“ການສ້າງໂລກ,” ເລື່ອງພຣະຄຳພີເດີມ (2022)
“ການສ້າງໂລກ,” ເລື່ອງພຣະຄຳພີເດີມ
ປະຖົມມະການ 1–2; ໂມເຊ 1–3; ອັບຣາຮາມ 3–5
ການສ້າງໂລກ
ບ້ານທີ່ສວຍງາມສຳລັບລູກໆຂອງພຣະບິດາເທິງສະຫວັນ
ພຣະເຈົ້າພຣະບິດາເທິງສະຫວັນຂອງເຮົາ ໄດ້ສະເໜີແຜນແຫ່ງຄວາມລອດໃນສະຫວັນ. ເຮົາທຸກຄົນໄດ້ໂຮຮ້ອງດ້ວຍຄວາມຊື່ນຊົມ! ເຮົາຈະສາມາດລົງມາເທິງໂລກ ເພື່ອຮັບເອົາຮ່າງກາຍທີ່ເປັນເນື້ອໜັງ. ຂະນະທີ່ຢູ່ເທິງໂລກ, ເຮົາຈະຮຽນຮູ້ທີ່ຈະຕິດຕາມພຣະບຸດຂອງພຣະເຈົ້າ, ອົງພຣະເຢຊູຄຣິດເຈົ້າ. ພຣະຜູ້ເປັນເຈົ້າໄດ້ສ້າງໂລກ ໂດຍການເຮັດຕາມຄຳແນະນຳຂອງພຣະເຈົ້າ.
ປະຖົມມະການ 1:1; ໂຢບ 38:4–7; ໂມເຊ 1:32–33; 2:1; ອັບຣາຮາມ 3:22–27
ໃນມື້ທີໜຶ່ງ, ພຣະຜູ້ເປັນເຈົ້າໄດ້ແຍກຄວາມສະຫວ່າງອອກຈາກຄວາມມືດ. ພຣະອົງໄດ້ເອີ້ນຄວາມສະຫວ່າງວ່າ ກາງເວັນ ແລະ ຄວາມມືດວ່າ ກາງຄືນ.
ປະຖົມມະການ 1:3–5; ໂມເຊ 2:3–5; ອັບຣາຮາມ 4:1–5
ໃນມື້ທີສອງ, ພຣະອົງໄດ້ແຍກນ້ຳອອກຈາກກັນ ລະຫວ່າງກ້ອນເມກຢູ່ເທິງຟ້າ ແລະ ມະຫາສະໝຸດຢູ່ເທິງແຜ່ນດິນໂລກ.
ປະຖົມມະການ 1:6–8; ໂມເຊ 2:6–8; ອັບຣາຮາມ 4:6–8
ໃນມື້ທີສາມ, ພຣະຜູ້ເປັນເຈົ້າໄດ້ນິລະມິດສ້າງມະຫາສະໝຸດ ແລະ ແຜ່ນດິນແຫ້ງ. ພຣະອົງໄດ້ເອີ້ນນ້ຳວ່າ ທະເລ ແລະ ແຜ່ນດິນແຫ້ງວ່າ ແຜ່ນດິນໂລກ. ພຣະອົງໄດ້ເຮັດໃຫ້ແຜ່ນດິນໂລກສວຍງາມເຕັມໄປດ້ວຍດອກໄມ້, ໝາກໄມ້, ພືດພັນ, ແລະ ຕົ້ນໄມ້.
ປະຖົມມະການ 1:9–13; ໂມເຊ 2:9–13; ອັບຣາຮາມ 4:9–13
ໃນມື້ທີສີ່, ພຣະອົງໄດ້ນິລະມິດສ້າງດວງຕາເວັນເພື່ອສ່ອງແສງໃນຕອນກາງເວັນ. ແລ້ວພຣະອົງໄດ້ນິລະມິດສ້າງດວງເດືອນ ແລະ ໝູ່ດວງດາວເພື່ອສ່ອງແສງໃນຕອນກາງຄືນ.
ປະຖົມມະການ 1:14–19; ໂມເຊ 2:14–19; ອັບຣາຮາມ 4:14–19
ໃນມື້ທີຫ້າ, ພຣະຜູ້ເປັນເຈົ້າໄດ້ນິລະມິດສ້າງຝູງປາໃນທະເລ ແລະ ຝູງນົກໃນອາກາດ. ພຣະອົງໄດ້ອວຍພອນສັດທັງປວງໃຫ້ອອກແມ່ແຜ່ລູກ ແລະ ອວຍພອນຝູງປາໃຫ້ເຕັມຢູ່ໃນມະຫາສະໝຸດ.
ປະຖົມມະການ 1:20–23; ໂມເຊ 2:20–23; ອັບຣາຮາມ 4:20–23
ໃນມື້ທີຫົກ, ພຣະອົງໄດ້ນິລະມິດສ້າງສັດສາວາສິ່ງຢູ່ເທິງແຜ່ນດິນໂລກ, ບາງຊະນິດທີ່ຍ່າງຍ້າຍ ແລະ ບາງຊະນິດທີ່ເລືອຄານ.
ປະຖົມມະການ 1:24–25; ໂມເຊ 2:24–25; ອັບຣາຮາມ 4:24–25
ພຣະບິດາເທິງສະຫວັນ ແລະ ພຣະຜູ້ເປັນເຈົ້າໄດ້ສະເດັດລົງມາຍັງແຜ່ນດິນໂລກໃນມື້ທີຫົກ. ຜູ້ຊາຍ ແລະ ຜູ້ຍິງຖືກນິລະມິດສ້າງຂຶ້ນຕາມຮູບລັກສະນະຂອງພຣະເຈົ້າ. ພຣະບິດາເທິງສະຫວັນໄດ້ສັ່ງໃຫ້ເຂົາເຈົ້າດູແລກັນແລະກັນ ແລະ ໃຫ້ມີລູກ. ຜູ້ຊາຍ ແລະ ຜູ້ຍິງກໍຖືກໄວ້ວາງໃຈໃຫ້ດູແລແຜ່ນດິນ ແລະ ສັດສາວາສິ່ງນຳອີກ.
ປະຖົມມະການ 1:26–27; ໂມເຊ 2:26–27; ອັບຣາຮາມ 4:26–31; 5:7–8
ພຣະບິດາເທິງສະຫວັນພໍພຣະໄທກັບທຸກສິ່ງທີ່ພວກພຣະອົງໄດ້ນິລະມິດສ້າງ. ໃນມື້ທີເຈັດ, ພວກພຣະອົງໄດ້ພັກຜ່ອນຈາກວຽກງານທຸກຢ່າງຂອງພວກພຣະອົງ. ແຜ່ນດິນໂລກກໍສວຍງາມ ແລະ ເຕັມໄປດ້ວຍທຸກສິ່ງທີ່ມີຊີວິດ.