“ໂຢເຊັບ ແລະ ຄວາມອຶດຢາກ,” ເລື່ອງພຣະຄຳພີເດີມ (2022)
“ໂຢເຊັບ ແລະ ຄວາມອຶດຢາກ,” ເລື່ອງພຣະຄຳພີເດີມ
ໂຢເຊັບ ແລະ ຄວາມອຶດຢາກ
ໂອກາດຂອງນ້ອງຊາຍທີ່ຈະຊ່ວຍໃຫ້ຄອບຄົວຂອງເພິ່ນໄດ້ມາຢູ່ນຳກັນ
ຄອບຄົວຂອງຢາໂຄບຫິວໂຫຍເພາະຄວາມອຶດຢາກ. ສະນັ້ນ ຢາໂຄບຈຶ່ງໄດ້ສົ່ງພວກລູກຊາຍຂອງເພິ່ນໄປປະເທດເອຢິບເພື່ອຊື້ອາຫານ. ເພິ່ນໄດ້ໃຫ້ລູກຊາຍຫລ້າ, ເບັນຢາມິນ, ຢູ່ບ້ານ. ເພິ່ນຢ້ານວ່າ ເພິ່ນຊິເສຍເບັນຢາມິນໄປຄືກັນກັບເພິ່ນໄດ້ເສຍໂຢເຊັບ ລູກຊາຍຂອງເພິ່ນໄປ ເມື່ອຫລາຍປີກ່ອນ. ເພິ່ນບໍ່ຮູ້ວ່າ ພວກລູກຊາຍໃຫຍ່ຂອງເພິ່ນໄດ້ຂາຍໂຢເຊັບໄປເປັນຂ້າທາດ.
ໃນເວລານີ້, ໂຢເຊັບໄດ້ເປັນຫົວໜ້າໃຫຍ່ປົກຄອງປະເທດເອຢິບ. ເພິ່ນຄວບຄຸມເລື່ອງການຂາຍອາຫານລະຫວ່າງທີ່ມີຄວາມອຶດຢາກ. ພວກອ້າຍໄດ້ພົບກັບໂຢເຊັບ ແລະ ຂໍຊື້ອາຫານຈາກເພິ່ນ. ພວກເຂົາບໍ່ຈື່ເພິ່ນ.
ໂຢເຊັບຈື່ພວກເຂົາໄດ້, ແຕ່ທຳທ່າວ່າບໍ່ຮູ້ຈັກພວກເຂົາ. ເພິ່ນໄດ້ຖາມກ່ຽວກັບຄອບຄົວຂອງພວກເຂົາ ເພື່ອຈະໄດ້ຮູ້ວ່າພໍ່ ແລະ ເບັນຢາມິນ ນ້ອງຊາຍຂອງເພິ່ນຍັງມີຊີວິດຢູ່ຫລືບໍ່.
ແລ້ວໂຢເຊັບໄດ້ມອບອາຫານໃຫ້ພວກອ້າຍຂອງເພິ່ນ. ເພິ່ນໄດ້ບອກພວກເຂົາບໍ່ໃຫ້ກັບຄືນມາຂໍຊື້ອາຫານອີກ ຖ້າຫາກພວກເຂົາບໍ່ພາເບັນຢາມິນ ນ້ອງຊາຍຫລ້າຂອງເພິ່ນມານຳ.
ເມື່ອຄອບຄົວບໍ່ມີອາຫານກິນອີກ, ຢາໂຄບຮູ້ວ່າ ເພິ່ນຕ້ອງໄດ້ສົ່ງເບັນຢາມິນໄປປະເທດເອຢິບກັບພວກລູກຊາຍຄົນອື່ນໆຂອງເພິ່ນ. ຢາໂຄບກໍຍັງບໍ່ກ້າທີ່ຈະປ່ອຍໃຫ້ເບັນຢາມິນໄປ. ແຕ່ຢູດາ, ອ້າຍຄົນໜຶ່ງ, ໄດ້ສັນຍາກັບເພິ່ນວ່າ ລາວຈະຮັກສາເບັນຢາມິນໃຫ້ປອດໄພ.
ເມື່ອອ້າຍນ້ອງເຫລົ່ານັ້ນກັບໄປປະເທດເອຢິບ, ໂຢເຊັບໄດ້ຫາທາງເຮັດໃຫ້ເບິ່ງຄືວ່າ ເບັນຢາມິນລັກເອົາຈອກເງິນ. ເພິ່ນຢາກເບິ່ງວ່າ ພວກອ້າຍຂອງເພິ່ນປ່ຽນໄປຫລືບໍ່. ຢູດາໄດ້ອ້ອນວອນໂຢເຊັບບໍ່ໃຫ້ລົງໂທດເບັນຢາມິນ ແຕ່ໃຫ້ລົງໂທດລາວແທນ.
ໂຢເຊັບດີໃຈທີ່ເຫັນວ່າ ພວກອ້າຍຂອງເພິ່ນໄດ້ປ່ຽນໄປ. ພວກເຂົາຮັກເບັນຢາມິນຫລາຍພໍທີ່ຈະປົກປ້ອງລາວ. ສະນັ້ນ, ໃນທີ່ສຸດ, ໂຢເຊັບກໍໄດ້ບອກພວກເຂົາວ່າ ເພິ່ນເປັນໃຜ.
ປະຖົມມະການ 42:21–24; 45:1–4
ໂຢເຊັບໄດ້ໃຫ້ອະໄພແກ່ພວກອ້າຍຂອງເພິ່ນ ທີ່ໄດ້ຂາຍເພິ່ນໄປເປັນຂ້າທາດ. ໂຢເຊັບເວົ້າວ່າ ມັນແມ່ນວິທີຂອງພຣະຜູ້ເປັນເຈົ້າ ໃນການຊ່ວຍຄອບຄົວຂອງພວກເພິ່ນໃຫ້ລອດຈາກຄວາມອຶດຢາກ.
ພວກອ້າຍຂອງໂຢເຊັບໄດ້ກັບໄປຫາຢາໂຄບ ພໍ່ຂອງພວກເຂົາ ແລະ ໄດ້ບອກເພິ່ນທຸກສິ່ງທີ່ໄດ້ເກີດຂຶ້ນ. ຢາໂຄບໄດ້ພາຄອບຄົວຂອງເພິ່ນໄປຢູ່ປະເທດເອຢິບ.
ປະຖົມມະການ 45:24–28; 46:1–26
ຟາໂຣຕ້ອນຮັບຄອບຄົວຂອງຢາໂຄບ. ເພິ່ນໄດ້ມອບທີ່ດິນ ແລະ ສັດລ້ຽງໃຫ້ພວກເຂົາ ເພື່ອວ່າພວກເຂົາຈະມີອາຫານກິນຢ່າງຫລວງຫລາຍ. ຄອບຄົວຂອງຢາໂຄບມີຊີວິດທີ່ສະຫງົບສຸກເປັນເວລາດົນນານ.