“ອັບຣາຮາມ ແລະ ອີຊາກ,” ເລື່ອງພຣະຄຳພີເດີມ (2022)
“ອັບຣາຮາມ ແລະ ອີຊາກ,” ເລື່ອງພຣະຄຳພີເດີມ
ປະຖົມມະການ 17; 21–22
ອັບຣາຮາມ ແລະ ອີຊາກ
ບິດາ, ລູກຊາຍ, ແລະ ການເສຍສະລະ
ອັບຣາຮາມ ແລະ ນາງຊາຣາໄດ້ມີລູກຊາຍ, ດັ່ງທີ່ພຣະຜູ້ເປັນເຈົ້າໄດ້ສັນຍາ. ພວກເພິ່ນໄດ້ຕັ້ງຊື່ໃຫ້ລາວວ່າ ອີຊາກ.
ພວກເພິ່ນຮັກອີຊາກ. ພວກເພິ່ນໄດ້ສິດສອນລາວໃຫ້ເລືອກສິ່ງທີ່ຖືກຕ້ອງ ແລະ ໄວ້ວາງໃຈໃນພຣະຜູ້ເປັນເຈົ້າ.
ພຣະຜູ້ເປັນເຈົ້າສັນຍາກັບອັບຣາຮາມ ແລະ ນາງຊາຣາວ່າ ຜ່ານທາງອີຊາກຄອບຄົວຂອງພວກເພິ່ນຈະເຕີບໃຫຍ່ເພື່ອເປັນພອນໃຫ້ທັງແຜ່ນດິນໂລກ. ແຕ່ມີມື້ໜຶ່ງພຣະຜູ້ເປັນເຈົ້າໄດ້ບັນຊາອັບຣາຮາມໃຫ້ນຳເອົາອີຊາກໄປຍັງພູເຂົາໂມຣິຢາ ແລະ ຖວາຍອີຊາກເປັນເຄື່ອງບູຊາ.
ໃນລະຫວ່າງທາງໄປຍັງພູເຂົາ, ອີຊາກໄດ້ຖາມວ່າລູກແກະທີ່ຈະເຜົາບູຊານັ້ນຢູ່ໃສ. ອັບຣາຮາມໄດ້ຕອບວ່າພຣະຜູ້ເປັນເຈົ້າຈະຈັດຫາໃຫ້ເອງ.
ເທິງພູເຂົາໂມຣິຢາ, ອັບຣາຮາມໄດ້ສ້າງແທ່ນບູຊາຂຶ້ນ ແລະ ໄດ້ເອົາໄມ້ຟືນວາງໄວ້ເທິງແທ່ນນັ້ນ.
ດັ່ງທີ່ພຣະຜູ້ເປັນເຈົ້າໄດ້ບັນຊາ, ອັບຣາຮາມໄດ້ບອກໃຫ້ອີຊາກນອນລົງເທິງແທ່ນບູຊາ. ອີຊາກໄວ້ວາງໃຈໃນອັບຣາຮາມເຊັ່ນດຽວກັນກັບທີ່ພຣະຜູ້ຊ່ວຍໃຫ້ລອດໄວ້ວາງພຣະໄທໃນພຣະບິດາຂອງພຣະອົງ.
ຂະນະທີ່ອັບຣາຮາມກຳລັງຈະຖວາຍອີຊາກ, ທູດອົງໜຶ່ງຂອງພຣະຜູ້ເປັນເຈົ້າໄດ້ຢຸດເພິ່ນໄວ້. ອັບຣາຮາມໄດ້ສະແດງສັດທາຂອງເພິ່ນໃນພຣະຜູ້ເປັນເຈົ້າ. ອັບຣາຮາມຮູ້ດີວ່າເພິ່ນຈະຕິດຕາມພຣະຜູ້ເປັນເຈົ້າຕະຫລອດເວລາ.
ອັບຣາຮາມແນມໄປຮອບໆຕົວ ແລະ ເຫັນແກະໂຕໜຶ່ງຄາຢູ່ພຸ່ມໄມ້. ພຣະຜູ້ເປັນເຈົ້າໄດ້ຈັດຫາແກະໂຕນັ້ນໃຫ້ເປັນເຄື່ອງບູຊາ.
ອັບຣາຮາມ ແລະ ອີຊາກໄດ້ຮຽນຮູ້ກ່ຽວກັບວ່າພຣະບິດາເທິງສະຫວັນຈະຍົກພຣະບຸດຂອງພຣະອົງ ພຣະເຢຊູຄຣິດ ໃຫ້ເປັນເຄື່ອງບູຊາແນວໃດ. ອົງພຣະເຢຊູຄຣິດເຈົ້າໄວ້ວາງພຣະໄທໃນອັບຣາຮາມຍ້ອນວ່າເພິ່ນໄດ້ເຊື່ອຟັງ. ອັບຣາຮາມໄວ້ວາງໃຈໃນຄຳສັນຍາຂອງພຣະຜູ້ເປັນເຈົ້າວ່າ ມື້ໜຶ່ງຄອບຄົວຂອງເພິ່ນຈະເຕີບໃຫຍ່ ມີຫລາຍກວ່າດວງດາວໃນທ້ອງຟ້າ.