1 I teianei, i na, te tuatua atu nei au kia koe, i te mea e kua oronga atu koe i taua au tataanga ra ko tei orongaia atu te mana kia koe kia akauri na roto i te Urima e te Tumima ki roto i te rima o tetai tangata kino, e kua ngaro ia koe te reira.

2 E kua ngaro katoa ia koe taau orongaanga i taua taime rai, e kua poiri toou manako.

3 Kareka ra, ka akaoki akaou ia mai te reira kia koe; e no reira kia papu ia koe e e akarongo tinamou tikai toou e tae uatu ki te otianga o te angaanga akaurianga mei taau i akamata.

4 Auraka e oro viviki me kore ra e angaanga ki mua ake i toou maroiroi, e te ka rauka ia koe i te akauri; i na ra, kia maroiroi koe e tae uatu ki te openga.

5 E pure putuputu uatu rai, kia rauka ia koe kia tutara ki rungaʼo i te kino, e kia autu koe ki rungaʼo ia Satani, e kia rauka ia koe kia ora atu mei te au rima o te au tavini o Satani te ka tauturu i tana angaanga.

6 I na, kua tauta ana ratou i te takore ia koe; ae, te tika ua ra te reira, e ko te tangata oki taau i irinaki ra, te tauta ra aia i te takore ia koe.

7 E no te reira i karanga atu ei au e, e tangata kino aia, no te mea, te titau ra aia i te apai ke i te au mea tei orongaia kia rave koe, e kua tauta katoa oki aia kia takore i taau orongaanga.

8 E no te mea oki e, kua oronga koe i te tataanga ki roto i tona rima, i na, kua rave te au tangata kino i te au papa mei ia koe atu.

9 No reira, kua oronga ke koe i te reira, ae, te au mea tapu, ki te aronga kino.

10 E, i na, kua tuku a Satani i tetai manako kino ki roto i to ratou ngakau kia akatuke i te tuatua taau i angaanga kia tataia, me kore ra taau i akauri, tei riro ke atu mei roto i toou rima.

11 E i na, te tuatua atu nei au kia koe, i te mea oki e kua akatuke ratou i te au tuatua, ka tatau tarevakē ia mei taau i akauri e i akaueia kia tataia;

12 E, mei teia te tu, te kimi ra oki te diabolo i tetai ravenga kino e te kikite, kia rauka oki iaia i te takore i teia angaanga nei;

13 Kua tuku oki aia ki roto i to ratou au ngakau kia rave i teia, e na roto i te pikikaaanga e karangaʼi ratou e kua mou koe ia ratou, na roto i te au tuatua taau i akavare e naau i akauri.

14 Tika tikai taku e karanga atu kia koe, kare rava au e akatika ia Satani kia akatupu i tana au ravenga kino ki roto i teia mea nei.

15 E i na, kua tuku oki aia ki roto i to ratou au ngakau kia opara oki ia koe kia timata atu i to Atu ra ko te Atua, na roto i te patianga kia akauri akaou ia.

16 Ei reira, i na, ka karanga oki ratou ma te manako i roto i to ratou ngakau—e ka akara tatou kia kite e, me kua oronga mai rai te Atua i te mana kiaia kia akauri; me ka tika, ka oronga akaou mai rai aia i te mana kiaia;

17 E me ka oronga akaou mai te Atua i te mana kiaia, e me kore ra me ka akauri akaou aia, me kore ra me ka rauka akaou mai iaia taua tuatua rai, i na, ka aiteite te reira ki ta tatou, e kua akatuke oki tatou i te reira;

18 No reira kare te nga urianga e aiteite, e ka karanga tatou e kua pikikaa aia i roto i tana tuatua, e kare ana orongaanga, e kare oki ona mana;

19 No reira ka takore tatou iaia, e tana angaanga katoa; e ka rave oki tatou i teia kia kore oki tatou e akama i te pae openga, e kia rauka oki ia tatou te kakā o te ao nei.

20 Tika, tika tikai taku e karanga atu kia koe, kua mou piri a Satani i to ratou au ngakau; nana oki i taoriori i to ratou ngakau kia rave i te kino ei tamanamanata i te meitaki.

21 E kua viivii to ratou au ngakau, e kua kī i te kino maata e te ara viivii, e inangaro maata to ratou i te poiri auraka ra te mārama, no te mea e ua kino ta ratou au angaanga; e no reira, kare ratou e pati mai iaku.

22 Kua taoriori oki a Satani ia ratou e raukaʼi iaia i te arataki i to ratou au vaerua ki te akapouanga.

23 Kua akanoonoo i reira aia i tetai ravenga kikite, ma te manako e ka rauka iaia i te takore i te angaanga a te Atua; i na ra, ka akautungaia ratou no te reira, e ka oki rai te akama ki runga ia ratou a te rā akavaanga.

24 Ae, kua taoriori aia i to ratou au ngakau kia riri i teia angaanga.

25 Ae, kua tuatua atura a Satani kia ratou: E akavare, e tapapa ua maira na roto i te pikikaa kia opu, e kia rauka i reira ia kotou kia takore; i na, kare teia e kino. E ka akapera aia i te taparuparu ia ratou, ma te tuatua kia ratou e kare e ara me pikikaa, kia opu i tetai tangata i te pikikaa, kia takore ei ratou iaia.

26 E ka na reira aia i te taparuparu ia ratou, ma te arataki aere ia ratou, e kika ua atu aia ia ratou ki raro ia ade; e kua na reira aia kia opu ratou ia ratou uaorai ki roto i ta ratou uaorai puereere.

27 E ka akapera katoa aia i te oriori aereanga na raro e na runga ma te aaere ua anga ki runga i te enua nei, i te kimianga kia takore i te au vaerua o te au tangata nei.

28 Tika, tika tikai taku e karanga atu nei kia koe, aue oki aia ko tei pikikaa atu kia vare, no te mea kua manako aia e te pikikaa katoa ra tetai atu tangata kia vare, kare rava oki aia e kiritiia mai mei te akaapaanga a te Atua.

29 E teia nei, i na, kua akatuke ratou i teia au tuatua, no te mea kua karanga atu oki a Satani kia ratou e: Kua akavare aia ia kotou—e kua taparu akapera aia ia ratou kia rave i te ara, e kia timata atu oki koe i to Atu ra ko te Atua.

30 I na, te karanga atu nei au kia koe e, auraka koe e akauri akaou i te au tuatua tei peke ki vao mei roto i toou rima;

31 E, i na, kare oki ratou e akatupu i ta ratou au ravenga kino i te pikikaaanga i tera au tuatua. E i na, me rave akaou mai koe i tera au tuatua, ka karanga ratou e kua pikikaa koe i te akaurianga, e kua akaapa koe ia koe uaorai.

32 E, i na, ka nenei ratou i teia, e ka akaketaketa atu oki a Satani i te au ngakau o te au tangata kia riri ia koe, kia kore oki ratou e irinaki mai i taku tuatua.

33 Na roto i te reira, kua manako a Satani kia mana aia ki rungaʼo i toou kite papu i roto i teia uki, kia kore te angaanga e tupu i teia uki nei.

34 E i na, tei konei te pakari, i te mea oki e te akaari atu nei au i te pakari, e ma te oronga atu i tetai au akaueanga no runga i teia au mea, no taau ka rave, auraka rava koe e akaari atu i te reira ki to te ao nei, kia akaoti roa koe i te angaanga akauri.

35 Auraka e umere i taku i tuatua ake nei kia koe e: Tei konei te pakari, auraka e akaari atu ki to te ao nei—no te mea kua karanga atu au e, auraka e akaari atu ki to te ao nei, kia ora oki koe.

36 I na, kare au e karanga atu e auraka koe e akaari atu ki te aronga tuatua-tika;

37 I na ra, kare oki e rauka ua rai ia koe kia kite atu i te aronga tuatua-tika, e me kore ra, kare oki e rauka ua rai ia koe kia kite i te aronga kino e te aronga tika, e no reira i karanga atu ei au kia koe, e muteki ua koe e tae ua atu ki te tuatau e tau ei iaku no te akakite atu ki to te ao nei no runga i taua mea.

38 E teianei, tika tikai te karanga atu nei au kia koe e, ko te tuatua no teia au mea nei taau i tata, tei peke ki vao ake i toou rima, kua kotikotiia te reira ki runga i te papa a Niphai;

39 Ae, e akamaara koe e kua tuatuaia i roto i taua tataanga e e manganui atu tei orongaia mai no runga i teia au mea ki runga i te au papa a Niphai.

40 I teianei, ko te au tataanga tei kotikotiia ki runga i te papa a Niphai, e manganui atu ïa no runga i te tuatua taku e inangaro na roto i toku pakari kia akakiteia, kia kite te tangata i te reira tuatua—

41 No reira, e akauri koe i te kotikotianga i runga i te au papa a Niphai, e tae uatu ki te tuatau i tutaraʼi te ariki ko Beniamina, me kore ra e tae ua mai ki taau i akauri, e ko taau katoa i akono.

42 E i na, e nenei koe i te papaanga ei puka na Niphai; ei reira au e akapuapinga kore ei i te aronga tei taruri ke i taku au tuatua.

43 Kare rava au e akatika ia ratou kia akakore i taku angaanga; ae, ka akaari atu au kia ratou e e maata atu toku kite pakari i te ravenga kikite o te diabolo.

44 I na, ko tetai pae ua tei rauka ia ratou, me kore ra ko te akapotoanga o te tuatua a Niphai.

45 I na, e maata te au mea i kotikotiia ki runga i te papa a Niphai, ko tei riro ei akamāramaanga maata ki runga i taku evangelia, e no reira, te vai nei te kite i roto iaku kia akauri koe i te pae mua o teia kotikotianga nei a Niphai, e kia kapitiia mai ki roto i teia angaanga.

46 E, i na, ko te toengaanga katoa o teia papaanga, tei roto i reira te au tuanga katoatoa o taku evangelia ta toku au peroveta tapu, e pera katoa, ta taku au pipi i anoano i roto i ta ratou pure e tae mai ei ki te tangata nei.

47 E kua karanga atu au kia ratou, ka orongaia mai kia ratou na roto i to ratou akarongo i roto i ta ratou au pure;

48 Ae, e ko teia to ratou akarongo—e ko taku evangelia, taku i oronga atu kia ratou kia tutu aere ratou i roto i to ratou au rā, ka tae oki te reira ki to ratou ai taeake ko te ngati Lamana, e te aronga katoatoa tei riro mai ei ngati Lamana no to ratou pekapeka.

49 E teianei, kare e ko teia anake—ko to ratou akarongo i roto i ta ratou au pure koia oki kia kiteaia mai teia evangelia, e me ka rauka oki e na tetai iti tangata ke e noo i teia enua;

50 E kua akaruke ratou i tetai akameitakianga ki runga i teia enua nei na roto i ta ratou pure, e ko te ka irinaki i teia evangelia i roto i teia enua nei, ka rauka iaia te ora mutukore.

51 Ae, ka oronga ua ia atu teia i te katoatoa, noatu e koai te iti tangata, te kopu, te reo, e noatu e koai te te tangata.

52 E teianei, i na, kia tau ki to ratou akarongo i roto i ta ratou pure, taku ka oronga mai ei i teia tuanga o taku evangelia kia kite toku iti tangata. I na, kare oki au i apai mai ei takore i tei rauka ia ratou, mari ra kia akatupu.

53 E no teia tumu nei i karanga atu ei au e: me kare teia uki e akaketaketa i to ratou ngakau, ka akatinamou au i taku akonoanga ki rotopu ia ratou.

54 I teianei, kare au e tuatua i teia ei takore i taku akonoanga, mari ra, te tuatua nei au i teia ei akatupu i taku akonoanga.

55 No reira, ko ratou tei piri mai ki taku akonoanga kare ratou e mataku, ko ratou oki te ka noo ki te basileia o te ao ra.

56 I na ra, ko ratou tei kore e mataku mai iaku, e kare katoa e akono i taku au akaueanga, i na ra, kua akatu i tetai au akonoanga ke rai no ratou uaorai kia rauka tetai puapinga, e ko te aronga rave ara katoatoa, e tei akatupu i te basileia o te diabolo—ae, tika, tika tikai taku e karanga atu kia kotou, ko ratou oki taku ka tamataku, e ka ruketekete e tae uatu ki rotopu.

57 I na, ko Iesu Mesia au, te Tamaiti a te Atua. I aere mai nei au ki oku tikai, e kare ra toku i ariki mai iaku.

58 Ko au te mārama tei kakā mai ana i te poiri, e kare ra te poiri i ariki atu.

59 Ko au oki teia tei karanga atu e—E mamoe ke atu rai taku kare no teianei koro—ki taku au pipi, e manganui oki ratou tei kore i mārama mai iaku.

60 E ka akaari atu au ki teia au tangata e e mamoe ke atu rai taku, e rara oki ratou no te ngutuare o Iakoba.

61 E ka akaari mai au ki te mārama ta ratou au angaanga umere, ta ratou i rave na roto i toku ingoa;

62 Ae, ka apai katoa mai au ki te mārama i taku evangelia tei akakiteia kia ratou, e, i na, kare oki ratou e patoi i tei rauka ia kotou, ka akatupu ra ratou, e ka apai mai ki te mārama i te tuanga tika o taku apiianga, ae, e ko te apiianga okotai ua te reira iaku nei.

63 Te rave nei oki au i teia kia rauka iaku i te akatumu i taku evangelia, kia kore oki e maata te tauetonoanga; Ae, te taoriori nei oki a Satani i te ngakau o te au tangata kia tauetono no runga i te au mea o taku nei apiianga; e kua tarevakē ratou i roto i teia au mea nei, no te mea kua taui ratou i te au irava tapu, tei kore ratou i mārama i te reira.

64 No reira, ka eeu atu au i teia muna maata kia ratou;

65 E, i na, ka akakoukou au ia ratou mei te tinana moa e akakoukou i tana anau ki raro i tona peau, me kare ratou e akaketaketa i to ratou ngakau;

66 Ae, me ka aere mai ratou, ka rauka kia inu ua ratou i te au vai ora, kare e tutaki.

67 I na, ko taku apiianga teia—ko tei tataraara e aere mai kiaku nei, ko taku akonoanga ïa.

68 Ko tei maata atu, me kore ra tei meangiti mai tana ka akakite mai i teia, kare ïa e noku, kua patoi ra iaku; no reira kare aia e no taku akonoanga.

69 E teianei, i na, ko tei riro ki roto i taku akonoanga, e kua tapapa marie e tae uatu ki te openga, ka akamou au iaia ki runga i taku papa, e kare oki te au ngutupa o ade e autu ki rungaʼo ia ratou.

70 E teianei e akamaara i tana tuatua ta tei oronga mai i te ora e te mārama o te ao nei, toou Akaora, toou Atu e toou Atua. Amene.