“Si Jacob kag si Serem,” Mga Sugilanon sa Libro ni Mormon (2023)
Si Jacob kag si Serem
Ang testimonya sang propeta parte kay Jesucristo
Si Jacob isa ka propeta nga nakakita kay Jesucristo. Gusto niya nga magpati ang mga tawo kay Jesus. Gintudloan ni Jacob ang mga tawo nga tumanon ang mga kasuguan sang Dios. Nangabudlay sia todo para tudloan ang mga tawo parte kay Jesus.
2 Nefi 11:2–3; Jacob 1:1–8, 17–19
Isa ka adlaw, isa ka tawo nga ang ngalan Serem nagsugod sa pagtudlo sa mga tawo. Pero gintudlo ni Serem nga indi matuod si Jesus. Maayo si Serem maghambal, kag madamo nga Nefinhon ang nagpati sa iya ginhambal. Tungod sa iya, madamo ang nag-untat na sa pagpati kay Jesus. Gusto man ni Serem nga mag-untat si Jacob sa pagpati kay Jesus.
Siling ni Serem nga wala sang nakahibalo kon ano ang matabo sa palaabuton. Siling niya, ang buot silingon sini, wala sang nakahibalo kon matuod si Jesus, tungod wala pa nag-abot si Jesus sa duta. Pero siling ni Jacob nga ang balaan nga kasulatan kag ang tanan nga propeta nagtudlo parte kay Jesus. Ginpakita sang Dios kay Jacob nga maabot si Jesus sa duta.
Indi gihapon magpati si Serem. Gusto niya nga pakitaan sia ni Jacob sang tanda nga matuod si Jesus.
Siling ni Jacob nga nakahibalo si Serem nga maabot si Jesus kag indi niya kinahanglan sang tanda. Pero siling ni Jacob nga pwede sang Ginuo lipungon si Serem para ipakita nga may gahum ang Dios kag matuod si Jesus.
Gulpi lang, nangluya si Serem kag natumba. Pagligad sang pila ka adlaw, nahibal-an niya nga malapit na sia mapatay. Ginhambal niya sa mga tawo nga naintuan sia ni Satanas. Siling niya nga nagbutig sia sa Ginuo. Nahibal-an na niya nga daan nga matuod si Jesus. Dayon napatay si Serem. Ang mga tawo nagbasa sang balaan nga kasulatan kag nagpati kay Jesus.