“ຄວາມຝັນທີ່ດົນໃຈຂອງໂຢເຊັບ,” ເລື່ອງພຣະຄຳພີເດີມ (2022)
“ຄວາມຝັນທີ່ດົນໃຈຂອງໂຢເຊັບ,” ເລື່ອງພຣະຄຳພີເດີມ
ຄວາມຝັນທີ່ດົນໃຈຂອງໂຢເຊັບ
ຄອບຄົວດີ້ນລົນທີ່ຈະຮັກກັນແລະກັນ
ນາງຣາເຊັນ ແລະ ຢາໂຄບໄດ້ອະທິຖານເປັນເວລາຫລາຍປີ ກ່ອນຈະໄດ້ລູກຊາຍ. ພຣະຜູ້ເປັນເຈົ້າໄດ້ຕອບຄຳອະທິຖານຂອງພວກເພິ່ນເມື່ອໂຢເຊັບໄດ້ເກີດມາ. ໂຢເຊັບເປັນລູກຊາຍຄົນໂປດຂອງຢາໂຄບ, ແລະ ເພິ່ນໄດ້ເອົາເສື້ອລ່າມພິເສດຜືນໜຶ່ງໃຫ້ລາວ. ພວກລູກຊາຍໃຫຍ່ສິບຄົນຂອງຢາໂຄບມີຄວາມອິດສາ.
ປະຖົມມະການ 30:22–24; 37:1–4
ເມື່ອໂຢເຊັບມີອາຍຸໄດ້ 17 ປີ, ລາວໄດ້ມີຄວາມຝັນທີ່ດົນໃຈວ່າ ລາວກຳລັງມັດເຂົ້າຢູ່ໃນທົ່ງກັບພວກອ້າຍນ້ອງຂອງລາວ. ຟ່ອນເຂົ້າຂອງໂຢເຊັບຕັ້ງຂຶ້ນຊື່. ແຕ່ຟ່ອນເຂົ້າຂອງພວກອ້າຍນ້ອງຂອງລາວໄດ້ຂາບລົງຕໍ່ໜ້າຟ່ອນເຂົ້າຂອງໂຢເຊັບ. ເມື່ອໂຢເຊັບເລົ່າຄວາມຝັນຂອງລາວໃຫ້ພວກອ້າຍຂອງລາວຟັງ, ພວກເຂົາກໍໃຈຮ້າຍໃຫ້ລາວ.
ຕໍ່ມາ, ໂຢເຊັບກໍໄດ້ມີຄວາມຝັນທີ່ດົນໃຈອີກ. ໃນຄວາມຝັນນີ້, ຕາເວັນ, ດວງເດືອນ, ແລະ ດວງດາວ 11 ດວງ ໄດ້ກົ້ມຂາບລາວ. ໂຢເຊັບໄດ້ເລົ່າຄວາມຝັນໃຫ້ຄອບຄົວຂອງລາວຟັງ. ຄວາມຝັນນີ້ຟັງແລ້ວຄືວ່າ ໂຢເຊັບຈະໄດ້ເປັນຜູ້ປົກຄອງເໜືອຄອບຄົວ. ພວກອ້າຍຂອງໂຢເຊັບຈຶ່ງໃຈຮ້າຍໃຫ້ລາວຫລາຍກວ່າເກົ່າ. ພວກເຂົາບໍ່ມັກຄວາມຝັນຂອງລາວ.
ມື້ໜຶ່ງພວກອ້າຍຂອງໂຢເຊັບໄດ້ໄປລ້ຽງແກະຢູ່ໄກບ້ານ. ຢາໂຄບໄດ້ສົ່ງໂຢເຊັບໃຫ້ໄປຈອບເບິ່ງພວກເຂົາ.
ພວກອ້າຍຂອງໂຢເຊັບບາງຄົນຢາກຂ້າລາວ. ພວກເຂົາໄດ້ກຸມແກ້ເສື້ອລ່າມຂອງລາວອອກ ແລະ ໄດ້ໂຍນລາວລົງໃນສ້າງທີ່ບໍ່ມີນ້ຳ.
ຂະນະທີ່ໂຢເຊັບຢູ່ໃນນ້ຳສ້າງ, ພວກອ້າຍຂອງລາວກໍເຫັນພວກພໍ່ຄ້າກຳລັງເດີນທາງໄປປະເທດເອຢິບ. ພວກອ້າຍໄດ້ຕັດສິນໃຈຂາຍໂຢເຊັບໃຫ້ເປັນຂ້າທາດຂອງພວກພໍ່ຄ້າ ເປັນຈຳນວນເງິນ 20 ຫລຽນ.
ແລ້ວພວກອ້າຍຂອງໂຢເຊັບໄດ້ເອົາເລືອດແບ້ທາໃສ່ເສື້ອລ່າມຂອງລາວ. ພວກອ້າຍໄດ້ໄປຫາພໍ່ຂອງພວກເຂົາ, ແລະ ເອົາເສື້ອລ່າມໃຫ້ເພິ່ນເບິ່ງ. ພວກເຂົາໄດ້ເວົ້າຕົວະຢາໂຄບ ແລະ ບອກເພິ່ນວ່າ ສັດປ່າໄດ້ຂ້າໂຢເຊັບ.
ຢາໂຄບຮ້ອງໄຫ້ເພາະເພິ່ນຄິດວ່າ ໂຢເຊັບຕາຍເສຍແລ້ວ.
ແຕ່ໂຢເຊັບຍັງມີຊີວິດຢູ່. ລາວຢູ່ຫ່າງໄກຈາກບ້ານໃນປະເທດເອຢິບ, ເປັນຢູ່ໃນຖານະຂ້າທາດ.