“ພຣະຜູ້ເປັນເຈົ້າກ່າວກັບເອລີຢາ,” ເລື່ອງພຣະຄຳພີເດີມ (2022)
“ພຣະຜູ້ເປັນເຈົ້າກ່າວກັບເອລີຢາ,” ເລື່ອງພຣະຄຳພີເດີມ
ພຣະຜູ້ເປັນເຈົ້າກ່າວກັບເອລີຢາ
ການຮັບຟັງສຸລະສຽງຂອງພຣະຜູ້ເປັນເຈົ້າ
ກະສັດອາຮາບໄດ້ບອກລາຊີນີເຢເຊເບນວ່າ ພຣະຜູ້ເປັນເຈົ້າໄດ້ເອົາຊະນະພວກປະໂລຫິດຂອງພະບາອານ. ນາງເຢເຊເບນໃຈຮ້າຍ ແລະ ໄດ້ເວົ້າວ່າ ນາງຈະຂ້າສາດສະດາເອລີຢາ.
ເພື່ອຄວາມປອດໄພ, ເອລີຢາຈຶ່ງໄດ້ໜີຈາກແຜ່ນດິນອິດສະຣາເອນໄປ. ເພິ່ນໄດ້ເດີນທາງເປັນເວລາ 40 ມື້ ແລະ 40 ຄືນ, ຖືສິນອົດເຂົ້າຂະນະທີ່ເດີນທາງ. ແລ້ວເພິ່ນໄດ້ມາເຖິງພູຊີນາຍ ແລະ ພົບເຫັນຖ້ຳເພື່ອລີ້ຊ່ອນຕົວ. ພຣະຜູ້ເປັນເຈົ້າໄດ້ບອກເອລີຢາໃຫ້ຂຶ້ນໄປຈອມພູເຂົາ ເພື່ອວ່າພຣະອົງຈະສາມາດກ່າວກັບເອລີຢາ.
ລົມແຮງໄດ້ພັດມາ ແລະ ເຮັດໃຫ້ກ້ອນຫີນອ້ອມຮອບຖ້ຳ ແຕກເປັນກ້ອນໆ. ຫລັງຈາກນັ້ນ, ກໍເກີດແຜ່ນດິນໄຫວ. ແລ້ວໄຟໄດ້ເລີ່ມຕົ້ນ. ເອລີຢາໄດ້ຍິນສຽງດັງຂອງລົມ, ແຜ່ນດິນໄຫວ, ແລະ ໄຟ. ແຕ່ສຸລະສຽງຂອງພຣະຜູ້ເປັນເຈົ້າບໍ່ໄດ້ຢູ່ໃນສຽງດັງເຫລົ່ານັ້ນ.
ແລ້ວເອລີຢາໄດ້ຍິນສຽງກະຊິບເບົາໆດັງແວ່ວມາ. ເພິ່ນຮູ້ວ່າ ແມ່ນພຣະຜູ້ເປັນເຈົ້າ. ພຣະຜູ້ເປັນເຈົ້າໄດ້ຖາມເອລີຢາວ່າ ເພິ່ນມາເຮັດຫຍັງຢູ່ຫັ້ນ.
ເອລີຢາໄດ້ເວົ້າວ່າ ເພິ່ນກຳລັງລີ້ຊ່ອນຕົວເພື່ອຄວາມປອດໄພ. ສາດສະດາທຸກຄົນໄດ້ຖືກຂ້າຕາຍ, ແລະ ຜູ້ຄົນໄດ້ປະຕິເສດພຣະຜູ້ເປັນເຈົ້າ.
ພຣະຜູ້ເປັນເຈົ້າໄດ້ປອບໂຍນເອລີຢາ ແລະ ບອກເພິ່ນວ່າ ມີຊາວອິດສະຣາເອນຫລາຍຄົນທີ່ຍັງນະມັດສະການພຣະຜູ້ເປັນເຈົ້າຢູ່. ພຣະຜູ້ເປັນເຈົ້າໄດ້ຂໍໃຫ້ເອລີຢາກັບຄືນໄປບ້ານ ແລະ ກຽມສາດສະດາອີກຄົນໜຶ່ງ. ສາດສະດາໃໝ່ຄົນນີ້ມີຊື່ວ່າ ເອລີຊາ.