“ໄພພິບັດຕ່າງໆໃນປະເທດເອຢິບ,” ເລື່ອງພຣະຄຳພີເດີມ (2022)
“ໄພພິບັດຕ່າງໆໃນປະເທດເອຢິບ,” ເລື່ອງພຣະຄຳພີເດີມ
ອົບພະຍົບ 4–5; 7–12
ໄພພິບັດຕ່າງໆໃນປະເທດເອຢິບ
ການເລືອກຂອງຟາໂຣຕໍ່ຕ້ານພຣະຜູ້ເປັນເຈົ້າ
ໂມເຊໄວ້ວາງໃຈໃນພຣະຜູ້ເປັນເຈົ້າ ແລະ ໄດ້ກັບຄືນໄປປະເທດເອຢິບ. ໂມເຊ ແລະ ອາໂຣນອ້າຍຂອງເພິ່ນໄດ້ໄປຫາຟາໂຣ ແລະ ໄດ້ຂໍຮ້ອງໃຫ້ເພິ່ນປ່ອຍຊາວອິດສະຣາເອນໃຫ້ເປັນອິດສະລະ ແລະ ໜີໄປຈາກປະເທດເອຢິບ. ຟາໂຣໄດ້ໃຈຮ້າຍ ແລະ ປະຕິເສດ. ເພິ່ນໄດ້ບັງຄັບໃຫ້ຊາວອິດສະຣາເອນເຮັດວຽກໜັກຫລາຍຂຶ້ນ.
ເພາະວ່າຟາໂຣບໍ່ໄດ້ຮັບຟັງພຣະຜູ້ເປັນເຈົ້າ, ຊາວເອຢິບຈຶ່ງຖືກສາບແຊ່ງດ້ວຍໄພພິບັດຢ່າງຮ້າຍແຮງ. ທຳອິດ, ແມ່ນ້ຳທຸກສາຍໃນເອຢິບໄດ້ກາຍເປັນເລືອດ. ໂມເຊໄດ້ຂໍຮ້ອງຟາໂຣອີກວ່າ ໃຫ້ປ່ອຍຊາວອິດສະຣາເອນໄປ, ແຕ່ຟາໂຣກໍເວົ້າວ່າບໍ່.
ຕໍ່ຈາກນັ້ນ, ພຣະຜູ້ເປັນໄດ້ສົ່ງຝູງກົບມາຍັງປະເທດເອຢິບ. ມັນໄດ້ຢູ່ທົ່ວທຸກບ່ອນ. ຟາໂຣໄດ້ເວົ້າວ່າ ເພິ່ນຈະປ່ອຍຊາວອິດສະຣາເອນໄປ ຖ້າຫາກຝູງກົບໜີໄປ. ພຣະຜູ້ເປັນເຈົ້າໄດ້ເຮັດໃຫ້ຝູງກົບໜີໄປ, ແຕ່ຟາໂຣບໍ່ໄດ້ປ່ອຍຊາວອິດສະຣາເອນໄປ. ແລ້ວພຣະຜູ້ເປັນເຈົ້າໄດ້ສົ່ງຝູງຮີ້ນ ແລະ ຝູງເຫລືອກມາ.
ຕໍ່ຈາກນັ້ນ, ສັດຂອງຊາວເອຢິບກໍໄດ້ຕາຍໝົດ, ແຕ່ສັດຂອງຊາວອິດສະຣາເອນບໍ່ໄດ້ຕາຍຈັກໂຕ. ແລ້ວຊາວເອຢິບເກີດຕຸ່ມຝີຕາມຕົນຕົວຂອງພວກເຂົາ.
ພະຍຸຮ້າຍພ້ອມດ້ວຍໝາກເຫັບ ແລະ ໄຟກໍໄດ້ມາສູ່ປະເທດເອຢິບນຳອີກ. ສິ່ງນີ້ໄດ້ກໍ່ໃຫ້ເກີດການທຳລາຍທີ່ຮ້າຍແຮງ.
ຟາໂຣຍັງບໍ່ຍອມປ່ອຍຊາວອິດສະຣາເອນໄປ. ແລ້ວພຣະຜູ້ເປັນເຈົ້າໄດ້ສົ່ງຝູງຕັກກະແຕນມາ, ແລະ ມັນໄດ້ກິນອາຫານຂອງຜູ້ຄົນຈົນໝົດກ້ຽງ.
ແລ້ວກໍມີຄວາມມືດເປັນເວລາສາມວັນ. ໃນລະຫວ່າງໄພພິບັດຢ່າງຫລວງຫລາຍນັ້ນ, ຟາໂຣໄດ້ສັນຍາວ່າຈະປ່ອຍຊາວອິດສະຣາເອນໄປ ຖ້າຫາກໄພພິບັດຈະຢຸດຕິ, ແຕ່ເພິ່ນໄດ້ເວົ້າຕົວະທຸກໆເທື່ອ.
ຫລັງຈາກໄພພິບັດທີ່ແຕກຕ່າງທັງເກົ້າຢ່າງ, ຟາໂຣກໍບໍ່ໄດ້ປ່ອຍຊາວອິດສະຣາເອນໄປ. ພຣະຜູ້ເປັນເຈົ້າໄດ້ບອກໂມເຊວ່າ ໄພພິບັດທີ່ຮ້າຍແຮງອີກຢ່າງໜຶ່ງຈະເກີດຂຶ້ນ. ພຣະຜູ້ເປັນເຈົ້າໄດ້ນຳພາ ແລະ ປົກປ້ອງຊາວອິດສະຣາເອນຂະນະທີ່ພວກເຂົາໄດ້ລໍຖ້າອິດສະລະພາບຂອງພວກເຂົາ.