“ໂຢເຊັບໃນປະເທດເອຢິບ,” ເລື່ອງພຣະຄຳພີເດີມ (2022)
“ໂຢເຊັບໃນປະເທດເອຢິບ,” ເລື່ອງພຣະຄຳພີເດີມ
ໂຢເຊັບໃນປະເທດເອຢິບ
ຂ້າທາດໄດ້ກາຍເປັນຜູ້ນຳ
ໂຢເຊັບຖືກຂາຍໃຫ້ເປັນຂ້າທາດຂອງຊາຍຄົນໜຶ່ງຊື່ ໂປຕີຟາ. ໂປຕີຟາຮັບໃຊ້ຟາໂຣ, ຜູ້ປົກຄອງປະເທດເອຢິບ. ໂປຕີຟາບອກໄດ້ວ່າ ພຣະຜູ້ເປັນເຈົ້າຊ່ວຍເຫລືອໂຢເຊັບ. ເພິ່ນໄວ້ວາງໃຈໂຢເຊັບ ແລະ ໃຫ້ໂຢເຊັບດູແລບ້ານເຮືອນຂອງເພິ່ນ ແລະ ທຸກສິ່ງທີ່ເພິ່ນເປັນເຈົ້າຂອງ.
ເມຍຂອງໂປຕີຟາຄິດມັກໂຢເຊັບ. ນາງຢາກໃຫ້ໂຢເຊັບລະເມີດພຣະບັນຍັດຂອງພຣະຜູ້ເປັນເຈົ້າກັບນາງ. ໂຢເຊັບໄດ້ເວົ້າປະຕິເສດນາງ.
ເມຍຂອງໂປຕີຟາບໍ່ຍອມຟັງ, ສະນັ້ນ ໂຢເຊັບຈຶ່ງໄດ້ແລ່ນໜີໄປ. ນາງໃຈຮ້າຍໃຫ້ໂຢເຊັບ.
ນາງໄດ້ເອົາເສື້ອຂອງໂຢເຊັບໃຫ້ໂປຕີຟາເບິ່ງ. ນາງເວົ້າຕົວະໂປຕີຟາກ່ຽວກັບໂຢເຊັບ. ໂປຕີຟາໄດ້ສົ່ງໂຢເຊັບເຂົ້າຄຸກ.
ໂຢເຊັບໄດ້ຖືກແຍກອອກຈາກຄອບຄົວຂອງລາວ. ລາວໄດ້ກາຍເປັນຂ້າທາດ, ແລະ ບັດນີ້ເປັນນັກໂທດ. ແຕ່ພຣະຜູ້ເປັນເຈົ້າຍັງຊ່ວຍເຫລືອໂຢເຊັບຢູ່. ໂຢເຊັບບໍ່ໄດ້ທໍ້ຖອຍໃຈ. ພຣະຜູ້ເປັນເຈົ້າໄດ້ອວຍພອນຫົວໜ້າຜູ້ຄຸມຄຸກໃຫ້ເຫັນຄວາມດີຂອງໂຢເຊັບ. ຫົວໜ້າຜູ້ຄຸມຄຸກໄດ້ເລີ່ມໄວ້ວາງໃຈລາວ, ສະນັ້ນ ລາວຈຶ່ງໃຫ້ໂຢເຊັບເປັນຜູ້ຕາງໜ້າເບິ່ງແຍງພວກນັກໂທດທັງຫລາຍ.
ໂຢເຊັບໄດ້ພົບກັບນັກໂທດສອງຄົນ, ຜູ້ໜຶ່ງເປັນຫົວໜ້າພະນັກງານເຮັດເຂົ້າຈີ່, ອີກຜູ້ໜຶ່ງເປັນຫົວໜ້າພະນັກງານເຮັດເຫລົ້າອະງຸ່ນ, ທີ່ຮັບໃຊ້ຟາໂຣ. ຄົນທັງສອງໄດ້ມີຄວາມຝັນທີ່ແປກປະຫລາດ. ຜ່ານທາງອຳນາດຂອງພຣະຜູ້ເປັນເຈົ້າ, ໂຢເຊັບໄດ້ແປຄວາມຝັນຂອງພວກເຂົາ. ຄວາມຝັນຂອງຫົວໜ້າພະນັກງານເຮັດເຫລົ້າອະງຸ່ນໝາຍຄວາມວ່າ ລາວຈະຖືກປ່ອຍຕົວ. ສາມມື້ຈາກນັ້ນ, ລາວກໍຖືກປ່ອຍໃຫ້ກັບໄປຮັບໃຊ້ຟາໂຣເໝືອນເດີມ.
ປະຖົມມະການ 39:22–23; 40:1–21
ມື້ໜຶ່ງຟາໂຣເກີດວຸ້ນວາຍໃຈຫລາຍຍ້ອນຄວາມຝັນຂອງເພິ່ນ. ບໍ່ມີໃຜສາມາດແກ້ຄວາມຝັນໃຫ້ເພິ່ນ.
ແລ້ວຫົວໜ້າພະນັກງານເຮັດເຫລົ້າອະງຸ່ນຈື່ໄດ້ວ່າ ໂຢເຊັບສາມາດແປຄວາມຝັນ.
ໂຢເຊັບໄດ້ຖືກພາອອກຈາກຄຸກເພື່ອໄປແປຄວາມຝັນໃຫ້ຟາໂຣ. ໂຢເຊັບໄດ້ເວົ້າວ່າ ຄວາມຝັນນັ້ນໝາຍຄວາມວ່າ ປະເທດເອຢິບຈະມີອາຫານການກິນຢ່າງຫລວງຫລາຍເປັນເວລາເຈັດປີ ແລ້ວຈະຕິດຕາມດ້ວຍຄວາມອຶດຢາກເປັນເວລາເຈັດປີ ມີອາຫານເລັກນ້ອຍທີ່ຈະກິນ. ໂຢເຊັບໄດ້ບອກຟາໂຣວ່າ ປະເທດເອຢິບຄວນເກັບຮິບໂຮມອາຫານໃນລະຫວ່າງປີທີ່ອຸດົມສົມບູນ.
ຟາໂຣຮູ້ວ່າ ສິ່ງທີ່ໂຢເຊັບເວົ້າກ່ຽວກັບຄວາມຝັນຂອງເພິ່ນເປັນຄວາມຈິງ. ເພິ່ນໄດ້ປ່ອຍໂຢເຊັບອອກຈາກຄຸກ ແລະ ແຕ່ງຕັ້ງລາວໃຫ້ເປັນເຈົ້ານາຍໃຫຍ່ໃນປະເທດເອຢິບ. ເປັນເວລາເຈັດປີ, ໂຢເຊັບໄດ້ຊ່ວຍປະເທດເອຢິບເກັບຮິບໂຮມອາຫານ.
ແລ້ວຄວາມອຶດຢາກໄດ້ມາເຖິງ. ລະຫວ່າງເວລານີ້, ໃຜກໍປູກຫຍັງບໍ່ໄດ້ຜົນ. ຜູ້ຄົນໄດ້ເດີນທາງໄປປະເທດເອຢິບເພື່ອຊື້ອາຫານທີ່ໂຢເຊັບໄດ້ເກັບຮິບໂຮມໄວ້. ເປັນຍ້ອນໂຢເຊັບ, ຊາວເອຢິບຈຶ່ງໄດ້ເກັບອາຫານໄວ້ພຽງພໍສຳລັບຕົວເອງ ແລະ ຄົນອື່ນໆ ເພື່ອຈະໄດ້ລອດຈາກຄວາມອຶດຢາກ.