“ກະສັດໂຢສີອາ,” ເລື່ອງພຣະຄຳພີເດີມ (2022)
“ກະສັດໂຢສີອາ,” ເລື່ອງພຣະຄຳພີເດີມ
ກະສັດໂຢສີອາ
ການສະແຫວງຫາທີ່ຈະເຊື່ອຟັງພຣະບັນຍັດຂອງພຣະຜູ້ເປັນເຈົ້າ
ໂຢສີອາມີອາຍຸໄດ້ແປດປີ ຕອນເພິ່ນໄດ້ກາຍເປັນກະສັດຂອງຢູດາຍ. ເພິ່ນເປັນກະສັດທີ່ດີ ຜູ້ຮັກພຣະຜູ້ເປັນເຈົ້າ. ເພິ່ນຢາກຊ່ວຍປະຊາຊົນຂອງເພິ່ນ, ຊາວອິດສະຣາເອນ, ໃຫ້ເຊື່ອຟັງພຣະຜູ້ເປັນເຈົ້າ ແລະ ເຊົານະມັດສະການຮູບປັ້ນ. ເມື່ອເພິ່ນໃຫຍ່ຂຶ້ນ, ເພິ່ນ ແລະ ປະຊາຊົນຂອງເພິ່ນໄດ້ເລີ່ມສ້ອມແປງພຣະວິຫານ ແລະ ເຮັດໃຫ້ມັນສວຍງາມຄືນອີກ.
2 ກະສັດ 22:1–2; 2 ຂ່າວຄາວ 34:3–7
ຂະນະທີ່ຜູ້ຄົນກຳລັງເຮັດວຽກຢູ່ພຣະວິຫານ, ມະຫາປະໂລຫິດຮິນກີຢາໄດ້ພົບເຫັນໜັງສືກົດບັນຍັດ, ເປັນມ້ວນທີ່ບັນຈຸພຣະຄຳພີ.
ຜູ້ຮັບໃຊ້ຄົນໜຶ່ງໄດ້ອ່ານປຶ້ມໃຫ້ໂຢສີອາຟັງ. ໂຢສີອາໄດ້ຍິນເນື້ອຄວາມ ແລະ ໂສກເສົ້າ ຍ້ອນວ່າປະຊາຊົນຂອງເພິ່ນບໍ່ໄດ້ເຊື່ອຟັງພຣະຜູ້ເປັນເຈົ້າ. ເພິ່ນໄດ້ຈີກເຄື່ອງນຸ່ງຂອງຕົນ ເພື່ອສະແດງໃຫ້ເຫັນວ່າເພິ່ນໂສກເສົ້າ.
ເພິ່ນໄດ້ບອກຮິນກີຢາໃຫ້ທູນຖາມພຣະຜູ້ເປັນເຈົ້າວ່າ ພວກເພິ່ນຄວນຈະເຮັດແນວໃດ. ຮິນກີຢາ ແລະ ຜູ້ຮັບໃຊ້ຂອງກະສັດໄດ້ໄປຫານາງຮຸນດາ. ນາງເປັນສາດສະດາຍິງ, ເປັນຜູ້ນຳທີ່ຊື່ສັດ ທີ່ໄດ້ຮັບການດົນໃຈຈາກພຣະເຈົ້າ. ນາງໄດ້ເວົ້າວ່າ ພຣະຜູ້ເປັນເຈົ້າພໍພຣະໄທກັບໂຢສີອາ ຍ້ອນວ່າເພິ່ນຢາກຊ່ວຍປະຊາຊົນຂອງເພິ່ນໃຫ້ເຊື່ອຟັງ. ພຣະຜູ້ເປັນເຈົ້າໄດ້ສັນຍາວ່າ ກະສັດໂຢສີອາຈະມີຊີວິດທີ່ສະຫງົບສຸກ.
ກະສັດໂຢສີອາຢາກໃຫ້ປະຊາຊົນຂອງເພິ່ນຮັກສາຄຳສັນຍາຂອງພວກເຂົາກັບພຣະຜູ້ເປັນເຈົ້າ. ເພິ່ນໄດ້ຂໍໃຫ້ພວກເຂົາສະຫລອງງານປັດສະຄາ ເພື່ອຊ່ວຍພວກເຂົາໃຫ້ຈື່ຈຳວິທີທີ່ພຣະຜູ້ເປັນເຈົ້າໄດ້ປົດປ່ອຍຊາວອິດສະຣາເອນດົນນານມາແລ້ວໃນປະເທດເອຢິບ.