“ດານີເອນ ແລະ ໝູ່ຂອງລາວ,” ເລື່ອງພຣະຄຳພີເດີມ (2022)
“ດານີເອນ ແລະ ໝູ່ຂອງລາວ,” ເລື່ອງພຣະຄຳພີເດີມ
ດານີເອນ 1
ດານີເອນ ແລະ ໝູ່ຂອງລາວ
ປະຕິເສດການກິນອາຫານຂອງກະສັດ
ອານາຈັກບາບີໂລນໄດ້ໄຊຊະນະເຢຣູຊາເລັມ. ພວກເຂົາໄດ້ນຳເອົາຊາຍໜຸ່ມທີ່ສະຫລຽວສະຫລາດ ແລະ ແຂງແຮງທີ່ສຸດໄປຈາກຄອບຄົວຂອງເຂົາເຈົ້າໃນເມືອງເຢຣູຊາເລັມ ແລະ ນຳເອົາເຂົາເຈົ້າກັບໄປທີ່ບາບີໂລນເພື່ອຮັບໃຊ້ກະສັດ.
ດານີເອນ ແລະ ໝູ່ຂອງລາວເປັນໜຶ່ງໃນຈຳນວນຊາຍໜຸ່ມເຫລົ່ານີ້. ເຂົາເຈົ້າຖືກເລືອກໃຫ້ຮັບໃຊ້ໃນຣາຊສຳນັກຂອງກະສັດ ແລະ ກາຍເປັນໂຫລາຈານຂອງກະສັດ.
ກະສັດໄດ້ໃຫ້ອາຫານ ແລະ ເຫລົ້າອະງຸ່ນກັບດານີເອນ ແລະ ໝູ່ຂອງລາວ. ແຕ່ວ່າເຂົາເຈົ້າບໍ່ຍອມກິນອາຫານ ແລະ ດື່ມເຫລົ້າອະງຸ່ນຂອງກະສັດ. ມັນເປັນການເຮັດຜິດຕໍ່ພຣະບັນຍັດຂອງພຣະເຈົ້າ.
ສິ່ງນີ້ເຮັດໃຫ້ຄົນຮັບໃຊ້ຂອງກະສັດຢ້ານກົວຫລາຍ. ລາວເປັນຄົນເບິ່ງແຍງດານີເອນ ແລະ ໝູ່ຂອງລາວ, ແລະ ລາວຄິດວ່າຖ້າເຂົາເຈົ້າປະຕິເສດອາຫານຂອງກະສັດ, ເຂົາເຈົ້າອາດຈະອ່ອນແອກວ່າຊາຍໜຸ່ມຄົນອື່ນໆ. ແລ້ວກະສັດອາດຈະໃຈຮ້າຍ ແລະ ຂ້າຄົນຮັບໃຊ້ກໍເປັນໄດ້.
ແຕ່ວ່າດານີເອນໄວ້ວາງໃຈໃນພຣະເຈົ້າ ແລະ ຢາກເຊື່ອຟັງພຣະບັນຍັດຂອງພຣະອົງ. ດານີເອນໄດ້ຂໍໃຫ້ຄົນຮັບໃຊ້ເອົາແຕ່ນໍ້າລ້າໆກັບຜັກມາໃຫ້ເຂົາເຈົ້າກິນເປັນເວລາ 10 ວັນ ແລະ ແລ້ວໃຫ້ທຽບສຸຂະພາບຂອງເຂົາເຈົ້າໃສ່ກັບຊາຍໜຸ່ມຄົນອື່ນໆ. ຄົນຮັບໃຊ້ໄດ້ຕົກລົງ.
ຫລັງຈາກ 10 ວັນ, ດານີເອນ ແລະ ໝູ່ຂອງລາວໄດ້ມີສຸຂະພາບແຂງແຮງກວ່າຊາຍໜຸ່ມຄົນອື່ນໆທຸກຄົນ. ດານີເອນ ແລະ ໝູ່ຂອງລາວໄດ້ເຮັດຕາມພຣະບັນຍັດຂອງພຣະເຈົ້າ, ແລະ ພຣະເຈົ້າໄດ້ເຮັດໃຫ້ເຂົາເຈົ້າສະຫລຽວສະຫລາດທີ່ສຸດໃນຣາຊສຳນັກຂອງກະສັດ.