“ງານປັດສະຄາ,” ເລື່ອງພຣະຄຳພີເດີມ (2022)
“ງານປັດສະຄາ,” ເລື່ອງພຣະຄຳພີເດີມ
ງານປັດສະຄາ
ການປົກປ້ອງໂດຍພຣະຜູ້ເປັນເຈົ້າ
ຟາໂຣບໍ່ຍອມປ່ອຍຊາວອິດສະຣາເອນໄປ, ສະນັ້ນພຣະຜູ້ເປັນເຈົ້າຈຶ່ງໄດ້ບອກໂມເຊວ່າ ພຣະອົງຈະສົ່ງໂຣກລະບາດຢ່າງສຸດທ້າຍມາ. ລູກຊາຍກົກຂອງທຸກຄອບຄົວໃນແຜ່ນດິນເອຢິບຈະຕາຍ, ແມ່ນແຕ່ລູກຫົວປີຂອງສັດລ້ຽງ.
ພຣະຜູ້ເປັນເຈົ້າໄດ້ສັນຍາວ່າ ຖ້າຫາກຊາວອິດສະຣາເອນເຮັດຕາມຄຳແນະນຳຂອງພຣະອົງ, ໂຣກລະບາດຈະຜ່ານພວກເຂົາໄປ ແລະ ບໍ່ທຳຮ້າຍພວກເຂົາ.
ພຣະຜູ້ເປັນເຈົ້າໄດ້ບອກຊາວອິດສະຣາເອນແຕ່ລະຄອບຄົວໃຫ້ຂ້າແກະເຖິກທີ່ບໍ່ມີບ່ອນຕຳນິໂຕໜຶ່ງ ແລະ ທາເລືອດໃສ່ຂອບປະຕູເຮືອນຂອງພວກເຂົາ.
ພຣະຜູ້ເປັນເຈົ້າໄດ້ບອກຊາວອິດສະຣາເອນໃຫ້ເຮັດອາຫານ ແລະ ກິນຊີ້ນແກະຢ່າງຮີບດ່ວນ. ຂະນະທີ່ພວກເຂົາກຳລັງກິນ, ພວກເຂົາຄວນນຸ່ງຖື ແລະ ກຽມພ້ອມທີ່ຈະໜີໄປ. ພຣະຜູ້ເປັນເຈົ້າໄດ້ກ່າວວ່າ ຖ້າຫາກຊາວອິດສະຣາເອນບໍ່ເຮັດສິ່ງເຫລົ່ານີ້, ລູກຊາຍກົກຂອງພວກເຂົາຈະບໍ່ລອດຈາກໂຣກລະບາດ.
ເປັນດັ່ງທີ່ພຣະຜູ້ເປັນເຈົ້າໄດ້ເຕືອນ, ໂຣກລະບາດໄດ້ເກີດຂຶ້ນ. ລູກຊາຍກົກຢູ່ໃນປະເທດເອຢິບໄດ້ຕາຍໄປ, ລວມທັງລູກຊາຍກົກຂອງຟາໂຣ. ແຕ່ໂຣກລະບາດໄດ້ຜ່ານກາຍແຕ່ລະເຮືອນທີ່ມີເລືອດແກະຕິດຢູ່ຂອບປະຕູ. ລູກຊາຍກົກຂອງຊາວອິດສະຣາເອນໄດ້ລອດຊີວິດ ຍ້ອນວ່າພວກເຂົາເຊື່ອຟັງພຣະຜູ້ເປັນເຈົ້າ.
ເມື່ອຟາໂຣໄດ້ເຫັນລູກຊາຍຂອງຕົນຕາຍຍ້ອນໂຣກລະບາດ, ເພິ່ນຈຶ່ງບອກໂມເຊ ແລະ ອາໂຣນໃຫ້ພາຊາວອິດສະຣາເອນໜີໄປຈາກປະເທດເອຢິບ.
ຊາວອິດສະຣາເອນໄດ້ໜີໄປ, ແຕ່ຟາໂຣຍັງໃຈຮ້າຍຢູ່. ເພິ່ນໄດ້ເຕົ້າໂຮມກອງທັບ ແລະ ລົດຮົບຂອງເພິ່ນ ແລະ ໄລ່ຕາມຊາວອິດສະຣາເອນໄປ.
ຊາວອິດສະຣາເອນຕັ້ງຄ້າຍພັກຢູ່ທີ່ທະເລແດງ. ບໍ່ດົນຟາໂຣ ແລະ ກອງທັບຂອງເພິ່ນກໍໄດ້ມາເຖິງພວກເຂົາ. ເມື່ອຊາວອິດສະຣາເອນໄດ້ເຫັນຊາວເອຢິບກຳລັງມາ, ພວກເຂົາກໍເກີດຄວາມຢ້ານກົວ. ແຕ່ໂມເຊໄດ້ບອກຊາວອິດສະຣາເອນວ່າ ພຣະຜູ້ເປັນເຈົ້າຈະປົກປ້ອງພວກເຂົາ.
ຂະນະທີ່ຊາວເອຢິບໃກ້ຈະມາເຖິງ, ພຣະຜູ້ເປັນເຈົ້າໄດ້ບອກໂມເຊໃຫ້ຍົກໄມ້ຄ້ອນເທົ້າຂຶ້ນ. ໂມເຊກໍໄດ້ເຮັດຕາມ, ແລະ ພຣະຜູ້ເປັນເຈົ້າໄດ້ແຍກນ້ຳທະເລ. ຊາວອິດສະຣາເອນໄດ້ຂ້າມນ້ຳທະເລໄປເທິງດິນແຫ້ງ. ພວກເຂົາໄດ້ແລ່ນໜີຈາກຟາໂຣ ແລະ ກອງທັບຂອງເພິ່ນ.
ກອງທັບເອຢິບໄດ້ໄລ່ຕາມຊາວອິດສະຣາເອນ. ເມື່ອຊາວອິດສະຣາເອນໄດ້ຂ້າມໄປຫາຟາກນ້ຳປອດໄພທຸກຄົນແລ້ວ, ພຣະຜູ້ເປັນເຈົ້າໄດ້ປ່ອຍນ້ຳລົງມາ. ກອງທັບເອຢິບໄດ້ຈົມນ້ຳຕາຍ.
ຊາວອິດສະຣາເອນໄດ້ເປັນອິດສະລະໃນທີ່ສຸດ. ພວກເຂົາໄດ້ຮ້ອງເພງ, ຟ້ອນລຳ, ແລະ ຂອບພຣະໄທພຣະຜູ້ເປັນເຈົ້າ. ພວກເຂົາໄດ້ຈື່ຈຳງານປັດສະຄາສະເໝີ ວ່າເປັນເວລາທີ່ພຣະຜູ້ເປັນເຈົ້າໄດ້ໂຜດຊີວິດຂອງພວກເຂົາ ແລະ ພາພວກເຂົາໜີຈາກປະເທດເອຢິບ.