“Ang mga Kahoy nga Olivo,” Mga Sugilanon sa Libro ni Mormon (2023)
Ang mga Kahoy nga Olivo
Pagpalangga sang Dios sa Iya katawhan
Si Jacob isa ka propeta sang Dios. Gusto niya tudloan ang mga Nefinhon kon ano kadako sang pagpalangga sang Dios sa Iya katawhan. Ginsugiran sila ni Jacob parte sa talamnan sang mga kahoy nga olivo. Ang Ginuo sang kaolivohan kag ang Iya suluguon ululupod nga nag-atipan sang kaolivohan.
May espesyal nga kahoy nga olivo ang Ginuo nga nagapamunga sang maayo nga prutas. Siling ni Jacob nga ining kahoy daw pareho sang katawhan sang Dios, ukon sang panimalay sang Israel. Ang prutas daw pareho sang mga ginahimo sang mga tawo. Gin-atipan sang Ginuo sing maayo ining kahoy. Ginbuligan Niya ini nga magtubo paagi sa pagsagod sang iya gamot kag pagpamuhin sang iya sanga. Ginhatagan Niya ini sang mga kinahanglanon sini para mabuhi.
Sa kadugayan, ang Iya espesyal nga kahoy nagsugod nga malaya. Pila na lang ang nabilin nga buhi nga sanga. Nasubuan gid sini ang Ginuo. Gusto Niya nga magpadayon ini sa pagpamunga sang maayo.
Para masalbar ang maayo pa nga mga sanga, ginpangkuha ini sang Ginuo kag gin-angot sa iban nga kahoy. Dayon ginbuslan Niya ini sang maayo nga mga sanga sang iban nga mga kahoy.
Nagligad ang malawig nga panahon. Ang Ginuo kag ang suluguon nagabisita pirme sa kaolivohan. Gin-atipan nila ang espesyal nga kahoy sang Ginuo. Gin-atipan man nila ang espesyal nga mga sanga nga ginlapta sa mga kahoy sa bilog nga talamnan. Kalabanan sang nangin bunga, maayo. Nalipay ang Ginuo kag ang Iya suluguon tungod sa maayo nga bunga.
Sang nadugayan, mas nagdamo pa gid ang bunga sang tagsa ka kahoy. Pero ang tanan nga bunga law-ay naman. Nasuboan kaayo ang Ginuo. Indi Sia gusto nga mausik ang Iya talamnan ukon ang mga bunga! Grabe ang Iya pagpangabudlay para buligan ang Iya mga kahoy. Nanumdom Sia kon ano pa gid ang pwede Niya himuon. Nag-istorya sia sa suluguon kag ginpili Niya nga magpadayon.
Para masalbar ang Iya talamnan, nagsiling ang Ginuo nga tipunon ang mga sanga nga iya ginkuha halin sa espesyal nga kahoy. Ginpaangot Niya ini liwat sa espesyal nga kahoy.
Amo na ini ang katapusan nga tion nga mag-obra ang Ginuo sa Iya talamnan. Nagtawag Sia sang iban pa nga suluguon para magbulig. Ang tanan nagbuligay sa pagtipon kag pagpang-angot sang mga sanga.
Gin-atipan nila ang tanan nga kahoy. Ginpangkakas nila ang law-ay nga mga sanga kag ginbilin ang maayo pa. Pagligad sang panahon, nagbunga liwat sang maayo nga prutas ang espesyal nga kahoy sang Ginuo. Ang iban nga kahoy namunga man sang maayo nga prutas nga daw pareho sang bunga sang espesyal nga kahoy. Nalipay ang Ginuo. Nasalbar ang Iya mga kahoy! Tanan sila namunga sang gusto Niya nga prutas.
Ginpasalamatan sang Ginuo ang mga suluguon. Ginhambalan Niya sila nga ginbugayan sila sa ila pagpangabudlay kag pagtuman sang Iya mga kasuguan. Ginhatagan Niya sila sang bunga, kag nalipay sila kaayo. Sa malawig nga panahon, napuslan sang Ginuo ang bunga.
Gintapos ni Jacob ang istorya parte sa mga kahoy nga olivo. Gintudlo niya sa mga tawo nga nagaulikid ang Dios sa ila pareho sang pag-ulikid sang Ginuo sang kaolivohan sa Iya mga kahoy. Ginpangabay ni Jacob ang tanan nga maghinulsol kag mas magpalapit sa Dios. Gintudloan niya sila nga palanggaon kag serbisyohan ang Dios tungod ang Dios pirme gid nagalab-ot sa pagbulig sa ila.