“ຢາໂຄບ ແລະ ຄອບຄົວຂອງເພິ່ນ,” ເລື່ອງພຣະຄຳພີເດີມ (2022)
“ຢາໂຄບ ແລະ ຄອບຄົວຂອງເພິ່ນ,” ເລື່ອງພຣະຄຳພີເດີມ
ປະຖົມມະການ 27–33
ຢາໂຄບ ແລະ ຄອບຄົວຂອງເພິ່ນ
ວິທີທີ່ພຣະຜູ້ເປັນເຈົ້າຮັກສາຄຳສັນຍາຂອງພຣະອົງ
ຢາໂຄບໄດ້ໜີຈາກບ້ານ ຍ້ອນຢ້ານກົວອ້າຍເອຊາວທີ່ໃຈຮ້າຍໃຫ້ເພິ່ນ. ພໍ່ຂອງຢາໂຄບໄດ້ອວຍພອນເພິ່ນໃຫ້ພົບເຫັນ ແລະ ແຕ່ງງານກັບຜູ້ຍິງທີ່ຮັກພຣະຜູ້ເປັນເຈົ້າ ແລະ ຮັກສາພຣະບັນຍັດຂອງພຣະອົງ.
ປະຖົມມະການ 27:42–46; 28:1–5
ຂະນະທີ່ຢາໂຄບເດີນທາງ, ພຣະຜູ້ເປັນເຈົ້າໄດ້ມາຢ້ຽມຢາມເພິ່ນໃນພາບນິມິດ. ພຣະອົງໄດ້ສັນຍາວ່າ ຈະສະຖິດຢູ່ກັບຢາໂຄບຕະຫລອດໄປ. ຢາໂຄບໄດ້ສັນຍາກັບພຣະຜູ້ເປັນເຈົ້າວ່າ ເພິ່ນຈະມອບໜຶ່ງສ່ວນສິບຂອງທຸກສິ່ງທີ່ເພິ່ນມີໃຫ້ພຣະອົງ.
ພຣະຜູ້ເປັນເຈົ້າໄດ້ສັນຍາກັບຢາໂຄບວ່າ ເພິ່ນຈະມີລູກຫລາຍຄົນ. ຜ່ານທາງລູກໆຂອງຢາໂຄບ, ຄອບຄົວຂອງແຜ່ນດິນໂລກຈະໄດ້ຮັບພອນ ທີ່ຮູ້ຈັກພຣະຜູ້ຊ່ວຍໃຫ້ລອດ. ຄອບຄົວຂອງຢາໂຄບໃນຍຸກສຸດທ້າຍ ຖືກເອີ້ນວ່າ ເຊື້ອສາຍອິດສະຣາເອນ.
ປະຖົມມະການ 28:3–4, 14; 1 ນີໄຟ 10:14
ຢາໂຄບໄດ້ເດີນທາງໄປຫາດິນແດນແຫ່ງໜຶ່ງທີ່ເອີ້ນວ່າ ຮາຣານ. ຢູ່ທີ່ນັ້ນ ເພິ່ນໄດ້ຕົກຫລຸມຮັກກັບຍິງສາວທີ່ຊອບທຳຄົນໜຶ່ງ ຊື່ຣາເຊັນ.
ຢາໂຄບໄດ້ຕົກລົງທີ່ຈະທຳງານເຈັດປີໃຫ້ລາບານ ພໍ່ຂອງນາງ, ຖ້າຫາກລາບານຈະອະນຸຍາດໃຫ້ເພິ່ນແຕ່ງງານກັບນາງຣາເຊັນ. ລາບານຕົກລົງ. ຢາໂຄບໄດ້ທຳງານເປັນເວລາເຈັດປີ.
ແຕ່ລາບານຢາກໃຫ້ນາງເລອາ ລູກສາວກົກຂອງລາວແຕ່ງງານກ່ອນ. ລະຫວ່າງພິທີສົມຣົດ, ລາບານໄດ້ຫລອກຢາໂຄບ ແລະ ໄດ້ໃຫ້ເພິ່ນແຕ່ງງານກັບນາງເລອາ ແທນນ້ອງສາວ. ແຕ່ຢາໂຄບຮັກນາງຣາເຊັນ. ເພິ່ນໄດ້ສັນຍາທີ່ຈະທຳງານອີກເຈັດປີ ຖ້າຫາກເພິ່ນສາມາດແຕ່ງງານກັບນາງຄືກັນ. ລາບານຕົກລົງ, ແລະ ຄອບຄົວຂອງຢາໂຄບເລີ່ມມີຈຳນວນຫລາຍຂຶ້ນ.
ປະຖົມມະການ 29:28–35; 30:3–13, 17–24; ຢາໂຄບ 2:27–30
ລາບານບໍ່ໄດ້ຈ່າຍຄ່າແຮງງານໃຫ້ຢາໂຄບຢ່າງສົມຄ່າ. ແຕ່ພຣະຜູ້ເປັນເຈົ້າໄດ້ອວຍພອນຢາໂຄບດ້ວຍຝູງສັດລ້ຽງຢ່າງຫລວງຫລາຍ ແລະ ໄດ້ບອກຢາໂຄບໃຫ້ກັບຄືນບ້ານ.
ປະຖົມມະການ 30:31, 43; 31:1–7, 17–18
ໃນລະຫວ່າງທາງ, ຢາໂຄບໄດ້ຍິນວ່າ ອ້າຍເອຊາວ ແລະ ພວກຜູ້ຊາຍ 400 ຄົນ ກຳລັງເດີນທາງມາພົບເພິ່ນ.
ຢາໂຄບຄິດວ່າເອຊາວຍັງໃຈຮ້າຍໃຫ້ເພິ່ນຢູ່. ຢາໂຄບຢ້ານວ່າຄອບຄົວຂອງເພິ່ນຈະໄດ້ຮັບອັນຕະລາຍ, ຈຶ່ງໄດ້ພາຄອບຄົວໄປລີ້ ແລະ ອະທິຖານ.
ຢາໂຄບໄດ້ອະທິຖານໝົດຄືນ ຈົນເຖິງຕອນເຊົ້າ. ພຣະຜູ້ເປັນເຈົ້າໄດ້ມາຢ້ຽມຢາມຢາໂຄບ ແລະ ໄດ້ອວຍພອນເພິ່ນ. ພຣະຜູ້ເປັນເຈົ້າໄດ້ບອກຢາໂຄບວ່າ ເພິ່ນຈະເປັນຜູ້ນຳທີ່ຍິ່ງໃຫຍ່ຕໍ່ຜູ້ຄົນຢ່າງຫລວງຫລາຍ. ພຣະຜູ້ເປັນເຈົ້າໄດ້ຕັ້ງຊື່ໃໝ່ໃຫ້ຢາໂຄບວ່າ ອິດສະຣາເອນ.
ບໍ່ດົນເອຊາວກັບຜູ້ຄົນຂອງລາວກໍໄດ້ພົບເຫັນຢາໂຄບ ແລະ ຄອບຄົວຂອງເພິ່ນ. ເອຊາວບໍ່ໄດ້ໃຈຮ້າຍໃຫ້ຢາໂຄບອີກແລ້ວ. ລາວໄດ້ແລ່ນໄປຫາຢາໂຄບ ແລະ ໂອບກອດເພິ່ນ. ລາວດີໃຈຫລາຍທີ່ໄດ້ເຫັນເພິ່ນ ແລະ ຄອບຄົວຂອງເພິ່ນ. ຢາໂຄບດີໃຈທີ່ໄດ້ເຫັນເອຊາວອີກຄືກັນ.
ພຣະຜູ້ເປັນເຈົ້າໄດ້ຮັກສາຄຳສັນຍາຂອງພຣະອົງກັບຢາໂຄບຕະຫລອດຊີວິດຂອງເພິ່ນ. ຢາໂຄບໄດ້ກັບໄປເຖິງບ້ານເກີດພ້ອມກັບຄອບຄົວ ແລະ ໄດ້ອາໄສຢູ່ທີ່ນັ້ນ. ນັບແຕ່ນັ້ນມາ, ຢາໂຄບໄດ້ຖືກເອີ້ນວ່າ ອິດສະຣາເອນ, ແລະ ຄອບຄົວຂອງເພິ່ນໄດ້ຖືກເອີ້ນວ່າ ຊາວອິດສະຣາເອນ. ເພິ່ນໄດ້ສືບຕໍ່ຮັກສາພຣະບັນຍັດ ແລະ ນະມັດສະການພຣະຜູ້ເປັນເຈົ້າ.