“ເອລີຢາ ແລະ ພວກປະໂລຫິດຂອງພະບາອານ,” ເລື່ອງພຣະຄໍາພີເດີມ (2022)
“ເອລີຢາ ແລະ ພວກປະໂລຫິດຂອງພະບາອານ,” ເລື່ອງພຣະຄໍາພີເດີມ
1 ກະສັດ 18
ເອລີຢາ ແລະ ພວກປະໂລຫິດຂອງພະບາອານ
ສາດສະດາຂອງພຣະຜູ້ເປັນເຈົ້າປະທະກັບພວກປະໂລຫິດປອມ
ອານາຈັກອິດສະຣາເອນໄດ້ສືບຕໍ່ທົນທຸກຈາກການບໍ່ມີນໍ້າ. ກະສັດອາຮາບບອກປະຊາຊົນໃຫ້ນະມັດສະການພຣະເຈົ້າປອມຊື່ວ່າ ພະບາອານ.
ພຣະຜູ້ເປັນເຈົ້າໄດ້ສົ່ງສາດສະດາເອລີຢາໄປພົບກັບອາຮາບ. ເອລີຢາໄດ້ເຊື້ອເຊີນປະຊາຊົນທັງໝົດໃຫ້ຂຶ້ນໄປຍັງຈອມພູ. ເພິ່ນໄດ້ທ້າທາຍກະສັດ ແລະ ພວກປະໂລຫິດຂອງເພິ່ນເພື່ອເບິ່ງວ່າ ແມ່ນພຣະຜູ້ເປັນເຈົ້າ ຫລື ພະບາອານ ທີ່ເປັນພຣະເຈົ້າອົງແທ້ຈິງ.
ເອລີຢາໄດ້ອະທິບາຍການທ້າທາຍ. ເພິ່ນ ແລະ ພວກປະໂລຫິດຈະຕ້ອງຖວາຍງົວໂຕໜຶ່ງເທິງແທ່ນບູຊາ, ແຕ່ບໍ່ໃຫ້ພວກເຂົາດັງໄຟໃສ່ດ້ວຍຕົວເອງ. ພວກປະໂລຫິດຕ້ອງອະທິຖານຫາພະບາອານເພື່ອໃຫ້ສົ່ງໄຟລົງມາ. ແລ້ວເອລີຢາກໍຈະອະທິຖານຫາພຣະຜູ້ເປັນເຈົ້າເພື່ອໃຫ້ສົ່ງໄຟລົງມາຄືກັນ. ເອລີຢາຮູ້ວ່າ ມີແຕ່ພຣະເຈົ້າອົງແທ້ຈິງເທົ່ານັ້ນທີ່ຈະສົ່ງໄຟລົງມາ.
ພວກປະໂລຫິດຂອງພະບາອານໄດ້ອະທິຖານຫາພຣະເຈົ້າຂອງພວກເຂົາຕັ້ງແຕ່ເຊົ້າຈົນຮອດທ່ຽງ, ແຕ່ກໍບໍ່ມີຫຍັງເກີດຂຶ້ນ. ເອລີຢາໄດ້ເວົ້າເຍາະເຍີ້ຍພວກເຂົາວ່າ ພະບາອານຂອງພວກເຂົາອາດກຳລັງນອນຫລັບຢູ່.
ພວກປະໂລຫິດໄດ້ເລີ່ມໃຈຮ້າຍ, ໂດດຂຶ້ນເທິງແທ່ນບູຊາ, ແລະ ຮ້ອງຈົນຮອດຕອນແລງ. ພວກເຂົາຫວັງວ່າພຣະເຈົ້າຂອງພວກເຂົາຈະຕອບ, ແຕ່ກໍຍັງບໍ່ມີໄຟ.
ບາດນີ້ຮອດຜຽນຂອງເອລີຢາ. ເພິ່ນໄດ້ສ້າງແທ່ນບູຊາໃຫ້ພຣະຜູ້ເປັນເຈົ້າ, ຂຸດຮ່ອງອ້ອມຮອບແທ່ນບູຊາ, ແລະ ໄດ້ກະກຽມເຄື່ອງຖວາຍບູຊາ.
ເອລີຢາໄດ້ຂໍໃຫ້ຜູ້ຄົນເອົານໍ້າມາໃສ່ໄຫສີ່ໜ່ວຍໃຫ້ເຕັມ ແລະ ເທໃສ່ຟືນທີ່ແທ່ນບູຊາຂອງເພິ່ນສາມເທື່ອ. ຟືນ ແລະ ແທ່ນບູຊາໄດ້ປຽກຈື້ນໄປດ້ວຍນໍ້າ. ນໍ້າກໍເຕັມຮ່ອງຈົນລົ້ນ.
ເອລີຢາໄດ້ອະທິຖານຫາພຣະຜູ້ເປັນເຈົ້າ ເພື່ອສະແດງລິດອໍານາດຂອງພຣະເຈົ້າອົງແທ້ຈິງ. ໄຟຂອງພຣະຜູ້ເປັນເຈົ້າໄດ້ລົງມາ ແລະ ເຜົາຜານເຄື່ອງຖວາຍບູຊາ, ໄມ້, ຫີນ, ແລະ ນໍ້າຈົນໝົດ. ປະຊາຊົນໄດ້ຮູ້ວ່າ ພຣະເຈົ້າຂອງເອລີຢາເປັນພຣະເຈົ້າອົງແທ້ຈິງ. ເອລີຢາໄດ້ອະທິຖານຂໍໃຫ້ໄພແຫ້ງແລ້ງສິ້ນສຸດລົງ, ແລະ ພຣະຜູ້ເປັນເຈົ້າໄດ້ສົ່ງຝົນມາ.