“ດານີເອນ ແລະ ຄວາມຝັນຂອງກະສັດ,” ເລື່ອງພຣະຄຳພີເດີມ (2022)
“ດານີເອນ ແລະ ຄວາມຝັນຂອງກະສັດ,” ເລື່ອງພຣະຄຳພີເດີມ
ດານີເອນ 2
ດານີເອນ ແລະ ຄວາມຝັນຂອງກະສັດ
ຂ່າວສານທີ່ລຶກລັບຂອງພຣະເຈົ້າເຖິງກະສັດ
ກະສັດແຫ່ງບາບີໂລນໄດ້ມີຄວາມຝັນທີ່ເຮັດໃຫ້ເພິ່ນເປັນທຸກໃຈ. ເພິ່ນບັນຊາໃຫ້ບັນດາປະໂລຫິດ ແລະ ພວກໂຫລາຈານຂອງເພິ່ນບອກເພິ່ນວ່າຄວາມຝັນນັ້ນໝາຍເຖິງຫຍັງ.
ກະສັດຈະບໍ່ບອກເຂົາເຈົ້າວ່າເພິ່ນຝັນກ່ຽວກັບຫຍັງ. ເພິ່ນເວົ້າວ່າຖ້າຫາກບັນດາປະໂລຫິດ ແລະ ພວກໂຫລາຈານມີອຳນາດແທ້ໆ, ເຂົາເຈົ້າຈະສາມາດບອກເພິ່ນວ່າຄວາມຝັນນັ້ນຄືຫຍັງ ແລະ ວ່າມັນໝາຍເຖິງຫຍັງ.
ບັນດາປະໂລຫິດ ແລະ ພວກໂຫລາຈານໄດ້ບອກກະສັດວ່າເຂົາເຈົ້າບໍ່ສາມາດແກ້ຄວາມຝັນຂອງເພິ່ນໄດ້ ຖ້າເພິ່ນບໍ່ບອກວ່າເພິ່ນໄດ້ຝັນກ່ຽວກັບຫຍັງ. ເຂົາເຈົ້າເວົ້າວ່າບໍ່ມີຄົນໃດສາມາດເຮັດໄດ້. ກະສັດໄດ້ໃຈຮ້າຍ ແລະ ເວົ້າວ່າເພິ່ນຈະຂ້າພວກໂຫລາຈານທຸກຄົນໃນອານາຈັກ, ລວມທັງດານີເອນ ແລະ ໝູ່ຂອງລາວ.
ເມື່ອທະຫານຂອງກະສັດໄດ້ມາຈັບດານີເອນ ແລະ ໝູ່ຂອງລາວ, ດານີເອນໄດ້ຂໍເວລາຕື່ມອີກເພື່ອວ່າລາວຈະສາມາດແກ້ຄວາມຝັນໃຫ້ກະສັດໄດ້. ດານີເອນຮູ້ວ່າພຣະເຈົ້າຮູ້ຈັກ ແລະ ເຫັນທຸກສິ່ງ, ແມ່ນແຕ່ຄວາມຝັນ. ດານີເອນໄດ້ຂໍໃຫ້ໝູ່ຂອງລາວອະທິຖານນຳລາວ.
ພຣະເຈົ້າໄດ້ສະແດງໃຫ້ດານີເອນເຫັນຄວາມຝັນຂອງກະສັດຢູ່ໃນພາບນິມິດ ແລະ ໄດ້ສິດສອນດານີເອນວ່າມັນໝາຍເຖິງຫຍັງ. ດານີເອນໄດ້ຂອບພຣະໄທພຣະເຈົ້າທີ່ໄດ້ຕອບຄຳອະທິຖານຂອງລາວ ແລະ ໝູ່ຂອງລາວ ແລະ ໄດ້ຊ່ວຍຊີວິດຂອງເຂົາເຈົ້າໄວ້. ແລ້ວລາວໄດ້ໄປບອກກະສັດເຖິງຄວາມໝາຍຂອງຄວາມຝັນນັ້ນ.
ດານີເອນໄດ້ກ່າວວ່າ ຄວາມຝັນຂອງກະສັດແມ່ນກ່ຽວກັບຮູບປັ້ນໃຫຍ່ ທີ່ຖືກທຳລາຍໂດຍກ້ອນຫີນທີ່ຖືກຕັດອອກມາຈາກໜ້າຜາ. ຮູບປັ້ນນັ້ນເປັນຕົວແທນໃຫ້ແກ່ອານາຈັກຕ່າງໆຢູ່ເທິງແຜ່ນດິນໂລກ. ກ້ອນຫີນທີ່ຖືກຕັດອອກມາຈາກໜ້າຜາ ເປັນຕົວແທນໃຫ້ແກ່ອານາຈັກຂອງພຣະເຈົ້າ ທີ່ຈະເຕັມໄປທົ່ວແຜ່ນດິນໂລກ. ກະສັດຮູ້ວ່າດານີເອນໄດ້ເວົ້າຄວາມຈິງ.