“ສາດສະດາຊາມູເອນ,” ເລື່ອງພຣະຄຳພີເດີມ (2022)
“ສາດສະດາຊາມູເອນ,” ເລື່ອງພຣະຄຳພີເດີມ
1 ຊາມູເອນ 2–3
ສາດສະດາຊາມູເອນ
ທ້າວນ້ອຍທີ່ພຣະຜູ້ເປັນເຈົ້າເອີ້ນ
ເປັນເວລາດົນນານ, ຊາວອິດສະຣາເອນບໍ່ມີສາດສະດາຂອງພຣະຜູ້ເປັນເຈົ້າ ເພື່ອນຳພາພວກເຂົາ. ແຕ່ຊາວອິດສະຣາເອນມີພວກຜູ້ປົກຄອງເປັນເວລາຫລາຍປີ. ລະຫວ່າງເວລານີ້, ນາງຮັນນາໄດ້ພາລູກຊາຍນ້ອຍ ຊື່ຊາມູເອນ ໄປອາໄສຢູ່ນຳເອລີ, ຜູ້ຊຶ່ງເປັນປະໂລຫິດ ແລະ ຜູ້ປົກຄອງຄົນໜຶ່ງຂອງອິດສະຣາເອນ. ຊາມູເອນໄດ້ຊ່ວຍເອລີຢູ່ໃນພຣະວິຫານ.
ລູກຊາຍສອງຄົນຂອງເອລີ ກໍໄດ້ຮັບໃຊ້ຢູ່ໃນພຣະວິຫານຄືກັນ, ແຕ່ພວກເຂົາໄດ້ລັກເອົາສິ່ງຂອງທີ່ຖືກນຳມາຖວາຍແດ່ພຣະຜູ້ເປັນເຈົ້າ. ບາງຄົນໄດ້ເວົ້າຈົ່ມກັບເອລີ, ແຕ່ເອລີບໍ່ໄດ້ລົງໂທດພວກເຂົາ.
ຄືນໜຶ່ງຊາມູເອນໄດ້ຍິນສຽງເອີ້ນລາວ. ລາວຄິດວ່າແມ່ນເອລີ, ສະນັ້ນຊາມູເອນຈຶ່ງໄດ້ໄປຫາເພິ່ນ. ແຕ່ເອລີບໍ່ໄດ້ເອີ້ນລາວ. ເອລີໄດ້ບອກຊາມູເອນໃຫ້ກັບຄືນໄປນອນ.
ຊາມູເອນໄດ້ຍິນສຽງເອີ້ນລາວອີກເປັນເທື່ອທີສອງ. ລາວໄດ້ໄປຫາເອລີ ແລະ ຖາມວ່າເພິ່ນຕ້ອງການອັນໃດ. ແຕ່ເອລີບໍ່ໄດ້ເອີ້ນລາວ. ເອລີໄດ້ບອກຊາມູເອນໃຫ້ໄປນອນ.
ຊາມູເອນໄດ້ຍິນສຽງເອີ້ນລາວອີກເປັນເທື່ອທີສາມ. ລາວໄດ້ໄປຫາເອລີອີກ ແລະ ຖາມວ່າເພິ່ນຕ້ອງການອັນໃດ. ເທື່ອນີ້, ເອລີຮູ້ວ່າ ນັ້ນແມ່ນພຣະຜູ້ເປັນເຈົ້າ ທີ່ກ່າວກັບຊາມູເອນ. ເອລີໄດ້ບອກຊາມູເອນໃຫ້ກັບຄືນໄປນອນ. ເອລີເວົ້າວ່າ ຖ້າຫາກພຣະຜູ້ເປັນເຈົ້າເອີ້ນລາວອີກ, ຊາມູເອນຄວນຮັບຟັງ.
ຊາມູເອນໄດ້ຍິນສຽງເອີ້ນລາວອີກ. ເທື່ອນີ້ຊາມູເອນໄດ້ຂໍໃຫ້ພຣະຜູ້ເປັນເຈົ້າກ່າວ ແລະ ລາວຈະຮັບຟັງ. ພຣະຜູ້ເປັນເຈົ້າໄດ້ບອກຊາມູເອນວ່າ ເອລີໄດ້ເຮັດຜິດ ທີ່ປ່ອຍໃຫ້ພວກລູກຊາຍຂອງເພິ່ນຮັບໃຊ້ຢູ່ໃນພຣະວິຫານ. ຄອບຄົວຂອງເອລີຈະບໍ່ຖືກອະນຸຍາດໃຫ້ຮັບໃຊ້ຢູ່ໃນພຣະວິຫານອີກຕໍ່ໄປ.
ມື້ຕໍ່ມາ, ເອລີໄດ້ຖາມຊາມູເອນກ່ຽວກັບສິ່ງທີ່ພຣະຜູ້ເປັນເຈົ້າໄດ້ກ່າວ. ຊາມູເອນໄດ້ບອກເພິ່ນ. ເອລີຮູ້ວ່າພຣະຜູ້ເປັນເຈົ້າໄດ້ກ່າວຜ່ານທາງຊາມູເອນ.
ຂ່າວໄດ້ແຜ່ລາມໄປທົ່ວແຜ່ນດິນອິດສະຣາເອນ. ຜູ້ຄົນຮູ້ວ່າ ພຣະຜູ້ເປັນເຈົ້າໄດ້ເລືອກຊາມູເອນໃຫ້ເປັນສາດສະດາຂອງພຣະອົງ.