“Si Alma kag ang Iya Katawhan,” Mga Sugilanon sa Libro ni Mormon (2023)
Si Alma kag ang Iya Katawhan
Kusog halin sa Dios sa panahon sang kabudlayan
Nagaestar si Alma kag ang iya katawhan sa matahum nga lugar. Nagpananom sila sang mga binhi kag nagpatindog sang mga balay. Si Alma pari sang Dios. Gintudloan niya ang iya katawhan nga magpalanggaanay. Namati ang mga tawo kay Alma kag gintuman ang mga kasuguan sang Dios. Nagdako ang ila mga pamilya, kag nagpatindog sila sang siyudad.
Isa ka adlaw, may nag-abot nga madamo nga mga Lamanhon. Nagtalang sila. Nangako ang mga Lamanhon nga pabay-an lang ang katawhan ni Alma kon buligan sila ni Alma nga matultulan ang alagyan papauli sa ila balay. Gintudloan ni Alma ang mga Lamanhon kon paano makabalik sa ila lugar.
Wala gintuman sang mga Lamanhon ang ila promisa. Kundi, ginsakop nila ang duta kag ginbutangan sang mga gwardya para bantayan ang katawhan ni Alma. Ginhimo man nila ang isa ka Nefinhon nga ang ngalan Amulon, nga hari sa katawhan ni Alma. Si Amulon lider sang peke nga mga pari. Ginpatay niya kag sang iya mga pari ang isa ka propeta sang Dios kag naghimo sang madamo pa nga kalainan.
Mosias 17:12–13; 23:31–32, 37–39; 24:9
Akig si Amulon kay Alma. Ginpatrabaho niya ang katawhan ni Alma sing todo-todo kag ginpangpintasan sila. Nabudlayan gid ang katawhan ni Alma.
Nagpangamuyo sila sa Dios para sa bulig. Ginhambalan sila ni Amulon nga mag-untat sa pagpangamuyo. Siling niya nga ang bisan sin-o nga mangamuyo patyon.
Nag-untat si Alma kag ang iya katawhan sa pagpangamuyo nga matunog. Sa baylo, nangamuyo sila sa ila mga tagipusuon. Ginpamatian sang Dios ang ila mga pangamuyo. Ginpaumpawan Niya sila kag ginpromisahan nga buligan sila nga makapalagyo. Ginpamag-an sang Dios ang mabudlay nila nga buluhaton. Pasensyoso ang mga tawo kag malipayon samtang nagapamati sila sa Dios. Nakahibalo sila nga ginabuligan Niya sila.
Nagasalig sa Dios ang katawhan ni Alma kag may dako nga pagtuo sa Iya. Isa ka adlaw, ginhambalan sila sang Dios nga oras na para maghalin. Sina nga gab-i, naghanda si Alma kag ang iya katawhan. Gintipon nila ang tanan nila nga kasapatan kag pagkaon. Sang aga sina, ginpatulog sang Dios sing mahamuok ang mga Lamanhon Dayon nagpalagyo si Alma kag ang iya katawhan kag nagpanglakaton bilog nga adlaw.
Ina nga gab-i, ang tanan nga lalaki, babayi, kag kabataan nagpasalamat sa Dios. Kahibalo sila nga ang Dios lang gid ang makabulig sa ila. Padayon sila nga nagbiyahe sang pila ka adlaw kag nag-abot sa kadutaan sang Zarahemla. Ginbaton sila sang mga Nefinhon, kag gintudloan ni Alma ang tanan parte sa pag-angkon sang pagtuo kay Jesucristo. Madamo nga mga tawo ang nagpati kag nagpabunyag.