“ດາວິດ ແລະ ໂກລີອາດ,” ເລື່ອງພຣະຄຳພີເດີມ (2022)
“ດາວິດ ແລະ ໂກລີອາດ,” ເລື່ອງພຣະຄຳພີເດີມ
1 ຊາມູເອນ 17
ດາວິດ ແລະ ໂກລີອາດ
ປະເຊີນໜ້າກັບການທ້າທາຍອັນໃຫຍ່ຫລວງ
ພວກຟີລິດສະຕິນກຳລັງໂຈມຕີຊາວອິດສະຣາເອນ. ທຸກໆເຊົ້າ ຄົນຟີລິດສະຕິນທີ່ສູງໃຫຍ່ຄົນໜຶ່ງ ຊື່ໂກລີອາດ ກໍໄດ້ອອກມາທ້າທາຍໃຫ້ຊາວອິດສະຣາເອນສົ່ງຄົນໃດຄົນໜຶ່ງອອກມາສູ້ຮົບກັບລາວ. ໂກລີອາດໃຫຍ່ກວ່າ ແລະ ສູງກວ່າທຸກໆຄົນ, ແລະ ລາວກໍໂຫດຮ້າຍ. ລາວໄດ້ສວມເຄື່ອງປ້ອງກັນ ແລະ ພາຍດາບ, ຫອກ, ແລະ ຖືໂລ້ແຜ່ນໃຫຍ່. ບໍ່ມີໃຜກ້າອອກໄປສູ້ຮົບກັບລາວ.
ດາວິດເປັນເດັກລ້ຽງແກະ ຜູ້ທີ່ມີສັດທາໃນພຣະຜູ້ເປັນເຈົ້າ. ພວກອ້າຍຂອງລາວເປັນທະຫານໃນກອງທັບຊາວອິດສະຣາເອນ. ມື້ໜຶ່ງ, ດາວິດໄດ້ນຳເອົາອາຫານໄປສົ່ງພວກອ້າຍຂອງລາວ. ເມື່ອລາວໄດ້ໄປເຖິງຄ້າຍທະຫານ, ລາວກໍໄດ້ຍິນຄຳທ້າທາຍຂອງໂກລີອາດ.
ດາວິດໄດ້ຖາມພວກທະຫານວ່າ ເປັນຫຍັງຈຶ່ງບໍ່ມີຄົນໃດປ້ອງກັນອິດສະຣາເອນ. ພວກອ້າຍຂອງລາວກໍໄດ້ໃຈຮ້າຍ ແລະ ໄດ້ບອກໃຫ້ລາວກັບໄປດູແລຝູງແກະ. ແຕ່ດາວິດຮູ້ວ່າ ພຣະຜູ້ເປັນເຈົ້າຈະປ້ອງກັນອິດສະຣາເອນ.
ກະສັດໂຊນຮູ້ເຖິງສັດທາຂອງດາວິດ, ສະນັ້ນເພິ່ນຈຶ່ງໃຫ້ຄົນພາດາວິດມາຫາເພິ່ນ. ດາວິດໄດ້ບອກກະສັດໂຊນວ່າ ລາວບໍ່ຢ້ານທີ່ຈະສູ້ຮົບກັບໂກລີອາດ. ດາວິດໄດ້ອະທິບາຍວ່າ ຄັ້ງໜຶ່ງຕອນລາວໄດ້ດູແລຝູງແກະຂອງລາວຢູ່, ລາວໄດ້ຂ້າໂຕສິງ ແລະ ໂຕໝີ. ພຣະຜູ້ເປັນເຈົ້າໄດ້ປົກປ້ອງລາວໃນຕອນນັ້ນ, ແລະ ດາວິດກໍຮູ້ວ່າ ພຣະຜູ້ເປັນເຈົ້າຈະປົກປ້ອງລາວໃນຕອນນີ້.
ໂຊນໄດ້ເອົາເຄື່ອງປ້ອງກັນຂອງເພິ່ນໃຫ້ດາວິດ. ແຕ່ມັນບໍ່ພໍດີ, ສະນັ້ນດາວິດຈຶ່ງແກ້ມັນອອກ. ລາວໄດ້ຕັດສິນໃຈອອກໄປສູ້ຮົບໂດຍບໍ່ສວມເຄື່ອງປ້ອງກັນໃດໆ.
ດາວິດໄດ້ເກັບເອົາກ້ອນຫີນກ້ຽງຫ້າກ້ອນ ແລະ ເອົາໃສ່ຖົງ. ລາວໄດ້ເອົາກະຖຸນ ແລະ ໄມ້ຄ້ອນສຳລັບລ້ຽງແກະຂອງລາວໄປນຳ ແລະ ໄດ້ອອກໄປຕໍ່ສູ້ກັບໂກລີອາດ.
ເມື່ອໂກລີອາດໄດ້ເຫັນດາວິດ, ລາວກໍໄດ້ຮ້ອງຂຶ້ນດັງໆ ແລະ ໄດ້ເຍາະເຍີ້ຍລາວ. ລາວໄດ້ເວົ້າວ່າ ເດັກລ້ຽງແກະຈະບໍ່ສາມາດຊະນະລາວໄດ້ດອກ. ດາວິດກໍໄດ້ຮ້ອງຕອບວ່າ ລາວໄວ້ວາງໃຈວ່າ ພຣະຜູ້ເປັນເຈົ້າຈະປົກປ້ອງລາວ! ດາວິດໄດ້ເວົ້າວ່າ ລາວຈະຊະນະໂກລີອາດ ເພື່ອສະແດງໃຫ້ເຫັນຄວາມຍິ່ງໃຫຍ່ຂອງພຣະຜູ້ເປັນເຈົ້າ.
ດາວິດແລ່ນໄປຫາໂກລີອາດ ລາວໄດ້ຍິງກ້ອນຫີນດ້ວຍກະຖຸນຂອງລາວຢ່າງໄວ. ກ້ອນຫີນນັ້ນໄດ້ໄປຖືກໜ້າຜາກໂກລີອາດ, ແລະ ຜູ້ຊາຍໃຫຍ່ສູງຄົນນັ້ນກໍໄດ້ລົ້ມລົງພື້ນດິນ. ພຣະຜູ້ເປັນເຈົ້າໄດ້ຊ່ວຍດາວິດໃຫ້ເອົາຊະນະໂກລີອາດ ໂດຍບໍ່ຕ້ອງໃຊ້ດາບ ຫລື ເຄື່ອງປ້ອງກັນ.
ເມື່ອພວກຟີລິດສະຕິນໄດ້ເຫັນວ່າໂກລີອາດໄດ້ຕາຍໄປແລ້ວ, ພວກເຂົາກໍພາກັນແລ່ນປົບໜີໄປດ້ວຍຄວາມຢ້ານກົວ. ຊາວອິດສະຣາເອນກໍໄດ້ໄຊຊະນະ. ດາວິດໄດ້ໄວ້ວາງໃຈໃນພຣະຜູ້ເປັນເຈົ້າ, ແລະ ພຣະຜູ້ເປັນເຈົ້າກໍໄດ້ປົກປ້ອງອິດສະຣາເອນ.