baylo, nagpromisa ang hari nga Lamanhon nga indi niya pagsakiton ang katawhan ni Limhi.
Nagpangabuhi sila nga malinong sang pila ka tuig. Dayon nagsugod na nga ginapintasan sang mga Lamanhon ang katawhan ni Limhi. Gusto sang mga tawo nga mangin hilway liwat. Gintilawan nila nga magbato sa mga Lamanhon, pero napirde sila. Nagpangamuyo ang mga tawo sang bulig sa Dios.
Isa ka adlaw, isa ka Nefinhon nga ang ngalan Amon ang nagbisita kay Limhi kag sa iya katawhan. Halin si Amon sa lugar nga gintawag Zarahemla. Nalipay si Limhi nga makita si Amon.
Pwede nga pangunahan ni Amon ang katawhan ni Limhi pakadto sa Zarahemla, pero kinahanglan nila anay malagyo sa mga Lamanhon. May plano si Gideon.
Sa gab-i, ginhatagan ni Gideon ang Lamanhon nga mga gwardya sang dugang nga alak para matulogan sila. Samtang tulog ang mga gwardya, si Limhi kag ang tanan niya nga katawhan nalagyo halin sa siyudad.
Nagkadto sila sa Zarahemla kag nag-upod sa mga Nefinhon didto. Si Limhi kag ang iya katawhan nagtuon pa gid parte sa Dios. Naghimo sila sang kasugtanan, ukon espesyal nga promisa, nga magserbisyo sa Dios kag magtuman sang Iya mga kasuguan. Ginbunyagan sila kag nangin parte sang Simbahan sang Dios. Ginadumdom nila nga ginbuligan sila sang Dios nga makapalagyo sa mga Lamanhon.