“ໂຢບ,” ເລື່ອງພຣະຄໍາພີເດີມ (2021)
“ໂຢບ,” ເລື່ອງພຣະຄໍາພີເດີມ
ໂຢບ 1–3; 19; 38–42
ໂຢບ
ການໄວ້ວາງໃຈໃນຄວາມຮັກຂອງພຣະຜູ້ເປັນເຈົ້າ
ໂຢບເປັນຄົນດີທີ່ຮັກພຣະຜູ້ເປັນເຈົ້າ ແລະ ຮັກສາພຣະບັນຍັດຂອງພຣະອົງ. ໂຢບ ແລະ ເມຍຂອງເພິ່ນມີລູກ 10 ຄົນ, ແລະ ເພິ່ນມີຝູງສັດ ແລະ ມີຊັບສົມບັດຢ່າງຫລວງຫລາຍ.
ພຣະຜູ້ເປັນເຈົ້າໄດ້ອະນຸຍາດໃຫ້ສັດທາຂອງໂຢບຖືກທົດສອບ. ໂຢບໄດ້ປະເຊີນກັບຄວາມຍາກລໍາບາກ.
ມື້ໜຶ່ງ ສັດຫລາຍໂຕຂອງໂຢບໄດ້ຖືກລັກ. ຕໍ່ມາ ໄຟກໍໄໝ້ຊັບສິນຂອງໂຢບທັງໝົດ ແລະ ໄດ້ຂ້າຄົນຮັບໃຊ້ທັງໝົດຂອງເພິ່ນ ແລະ ສັດອື່ນໆດ້ວຍ. ຈາກນັ້ນ ພະຍຸກໍພັດຖະລົ່ມເຮືອນຂອງລູກຊາຍຂອງໂຢບ. ລູກໆຂອງໂຢບຢູ່ໃນເຮືອນ, ແລະ ພວກເຂົາໄດ້ຕາຍໝົດທຸກຄົນ. ໂຢບ ແລະ ເມຍຂອງເພິ່ນບໍ່ມີຫຍັງເຫລືອເລີຍ ນອກຈາກສຸຂະພາບຂອງພວກເພິ່ນ.
ໂຢບ ແລະ ເມຍຂອງເພິ່ນເສຍໃຈຫລາຍ. ພວກເພິ່ນໄດ້ສູນເສຍທຸກຢ່າງ, ແມ່ນແຕ່ລູກໆຂອງພວກເພິ່ນ. ແຕ່ໂຢບຍັງມີສັດທາໃນພຣະຜູ້ເປັນເຈົ້າ. ເພິ່ນບໍ່ໄດ້ໂທດພຣະຜູ້ເປັນເຈົ້າສໍາລັບສິ່ງທີ່ໄດ້ເກີດຂຶ້ນ.
ແລ້ວໂຢບໄດ້ລົ້ມປ່ວຍໜັກ. ບາດແຜທີ່ເຈັບປວດໄດ້ປົກຄຸມທົ່ວຮ່າງກາຍຂອງເພິ່ນ. ໂຢບ ແລະ ເມຍຂອງເພິ່ນສົງໄສວ່າ ເປັນຫຍັງເລື່ອງຮ້າຍໆເຫລົ່ານີ້ຈຶ່ງເກີດຂຶ້ນ.
ພຣະຜູ້ເປັນເຈົ້າໄດ້ກ່າວກັບໂຢບ ແລະ ສະແດງໃຫ້ເພິ່ນເຫັນແຜ່ນດິນໂລກ, ໝູ່ດວງດາວ, ແລະ ສິ່ງທີ່ມີຊີວິດທັງໝົດ. ພຣະຜູ້ເປັນເຈົ້າໄດ້ສິດສອນບົດຮຽນທີ່ສໍາຄັນໃຫ້ແກ່ໂຢບ. ທຸກສິ່ງໄດ້ຖືກສ້າງຂຶ້ນເພື່ອຊ່ວຍລູກໆຂອງພຣະບິດາເທິງສະຫວັນໃຫ້ຮຽນຮູ້ກ່ຽວກັບພຣະບຸດຂອງພຣະອົງ ພຣະເຢຊູຄຣິດ ແລະ ຕິດຕາມພຣະອົງ.
ໂຢບໄດ້ກັບໃຈ ແລະ ຂໍໃຫ້ພຣະຜູ້ເປັນເຈົ້າອະໄພໃຫ້ເພິ່ນທີ່ເພິ່ນໄດ້ສົງໄສ. ເພິ່ນໄດ້ສັນຍາວ່າຈະໄວ້ວາງໃຈໃນພຣະຜູ້ເປັນເຈົ້າ. ພຣະຜູ້ເປັນເຈົ້າຮູ້ວ່າໂຢບຮັກພຣະອົງ. ພຣະອົງໄດ້ປິ່ນປົວໂຢບ ແລະ ອວຍພອນເພິ່ນໃຫ້ມີລູກອີກຫລາຍຄົນ ແລະ ຮັ່ງມີຫລາຍກວ່າເກົ່າເຖິງສອງເທົ່າ.