“ສາດສະດາຍິງເດໂບຣາ,” ເລື່ອງພຣະຄຳພີເດີມ (2022)
“ສາດສະດາຍິງເດໂບຣາ,” ເລື່ອງພຣະຄຳພີເດີມ
ສາດສະດາຍິງເດໂບຣາ
ຜູ້ນຳຄົນໜຶ່ງທີ່ຊ່ວຍອິດສະຣາເອນໃຫ້ໄວ້ວາງໃຈພຣະຜູ້ເປັນເຈົ້າ
ນາງເດໂບຣາເປັນສາດສະດາຍິງ, ເປັນຜູ້ນຳທີ່ຊື່ສັດຊາວອິດສະຣາເອນ ຜູ້ໄດ້ຮັບການດົນໃຈຈາກພຣະຜູ້ເປັນເຈົ້າ. ຜູ້ຄົນຂອງນາງເຊົາຮັກສາພຣະບັນຍັດຂອງພຣະຜູ້ເປັນເຈົ້າ, ແລະ ຊາວການາອານໄດ້ປົກຄອງພວກເຂົາ. ຫລັງຈາກຊາວປີ, ຊາວອິດສະຣາເອນໄດ້ເລີ່ມອະທິຖານຂໍໃຫ້ພຣະຜູ້ເປັນເຈົ້າຊ່ວຍເຫລືອ.
ພຣະຜູ້ເປັນເຈົ້າໄດ້ຍິນຄຳອະທິຖານຂອງພວກເຂົາ. ພຣະອົງໄດ້ບອກນາງເດໂບຣາໃຫ້ເຕົ້າໂຮມກອງທັບອິດສະຣາເອນເພື່ອຕໍ່ສູ້ກັບຊາວການາອານ.
ກອງທັບການາອານມີພົນທະຫານ ແລະ ລົດຮົບຢ່າງຫລວງຫລາຍ. ພວກເຂົາເຮັດໃຫ້ກອງທັບອິດສະຣາເອນຢ້ານກົວ, ແຕ່ນາງເດໂບຣາບໍ່ຢ້ານ. ນາງຮູ້ວ່າພຣະຜູ້ເປັນເຈົ້າຈະຊ່ວຍພວກເຂົາ.
ບາຣັກເປັນຜູ້ນຳກອງທັບອິດສະຣາເອນ. ເພິ່ນບໍ່ຢາກຕໍ່ສູ້. ແຕ່ເພິ່ນຄິດວ່າ ຖ້າຫາກນາງເດໂບຣາໄປກັບກອງທັບ, ພຣະຜູ້ເປັນເຈົ້າຈະປົກປ້ອງພວກເຂົາ. ນາງເດໂບຣາໄດ້ຕົກລົງໄປນຳ. ນາງໄດ້ທຳນາຍວ່າ ຜູ້ຍິງຄົນໜຶ່ງຈະເອົາຊະນະຊີເຊຣາ, ຜູ້ນຳກອງທັບການາອານ.
ກອງທັບອິດສະຣາເອນໄດ້ເຕົ້າໂຮມກັນຢູ່ເທິງພູເຂົາ, ແລະ ຊາວການາອານໄດ້ເຕົ້າໂຮມກັນຢູ່ຮ່ອມພູ. ນາງເດໂບຣາໄດ້ບອກບາຣັກໃຫ້ລົງໄປຈາກພູເຂົາ. ນາງສັນຍາວ່າ ພຣະຜູ້ເປັນເຈົ້າຈະສະຖິດຢູ່ກັບພວກເຂົາ.
ພຣະຜູ້ເປັນເຈົ້າໄດ້ສົ່ງຝົນລົງມາ, ແລະ ລົດຮົບຂອງຊາວການາອານຖືກນ້ຳຊັດໄຫລໜີ. ຊາວການາອານຫລາຍຄົນໄດ້ຈົມນ້ຳຕາຍຢູ່ໃນແມ່ນ້ຳ, ແຕ່ຊີເຊຣາໄດ້ແລ່ນໜີໄປ.
ພວກຜູ້ປົກຄອງ 4:15, 17; 5:4–5, 19–22
ຍິງຄົນໜຶ່ງຊື່ ຢາເອນ ອາໄສຢູ່ໃນຜ້າເຕັ້ນໃກ້ແຖວນັ້ນ. ນາງເຫັນຊີເຊຣາກຳລັງແລ່ນມາ ແລະ ໄດ້ບອກລາວໃຫ້ໄປລີ້ຢູ່ໃນຜ້າເຕັ້ນຂອງນາງ. ນາງຢາເອນຮູ້ວ່າ ລາວເປັນຜູ້ນຳກອງທັບການາອານ ແລະ ໄດ້ຂ້າລາວ ເພື່ອວ່າລາວຈະບໍ່ສາມາດທຳຮ້າຍຜູ້ຄົນຕື່ມອີກ.
ຄຳທຳນາຍຂອງນາງເດໂບຣາໄດ້ເກີດເປັນຈິງ. ຊີເຊຣາໄດ້ຜ່າຍແພ້ໂດຍຜູ້ຍິງທີ່ກ້າຫານຄົນໜຶ່ງ. ນາງເດໂບຣາໄດ້ຮ້ອງເພງເພື່ອຊ່ວຍຊາວອິດສະຣາເອນໃຫ້ຈື່ຈຳວິທີທີ່ພຣະຜູ້ເປັນເຈົ້າໄດ້ຊ່ວຍພວກເຂົາໃຫ້ລອດ. ຊາວອິດສະຣາເອນໄດ້ຮັກສາພຣະບັນຍັດ ແລະ ດຳລົງຊີວິດໃນຄວາມສະຫງົບສຸກເປັນເວລາ 40 ປີ.