“ທ້າວນ້ອຍດາວິດ,” ເລື່ອງພຣະຄຳພີເດີມ (2022)
“ທ້າວນ້ອຍດາວິດ,” ເລື່ອງພຣະຄຳພີເດີມ
ທ້າວນ້ອຍດາວິດ
ເດັກລ້ຽງແກະໄດ້ຖືກເອີ້ນໃຫ້ກາຍເປັນກະສັດ
ພຣະຜູ້ເປັນເຈົ້າໄດ້ສົ່ງສາດສະດາຊາມູເອນໃຫ້ໄປຊອກຫາກະສັດອົງໃໝ່. ໂຊນ, ຜູ້ເປັນກະສັດໃນເວລານັ້ນ, ໄດ້ເຊົາຕິດຕາມພຣະຜູ້ເປັນເຈົ້າ. ພຣະຜູ້ເປັນເຈົ້າໄດ້ບອກຊາມູເອນໃຫ້ເດີນທາງໄປເບັດເລເຮັມ ແລະ ຊອກຫາຊາຍຄົນໜຶ່ງຊື່ ເຢຊີ. ກະສັດອົງໃໝ່ຈະມາຈາກພວກລູກຊາຍຄົນໜຶ່ງຂອງເຢຊີ.
ພວກລູກຊາຍໃຫຍ່ຂອງເຢຊີເປັນຄົນສູງໃຫຍ່ ແລະ ແຂງແຮງ. ແຕ່ພຣະຜູ້ເປັນເຈົ້າໄດ້ບອກຊາມູເອນບໍ່ໃຫ້ຕັດສິນພວກເຂົາຕາມຮູບຮ່າງໜ້າຕາ.
ຊາມູເອນໄດ້ຖາມເຢຊີຖ້າຫາກວ່າລາວມີລູກຊາຍຄົນອື່ນໆອີກຫລືບໍ່. ເຢຊີເວົ້າວ່າ ລູກຊາຍຫລ້າຂອງລາວ, ດາວິດ, ກຳລັງດູແລຝູງແກະຢູ່. ດາວິດໄດ້ຖືກພາມາຫາຊາມູເອນ.
ດາວິດມີຮູບຮ່າງນ້ອຍກວ່າພວກອ້າຍຂອງລາວ ແລະ ເປັນພຽງເດັກລ້ຽງແກະເທົ່ານັ້ນ. ແຕ່ພຣະຜູ້ເປັນເຈົ້າບໍ່ໄດ້ເບິ່ງທີ່ຮູບຮ່າງຂອງດາວິດ. ພຣະຜູ້ເປັນເຈົ້າຮູ້ຈັກວ່າ ໃຈຂອງດາວິດເຕັມໄປດ້ວຍສັດທາ. ພຣະອົງໄດ້ບອກຊາມູເອນວ່າ ດາວິດຈະເປັນກະສັດ. ຊາມູເອນໄດ້ອວຍພອນດາວິດ. ພຣະວິນຍານຂອງພຣະເຈົ້າໄດ້ກະກຽມດາວິດເພື່ອໃຫ້ເປັນກະສັດ.