“ກ່ຽວກັບພຣະຄຳພີເດີມ,” ເລື່ອງພຣະຄຳພີເດີມ (2022)
“ກ່ຽວກັບພຣະຄຳພີເດີມ,” ເລື່ອງພຣະຄຳພີເດີມ
ກ່ຽວກັບພຣະຄຳພີເດີມ
ຄຳສັນຍາຂອງພຣະບິດາເທິງສະຫວັນກັບລູກໆຂອງພຣະອົງດົນນານມາແລ້ວ
ພາກສ່ວນທຳອິດຂອງພຣະຄຣິສຕະທຳຄຳພີແມ່ນພຣະຄຳພີເດີມ. ພຣະຄຳພີເຫລົ່ານີ້ໄດ້ຖືກຂຽນໄວ້ດົນນານມາແລ້ວ, ແມ່ນແຕ່ກ່ອນພຣະເຢຊູຄຣິດໄດ້ມາກຳເນີດ. ມັນມີເລື່ອງລາວທີ່ຊ່ວຍເຮົາໃຫ້ມີສັດທາໃນພຣະອົງ. ມັນສິດສອນເຮົາວ່າ ແຕ່ລະຄົນຢູ່ເທິງແຜ່ນດິນໂລກ ແມ່ນພາກສ່ວນໃນຄອບຄົວຂອງພຣະບິດາເທິງສະຫວັນ ແລະ ວ່າພຣະອົງຮັກລູກໆຂອງພຣະອົງ.
ພຣະບັນຍັດສອງ 7:7–9; ເອຊາຢາ 45:10–12
ໃນພຣະຄຳພີເດີມ, ພຣະເຢຊູຄຣິດຖືກເອີ້ນວ່າ ເຢໂຮວາ ແລະ ພຣະຜູ້ເປັນເຈົ້າ. ພຣະອົງໄດ້ເຮັດຕາມຄຳແນະນຳຂອງພຣະບິດາເທິງສະຫວັນ. ນັບແຕ່ວັນເວລາຂອງອາດາມ ແລະ ເອວາເປັນຕົ້ນມາ, ພຣະບິດາເທິງສະຫວັນໄດ້ສົ່ງອົງພຣະເຢຊູຄຣິດເຈົ້າມາກ່າວກັບສາດສະດາຂອງພຣະອົງ. ພຣະບິດາເທິງສະຫວັນໄດ້ສົ່ງພຣະວິນຍານບໍລິສຸດມາ ເພື່ອຊ່ວຍເຮົາໃຫ້ຮູ້ວ່າ ຖ້ອຍຄຳຂອງສາດສະດາເປັນຄວາມຈິງ.
ອົບພະຍົບ 6:2–3; 2 ຂ່າວຄາວ 20:20; ອາໂມດ 3:7; 2 ເປໂຕ 1:21; ໂມເຊ 2:1
ພຣະຜູ້ເປັນເຈົ້າໄດ້ສັນຍາກັບສາດສະດາອັບຣາຮາມ ແລະ ນາງຊາຣາ ພັນລະຍາຂອງເພິ່ນວ່າ ຄອບຄົວຂອງພວກເພິ່ນຈະເຕີບໂຕ ແລະ ເປັນພອນໃຫ້ທັງໂລກ. ຢາໂຄບ ຫລານຊາຍຂອງພວກເພິ່ນມີຄອບຄົວໃຫຍ່ ທີ່ໄດ້ກາຍເປັນປະຊາຊາດ. ພວກເຂົາຖືກເອີ້ນວ່າເຊື້ອສາຍອິດສະຣາເອນ, ຫລື ຊາວອິດສະຣາເອນ. ສາດສະດາໄດ້ສິດສອນພວກເຂົາໃຫ້ຕັ້ງຕາລໍຄອຍເວລາທີ່ພຣະເຢຊູຄຣິດຈະສະເດັດມາ.
ປະຖົມມະການ 15:5–6; 17:1–8; ພຣະບັນຍັດສອງ 18:15; ເອຊາຢາ 7:14
ຫລາຍເລື່ອງຢູ່ໃນພຣະຄຳພີເດີມສະແດງໃຫ້ເຫັນວ່າ ພຣະຜູ້ເປັນເຈົ້າຮັກສາຄຳສັນຍາຂອງພຣະອົງກັບຊາວອິດສະຣາເອນແນວໃດ.
ປະຖົມມະການ 9:13–17; ເຢເຣມີຢາ 11:4–5; ເຮັບເຣີ 11:1–35
ເວລາຊາວອິດສະຣາເອນຟັງຄວາມສາດສະດາ ແລະ ຮັກສາພຣະບັນຍັດ, ພຣະຜູ້ເປັນເຈົ້າໄດ້ຊ່ວຍພວກເຂົາ. ເມື່ອພວກເຂົາບໍ່ເຊື່ອຟັງ, ພຣະອົງບໍ່ສາມາດຊ່ວຍພວກເຂົາ.
ພຣະບັນຍັດສອງ 11:26–28; ໂຢບ 36:11–12
ທ່ານເປັນພາກສ່ວນໃນຄອບຄົວຂອງພຣະບິດາເທິງສະຫວັນ. ພຣະບິດາເທິງສະຫວັນມີເມດຕາ, ແລະ ພຣະອົງຮັກທ່ານ. ພຣະອົງມີແຜນສຳລັບທ່ານ. ເປັນຍ້ອນອົງພຣະເຢຊູຄຣິດເຈົ້າ, ທ່ານຈຶ່ງສາມາດກັບຄືນໄປຢູ່ກັບພຣະບິດາເທິງສະຫວັນໄດ້ອີກຄັ້ງ. ເໝືອນດັ່ງຊາວອິດສະຣາເອນໄດ້ຖືກສິດສອນ, ທ່ານກໍສາມາດເລືອກທີ່ຈະມີສັດທາໃນພຣະຜູ້ເປັນເຈົ້າ ແລະ ຮັກສາພຣະບັນຍັດຂອງພຣະອົງ.