“ກະສັດດາວິດ,” ເລື່ອງພຣະຄຳພີເດີມ (2022)
“ກະສັດດາວິດ,” ເລື່ອງພຣະຄຳພີເດີມ
1 ຊາມູເອນ 18–19; 31; 2 ຊາມູເອນ 1; 5; 11–12
ກະສັດດາວິດ
ການດີ້ນລົນຂອງກະສັດ
ກະສັດໂຊນ, ກະສັດຂອງອິດສະຣາເອນປະທັບໃຈກັບດາວິດຫລາຍທີ່ເອົາຊະນະໂກລີອາດ. ກະສັດໂຊນໄດ້ແຕ່ງຕັ້ງດາວິດໃຫ້ເປັນຜູ້ນຳກອງທັບຂອງເພິ່ນ.
ດາວິດຮັກພຣະຜູ້ເປັນເຈົ້າ ແລະ ຢາກເຮັດສິ່ງທີ່ຖືກຕ້ອງຢູ່ສະເໝີ. ຊາວອິດສະຣາເອນຮັກດາວິດ.
ກະສັດໂຊນເກີດຄວາມອິດສາ ແລະ ພະຍາຍາມຂ້າດາວິດ. ແຕ່ວ່າດາວິດເຊື່ອຟັງພຣະຜູ້ເປັນເຈົ້າ, ແລະ ພຣະຜູ້ເປັນເຈົ້າປົກປ້ອງເພິ່ນຈາກກະສັດໂຊນ.
ຊາວອິດສະຣາເອນໄດ້ສູ້ຮົບໃນຫລາຍສົງຄາມ. ມື້ໜຶ່ງກະສັດໂຊນ ແລະ ພວກລູກຊາຍຂອງເພິ່ນໄດ້ຖືກຂ້າຕາຍໃນສະໜາມຮົບ. ດາວິດຮັກພວກເພິ່ນ ແລະ ເສຍໃຈຫລາຍທີ່ໄດ້ຮູ້ເຖິງການເສຍຊີວິດຂອງພວກເພິ່ນ. ບັດນີ້ຊາວອິດສະຣາເອນຕ້ອງການກະສັດຄົນໃໝ່. ພຣະຜູ້ເປັນເຈົ້າໄດ້ເລືອກດາວິດໃຫ້ເປັນກະສັດ. ຜູ້ຄົນມີຄວາມປິຕິຍິນດີ.
1 ຊາມູເອນ 31:2–6; 2 ຊາມູເອນ 1:11–12; 5:1–5
ພຣະຜູ້ເປັນເຈົ້າອວຍພອນກະສັດດາວິດ ແລະ ນຳພາເພິ່ນ. ດ້ວຍຄວາມຊ່ວຍເຫລືອຈາກພຣະຜູ້ເປັນເຈົ້າ, ກອງທັບຂອງດາວິດເອົາຊະນະສັດຕູຂອງພວກເພິ່ນ.
ມື້ໜຶ່ງເມື່ອດາວິດຕ້ອງອອກໄປສູ້ຮົບ, ແຕ່ເພິ່ນໄດ້ຢູ່ທີ່ວັງ. ເພິ່ນເລີຍເຫັນຜູ້ຍິງທີ່ສວຍງາມຄົນໜຶ່ງ. ນາງມີຊື່ວ່າ ບັດເຊບາ, ແລະ ດາວິດຢາກແຕ່ງງານກັບນາງ. ແຕ່ວ່ານາງໄດ້ແຕ່ງງານແລ້ວກັບອູຣິຢາ, ທະຫານຄົນໜຶ່ງໃນກອງທັບຂອງດາວິດ.
ດາວິດຢາກແຕ່ງງານກັບນາງບັດເຊບາ, ດັ່ງນັ້ນເພິ່ນຈຶ່ງໄດ້ສົ່ງຜົວຂອງນາງອອກໄປສະໜາມຮົບບ່ອນທີ່ອັນຕະລາຍເພື່ອຫວັງໃຫ້ອູຣິຢາຖືກຂ້າຕາຍ.
ບໍ່ດົນດາວິດກໍໄດ້ຮັບຂ່າວວ່າ ອູຣິຢາຕາຍໃນສະໜາມຮົບ. ດາວິດໄດ້ສົ່ງຄົນຮັບໃຊ້ຂອງເພິ່ນໄປນຳເອົານາງບັດເຊບາມາທີ່ວັງຂອງເພິ່ນ, ແລະ ເພິ່ນໄດ້ແຕ່ງງານກັບນາງ.
ແຕ່ພຣະຜູ້ເປັນເຈົ້າບໍ່ພໍພຣະໄທກັບການກະທຳຂອງດາວິດ. ພຣະຜູ້ເປັນເຈົ້າໄດ້ສົ່ງນາທານ, ສາດສະດາຄົນໜຶ່ງ, ເພື່ອມາບອກດາວິດເຖິງບາບທີ່ຮ້າຍແຮງຂອງເພິ່ນ. ດາວິດໂສກເສົ້າເສຍໃຈຫລາຍກັບສິ່ງທີ່ເພິ່ນໄດ້ກະທຳກັບອູຣິຢາ ແລະ ນາງບັດເຊບາ. ເພິ່ນໄດ້ອະທິຖານ ແລະ ຖືສິນອົດເຂົ້າເພື່ອຂໍການໃຫ້ອະໄພຈາກພຣະຜູ້ເປັນເຈົ້າ.