“ກອງທັບຂອງກີເດໂອນ,” ເລື່ອງພຣະຄຳພີເດີມ (2022)
“ກອງທັບຂອງກີເດໂອນ,” ເລື່ອງພຣະຄຳພີເດີມ
ກອງທັບຂອງກີເດໂອນ
ການໄວ້ວາງໃຈໃນພຣະຜູ້ເປັນເຈົ້າຢູ່ໃນສົງຄາມ
ປະຊາຊົນອິດສະຣາເອນໄດ້ຮັບພອນເປັນເວລາຫລາຍປີ. ແຕ່ພວກເຂົາໄດ້ເລືອກບໍ່ເຊື່ອຟັງພຣະຜູ້ເປັນເຈົ້າ. ເພື່ອຊ່ວຍພວກເຂົາໃຫ້ລະນຶກເຖິງພຣະອົງ, ພຣະຜູ້ເປັນເຈົ້າໄດ້ປ່ອຍໃຫ້ສັດຕູຊາວມີດີອານມາລັກອາຫານ ແລະ ສັດຂອງພວກເຂົາ. ຊາວອິດສະຣາເອນເກີດຄວາມອຶດຢາກ, ສະນັ້ນພວກເຂົາຈຶ່ງລະນຶກເຖິງພຣະຜູ້ເປັນເຈົ້າ ແລະ ໄດ້ອະທິຖານຂໍໃຫ້ພຣະອົງຊ່ວຍເຫລືອ.
ກີເດໂອນມາຈາກຄອບຄົວທີ່ຍາກຈົນ. ພຣະຜູ້ເປັນເຈົ້າໄດ້ສົ່ງທູດອົງໜຶ່ງມາເອີ້ນລາວໃຫ້ປົດປ່ອຍຊາວອິດສະຣາເອນ. ກີເດໂອນປະຫລາດໃຈວ່າເປັນຫຍັງພຣະຜູ້ເປັນເຈົ້າຈຶ່ງເລືອກລາວ.
ພຣະຜູ້ເປັນເຈົ້າໄດ້ບອກກີເດໂອນໃຫ້ທຳລາຍສະຖານທີ່ຕ່າງໆ ບ່ອນທີ່ຊາວອິດສະຣາເອນນະມັດສະການພຣະເຈົ້າປອມ. ເມື່ອກີເດໂອນເຊື່ອຟັງ, ຜູ້ຄົນກໍໃຈຮ້າຍ.
ຊາວອິດສະຣາເອນຢາກຂ້າກີເດໂອນ. ແຕ່ພໍ່ຂອງກີເດໂອນໄດ້ກິ້ງກ່ອມພວກເຂົາບໍ່ໃຫ້ທຳຮ້າຍລາວ. ກີເດໂອນໄດ້ຖືກຮັກສາໄວ້ໃຫ້ປອດໄພ.
ກີເດໂອນບໍ່ຄິດວ່າລາວຈະສາມາດປົດປ່ອຍຊາວອິດສະຣາເອນໄດ້. ກອງທັບມີດີອານມີຈຳນວນພົນຫລາຍກວ່າ 135,000 ຄົນ. ແຕ່ພຣະຜູ້ເປັນເຈົ້າໄດ້ມອບສະຕິປັນຍາ ແລະ ກຳລັງໃຫ້ແກ່ກີເດໂອນ.
ພຣະຜູ້ເປັນເຈົ້າປະສົງໃຫ້ຊາວອິດສະຣາເອນຮູ້ວ່າ ພວກເຂົາສາມາດໄຊຊະນະດ້ວຍກຳລັງຂອງພຣະອົງ, ບໍ່ແມ່ນດ້ວຍກຳລັງຂອງພວກເຂົາເອງ. ເຖິງແມ່ນວ່າຊາວອິດສະຣາເອນມີຈຳນວນພົນພຽງແຕ່ 32,000 ຄົນ, ແຕ່ພຣະຜູ້ເປັນເຈົ້າໄດ້ຂໍໃຫ້ກີເດໂອນສົ່ງພວກທະຫານທີ່ຢ້ານກົວກັບບ້ານ. ຫລັງຈາກ 22,000 ຄົນໄດ້ກັບບ້ານ, ທະຫານຊາວອິດສະຣາເອນເຫລືອຢູ່ພຽງແຕ່ 10,000 ຄົນ.
ພຣະຜູ້ເປັນເຈົ້າໄດ້ກ່າວວ່າ 10,000 ຄົນ ກໍຍັງມີຫລາຍໂພດ. ພຣະອົງໄດ້ບອກກີເດໂອນໃຫ້ພາກອງທັບລົງໄປກິນນ້ຳ. ຜູ້ທີ່ໃຊ້ລີ້ນເລຍກິນນ້ຳ ໃຫ້ສົ່ງກັບບ້ານ. ຜູ້ທີ່ກອບນ້ຳຂຶ້ນມາກິນ ໃຫ້ຢູ່ຕໍ່. ບັດນີ້ມີທະຫານຈຳນວນ 300 ຄົນທີ່ໄດ້ຢູ່ຕໍ່.
ໃນທີ່ສຸດ, ຊາວອິດສະຣາເອນກໍພ້ອມແລ້ວທີ່ຈະຕໍ່ສູ້. ພຣະຜູ້ເປັນເຈົ້າໄດ້ສະແດງໃຫ້ກີເດໂອນເຫັນວິທີທີ່ຈະໄຊຊະນະຊາວມີດີອານ. ກີເດໂອນໄດ້ບອກກອງທັບຂອງລາວໃຫ້ໃຊ້ແກ ແລະ ກະບອງ ເພື່ອເຮັດໃຫ້ສັດຕູຢ້ານກົວ. ສຽງດັງ ແລະ ແສງໄຟໄດ້ເຮັດໃຫ້ຊາວມີດີອານສັບສົນຢ່າງໜັກ ຈົນວ່າພວກເຂົາເລີ່ມຕໍ່ສູ້ກັນເອງ. ແລ້ວພວກເຂົາໄດ້ຮ້ອງຂຶ້ນ ແລະ ແລ່ນໜີໄປ.
ຍ້ອນວ່າກີເດໂອນໄດ້ໄວ້ວາງໃຈໃນພຣະຜູ້ເປັນເຈົ້າ, ຊາວອິດສະຣາເອນຈຶ່ງໄດ້ໄຊຊະນະກອງທັບໃຫຍ່ຂອງຊາວມີດີອານດ້ວຍຈຳນວນພົນພຽງແຕ່ 300 ຄົນ. ພຣະຜູ້ເປັນເຈົ້າໄດ້ປົດປ່ອຍປະຊາຊົນອິດສະຣາເອນ.