Ginbendisyunan ni Jesus ang Kabataan

Pagpakita sang Iya pagpalangga sa ila

Si Jesucristo nga nagatindog sa hagdan sang templo kag nagahambal sa grupo sang mga tawo

Gintudloan ni Jesucristo ang mga tawo sang madamo nga butang. Nakita Niya nga kinahanglan nila sang tiyempo para hunahunaon ang ila natun-an. Ginpapauli Niya sila kag ginhambalan nga magpangamuyo sa Amay nga Langitnon para maintiendihan nila ang Iya gintudlo sa ila. Dayon nagpromisa si Jesus nga bisitahan sila liwat pagkadason nga adlaw.

3 Nefi 17:1–4

Si Jesucristo nga nagayuhum kag nagaalsa sang Iya kamot

Naghilibi ang mga tawo kay gusto nila nga magtiner pa lawig si Jesus. Palangga ni Jesus ang mga tawo. Nakita Niya ang ila pagtuo nga grabe kabaskog. Ginhambalan Niya sila nga dalhon sa Iya ang bisan sin-o nga nagamasakit ukon may bisan ano nga ginabatyag. Gusto Niya nga paayuhon ang tagsa sa ila.

3 Nefi 17:5–8

Si Jesucristo nga ginabuligan ang masakiton nga bata, kag may iban nga kabataan sa palibot nga nagayuhum

Nagkadto sa Iya ang mga tawo upod ang masakiton nga mga miyembro sang ila pamilya kag mga amigo. Ginpaayo ni Jesus ang kada isa sa ila. Malipayon sila katama. Nagluhod sila kag ginhalukan ang Iya mga tiil.

3 Nefi 17:9–10

Si Jesucristo nagaistorya sa isa ka bata, kag ginpalibutan sang mga tawo si Jesus upod ang ila kabataan

Ginpangabay sila ni Jesus nga dalhon ang ila magagmay nga kabataan sa Iya. Gindala sang mga tawo ang ila kabataan kag ginplastar sa duta nga nagapalibot kay Jesus.

3 Nefi 17:11–12

Si Jesucristo nga nagaluhod kag nagapangamuyo, kag ang mga kabataan kag mga dalagko na nagaluhod sa palibot Niya kag nagapangamuyo

Sang natipon na ang tanan nga kabataan upod sa Iya, ginhambalan ni Jesus ang mga tawo nga magluhod sa duta. Nagluhod man Sia. Dayon nangamuyo Sia sa Amay nga Langitnon. Kanami sang Iya mga ginpanghambal nga indi pwede isulat ang Iya mga pulong. Napuno sang kalipay ang mga tawo.

3 Nefi 17:13–18

Si Jesucristo nga nagayuhum kag nagatulo ang luha sa Iya mata

Ginhambal ni Jesus sa mga tawo nga ginbugayan sila tungod sang ila pagtuo sa Iya. Nalipay gid kaayo si Jesus nga naghibi gid Sia.

3 Nefi 17:19–21

Si Jesucristo nga ginahakos ang isa ka bata, kag ang iban nga kabataan nagatindog sa palibot nga nagayuhum

Dayon ginbendisyunan ni Jesus ang tagsa ka bata sing tag-isaisa. Nangamuyo Sia sa Amay nga Langitnon para sa tagsa sa ila. Dayon ginhambalan Niya ang mga tawo nga tulukon ang ila mga kabataan.

3 Nefi 17:21–23

Si Jesucristo nga nagaistorya sa mga kabataan, kag ang mga anghel nagpanaog halin sa langit kag ginpalibutan ang mga kabataan

Nagpanaog ang mga anghel halin sa langit kag ginpalibutan ang mga kabataan. Samtang ginabendisyunan sang mga anghel ang mga kabataan, ginpalibutan sila sang langitnon nga kasanag. Sang madason pa gid nga adlaw, nakigkita liwat kag ginbendisyunan ni Jesus ang mga kabataan. Ginbendisyunan man Niya ang mga kabataan nga makahambal sila. Bisan ang mga lapsag naghambal. Gintudloan sang mga kabataan ang ila mga ginikanan sang matahum nga mga butang.

3 Nefi 17:23–25; 26:14, 16