1 Kuv hais tseeb rau nej, kuv cov phooj ywg, kuv muab tej lus ntuas rau nej, thiab ib lo lus txib, ntsig txog tag nrho tej teej tug uas yog lub koom haum li uas kuv txib kom tsim thiab tsa muaj, los ua ib lub koom haum koom siab, thiab ib lub koom haum kav ib txhis rau txoj kev pab kuv lub koom txoos, thiab rau txoj kev cawm neeg dim kom txog thaum kuv los—

2 Nrog kev cog lus uas pauv tsis taus thiab hloov tsis taus, kom npaum li uas cov kuv tau txib lawm rau siab ntseeg ces lawv yuav tau koob hmoov nrog ntau yam koob hmoov;

3 Tiam sis npaum li uas lawv tsis rau siab ntseeg ces tsis ntev lawv yuav raug foom tsis zoo.

4 Yog li ntawd, npaum li uas ib txhia ntawm kuv cov tub qhe tsis tau ua raws li lo lus txib, tiam sis tau rhuav txoj kev khi lus los ntawm kev ntshaw luag tug, thiab kev siv tej lus cuav, ces kuv tau foom tsis zoo rau lawv nrog ib txoj kev foom tsis zoo mob thiab hnyav heev.

5 Vim kuv, tus uas yog tus Tswv, tau hais nyob hauv kuv lub siab lawm tias, npaum li uas ib tug twg uas zwm rau lub koom haum yog neeg ua txhaum, los yog hais tias, tau rhuav txoj kev khi lus uas nej tau khi, ces nws yuav raug foom tsis zoo nyob hauv nws lub neej, thiab yuav raug muab tsuj los ntawm tus uas kuv pom zoo;

6 Vim kuv, tus uas yog tus Tswv, yeej yuav tsis pub luag thuam txog tej yam no—

7 Thiab muaj tag nrho tej no kom cov tsis muaj txim nyob hauv nej thiaj yuav tsis raug txim nrog cov tsis ncaj ncees; thiab kom cov muaj txim nyob hauv nej thiaj yuav khiav tsis dim; vim kuv, tus uas yog tus Tswv, tau cog lus tias nej yuav tau lub meej mom yeeb koob nyob ntawm kuv sab tes xis.

8 Yog li ntawd, npaum li uas nej yog neeg ua txhaum, ces nej yuav khiav tsis dim kuv txoj kev npau taws nyob hauv nej lub neej.

9 Npaum li uas nej raug txiav tawm vim kev ua txhaum, nej yuav khiav tsis dim txoj kev tsim txom ntawm Dab Ntxwg Nyoog kom txog hnub txhiv dim tso.

10 Thiab nim no kuv muab hwj chim rau nej txij kiag ntawm lub sij hawm no mus, hais tias yog ib tug twg nyob hauv nej, ntawm lub koom haum, yog ib tug neeg ua txhaum thiab tsis hloov siab lees txim rau txoj kev phem, ces nej yuav tsum muab nws pov rau txoj kev tsim txom ntawm Dab Ntxwg Nyoog; thiab nws yuav tsis muaj hwj chim coj tau kev phem los rau nej.

11 Qhov no yog kuv lub tswv yim; yog li ntawd, kuv muab ib lo lus txib rau nej tias, nej yuav tsum kho nej tus kheej thiab muab rau txhua tus neeg nws txoj hauj lwm saib xyuas;

12 Kom txhua tus neeg yuav muab ib zaj qhia rau kuv txog txoj hauj lwm saib xyuas uas tau muab tsa rau nws lawm.

13 Vim tsim nyog hais tias kuv, tus uas yog tus Tswv, yuav tsum ua kom txhua tus neeg muaj kev lav ris, ua ib tug saib xyuas tej koob hmoov hauv ntiaj teb, uas kuv tau ua thiab tau npaj rau kuv cov neeg.

14 Kuv, tus uas yog tus Tswv, tau nthuav lub ntuj, thiab puab lub ntiaj teb, yog kiag kuv tes hauj lwm; thiab txhua yam nyob haud yog kuv li.

15 Thiab yog kuv lub hom phiaj kom nrhiav noj nrhiav haus rau kuv haiv neeg ntseeg, vim txhua yam yog kuv li.

16 Tiam sis yeej yuav tsum ua li no raws li kuv tus kheej txoj kev; thiab saib seb qhov no yog txoj kev uas kuv, tus uas yog tus Tswv, tau tshaj tawm tias yuav nrhiav noj nrhiav haus rau kuv haiv neeg ntseeg, kom yuav muab cov pluag tsa sawv, li ntawd txo kom cov nplua nuj qis.

17 Vim lub ntiaj teb twb puv nkaus, thiab twb muaj txaus thiab muaj seem; muaj tseeb tiag, kuv npaj txhua yam, thiab cia rau noob neej kom xaiv ywj siab rau lawv tus kheej.

18 Yog li ntawd, yog hais tias ib tug neeg yuav muab tej khoom nplua mias uas kuv tau tsim, thiab tsis faib nws qhov mus rau cov pluag thiab cov txom nyem, raws li txoj kev cai ntawm kuv txoj moo zoo, ces nws yuav nrog cov neeg phem tsa nws qhov muag nyob hauv ntuj txiag teb tsaus, thiab raug kev tsim txom.

19 Thiab nim no, kuv hais tseeb rau nej, ntsig txog tej teej tug ntawm lub koom haum—

20 Cia li muab qhov chaw uas ziag no kuv tus tub qhe Sidney Rigdon nyob rau nws; thiab thaj av ziab tawv tsiaj muab ua nws txoj hauj lwm saib xyuas, los txhawb nws lub sij hawm nws ua hauj lwm nyob hauv kuv lub vaj txiv hmab, raws li kuv pom zoo, thaum kuv yuav txib nws.

21 Thiab cia li ua txhua yam kom tiav raws li lub koom haum tej lus ntuas, thiab raws li sawv daws pom yeem los yog lub koom haum lub suab, uas nyob hauv thaj av Kirtland.

22 Thiab txoj hauj lwm saib xyuas thiab koob hmoov no, kuv, tus uas yog tus Tswv, muab rau kuv tus tub qhe Sidney Rigdon ua ib txoj koob hmoov rau nws, thiab nws cov tub ki tom qab nws;

23 Thiab kuv yuav ntxiv tej koob hmoov ntau rau nws, npaum li uas nws yuav txo hwj chim rau kuv.

24 Thiab ntxiv, cia li muab rau kuv tus tub qhe Martin Harris, ua nws txoj hauj lwm saib xyuas, thaj av uas kuv tus tub qhe John Johnson tau los ntawm kev muab pauv nws qub txeeg qub teg yav tas los, muab rau nws thiab nws cov tub ki tom qab nws;

25 Thiab npaum li uas nws rau siab ntseeg, kuv yuav ntxiv tej koob hmoov ntau rau nws thiab nws cov tub ki tom qab nws.

26 Thiab cia kuv tus tub qhe Martin Harris muab nws cov nyiaj nruab rau txoj kev tshaj tawm kuv tej lus, raws li kuv tus tub qhe Joseph Smith, tus Hluas, yuav qhia.

27 Thiab ntxiv, cia li muab qhov chaw uas ziag no kuv tus tub qhe Frederick G. Williams nyob rau nws.

28 Thiab cia li muab thaj av uas nyob ze ib sab ntawm lub tsev rau kuv tus tub qhe Oliver Cowdery, thaj av uas yuav ua lub tsev luam ntawv, uas yog kem ib, thiab thaj av uas nws txiv nyob haud thiab.

29 Thiab cia li muab lub tsev luam ntawv thiab txhua yam uas zwm nrog rau kuv ob tug tub qhe Frederick G. Williams thiab Oliver Cowdery.

30 Thiab qhov no yuav yog nkawd txoj hauj lwm saib xyuas uas yuav muab tsa rau nkawd.

31 Thiab npaum li uas nkawd rau siab ntseeg, saib seb kuv yuav foom koob hmoov, thiab ntxiv tej koob hmoov ntau rau nkawd.

32 Thiab qhov no yog qhov pib ntawm txoj hauj lwm saib xyuas uas kuv tau tsa rau nkawd, rau nkawd thiab nkawd cov tub ki tom qab nkawd.

33 Thiab, npaum li uas nkawd rau siab ntseeg, kuv yuav ntxiv tej koob hmoov ntau rau nkawd thiab nkawd cov tub ki tom qab nkawd, twb yog ntau yam koob hmoov heev.

34 Thiab ntxiv, cia li muab lub tsev uas kuv tus tub qhe John Johnson nyob, thiab qub txeeg qub teg tag nrho rau nws, tsuas tseg qhov av uas tau tshwj tseg los ua kuv tej tsev xwb, uas zwm rau qub txeeg qub teg ntawd, thiab tej thaj av uas tau muab rau kuv tus tub qhe Oliver Cowdery.

35 Thiab npaum li uas nws rau siab ntseeg, kuv yuav ntxiv tej koob hmoov ntau rau nws.

36 Thiab yog kuv lub siab nyiam uas nws yuav tsum muag tej thaj av uas nrug zog ntawm qhov tseg los rhawv lub nroog ntawm kuv haiv neeg ntseeg, npaum li uas tus Ntsuj Plig lub suab yuav qhia los rau nws, thiab raws li lub koom haum tej lus ntuas, thiab los ntawm lub koom haum lub suab.

37 Thiab qhov no yog qhov pib ntawm txoj hauj lwm saib xyuas uas kuv tau muab tsa rau nws, ua ib txoj koob hmoov rau nws thiab nws cov tub ki tom qab nws.

38 Thiab npaum li uas nws rau siab ntseeg, ces kuv yuav ntxiv ntau yam koob hmoov rau nws.

39 Thiab ntxiv, cia li muab tej tsev thiab thaj av uas ziag no kuv tus tub qhe Newel K. Whitney nyob rau nws, thiab thaj av thiab lub tsev uas yog qhov chaw rau lub khw muag khoom, thiab thaj av uas nyob ntawm ces kaum sab qab teb ntawm lub khw muag khoom thiab thaj av uas muaj lub tsev ua tshauv.

40 Thiab tag nrho tej no kuv tau muab tsa rau kuv tus tub qhe Newel K. Whitney ua nws txoj hauj lwm saib xyuas, ua ib txoj koob hmoov rau nws thiab nws cov tub ki tom qab nws, kom zoo rau lub khw muag khoom ntawm kuv lub koom haum uas kuv tau tsim rau kuv ceg txheem ntseeg hauv thaj av Kirtland.

41 Muaj tseeb tiag, tseeb tiag, qhov no yog txoj hauj lwm saib xyuas uas kuv tau muab tsa rau kuv tus tub qhe N. K. Whitney, tag nrho kiag lub khw muag khoom, nws thiab nws tus sawv cev, thiab nws cov tub ki tom qab nws.

42 Thiab npaum li uas nws rau siab ua raws li kuv tej lus txib, uas kuv tau muab rau nws, ces kuv yuav ntxiv koob hmoov ntau rau nws thiab nws cov tub ki tom qab nws, twb yog ntau yam koob hmoov heev.

43 Thiab ntxiv, cia li muab thaj av uas nrug ntawm qhov chaw yuav ua kuv lub tsev, uas muaj plaub caug daj ntev thiab kaum ob daj dav rau kuv tus tub qhe Joseph Smith, tus Hluas, thiab qub txeeg qub teg uas ziag no nws txiv nyob;

44 Thiab qhov no yog qhov pib ntawm txoj hauj lwm saib xyuas uas kuv tau muab tsa rau nws, ua ib txoj koob hmoov rau nws, thiab rau nws txiv.

45 Vim saib seb, kuv tau tshwj qub txeeg qub teg tseg rau nws txiv, los txhawb nws; yog li ntawd yuav suav hais tias nws nrog kuv tus tub qhe Joseph Smith, tus Hluas tsev neeg.

46 Thiab kuv yuav ntxiv tej koob hmoov ntau rau kuv tus tub qhe Joseph Smith, tus Hluas, tsev neeg, npaum li uas nws rau siab ntseeg, twb yog ntau yam koob hmoov heev.

47 Thiab nim no, kuv muab ib lo lus txib ntsig txog Xi-oos rau nej, hais tias nej tsis txhob zwm ua ib lub koom haum koom siab nrog nej cov kwv tij hauv Xi-oos ntxiv lawm, tsuas yog raws li no xwb—

48 Tom qab nej tsim tau, yuav muab nej hu ua lub Koom Haum Koom Siab ntawm Ceg Txheem Ntseeg ntawm Xi-oos, nyob hauv lub Nroog Kirtland. Thiab nej cov kwv tij, tom qab lawv tsim tau, yuav hu lawv ua lub Koom Haum Koom Siab hauv lub Nroog Xi-oos.

49 Thiab yuav tsum muab lawv ua pab ua pawg los ntawm lawv tus kheej tej npe, thiab los ntawm lawv tus kheej lub npe; thiab lawv yuav tsum ua lawv tej hauj lwm los ntawm lawv tus kheej lub npe, thiab los ntawm lawv tus kheej tej npe;

50 Thiab nej yuav tsum ua nej tej hauj lwm los ntawm nej tus kheej lub npe, thiab los ntawm nej tus kheej tej npe.

51 Thiab kuv tau txib li no kom ua rau nej txoj kev cawm seej, thiab kuj yog rau lawv txoj kev cawm seej thiab, vim rau qhov lawv raug muab ntiab tawm thiab rau qhov uas tseem yuav los.

52 Vim tej kev khi lus tau raug muab rhuav los ntawm kev ua txhaum, los ntawm kev ntshaw luag tug thiab kev siv tej lus cuav—

53 Yog li ntawd, nej lub koom haum koom siab nrog nej cov kwv tij tas lawm, es nej thiaj li tsis khi nrog rau lawv tsuas yog txij li lub sij hawm no xwb, tsuas yog raws li no xwb, li kuv tau hais, los ntawm kev qiv nyiaj txiag raws li lub koom haum no pom zoo nyob hauv kev sab laj, raws li nej tej xwm txheej yuav cia thiab raws li lub suab ntawm pawg sab laj coj.

54 Thiab ntxiv, kuv muab ib lo lus txib rau nej ntsig txog nej txoj hauj lwm saib xyuas uas kuv tau muab rau nej.

55 Saib seb, tag nrho tej teej tug no yog kuv li, yog tsis li ces nej txoj kev ntseeg tsis muaj nuj nqis, thiab nej yuav pom hais tias nej yog neeg siab dag, thiab tej kev khi lus uas nej tau khi rau kuv twb raug muab rhuav;

56 Thiab yog hais tias tej teej tug yog kuv li, ces nej yog cov saib xyuas; yog tsis li ces nej tsis yog cov saib xyuas.

57 Tiam sis, kuv hais tseeb rau nej tias, kuv tau tsa nej los ua cov saib xyuas kuv lub tsev, twb yog cov saib xyuas tiag.

58 Thiab yog rau lub hom phiaj no es kuv thiaj tau txib nej kom muab nej tus kheej ua pab ua pawg, twb kom luam kuv tej lus, qhov txhij txhua ntawm kuv cov vaj lug kub, tej kev tshwm sim uas kuv tau muab rau nej, thiab tej uas, tom qab no mus, tej lub sij hawm kuv yuav muab rau nej—

59 Rau lub hom phiaj txhim tsa kuv lub koom txoos thiab nceeg vaj rau hauv lub ntiaj teb, thiab los npaj kuv cov neeg rau lub sij hawm thaum kuv yuav nrog lawv nyob, uas twb yuav txog lawm.

60 Thiab nej yuav tsum npaj ib qho chaw ua ib lub txhab nyiaj rau nej tus kheej, thiab muab qhov chaw ntawd fij tseg rau kuv lub npe.

61 Thiab nej yuav tsum tsa ib tug hauv nej los saib xyuas lub txhab nyiaj, thiab yuav tsum muab nws tsa los mus rau txoj koob hmoov no.

62 Thiab yuav tsum muaj ib lub cim rau lub txhab nyiaj, thiab tag nrho tej yam dawb ceev yuav tsum coj mus cia hauv lub txhab nyiaj; thiab yuav tsum tsis muaj ib tug neeg hauv nej muab tej ntawd hu ua nws li, los sis ib feem twg nyob haud, vim lub txhab nyiaj yog nej sawv daws tug ua ke.

63 Thiab kuv muab lub txhaj nyiaj rau nej txij kiag ntawm lub sij hawm no mus; thiab nim no yuav tsum xyuas, kom nej mus thiab ua tej hauj lwm saib xyuas uas kuv tau tsa rau nej, tsuas yog tseg tej yam dawb ceev xwb, rau lub hom phiaj muab tej yam dawb ceev no luam raws li kuv tau hais.

64 Thiab tej tsam thawj los ntawm tej yam dawb ceev yuav tsum muab ceev cia hauv lub txhab nyiaj, thiab yuav tsum nias lub cim rau; thiab yuav tsum txhob pub ib tug twg muab siv los yog muab rho tawm hauv lub txhab nyiaj mus, thiab yuav tsum txhob muab lub cim uas muab nias rau rhuav, tsuas yog los ntawm lub koom haum lub suab xwb, los sis los ntawm lo lus txib xwb.

65 Thiab nej yuav tsum ceev tej tsam thawj ntawm tej yam dawb ceev hauv lub txhab nyiaj zoo li no, rau tej hom phiaj dawb ceev thiab dawb huv.

66 Thiab yuav tsum muab qhov no hu ua tus Tswv lub txhab nyiaj dawb ceev; thiab yuav tsum muab ib lub cim nias rau kom lub txhab nyiaj yuav dawb huv thiab muab fij tseg rau tus Tswv.

67 Thiab ntxiv, yuav tsum npaj dua lwm lub txhab nyiaj, thiab tsa ib tug neeg los ceev tej nyiaj txiag, thiab yuav tsum muab ib lub cim nias rau.

68 Thiab tag nrho tej nyiaj uas nej txais tau hauv nej txoj hauj lwm saib xyuas, los ntawm kev ntxiv rau tej teej tug uas kuv tau muab rau nej, ntawm tej vaj tsev, los yog ntawm tej av, los yog ntawm tej nyuj, los yog ntawm txhua yam tsuas yog tseg tej ntawv sau dawb huv thiab dawb ceev xwb, uas kuv tau tshwj tseg rau kuv tus kheej rau tej hom phiaj dawb huv thiab dawb ceev, yuav tsum muab coj mus tso rau hauv lub txhab nyiaj sai li sai thaum nej tau tej nyiaj, qhov ib puas, los sis qhov tsib caug, los sis qhov nees nkaum, los sis qhov kaum, los sis qhov tsib.

69 Los yog hais tias, yog muaj ib tug neeg twg nyob hauv nej tau tsib daulas ces kom nws muab coj mus tso rau hauv lub txhab nyiaj; los yog nws tau kaum, los yog nees nkaum, los yog tsib caug, los yog ib puas, cia nws ua tib yam nkaus li ntawd;

70 Thiab yuav tsum tsis pub ib tug neeg twg hauv nej hais tias yog nws tus kheej li; vim yuav tsis hu hais tias yog nws li, tsis hais feem twg.

71 Thiab yuav tsum tsis txhob muab ib feem twg coj los siv, los yog muab rho tawm hauv lub txhab nyiaj mus, tsuas yog los ntawm lub koom haum lub suab thiab kev sawv daws pom yeem xwb.

72 Thiab qhov no yuav yog lub koom haum lub suab thiab sawv daws kev pom yeem—kom muaj ib tug neeg hauv nej hais rau tus ceev nyiaj txiag tias: Kuv yuav tsum muaj qhov no los pab kuv nyob hauv kuv txoj hauj lwm saib xyuas—

73 Txawm yog tsib daulas, los sis kaum daulas, los yog nees nkaum, los yog tsib caug, los yog ib puas, tus ceev nyiaj txiag mam muab rau nws qhov uas nws xav tau los pab nws nyob hauv nws txoj hauj lwm saib xyuas—

74 Kom txog thaum pom hais tias nws yog ib tug neeg ua txhaum, thiab pawg sab laj pom meej hais tias nws yog ib tug saib xyuas uas tsis rau siab ntseeg thiab tsis muaj tswv yim.

75 Tiam sis npaum li uas nws yog ib tug mej zeej tag nrho, thiab rau siab ntseeg thiab muaj tswv yim thaum ua nws txoj hauj lwm saib xyuas, qhov no yuav yog nws lub cim rau tus ceev nyiaj txiag kom tus ceev nyiaj txiag yuav tsum tsis txhob xyeej.

76 Tiam sis yog muaj kev ua txhaum, tus ceev nyiaj txiag yuav tsum ua raws li pawg sab laj thiab lub koom haum lub suab.

77 Thiab yog hais tias tus ceev nyiaj txiag yog ib tug saib xyuas tsis rau siab thiab tsis muaj tswv yim, nws yuav tsum ua raws li pawg sab laj thiab lub koom haum lub suab, thiab yuav tsum raug muab rho tawm ntawm nws qhov chaw mus, thiab yuav tsum tsa lwm tus los pauv nws qhov chaw.

78 Thiab ntxiv, kuv hais tseeb rau nej, ntsig txog nej tej nuj nqis—saib seb yog kuv lub siab nyiam uas nej yuav tsum them nej tej nuj nqis kom tas.

79 Thiab yog kuv lub siab nyiam uas nej yuav tsum txo nej lub hwj chim rau kuv, thiab tau txoj koob hmoov no los ntawm nej txoj kev rau siab thiab kev txo hwj chim thiab kev thov Vajtswv nrog kev ntseeg.

80 Thiab npaum li uas nej rau siab thiab txo hwj chim, thiab muab siab rau txoj kev thov Vajtswv nrog kev ntseeg, saib seb, kuv yuav ua kom cov neeg uas nej tshuav nuj nqis rau lub siab mos muag, kom txog thaum kuv yuav xa tej yam los rau nej los txhiv nej dim.

81 Yog li ntawd cia li sau ntawv nrawm nroos mus lawm tim New York thiab sau raws li tej uas kuv tus Ntsuj Plig kom hais; thiab kuv yuav ua kom cov neeg uas nej tshuav nuj nqis rau lub siab mos muag, xwv kom yuav muab txoj kev xav ua rau nej raug txom nyem tshem tawm hauv lawv lub siab mus.

82 Thiab npaum li uas nej txo hwj chim thiab rau siab ntseeg thiab hu txog kuv lub npe, saib seb, kuv yuav muab txoj kev muaj yeej rau nej.

83 Kuv cog lus rau nej tias, yuav muab nej tso dim tib zaug no tawm ntawm nej txoj kev ua qhev.

84 Npaum li uas nej tau lub cib fim los qiv nyiaj ntawm tsheej pua, los sis tsheej txhiab, kom txog thaum qiv txaus los mus tso nej dim ntawm kev ua qhev, nej muaj cai ua li ntawd.

85 Thiab cog lus txog tej teej tug uas kuv tau muab rau hauv nej txhais tes, tib zaug no, los ntawm kev xees nej lub npe los ua ke pom yeem los sis li cas, raws li pom hais tias zoo rau nej.

86 Kuv tso cai li no rau nej, tib zaug no; thiab saib seb, yog hais tias nej mus ua tej yam uas kuv tau qhia rau nej, raws li kuv tej lus txib, tag nrho tej yam no yog kuv li, thiab nej yog kuv cov saib xyuas, thiab tus tswv yuav tsis cia nws lub tsev raug ua kom puas tsuaj. Twb yog li ntawd. Amees.