Si Moroni nga Propeta

Pag-angkon sang putli nga paghigugma ni Jesucristo

Si Moroni nga nagatulok sa siyudad nga nagakasunog

Si Moroni ang katapusan nga propeta sang mga Nefinhon. Nakig-away sia sa dako nga giyera sa tunga sang mga Nefinhon kag mga Lamanhon. Ang iya pamilya kag ang tanan niya nga kilala napatay sa giyera. Ang mga tawo sa lugar mga malain. Ginpamatay nila ang tanan nga nagapati kay Jesucristo. Nagapati si Moroni kay Jesus. Indi niya pag-ipanghiwala nga si Jesus amo ang Manluluwas.

Mormon 8:2–10; Moroni 1:2–3

Ginabitbit ni Moroni ang metal nga mga lamina kag nagapanago dala ang mga ini sa grupo sang mga soldado

Ang tatay ni Moroni nga si Mormon, nagsulat sang kasaysayan sang ila katawhan sa metal nga mga lamina. Antes napatay si Mormon, ginhatag niya ang mga lamina kay Moroni. Kinahanglan gid ni Moroni nga magpanago para protektahan ang iya kabuhi kag ang mga lamina.

Mormon 6:6; 8:1–5, 13; Moroni 1:1–3

Nagapungko si Moroni sa kuweba kag nagasulat sa metal nga mga lamina

Mabudlay ang pangabuhi ni Moroni, pero padayon sia nga nagpati. Ginsulat niya ang gintudlo ni Mormon parte sa putli nga pagpalangga, nga amo ang putli nga gugma ni Cristo. Siling ni Mormon nga dapat magpangamuyo ang mga tawo sa Dios upod ang tanan nga kusog sang ila tagipusuon para maangkon ang amo sini nga pagpalangga. Siling niya nga ang Dios nagahatag sang putli nga pagpalangga sa matuod gid nga nagasunod kay Jesus.

Moroni 7:32–33, 40–48; 10:20–21, 23

malipayon ang pamilya nga ginhatagan sang pagkaon, kag nagayuhum si Moroni

Palangga ni Moroni ang mga Lamanhon bisan pa nga ginpamatay sang iban sa ila ang tanan niya nga kakilala kag gusto man sia nga patyon. Madamo sia sang ginsulat sa metal nga mga lamina para buligan ang mga Lamanhon sa palaabuton. Nagalaum sia nga mabasahan nila ang rekord sa pila ka adlaw kag magpati liwat kay Jesus.

Mormon 8:1–3; Moroni 1:1–4; 10:1

Si Moroni nga nagapungko sa hilamon sa bungyod kag nagasulat sa metal nga mga lamina

Ginahagad ni Moroni ang tanan nga tawo nga makabasa sang rekord nga panumdumon kon daw ano kamapinalanggaon nga ginaatipan sang Dios ang Iya mga anak. Ginahagad niya sila nga magpangamuyo kag pamangkuton ang Dios kon ang rekord matuod. Siling niya nga kon may pagtuo sila kay Jesus kag gusto gid nila nga makabalo, ipabalo sang Dios sa ila ang kamatuoran. Mabal-an nila paagi sa gahum sang Balaan nga Espiritu.

Introduksyon sa Libro ni Mormon; Moroni 10:1–5

Ginalubong ni Moroni ang metal nga mga lamina kag ginatabunan sang bato ang lugar nga gintagoan

Gintapos ni Moroni ang pagsulat sa kasulatan. Dayon ginlubong niya ang metal nga mga lamina sa duta. Ginsiling ni Jesus kay Moroni nga ang kasaysayan nga ginsulat sa mga lamina magabugay sa mga kabuhi sang mga anak sang Dios sa bilog nga kalibutan sa pila ka adlaw.

Mormon 8:4, 14–16

ginaisdog sang lamharon nga si Joseph Smith ang bato kag nakita ang metal nga mga lamina kag ang Liahona

Madamo nga tinuig ang nagligad, ginpadala sang Dios si Moroni, bilang anghel, para ipakita sa solterito nga ginhingadlan Joseph Smith kon diin nalubong ang metal nga mga lamina. Si Joseph gintawag sang Dios nga mangin propeta. Ginbuligan sang Dios si Joseph nga ma-translate ang mga lamina para mabasahan sang mga tawo ang nasulat diri. Ang rekord ginatawag na karon nga ang Libro ni Mormon.

Introduksyon sa Libro ni Mormon