“ຢາໂຄບ ແລະ ເອຊາວ,” ເລື່ອງພຣະຄຳພີເດີມ (2022)
“ຢາໂຄບ ແລະ ເອຊາວ,” ເລື່ອງພຣະຄຳພີເດີມ
ປະຖົມມະການ 25–27
ຢາໂຄບ ແລະ ເອຊາວ
ສອງອ້າຍນ້ອງກັບສິດທິອ້າຍກົກອັນດຽວ
ອີຊາກກັບນາງເຣເບກາມີລູກຝາແຝດ, ຢາໂຄບ ແລະ ເອຊາວ. ເອຊາວເປັນນາຍພານທີ່ເກັ່ງກ້າ. ຢາໂຄບເປັນຄົນສຸກຂຸມ ແລະ ເຊື່ອຟັງພຣະຜູ້ເປັນເຈົ້າ.
ເອຊາວໄດ້ເກີດກ່ອນ. ຕາມປົກກະຕິແລ້ວ ລູກກົກຈະໄດ້ຮັບພອນຂອງສິດທິອ້າຍກົກຈາກພໍ່ຂອງລາວ. ສິດທິອ້າຍກົກ ໝາຍຄວາມວ່າລາວຕ້ອງນຳພາຄອບຄົວ ແລະ ມີທີ່ດິນ ແລະ ສັດລ້ຽງຫລາຍກວ່າໝູ່ ເພື່ອຊ່ວຍດູແລຄອບຄົວ. ແຕ່ເອຊາວສົນໃຈກັບຕົວເອງຫລາຍກວ່າຄອບຄົວຂອງລາວ, ແລະ ລາວບໍ່ເຊື່ອຟັງພໍ່ແມ່ ແລະ ພຣະຜູ້ເປັນເຈົ້າ.
ປະຖົມມະການ 25:25, 32; 26:34–35
ມື້ໜຶ່ງເອຊາວໄດ້ກັບມາຈາກການໄປລ່າສັດ. ລາວຫິວເຂົ້າຫລາຍ ແລະ ໄດ້ຂໍກິນເຂົ້ານຳຢາໂຄບ. ພຣະຜູ້ເປັນເຈົ້າຢາກໃຫ້ຢາໂຄບໄດ້ຮັບພອນຂອງສິດທິອ້າຍກົກ ຍ້ອນວ່າເອຊາວບໍ່ມີຄ່າຄວນສຳລັບມັນ. ຢາໂຄບເວົ້າວ່າ ລາວຈະເອົາອາຫານໃຫ້ເອຊາວກິນ ຖ້າຫາກເອຊາວມອບສິດທິອ້າຍກົກໃຫ້ລາວ. ເອຊາວຕົກລົງ ແລະ ໄດ້ແລກສິດທິອ້າຍກົກກັບອາຫານຂອງຢາໂຄບ.
ປະຖົມມະການ 25:23, 29–34; ເຮັບເຣີ 11:20
ນາງເຣເບກາ ແລະ ອີຊາກຢາກໃຫ້ລູກຂອງພວກເພິ່ນໄດ້ຮັບສິ່ງທີ່ດີທີ່ສຸດ. ພວກເພິ່ນໂສກເສົ້າທີ່ເອຊາວໄດ້ສືບຕໍ່ເຮັດຕາມໃຈຕົນ ແລະ ບໍ່ໄດ້ເຮັດຕາມພຣະປະສົງຂອງພຣະຜູ້ເປັນເຈົ້າ.
ອີຊາກໄດ້ເຖົ້າແກ່ຫລາຍ ແລະ ສາຍຕາກໍມືດມົວລົງ. ກ່ອນເພິ່ນຕາຍ, ເພິ່ນໄດ້ຂໍໃຫ້ເອຊາວໄປລ່າສັດ ແລະ ເຮັດອາຫານແຊບໆໃຫ້ເພິ່ນກິນ ແລະ ມີຄວາມສຸກ.
ນາງເຣເບກາຮູ້ວ່າ ມັນເຖິງເວລາທີ່ອີຊາກຈະມອບສິດທິອ້າຍກົກ.
ນາງເຣເບກາໄດ້ຂໍໃຫ້ຢາໂຄບໄປເອົາສັດສອງໂຕ ເພື່ອວ່ານາງຈະໄດ້ເຮັດອາຫານ ກ່ອນເອຊາວກັບຄືນມາ. ແລ້ວຢາໂຄບຈະໄດ້ຮັບພອນ.
ຢາໂຄບໄດ້ແຕ່ງກາຍຄືກັນກັບເອຊາວ ແລະ ໄດ້ເອົາອາຫານໄປໃຫ້ພໍ່ກິນ. ອີຊາກໄດ້ມອບພອນຂອງສິດທິອ້າຍກົກໃຫ້ຢາໂຄບ. ເມື່ອເອຊາວກັບຄືນມາ, ລາວໄດ້ໃຈຮ້າຍໃຫ້ຢາໂຄບ. ແຕ່ສິດທິອ້າຍກົກໄດ້ຖືກມອບໃຫ້ແກ່ຢາໂຄບແລ້ວ ເພາະລາວໄດ້ຮັກສາພຣະບັນຍັດຂອງພຣະຜູ້ເປັນເຈົ້າ ແຕ່ເອຊາວບໍ່ໄດ້ຮັກສາ.