ສາດສະດາໂຢຊວຍ

ການທົດສອບເທື່ອສຸດທ້າຍກ່ອນເຂົ້າໄປໃນແຜ່ນດິນແຫ່ງຄຳສັນຍາ

ພຣະຜູ້ເປັນເຈົ້າໄດ້ເອີ້ນໂຢຊວຍໃຫ້ເປັນສາດສະດາຄົນໃໝ່ແທນສາດສະດາໂມເຊ ທີ່ຖືກເອົາຂຶ້ນໄປສະຫວັນ. ຂະນະທີ່ຊາວອິດສະຣາເອນກຳລັງຕັ້ງຄ້າຍຢູ່ໃກ້ແມ່ນ້ຳຈໍແດນ, ພຣະຜູ້ເປັນເຈົ້າໄດ້ກ່າວວ່າ ມັນເຖິງເວລາແລ້ວທີ່ພວກເຂົາຈະຍ້າຍໄປຢູ່ແຜ່ນດິນແຫ່ງຄຳສັນຍາ.

ພຣະບັນຍັດສອງ 34:1–9; ໂຢຊວຍ 1:1–4; ແອວມາ 45:19

ແຜ່ນດິນແຫ່ງຄຳສັນຍາແມ່ນຢູ່ໃນດິນແດນການາອານ, ແຕ່ຄົນຊົ່ວໄດ້ອາໄສຢູ່ທີ່ນັ້ນ. ພຣະຜູ້ເປັນເຈົ້າໄດ້ບອກໂຢຊວຍໃຫ້ມີຄວາມເຂັ້ມແຂງ ແລະ ກ້າຫານ. ດ້ວຍຄວາມຊ່ວຍເຫລືອຈາກພຣະຜູ້ເປັນເຈົ້າ, ຊາວອິດສະຣາເອນຈຶ່ງສາມາດເຂົ້າຄອບຄອງແຜ່ນດິນການາອານໄດ້.

ໂຢຊວຍ 1:1–9

ໂຢຊວຍໄດ້ເຕົ້າໂຮມກອງທັບ. ພຣະຜູ້ເປັນເຈົ້າໄດ້ບອກພວກເຂົາໃຫ້ຫາມແຜ່ນພຣະບັນຍັດສິບປະການ ແລະ ພຣະຄຳພີອື່ນໆ. ພວກປະໂລຫິດໄດ້ຫາມສິ່ງຂອງສັກສິດເຫລົ່ານີ້ຢູ່ໃນຫີບທີ່ເອີ້ນວ່າ ຫີບພັນທະສັນຍາ. ແລ້ວກອງທັບໄດ້ກຽມພ້ອມທີ່ຈະຂ້າມແມ່ນ້ຳຈໍແດນ. ແມ່ນ້ຳນັ້ນເລິກ ແລະ ໄຫລແຮງ.

ພຣະບັນຍັດສອງ 10:5; 31:25–26; ໂຢຊວຍ 1:10–11; 3:1–11

ໂຢຊວຍໄດ້ສັນຍາກັບຊາວອິດສະຣາເອນວ່າ ພຣະຜູ້ເປັນເຈົ້າຈະຊ່ວຍເຫລືອພວກເຂົາຂ້າມແມ່ນ້ຳ.

ໂຢຊວຍ 3:10–13

ໂຢຊວຍໄດ້ຂໍໃຫ້ພວກປະໂລຫິດ 12 ຄົນຫາມຫີບພັນທະສັນຍາ ແລະ ຍ່າງລົງໄປໃນນ້ຳ. ທັນທີທີ່ພວກປະໂລຫິດຢັ່ງຕີນລົງນ້ຳ, ນ້ຳກໍແຍກອອກ.

ໂຢຊວຍ 3:12–17

ຊາວອິດສະຣາເອນກຳລັງຫາມຫີບພັນທະສັນຍາໄປເທິງພື້ນແມ່ນ້ຳແຫ້ງ, ບາງຄົນໄດ້ເກັບເອົາກ້ອນຫີນ

ຊາວອິດສະຣາເອນໄດ້ຂ້າມແມ່ນ້ຳໄປເທິງດິນແຫ້ງ. ໂຢຊວຍໄດ້ຂໍໃຫ້ຊາວອິດສະຣາເອນເກັບເອົາກ້ອນຫີນ 12 ກ້ອນ ຈາກພື້ນແມ່ນ້ຳ. ເພິ່ນໄດ້ກອງຫີນເຫລົ່ານັ້ນຂຶ້ນເພື່ອເຕືອນໃຈຊາວອິດສະຣາເອນ ເຖິງການມະຫັດສະຈັນຂອງພຣະຜູ້ເປັນເຈົ້າໃນມື້ນັ້ນ.

ໂຢຊວຍ 3:17; 4:1–24

ໂຢຊວຍໄດ້ນຳພາກອງທັບອິດສະຣາເອນໄປຫາແຜ່ນດິນການາອານ. ພວກເຂົາໄດ້ໄປເຖິງເມືອງໜຶ່ງຊື່ວ່າ ເຢຣິໂກ. ເມືອງນັ້ນເຂັ້ມແຂງຫລາຍ ແລະ ມີກຳແພງສູງ. ພຣະຜູ້ເປັນເຈົ້າໄດ້ບອກໂຢຊວຍເຖິງວິທີທີ່ຈະຄອບຄອງເມືອງເຢຣິໂກ. ພຣະອົງໄດ້ກ່າວວ່າ ຊາວອິດສະຣາເອນຄວນຍ່າງອ້ອມເມືອງເຢຣິໂກທຸກມື້ ເປັນເວລາຫົກມື້. ໂຢຊວຍໄດ້ເຊື່ອຟັງພຣະຜູ້ເປັນເຈົ້າ.

ໂຢຊວຍ 5:13–15; 6:1–5

ພວກປະໂລຫິດກຳລັງຫາມຫີບພັນທະສັນຍາ, ປະໂລຫິດຄົນອື່ນໆກຳລັງເປົ່າແກ

ໂຢຊວຍໄດ້ບອກພວກປະໂລຫິດໃຫ້ຫາມຫີບພັນທະສັນຍາອອກໜ້າຊາວອິດສະຣາເອນ. ແຕ່ລະມື້, ກອງທັບໄດ້ຍ່າງອ້ອມເມືອງເຢຣິໂກ, ແລະ ພວກປະໂລຫິດເຈັດຄົນໄດ້ເປົ່າແກ. ສ່ວນຊາວອິດສະຣາເອນຄົນອື່ນໆມິດງຽບ.

ໂຢຊວຍ 6:6–14

ຊາວອິດສະຣາເອນກຳລັງຮ້ອງດັງໆ, ກຳແພງເມືອງເພພັງລົງ

ໃນມື້ທີເຈັດ, ກອງທັບໄດ້ຍ່າງອ້ອມເມືອງເຢຣິໂກເຈັດຮອບ. ຂະນະທີ່ພວກປະໂລຫິດເປົ່າແກຂອງພວກເຂົາ, ໂຢຊວຍໄດ້ບອກຊາວອິດສະຣາເອນໃຫ້ຮ້ອງດັງໆ. ທັນໃດນັ້ນ ກຳແພງເມືອງເຢຣິໂກກໍໄດ້ພັງລົງສູ່ພື້ນດິນ, ແລະ ກອງທັບຂອງໂຢຊວຍໄດ້ຍຶດເອົາເມືອງ.

ໂຢຊວຍ 6:15–16, 20

ພຣະຜູ້ເປັນເຈົ້າໄດ້ຊ່ວຍຊາວອິດສະຣາເອນ, ດັ່ງທີ່ພຣະອົງໄດ້ສັນຍາ. ກອງທັບຂອງໂຢຊວຍໄດ້ສືບຕໍ່ຄອບຄອງແຜ່ນດິນການາອານ, ແລະ ຊາວອິດສະຣາເອນໄດ້ເລີ່ມຕົ້ນອາໄສຢູ່ທີ່ນັ້ນ. ໂຢຊວຍໄດ້ເຕືອນພວກເຂົາເຖິງການມະຫັດສະຈັນ ແລະ ຄຳສັນຍາຂອງພຣະຜູ້ເປັນເຈົ້າ. ເພິ່ນໄດ້ຂໍໃຫ້ຊາວອິດສະຣາເອນເລືອກທີ່ຈະຮັບໃຊ້ພຣະຜູ້ເປັນເຈົ້າ.

ໂຢຊວຍ 10:42; 11:23; 21:43–45; 24:15