1 Nyob hauv lub koom txoos muaj ob lub pov thawj hwj, hu ua, lub pov thawj hwj Mekhixedes thiab lub pov thawj hwj Aloos, uas muaj lub Pov Thawj Hwj Xeem Levis nyob rau haud.

2 Vim li cas hu thawj lub ua lub Pov Thawj Hwj Mekhixedes twb yog vim Mekhixedes yog ib tug pov thawj hlob zoo kawg nkaus.

3 Ua ntej nws nyob hauv lub ntiaj teb ces tau hu lub pov thawj hwj ntawd ua lub Pov Thawj Hwj Dawb Huv, raws li tus Txheej Txheem ntawm Vajtswv Leej Tub.

4 Tiam sis los ntawm txoj kev saib taus los yog hawm tus Tswv Ntuj Tswv Teb lub npe, kom tsis txhob hais nws lub npe ntau ntau, lawv, cov nyob hauv lub koom txoos, nyob txheej puag thaum ub, thiaj tau muab lub pov thawj hwj ntawd hu raws Mekhixedes, los yog lub Pov Thawj Hwj Mekhixedes.

5 Tag nrho lwm cov thawj coj los yog lub luag hauj lwm nyob hauv lub koom txoos puav leej yog txuas rau lub pov thawj hwj no.

6 Tiam sis muaj ob lub sib cais los yog ob tuam hau—ib lub yog lub Pov Thawj Hwj Mekhixedes, thiab ib lub yog lub Pov Thawj Hwj Aloos los yog lub Pov Thawj Hwj Xeem Levis.

7 Lub luag hauj lwm ntawm ib tug txwj laug yog los hauv lub pov thawj hwj Mekhixedes los.

8 Lub Pov Thawj Hwj Mekhixedes tuav txoj cai ntawm pawg thawj tswj hwm, thiab muaj hwj chim thiab txoj cai kav tag nrho tej hauj lwm nyob hauv lub koom txoos nyob rau txhua tiam neeg ntawm lub ntiaj teb, los saib xyuas tej yam ntawm sab ntsuj plig.

9 Pawg Thawj Tswj Hwm ntawm lub Pov Thawj Hwj Hlob, raws Mekhixedes tus txheej txheem, muaj txoj cai los coj ua tag nrho tej luag hauj lwm nyob hauv lub koom txoos.

10 Cov pov thawj hlob raws li tus txheej txheem ntawm lub Pov Thawj Hwj Mekhixedes muaj txoj cai los coj ua lawv tus kheej txoj hauj lwm, raws li txoj kev qhia ntawm pawg thawj tswj hwm, saib xyuas tej yam ntawm sab ntsuj plig, thiab kuj ua lub luag hauj lwm ntawm ib tug txwj laug, pov thawj (ntawm Xeem Levis tus txheej txheem), xib hwb, diskas, thiab mej zeej.

11 Tus txwj laug muaj txoj cai los coj ua hauj lwm sawv tus pov thawj hlob cev thaum tus pov thawj hlob tsis nyob ntawd.

12 Tus pov thawj hlob thiab txwj laug yuav tsum saib xyuas tej yam ntawm sab ntsuj plig, kom raws li tej kev khi lus thiab tej lus txib ntawm lub koom txoos; thiab lawv muaj txoj cai los coj ua tag nrho tej hauj lwm ntawm lub koom txoos no thaum tsis muaj cov thawj coj siab dua nyob ntawd.

13 Lub pov thawj hwj thib ob hu ua lub Pov Thawj Hwj Aloos, vim yog tau muab lub Pov Thawj Hwj no rau Aloos thiab nws cov tub ki, dhau tag nrho lawv tiam neeg.

14 Vim li cas ho hu ua lub pov thawj hwj yau zog yog vim lub pov thawj hwj no txuas rau lub loj zog, los sis lub Pov Thawj Hwj Mekhixedes, thiab muaj hwj chim ua tej kab ke ntawm sab cev nqaij daim tawv.

15 Pawg npisov yog pawg thawj tswj hwm ntawm lub pov thawj hwj no, thiab tuav cov yawm sij los yog txoj cai ntawm lub pov thawj hwj no.

16 Tsis muaj ib tug neeg uas muaj txoj cai rau lub luag hauj lwm no, tuav cov yawm sij ntawm lub pov thawj hwj no, tsuas yog nws yog kiag Aloos ib tug xeeb ntxwv xwb.

17 Tiam sis ib yam li ib tug pov thawj hlob ntawm lub Pov Thawj Hwj Mekhixedes muaj txoj cai los coj ua tag nrho tej hauj lwm uas qis dua, nws kuj coj ua tau lub luag hauj lwm ntawm tus npisov thaum nrhiav tsis tau tus uas yog kiag Aloos tus xeeb ntxwv, yog hais tias muab nws hu thiab tshwj cia thiab tsa rau lub hwj chim no los ntawm Pawg Thawj Tswj Hwm ntawm lub Pov Thawj Hwj Mekhixedes tes.

18 Lub hwj chim thiab txoj cai ntawm lub pov thawj hwj siab zog, los yog lub Pov Thawj Hwj Mekhixedes, yog tuav cov yawm sij ntawm tag nrho lub koom txoos tej koob hmoov ntawm sab ntsuj plig—

19 Kom muaj lub cib fim txais tau tej txuj ci uas neeg tsis paub txog lub nceeg vaj ceeb tsheej, kom ntuj qhib rau lawv, kom mus koom nrog txoj kev sib txoos thiab lub koom txoos ntawm tus Tub Hlob, thiab kom xyiv fab rau txoj kev sib raug zoo thiab yeeb haum ntawm Vajtswv uas yog Leej Txiv, thiab Yexus uas yog tus neeg nruab nrab ntawm txoj kev khi lus tshiab.

20 Lub hwj chim thiab txoj cai ntawm lub pov thawj hwj qis zog, los yog lub Pov Thawj Hwj Aloos, yog tuav cov yawm sij ntawm cov tim tswv txoj kev los txhawb pab, thiab los saib xyuas tej kab ke ntawm sab cev nqaij daim tawv, kev ua raws nraim txoj moo zoo, txoj kev cai raus dej ntawm kev hloov siab lees txim kom txais txoj kev zam txim rau tej kev txhaum, raws li tej kev khi lus thiab tej lus txib.

21 Yuav tsum muaj cov thawj tswj hwm, los yog thawj coj tswj hwm los ntawm, los sis muab tsa los ntawm cov uas tau muab tsa rau ob peb lub luag hauj lwm nyob hauv ob lub pov thawj hwj no.

22 Nyob rau ntawm lub Pov Thawj Hwj Mekhixedes, peb tug Pov Thawj Hlob uas Tswj Hwm, uas xaiv los ntawm pawg ntawd, hu los thiab muab tsa rau lub luag hauj lwm ntawd, thiab txhawb nqa los ntawm txoj kev tso siab, kev ntseeg, thiab kev thov Vajtswv ntawm cov ntseeg, ces ua ib Pawg Thawj Tswj Hwm ntawm lub Koom Txoos.

23 Tus Tswv hu kaum ob tug sab laj uas ncig mus ua hauj lwm los ua Kaum Ob tug Thwj Tim, los sis cov tim khawv tshwj xeeb rau Khetos lub npe mus thoob plaws lub ntiaj teb—li no lawv thiaj txawv lwm cov thawj coj nyob hauv lub koom txoos ntawm tej dej num ntawm qhov uas Vajtswv hu lawv ua.

24 Thiab lawv ua ib pawg, muaj txoj cai thiab hwj chim sib luag zos li peb tug thawj tswj hwm uas nyuam qhuav tau hais los lawm.

25 Tus Tswv kuj hu cov Xya Caum los mus tshaj tawm txoj moo zoo, thiab los mus ua cov tim khawv tshwj xeeb rau Lwm Haiv Neeg thiab rau tag nrho neeg ntiaj teb—li no lawv thiaj txawv lwm cov thawj coj nyob hauv lub koom txoos ntawm tej dej num ntawm qhov uas Vajtswv hu lawv ua.

26 Thiab lawv ua ib pawg, muaj txoj cai sib luag zos li Kaum Ob tug tim khawv tshwj xeeb los sis cov Thwj Tim nyuam qhuav hais ntawd.

27 Thiab txhua txoj kev txiav txim siab los ntawm ob pawg no yuav tsum yog txhua tus hauv ob pawg no lub suab pom zoo; txhais hais tias, txhua tus mej zeej nyob hauv nws pawg yuav tsum pom zoo rau nws pawg tej kev txiav txim siab, es thiaj yuav ua rau lawv tej kev txiav txim siab muaj hwj chim los sis raug cai ua ke—

28 Ib feem coob yuav ua tau ib pawg yog hais tias thaum tej xwm txheej ua kom muaj tsis taus lwm txoj hau kev—

29 Yog hais tias tsis muaj li no, lawv tej kev txiav txim siab tsis muaj cai tau tej koob hmoov uas zoo ib yam li tej kev txiav txim siab ntawm pawg peb tug thawj tswj hwm nyob rau yav puag thaum ub, cov uas tau tsa raws li Mekhixedes tus txheej txheem, thiab yog neeg ncaj ncees thiab dawb huv.

30 Tej kev txiav txim siab ntawm tej pawg no, los sis ib pawg ntawd, yuav tsum txiav txim raws li kev ncaj ncees tag nrho, raws li kev dawb huv, thiab nrog kev txo siab txo ntsws, siab mos siab muag thiab ua siab ntev, thiab nrog kev ntseeg, thiab kev tsim txiaj, thiab kev txawj ntse, kev xyuam xim, kev siab ntev, kev coj ncaj li Vajtswv, kev siab zoo li kwv tij ua rau kwv tij thiab kev siab hlub;

31 Vim txoj kev cog lus yog li no hais tias, yog muaj tej yam no ntau nyob hauv lawv ces lawv yuav tawg paj txi txiv ntawm txoj kev paub txog tus Tswv.

32 Thiab yog tej pawg no txiav txim siab los ntawm kev ua tsis ncaj ncees, ces coj tau kev txiav txim siab no mus rau ntawm ib pawg koom txoos los ntawm ob peb pawg, uas yog lub koom txoos cov thawj coj ntawm sab ntsuj plig; yog tsis li ces yuav tsis muaj peev xwm thov hais dua los ntawm lawv tej kev txiav txim siab.

33 Kaum Ob tug Thwj Tim yog ib Pawg Thawj Sab Laj Hlob Ncig Mus Ua Hauj Lwm, mus coj ua hauj lwm ntawm tus Tswv lub npe, los ntawm Pawg Thawj Tswj Hwm ntawm lub Koom Txoos txoj kev qhia, raws li lub ntuj ceeb tsheej tau tsim muaj lawm; los mus txhim tsa lub koom txoos, thiab kav tag nrho tej xwm hauv lub koom txoos nyob hauv txhua lub teb chaws, uas ua ntej yog mus rau Lwm Haiv Neeg thiab thib ob yog mus rau cov Neeg Yudais.

34 Cov Xya Caum yuav tsum ua dej num los ntawm tus Tswv lub npe, raws li Kaum Ob tug Thwj Tim los yog pawg sab laj hlob ncig mus ua hauj lwm txoj kev qhia, rau txoj kev txhim tsa lub koom txoos thiab tswj tag nrho tej xwm hauv lub koom txoos nyob hauv txhua lub teb chaws, qhov ua ntej yog mus rau Lwm Haiv Neeg thiab tom qab ntawd mus rau cov Neeg Yudais—

35 Tus Tswv xa Kaum Ob tug Thwj Tim tawm mus, thiab tuav cov yawm sij, mus qhib lub qhov rooj los ntawm txoj kev tshaj tawm Yexus Khetos txoj moo zoo, thiab ua ntej yog mus rau Lwm Haiv Neeg thiab tom qab ntawd mus rau cov Neeg Yudais.

36 Cov sab laj hlob ntawm zej zog, nyob hauv tej ceg txheem ntseeg ntawm Xi-oos, ua tau ib pawg muaj txoj cai sib luag rau lub koom txoos tej xwm, hais txog tag nrho lawv tej kev txiav txim siab, zoo li pawg thawj tswj hwm, los yog zoo li pawg sab laj hlob uas ncig mus ua hauj lwm.

37 Pawg sab laj hlob hauv Xi-oos ua tau ib pawg muaj txoj cai sib luag rau lub koom txoos tej xwm, hais txog tag nrho lawv tej kev txiav txim siab, nyob hauv tej ceg txheem ntseeg ntawm Xi-oos li pawg Kaum Ob tug Thwj Tim.

38 Pawg sab laj hlob ncig mus ua hauj lwm tej dej num yog mus hais cov Xya Caum, thaum lawv xav tau kev pab, los mus ua ob peb txoj hauj lwm tshaj tawm thiab qhia txoj moo zoo, es tsis yog muab rau lwm cov.

39 Kaum Ob tug Thwj Tim tej dej num, nyob hauv txhua pawg ntseeg loj ntawm lub koom txoos, yog mus tsa cov ua hauj lwm yawg suab, raws li kev tshwm sim yuav qhia lawv rau Kaum Ob tug Thwj Tim—

40 Tus Tswv pom zoo rau tus txheej txheem ntawm lub pov thawj hwj no kom leej txiv muab cev mus rau leej tub, thiab cov xeeb ntxwv kiag ntawm cov tub ki uas tau xaiv tseg muaj txoj cai tuav, cov uas tau kev cog lus.

41 Tus Tswv muab tus txheej txheem no tsim nyob hauv Adas lub caij nyoog, thiab cev los raws caj ceg zoo li nram no:

42 Ntawm Adas los rau Xej, tus uas Adas tsa thaum muaj hnub nyoog rau caum cuaj xyoos, thiab Adas tau foom koob hmoov rau peb xyoos ua ntej nws (Adas) tuag, thiab tau txais Vajtswv txoj kev cog lus los ntawm nws txiv, hais tias nws cov xeeb leej xeeb ntxwv yuav ua cov uas tus Tswv xaiv, thiab hais tias yuav tshwj lawv tseg cia mus txog hnub kawg ntawm lub ntiaj teb;

43 Vim hais tias nws (Xej) yog ib tug neeg zoo tag nrho, thiab nws tus yam ntxwv zoo ib yam li nws txiv tus yam ntxwv, thiaj pom nws zoo li nws txiv ntawm txhua yam, thiab qhov txawv uas paub tau ntawm nws ces yog nws lub hnub nyoog xwb.

44 Tau muab Enos tsa thaum muaj hnub nyoog ib puas thiab peb caug plaub xyoos thiab plaub hlis, los ntawm Adas txhais tes.

45 Vajtswv tau hu Kenas nyob tom roob moj sab qhua thaum nws hnub nyoog muaj plaub caug xyoo; thiab nws tau ntsib Adas thaum taug kev mus rau qhov chaw Sidolamav. Kenas muaj yim caum xya xyoo thaum nws txais nws txoj kev tsa.

46 Mahalalees muaj plaub puas thiab cuaj caum rau xyoo thiab xya hnub thaum Adas txhais tes muab nws tsa, tus uas kuj tau foom koob hmoov rau nws.

47 Yales muaj ob puas xyoo thaum Adas txhais tes muab nws tsa, tus uas kuj tau foom koob hmoov rau nws.

48 Enauj muaj nees nkaum tsib xyoos Adas txhais tes muab nws tsa; thiab nws muaj rau caum tsib xyoos thaum Adas foom koob hmoov rau nws.

49 Thiab nws pom tus Tswv, thiab nws mus kev nrog tus Tswv, thiab tau nyob ntawm tus Tswv xub ntiag tsis tu ncua; thiab nws mus kev nrog Vajtswv peb puas thiab rau caum tsib xyoos, txhais hais tias nws muaj plaub puas thiab peb caug xyoo thaum nws plhis.

50 Methuxelas muaj ib puas xyoo thaum Adas txhais tes muab nws tsa.

51 Lamej muaj peb caug ob xyoos thaum Xej txhais tes muab nws tsa.

52 Nau-as muaj kaum xyoo thaum Methuxelas txhais tes muab nws tsa.

53 Peb xyoos ua ntej Adas tuag, nws tau hu Xej, Enos, Kenas, Mahalalees, Yales, Enauj, thiab Methuxelas, cov uas yog pov thawj hlob tag nrho, nrog rau cov seem tshuav ntawm nws cov xeeb leej xeeb ntxwv ncaj ncees, mus rau hauv lub hav Adas-oodais-Omas, thiab tau foom nws txoj koob hmoov kawg pub rau lawv nyob ntawd.

54 Thiab tus Tswv tau tshwm sim los cuag lawv, thiab lawv sawv ntsug thiab foom koob hmoov rau Adas, thiab hu nws ua Mikhayees, tus tub vaj ntxwv, tus thawj tim tswv.

55 Thiab tus Tswv muab kev nplij siab rau Adas, thiab hais rau nws tias: Kuv tau tsa koj los ua tus thawj; yuav muaj ntau haiv neeg los ntawm koj, thiab koj yog ib tug tub vaj ntxwv rau lawv mus ib txhis.

56 Thiab Adas sawv ntsug hauv nruab nrab ntawm pab neeg; thiab, txawm hais tias nws khoov pob vim txoj kev laus los, vim muaj tus Vaj Ntsuj Plig Dawb Huv puv npo, nws tau qhia ua ntej txog tej yam uas yuav raug nws cov xeeb leej xeeb ntxwv mus txog tiam neeg kawg nkaus.

57 Tej yam no tau muab sau tag nrho cia rau hauv Enauj phau ntawv, thiab yuav ua tim khawv txog tej no thaum txog lub sij hawm uas tau pom zoo.

58 Kaum Ob tug Thwj Tim tej dej num kuj yog mus tsa thiab muab tag nrho lwm cov tuav hauj lwm ntawm lub koom txoos nyob kom muaj chaw txawb chaw rau, raws li txoj kev tshwm sim uas hais tias:

59 Hais rau Khetos lub koom txoos nyob hauv thaj av Xi-oos, ntxiv rau lub koom txoos tej kev cai hais txog lub koom txoos tej hauj lwm—

60 Ib Tsoom Tub Rog tus Tswv hais li no, Kuv hais tseeb rau nej tias, yeej yuav tsum muaj cov txwj laug uas tswj hwm los mus tswj cov uas muaj lub luag hauj lwm ua ib tug txwj laug;

61 Thiab cov pov thawj los mus tswj hwm cov uas muaj lub luag hauj lwm ua ib tug pov thawj thiab;

62 Thiab cov xib hwb los mus tswj hwm cov uas muaj lub luag hauj lwm ua ib tug xib hwb thiab, zoo ib yam nkaus, thiab cov diskas thiab.

63 Yog li ntawd, txij ntawm tus diskas mus txog tus xib hwb, thiab txij ntawm tus xib hwb mus txog tus pov thawj, thiab txij ntawm tus pov thawj mus txog tus txwj laug, txhua tus uas tau muab tsa, raws li tej kev khi lus thiab tej lus txib ntawm lub koom txoos.

64 Ces mus rau lub Pov Thawj Hwj Hlob, uas yog lub tseem ceeb tshaj plaws.

65 Yog li ntawd, yeej yuav tsum muab ib tug ntawm lub Pov Thawj Hwj Hlob tsa los tswj lub pov thawj hwj, thiab yuav tsum muab nws hu ua tus Thawj Tswj Hwm ntawm lub Pov Thawj Hwj Hlob ntawm lub Koom Txoos;

66 Los yog hais tias, tus Pov Thawj Hlob uas Tswj Hwm lub Pov Thawj Hwj Hlob ntawm lub Koom Txoos.

67 Los ntawm tus ntawd ces muaj txoj kev ua tej kab ke thiab tej koob hmoov rau cov ntseeg, los ntawm kev tso tes rau saum taub hau.

68 Yog li ntawd, lub luag hauj lwm ua npisov tsis zoo ib yam li lub luag hauj lwm ntawd; vim lub luag hauj lwm ua npisov yog kev saib xyuas tag nrho tej yam ntawm sab cev nqaij daim tawv;

69 Txawm li ntawd los yuav tsum xaiv tus npisov los ntawm cov Pov Thawj Hwj Hlob los, yog hais tias nws tsis yog kiag Aloos ib tug xeeb ntxwv.

70 Yog hais tias nws tsis yog kiag Aloos ib tug xeeb ntxwv ces nws tuav tsis tau cov yawm sij ntawm lub pov thawj hwj ntawd.

71 Txawm li ntawd los, lub Koom Txoos cov thawj coj muaj cai muab ib tug pov thawj hlob, uas yog, raws li Mekhixedes tus txheej txheem, muaj cai tsa los saib xyuas tej yam ntawm sab cev nqaij daim tawv, uas paub txog tej ntawd los ntawm tus Ntsuj Plig ntawm txoj kev tseeb;

72 Thiaj kuj yog ua ib tug txiav txim nyob hauv Ixayees, los ua lub koom txoos tej hauj lwm, mus txiav txim rau cov neeg ua txhaum raws li tej lus tim khawv uas yuav muab los rau nws mloog raws li tej kev cai, los ntawm txoj kev pab ntawm nws ob tug pab cuam uas nws tau xaiv los sis yuav xaiv tawm hauv cov txwj laug ntawm lub koom txoos los.

73 Tej no yog qhov dej num ntawm tus npisov uas tsis yog kiag Aloos ib tug xeeb ntxwv, tiam sis tau muab tsa los rau lub Pov Thawj Hwj Hlob raws li Mekhixedes tus txheej txheem.

74 Zoo li no nws thiaj yuav ua tau ib tug txiav txim, twb yog ib tug txiav txim rau cov neeg nyob hauv Xi-oos, los sis nyob hauv ib ceg txheem ntseeg ntawm Xi-oos, los sis nyob hauv ib ceg ntseeg twg ntawm lub koom txoos uas yuav tsa nws los ua txoj hauj lwm qhuab qhia no, kom txog thaum Xi-oos tej ciaj ciam dav tuaj thiab tsim nyog muaj lwm cov npisov los yog cov txiav txim nyob hauv Xi-oos los yog nyob lwm qhov.

75 Thiab npaum li uas muaj lwm cov npisov uas lub Koom Txoos cov thawj coj muab tsa ces lawv yuav ua tib lub luag hauj lwm ntawd.

76 Tiam sis tus xeeb ntxwv kiag ntawm Aloos muaj txoj cai los nyob hauv pawg thawj tswj hwm ntawm lub pov thawj hwj no, los tuav cov yawm sij ntawm txoj hauj lwm qhuab qhia no, los ua lub luag hauj lwm npisov tsis tos leej twg, tsis tas muaj ob tug pab cuam, tsuas yog thaum uas tus Thawj Tswj Hwm ntawm lub Pov Thawj Hwj Hlob, raws li Mekhixedes tus txheej txheem, raug coj los txiav txim, los ua tus txiav txim nyob hauv Ixayees.

77 Thiab txoj kev txiav txim siab ntawm tej pawg sab laj no, kom raws li lo lus txib uas hais tias:

78 Ntxiv, kuv hais tseeb rau nej tias, lub koom txoos tej hauj lwm tseem ceeb tshaj plaws, thiab lub koom txoos tej txub nyuaj tshaj plaws, npaum li uas tsis muaj txoj kev txaus siab rau txoj kev txiav txim ntawm tus npisov los yog cov neeg txiav txim, ces yuav tsum muab tej ntawd coj mus thiab cev rau pawg sab laj ntawm lub koom txoos, rau ntawm Pawg Thawj Tswj Hwm ntawm lub Pov Thawj Hwj Hlob.

79 Thiab Pawg Thawj Tswj Hwm ntawm pawg sab laj ntawm lub Pov Thawj Hwj Hlob yuav muaj hwj chim hu lwm cov pov thawj hlob, kom muaj kaum ob leeg, los pab li cov pab cuam; thiab yog li ntawd Pawg Thawj Tswj Hwm ntawm lub Pov Thawj Hwj Hlob thiab cov pab cuam thiaj yuav muaj hwj chim txiav txim rau cov lus tim khawv raws li tej kev cai ntawm lub koom txoos.

80 Thiab tom qab txoj kev txiav txim siab no yuav tsis coj qhov no los rau tus Tswv ntxiv lawm; vim cov no yog pawg sab laj siab tshaj ntawm Vajtswv lub koom txoos, thiab yog txoj kev txiav txim siab kawg rau tej kev cov nyom ntawm tej xwm ntawm sab ntsuj plig.

81 Tsis muaj ib tug neeg twg zwm nyob hauv lub koom txoos uas lub koom txoos pawg sab laj no yuav zam.

82 Thiab npaum li uas ib tug Thawj Tswj Hwm ntawm lub Pov Thawj Hwj Hlob ho ua txhaum, ces nws yuav tsum raug coj los rau ntawm sawv daws pawg sab laj ntawm lub koom txoos, cov uas yuav tau kev pab los ntawm kaum ob tug pab cuam ntawm lub Pov Thawj Hwj Hlob;

83 Thiab lawv txoj kev txiav txim siab rau nws tus kheej yuav yog qhov kawg ntawm kev cov nyom ntsig txog nws.

84 Yog li ntawd, tsis muaj leej twg yuav zam los ntawm Vajtswv txoj kev txim lij thiab tej kev cai, xwv kom yuav ua txhua yam muaj chaw txawb chaw rau thiab ua tiag tiag rau Vajtswv pom, raws li qhov tseeb thiab kev ncaj ncees.

85 Thiab ntxiv, kuv hais tseeb rau nej tias, tej dej num ntawm tus thawj tswj hwm saib xyuas lub luag hauj lwm ua ib tug diskas yog los tswj kaum ob tug diskas, los sab laj nrog lawv, thiab los qhia lawv tej dej num rau lawv, ib leeg txhawb nqa ib leeg, ib yam li tau muab tshwm sim los raws li tej kev khi lus.

86 Thiab tej dej num ntawm tus thawj tswj hwm saib xyuas lub luag hauj lwm ua xib hwb yog tswj nees nkaum plaub tus xib hwb, thiab los sab laj nrog lawv, qhia lawv tej dej num rau lawv, ib yam li tau muab los nyob hauv tej kev khi lus.

87 Thiab tej dej num ntawm tus thawj tswj hwm saib xyuas lub Pov Thawj Hwj Aloos yog los tswj plaub caug yim tus pov thawj, thiab los sab laj nrog lawv, los qhia lawv tej dej num ntawm lawv lub luag hauj lwm rau lawv, ib yam li tau muab los nyob hauv tej kev khi lus—

88 Tus thawj tswj hwm no yuav tsum yog tus npisov; vim qhov no yog ib qho ntawm tej dej num ntawm lub pov thawj hwj no.

89 Ntxiv, tej dej num ntawm tus thawj tswj hwm saib xyuas lub luag hauj lwm ntawm cov txwj laug yog los tswj cuaj caum rau tus txwj laug, thiab los sab laj nrog lawv, thiab los qhia lawv raws li tej kev khi lus.

90 Pawg thawj tswj hwm no yog ib pawg txawv ntawm cov xya caum, thiab tus Tswv muab tsim los rau cov tsis ncig mus ua hauj lwm thoob ntiaj teb.

91 Thiab ntxiv, tej dej num ntawm tus Thawj Tswj Hwm los ntawm lub luag hauj lwm ntawm lub Pov Thawj Hwj Hlob yog los tswj hwm tag nrho lub koom txoos, thiab ua zoo li Mauxes—

92 Saib seb, qhov no yog tswv yim; muaj tseeb tiag, los ua ib tug pom tau, ib tug txais kev tshwm sim, ib tug txhais lus, thiab ib tug yaj saub, muaj tag nrho Vajtswv tej txiaj ntsim uas nws foom pub rau tus thawj ntawm lub koom txoos.

93 Thiab yog raws li txoj kev ua yog toog pom tus txheej txheem ntawm cov Xya Caum, kom lawv yuav tsum muaj xya tus thawj tswj hwm tswj lawv, xaiv tawm ntawm cov xya caum los;

94 Thiab tus thawj tswj hwm thib xya ntawm cov thawj tswj hwm no yuav tsum tswj hwm rau tus thawj tswj hwm;

95 Thiab xya tus thawj tswj hwm no yuav tsum xaiv lwm cov xya caum ntxiv rau ntawm thawj cov xya caum uas lawv zwm rau, thiab yuav tsum tswj hwm lawv;

96 Thiab lwm cov xya caum, kom txog thaum muaj xya pawg xya caum, yog hais tias yuav tsum ua txoj hauj lwm hauv lub vaj txiv hmab li ntawd.

97 Thiab cov xya caum no yuav tsum yog cov muab kev pab ncig mus ua hauj lwm, mus rau Lwm Haiv Neeg ua ntej tso thiab kuj mus rau cov Neeg Yudais thiab.

98 Tiam sis lwm cov thawj coj ntawm lub koom txoos, uas tsis zwm rau Kaum Ob tug Thwj Tim, thiab tsis zwm rau cov Xya Caum, lawv tsis muaj kev lav ris ncig mus ua hauj lwm rau tag nrho txhua teb chaws, tiam sis tsuas ncig mus ua hauj lwm raws li lawv tej xwm txheej yuav cia lawv mus, txawm hais tias lawv yuav tuav tej hauj lwm siab ib yam thiab tseem ceeb ib yam nyob hauv lub koom txoos.

99 Yog li ntawd, nim no cia txhua tus neeg kawm nws tej dej num, thiab rau siab kawg nkaus ua lub luag hauj lwm uas tau tsa nws rau.

100 Tus uas tub nkeeg ces tus Tswv yuav tsis suav tias tus ntawd tsim nyog sawv ntsug, thiab tus uas tsis kawm txog nws qhov dej num thiab ua tej yam uas tus Tswv tsis pom zoo ces tus Tswv yuav tsis suav tias tus ntawd tsim nyog sawv ntsug. Twb yog li ntawd. Amees.