“ລາຊີນີເອສະເທີ,” ເລື່ອງພຣະຄຳພີເດີມ (2022)
“ລາຊີນີເອສະເທີ,” ເລື່ອງພຣະຄຳພີເດີມ
ເອສະເທີ 2–5; 7–9
ລາຊີນີເອສະເທີ
ກ້າຫານໃນຊ່ວງເວລາທີ່ອັນຕະລາຍ
ຊາວອິດສະຣາເອນບາງຄົນຖືກເອີ້ນວ່າຊາວຢິວ. ນາງເອສະເທີເປັນຄົນຢິວທີ່ອາໄສຢູ່ໃນເປີເຊຍ. ພໍ່ແມ່ຂອງນາງເສຍຊີວິດແລ້ວ, ສະນັ້ນພີ່ນ້ອງຂອງນາງ ຊື່ມໍເດໄກ ຈຶ່ງໄດ້ເອົານາງມາລ້ຽງ. ນາງຖືກເຊື້ອເຊີນໄປທີ່ວັງຂອງກະສັດກັບຍິງສາວຄົນອື່ນໆໃນອານາຈັກ. ກະສັດຢາກໄດ້ລາຊີນີຄົນໃໝ່, ແລະ ເພິ່ນໄດ້ເລືອກເອົານາງເອສະເທີ.
ກະສັດມີຄົນຮັບໃຊ້ ຊື່ຮາມານ ຜູ້ທີ່ຖືກເລື່ອນຊັ້ນໃຫ້ມີອຳນາດຫລາຍ. ຮາມານໄດ້ຊ່ວຍກະສັດປົກຄອງແຜ່ນດິນ. ກະສັດໄດ້ສັ່ງໃຫ້ທຸກຄົນກົ້ມຂາບຮາມານ.
ແຕ່ມໍເດໄກບໍ່ຍອມກົ້ມຂາບຮາມານ. ມໍເດໄກຈະກົ້ມຂາບພຽງແຕ່ພຣະຜູ້ເປັນເຈົ້າເທົ່ານັ້ນ. ສິ່ງນີ້ເຮັດໃຫ້ຮາມານໃຈຮ້າຍ. ລາວຢາກລົງໂທດມໍເດໄກ ແລະ ຊາວຢິວທຸກຄົນ.
ອົບພະຍົບ 20:5; ເອສະເທີ 3:5–6, 8
ຮາມານໄດ້ບອກກະສັດວ່າ ຊາວຢິວບໍ່ໄດ້ເຮັດຕາມກົດໝາຍຂອງກະສັດ. ສະນັ້ນ ກະສັດຈຶ່ງປ່ອຍໃຫ້ຮາມານຕັ້ງກົດໝາຍໃໝ່ຂຶ້ນ: ໃນວັນທີ່ກຳນົດໄວ້, ຊາວຢິວທຸກຄົນຈະຖືກຂ້າ.
ມໍເດໄກໄດ້ຂໍໃຫ້ນາງເອສະເທີເວົ້າລົມກັບກະສັດ. ກະສັດສາມາດປ່ຽນກົດໝາຍຂອງຮາມານໄດ້ ແລະ ຊ່ວຍຊີວິດຂອງຊາວຢິວໄວ້. ແຕ່ນາງເອສະເທີກໍຢ້ານກົວ. ບາງເທື່ອກະສັດກໍໄດ້ຂ້າຜູ້ຄົນທີ່ໄດ້ມາເວົ້າລົມກັບເພິ່ນໂດຍບໍ່ໄດ້ຮັບການເຊື້ອເຊີນ.
ມໍເດໄກໄດ້ຂໍໃຫ້ນາງເອສະເທີຄິດກ່ຽວກັບຊາວຢິວທີ່ຈະຖືກຂ້າຕາຍ. ມໍເດໄກໄດ້ກ່າວວ່າ ພຣະຜູ້ເປັນເຈົ້າອາດໄດ້ວາງນາງເອສະເທີໄວ້ໃນວັງຂອງກະສັດເພື່ອຊ່ວຍຊີວິດຂອງຊາວຢິວ.
ນາງເອສະເທີຮູ້ວ່ານາງຕ້ອງເວົ້າລົມກັບກະສັດ, ແມ່ນແຕ່ຖ້ານັ້ນໝາຍຄວາມວ່າ ນາງຈະຖືກຂ້າຕາຍກໍຕາມ. ນາງເອສະເທີໄດ້ຂໍໃຫ້ຊາວຢິວ ແລະ ຄົນຮັບໃຊ້ຂອງນາງທຸກຄົນຖືສິນອົດເຂົ້າຮ່ວມກັບນາງ.
ຫລັງຈາກໄດ້ຖືສິນອົດເຂົ້າສາມມື້ແລ້ວ, ນາງເອສະເທີກໍໄດ້ກະກຽມຕົວນາງເອງ ແລະ ໄດ້ເຂົ້າເຝົ້າກະສັດ.
ເມື່ອນາງໄດ້ເຂົ້າໄປໃກ້ກະສັດ, ເພິ່ນໄດ້ເດ່ໄມ້ຄ້ອນເທົ້າຂອງເພິ່ນອອກໄປ. ນີ້ໝາຍຄວາມວ່າກະສັດດີໃຈທີ່ໄດ້ເຫັນນາງ ແລະ ຈະບໍ່ຂ້ານາງ. ເພິ່ນໄດ້ຖາມວ່ານາງຕ້ອງການຫຍັງ. ນາງເອສະເທີໄດ້ບອກກະສັດວ່າ ຜູ້ຄົນຂອງນາງຕົກຢູ່ໃນຂັ້ນອັນຕະລາຍ. ເປັນເພາະກົດໝາຍຂອງຮາມານ, ນາງ ແລະ ຊາວຢິວທຸກຄົນຢູ່ໃນອານາຈັກຈະຖືກຂ້າຕາຍ.
ກະສັດໃຈຮ້າຍໃຫ້ຮາມານ ແລະ ໄດ້ສັ່ງໃຫ້ຂ້າລາວເສຍ. ກະສັດໄດ້ຕັ້ງກົດໝາຍໃໝ່ຂຶ້ນທີ່ປົກປ້ອງຊາວຢິວ. ບັດນີ້ເຂົາເຈົ້າຖືກອະນຸຍາດໃຫ້ປ້ອງກັນຕົວເຂົາເຈົ້າເອງ ຖ້າຫາກຄົນໃດພະຍາຍາມຈະທຳຮ້າຍເຂົາເຈົ້າ.
ສັດທາຂອງນາງເອສະເທີໃນພຣະຜູ້ເປັນເຈົ້າ ແລະ ຄວາມກ້າຫານຂອງນາງທີ່ຈະເວົ້າລົມກັບກະສັດ ໄດ້ຊ່ວຍຊີວິດຂອງຜູ້ຄົນຂອງນາງເອົາໄວ້. ແທນທີ່ຈະຕາຍ ແລະ ໂສກເສົ້າ, ແຕ່ໄດ້ມີການກິນລ້ຽງແທນ. ຊາວຢິວໄດ້ສະເຫລີມສະຫລອງ.