“ສາດສະດາເອລີຢາ,” ເລື່ອງພຣະຄຳພີເດີມ (2022)
“ສາດສະດາເອລີຢາ,” ເລື່ອງພຣະຄຳພີເດີມ
1 ກະສັດ 16–18
ສາດສະດາເອລີຢາ
ສັດທາຂອງແມ່ຄົນໜຶ່ງ ແລະ ການອັດສະຈັນຂອງພຣະຜູ້ເປັນເຈົ້າ
ຝົນບໍ່ຕົກຢູ່ໃນອານາຈັກອິດສະຣາເອນ, ແລະ ນ້ຳກໍກຳລັງຈະແຫ້ງໝົດໄປ. ກະສັດອາຮາບ ແລະ ລາຊີນີເຢເຊເບນບໍ່ມັກບັນດາສາດສະດາຂອງພຣະຜູ້ເປັນເຈົ້າ. ພວກເພິ່ນໄດ້ສັ່ງໃຫ້ຂ້າສາດສະດາບາງທ່ານ. ກະສັດ ແລະ ລາຊີນີໄດ້ອະທິຖານຕໍ່ຮູບເຄົາລົບເພື່ອຂໍໃຫ້ຝົນຕົກ. ແຕ່ສາດສະດາເອລີຢາໄດ້ບອກພວກເພິ່ນວ່າ ພຣະຜູ້ເປັນເຈົ້າຈະບໍ່ສົ່ງຝົນມາເປັນເວລາຫລາຍປີ.
1 ກະສັດ 16:29–33; 17:1; 18:13
ກະສັດ ແລະ ລາຊີນີໄດ້ໃຈຮ້າຍໃຫ້ເອລີຢາ. ພຣະຜູ້ເປັນເຈົ້າໄດ້ເຕືອນເອລີຢາວ່າ ໃຫ້ໄປລີ້ເພາະວ່າຊີວິດຂອງເພິ່ນຕົກຢູ່ໃນຂັ້ນອັນຕະລາຍ.
ພຣະຜູ້ເປັນເຈົ້າໄດ້ນຳເອລີຢາໄປທີ່ຫ້ວຍ ແລະ ໄດ້ສົ່ງກາເອົາອາຫານໄປໃຫ້ເພິ່ນກິນ. ແຕ່ເປັນເພາະບໍ່ມີຝົນ, ຫ້ວຍກໍໄດ້ແຫ້ງແລ້ງ, ແລະ ເອລີຢາກໍບໍ່ມີນ້ຳຈະດື່ມ.
ພຣະຜູ້ເປັນເຈົ້າໄດ້ນຳເອລີຢາໄປຫາຜູ້ຍິງຄົນໜຶ່ງຢູ່ເມືອງທີ່ຫ່າງໄກແຫ່ງໜຶ່ງ. ເອລີຢາໄດ້ຂໍນ້ຳ ແລະ ເຂົ້າຈີ່ຈາກນາງ. ແຕ່ນາງກໍມີພຽງພໍສຳລັບຕົວນາງເອງ ແລະ ລູກຊາຍຂອງນາງອີກມື້ໜຶ່ງເທົ່ານັ້ນ.
ເອລີຢາກໍຮູ້ວ່ານັ້ນແມ່ນອາຫານຄາບສຸດທ້າຍຂອງນາງ. ເພິ່ນໄດ້ສັນຍາກັບນາງວ່າ ຖ້າຫາກນາງລ້ຽງເຂົ້າເພິ່ນ, ພຣະຜູ້ເປັນເຈົ້າຈະຈັດຫາອາຫານໃຫ້ແກ່ຄອບຄົວຂອງນາງຈົນກວ່າຝົນຈະຕົກຄືນອີກ.
ຜູ້ຍິງຄົນນັ້ນໄດ້ເຮັດເຂົ້າຈີ່ໃຫ້ເອລີຢາ. ແລ້ວນ້ຳມັນ ແລະ ແປ້ງເຂົ້າຈີ່ຂອງນາງກໍເພີ່ມທະວີຂຶ້ນ. ມັນໄດ້ມີອາຫານພຽງພໍສຳລັບເອລີຢາ ແລະ ຄອບຄົວຂອງນາງເປັນເວລາຫລາຍວັນ.
ມື້ໜຶ່ງລູກຊາຍຂອງຜູ້ຍິງຄົນນັ້ນເປັນໄຂ້ ແລະ ໄດ້ຕາຍໄປ. ນາງໄດ້ຖາມເອລີຢາວ່າ ເປັນຫຍັງພຣະຜູ້ເປັນເຈົ້າຈຶ່ງປ່ອຍໃຫ້ສິ່ງນີ້ເກີດຂຶ້ນກັບນາງ.
ເອລີຢາດຳລົງຖານະປະໂລຫິດ. ເພິ່ນໄດ້ອວຍພອນລູກຊາຍຂອງນາງ ແລະ ໄດ້ທູນຂໍໃຫ້ພຣະຜູ້ເປັນເຈົ້າອະນຸຍາດໃຫ້ທ້າວນ້ອຍກັບຄືນມີຊີວິດ. ທ້າວນ້ອຍກໍໄດ້ຫາຍໃຈອີກ, ແລະ ຜູ້ຍິງຄົນນັ້ນກໍຮູ້ວ່າ ເອລີຢາເປັນສາດສະດາຂອງພຣະຜູ້ເປັນເຈົ້າ.