1 Ua tsaug rau koj lub npe, auj tus Tswv Ixayees tus Vajtswv, tus uas ua raws li kev khi lus thiab muab kev hlub tshua rau koj cov tub qhe uas taug kev ncaj rau koj pom, nrog tag nrho lawv lub siab—

2 Koj tus uas tau txib koj cov tub qhe kom ua ib lub tsev los rau koj lub npe nyob rau qhov chaw no [Kirtland].

3 Thiab nim no koj twb pom, auj tus Tswv, hais tias koj cov tub qhe tau ua raws li koj lo lus txib.

4 Thiab nim no peb thov koj, Leej Txiv Dawb Huv, los ntawm Yexus Khetos lub npe, Leej Tub ntawm koj nruab siab, ntawm tib lub npe uas muaj peev xwm coj txoj kev cawm seej los rau noob neej, peb thov koj, auj tus Tswv, kom txais lub tsev no, tej tes hauj lwm ntawm peb uas yog koj cov tub qhe tej tes, vim koj tau txib kom peb ua.

5 Vim koj yeej paub hais tias peb tau ua txoj hauj lwm no thaum raug txom nyem heev; thiab los ntawm peb txoj kev pluag peb tau muab peb tej khoom los ua ib lub tsev los rau koj lub npe, xwv kom Neeg Leej Tub yuav muaj ib qho chaw tshwm sim nws tus kheej tawm los rau nws cov neeg.

6 Thiab ib yam li koj tau hais nyob hauv ib txoj kev tshwm sim, uas tau muab rau peb, koj hu peb ua koj cov phooj ywg, hais tias—Hu nej lub rooj txoos ua kev cai, raws li kuv tau txib nej;

7 Thiab vim tsis yog txhua tus muaj kev ntseeg, nej cia li rau siab nrhiav thiab ib leeg cia li qhia tej lus tswv yim rau ib leeg; tseeb tiag, nej cia li nrhiav hauv tej phau ntawv zoo tshaj plaws tej lus tswv yim, nrhiav kev kawm, uas twb yog los ntawm kev kawm ntawv thiab los ntawm kev ntseeg;

8 Kho nej tus kheej; npaj txhua yam uas yuav tsum muaj, thiab tsa ib lub tsev, uas twb yog ib lub tsev thov Vajtswv, ib lub tsev yoo mov, ib lub tsev muaj kev ntseeg, ib lub tsev muaj kev kawm, ib lub tsev muaj yeeb koob, ib lub tsev muaj chaw txawb chaw rau, ib lub tsev rau Vajtswv;

9 Kom nej txoj kev mus ua hauj lwm rau haud yuav yog los ntawm tus Tswv lub npe, kom nej txoj kev ua hauj lwm tawm mus yuav yog los ntawm tus Tswv lub npe, kom tag nrho nej tej kev sib hu tos txais yuav yog los ntawm tus Tswv lub npe, nrog kev tsa tes mus rau tus Siab Tshaj Plaws—

10 Thiab nim no, Leej Txiv Dawb Huv, peb thov koj pab peb, uas yog koj cov neeg, nrog koj txoj kev tshav ntuj, ntawm kev hu peb lub rooj txoos ua kev cai, kom yuav ua rau koj tau lub sam xeeb thiab rau koj uas yog Vajtswv txoj kev pom zoo txais;

11 Thiab ua raws li ib txoj kev kom koj thiaj li pom tias peb yog neeg tsim nyog, kom muaj raws li tej kev cog lus uas koj tau cog rau peb, uas yog koj cov neeg, nyob hauv tej kev tshwm sim uas tau muab los rau peb;

12 Xwv kom koj lub yeeb koob yuav nqis los rau koj cov neeg, thiab los rau koj lub tsev no, uas nim no peb muab fij rau koj, es kom lub tsev no yuav hloov ua dawb huv thiab muab fij cia kom huv, thiab kom koj lub yeeb haum dawb huv yuav nyob hauv lub tsev no tsis tu ncua;

13 Thiab kom txhua tus neeg uas nkag los rau hauv lub qhov rooj ntawm tus Tswv lub tsev yuav hnov koj lub hwj chim, thiab raug txhib lees hais tias koj tau ua rau lub tsev no hloov ua dawb huv, thiab hais tias yog koj lub tsev, ib qho chaw rau koj txoj kev dawb huv.

14 Thiab thov koj pub, Leej Txiv Dawb Huv, kom yuav qhia tej lus tswv yim hauv tej phau ntawv zoo tshaj plaws los rau tag nrho cov uas teev tiam nyob hauv lub tsev no, thiab kom lawv nrhiav kev kawm uas yog los ntawm kev kawm ntawv, thiab kuj yog los ntawm kev ntseeg, ib yam li koj tau hais;

15 Thiab xwv kom lawv yuav loj hlob los ntawm koj, thiab txais tus Vaj Ntsuj Plig Dawb Huv tag nrho, thiab kom kho lawv raws li koj tej kev cai, thiab npaj kom tau txhua yam uas yuav tsum muaj;

16 Thiab xwv kom lub tsev no yuav yog ib lub tsev thov Vajtswv, ib lub tsev yoo mov, ib lub tsev muaj kev ntseeg, ib lub tsev muaj yeeb koob thiab rau Vajtswv, uas twb yog koj lub tsev;

17 Xwv kom tag nrho koj cov neeg txoj kev mus ua hauj lwm rau hauv lub tsev no, yuav yog los ntawm tus Tswv lub npe;

18 Xwv kom tag nrho lawv txoj kev ua hauj lwm tawm hauv lub tsev no mus yuav yog los ntawm tus Tswv lub npe;

19 Thiab xwv kom tag nrho lawv tej kev sib hu tos txais yuav yog los ntawm tus Tswv lub npe, nrog tej tes dawb huv, nrog kev tsa tes mus rau tus Siab Tshaj Plaws;

20 Thiab xwv kom tsis txhob pub ib yam dab tsi tsis huv los mus rau hauv koj lub tsev mus ua kom vuab tsuab;

21 Thiab thaum koj cov neeg ua txhaum, lawv tus twg los xij, lawv yuav hloov siab lees txim nrawm nroos thiab rov qab los cuag koj, thiab nrhiav tau koj txoj kev pom zoo, thiab rov txum tim rau tej koob hmoov nplua mias uas koj tau tsa kom muab foom tawm los rau cov uas yuav hawm koj nyob hauv koj lub tsev.

22 Thiab peb thov koj, Leej Txiv Dawb Huv, kom koj cov tub qhe yuav tawm hauv lub tsev no mus muaj koj lub hwj chim ua ntaj riam thaiv lawv, thiab kom muaj koj lub npe nyob nrog lawv, thiab koj lub yeeb koob nyob puag ncig lawv, thiab koj tej tim tswv saib xyuas lawv;

23 Thiab kom lawv yuav coj txoj moo tseem ceeb thiab zoo kawg, ntawm txoj kev tseeb, ntawm qhov chaw no mus rau neeg nyob thoob plaws lub ntiaj teb, kom lawv yuav paub hais tias nov yog koj txoj hauj lwm, thiab hais tias koj tau muab koj txhais tes xyab, ua kom muaj raws li tej uas cov yaj saub lub qhov ncauj tau hais, ntsig txog hnub nyoog kawg.

24 Peb thov koj, Leej Txiv Dawb Huv, kom muab cov neeg uas yuav teev tiam koj cog kom ruaj khov, thiab kom muaj npe thiab muaj chaw raws li kev tsim txiaj nyob hauv koj lub tsev no, mus rau txhua tiam neeg thiab nyob mus ib txhis;

25 Thov kom tsis muaj ib yam cuab yeej ua rog uas tawm tsam lawv yuav kov yeej lawv; thov kom tus uas khawb ib lub qhov cuab lawv yuav poob mus rau hauv lub qhov ntawd nws tus kheej;

26 Thov kom tej kev phem txoj kev tuav hauv yuav tsis muaj hwj chim sawv thiab kov yeej koj cov neeg cov uas yuav muaj koj lub npe nyob nrog lawv hauv lub tsev no;

27 Thiab yog hais tias muaj cov neeg twg sawv tawm tsam cov neeg no, thov kom koj txoj kev chim siab npau tawm tsam lawv;

28 Thiab yog hais tias lawv tawm tsam cov neeg no thov koj tawm tsam lawv; thov koj ntaus rau koj cov neeg ib yam li koj tau ua nyob rau hnub ntaus rog, kom lawv yuav dim los ntawm lawv cov yeeb ncuab tes.

29 Peb thov koj, Leej Txiv Dawb Huv, kom ua rau tag nrho cov uas tau nthuav tej lus dag tawm mus rau puag tim tej, mus thoob ntiaj teb, tawm tsam koj tus tub qhe los yog cov tub qhe poob ntsej muag, thiab xav tsis tag, thiab ua rau lawv txaj muag thiab ua nem nuv, yog hais tias lawv tsis kam hloov siab lees txim, thaum muab txoj moo zoo uas kav ib txhis tshaj tawm mus rau lawv pob ntseg;

30 Thiab kom tag nrho tej yam lawv ua yuav raug ua kom tsis muaj nuj nqis, thiab kom raug nplawm los ntawm tej lawg thiab tej kev txiav txim uas koj yuav xa los rau lawv thaum koj chim siab, kom tej lus dag thiab lus xaiv tawm tsam koj cov neeg yuav txawj tag.

31 Vim koj yeej paub, auj tus Tswv, hais tias koj cov tub qhe twb tsis muaj txim rau koj pom hais txog qhov uas lawv ua tim khawv txog koj lub npe, qhov uas ua rau lawv raug tej yam no.

32 Yog li ntawd peb thov koj kom cawm peb dim huv si thiab tag nrho ntawm tus quab no;

33 Tshem tus quab no tawm, auj tus Tswv; muab tshem tawm ntawm koj cov tub qhe caj dab mus, los ntawm koj lub hwj chim, kom peb yuav sawv taus los nyob hauv tiam neeg no thiab ua koj txoj hauj lwm.

34 Auj Yehauvas, thov hlub tshua cov neeg no, thiab vim neeg sawv daws ua txhaum, thov zam txim rau koj cov neeg tej kev ua txhaum, thiab muab lawv tej kev txhaum ntawd tshem tawm mus ib txhis li.

35 Cia lub hwj chim los saum ntuj los muab txoj kev tsa koj cov neeg qhuab qhia khi rau lawv.

36 Thov kom muaj raws li no rau lawv, ib yam li muaj rau cov nyob rau hnub Peetekos; muab lub txiaj ntsim txawj hais lwm yam lus pub nplua mias rau koj cov neeg, ib yam li tej nplaim taws faib pes rhe, thiab txoj kev txhais tej yam lus ntawd.

37 Thiab ua kom koj lub tsev muaj puv nkaus, ib yam li muaj ib nthw cua ntsawj hlob hlob, nrog koj lub yeeb koob.

38 Muab txoj lus tim khawv ntawm txoj kev khi lus tso rau koj cov tub qhe, kom thaum lawv tawm mus thiab tshaj tawm koj txoj lus lawv yuav zwm txoj kev cai, thiab npaj koj haiv neeg ntseeg lub siab rau tag nrho tej kev txiav txim uas koj tab tom yuav xa los, thaum koj npau taws, rau cov neeg hauv ntiaj teb, vim yog lawv tej kev ua txhaum, xwv kom koj cov neeg tsis txhob poob siab nyob rau hnub muaj teeb meem.

39 Thiab txhua lub nroog uas koj cov tub qhe yuav nkag mus, thiab yog cov neeg hauv lub nroog ntawd txais yuav lawv zaj lus tim khawv, thov cia koj txoj kev kaj siab lug thiab koj txoj kev cawm seej nyob rau hauv lub nroog ntawd; kom lawv yuav sau cov ncaj ncees tawm hauv lub nroog ntawd los, xwv kom lawv yuav los mus rau hauv Xi-oos, los yog los mus rau hauv nws tej ceg txheem ntseeg, tej chaw koj tau teem tseg, nrog tej nkauj xyiv fab kav ib txhis;

40 Thiab tsis txhob coj koj tej kev txiav txim los rau lub nroog ntawd kom txog thaum muaj raws li tej no tiav lawm tso.

41 Thiab txhua lub nroog uas koj cov tub qhe yuav nkag mus, thiab yog cov neeg hauv lub nroog ntawd tsis txais yuav koj cov tub qhe zaj lus tim khawv, thiab koj cov tub qhe ceeb toom lawv kom cawm lawv tus kheej tawm ntawm tiam neeg qias no, ces cia kom muaj los rau lub nroog ntawd raws li tej uas koj tau hais los ntawm koj cov yaj saub lub qhov ncauj.

42 Tiam sis auj Yehauvas, peb thov koj cawm koj cov tub qhe dim tawm ntawm lawv tes, thiab ntxuav koj cov tub qhe kom huv los ntawm lawv cov ntshav.

43 Auj tus Tswv, peb tsis xyiv fab rau txoj kev puas tsuaj ntawm peb ib tsoom tib neeg; lawv ntsuj plig yeej muaj nqis rau koj;

44 Tiam sis yeej yuav muaj raws li koj txoj lus. Nrog koj lub hwj chim txhawb lawv, thov pab koj cov tub qhe kom hais tau tias: Ua raws li koj lub siab nyiam, auj tus Tswv, thiab txhob ua li peb lub siab nyiam.

45 Peb paub hais tias koj tau hais los ntawm koj cov yaj saub lub qhov ncauj tej yam txaus ntshai heev txog cov phem, nyob rau hauv hnub nyoog kawg—hais tias koj yuav nchuav koj tej kev txiav txim tawm los, uas tsis paub tag;

46 Yog li ntawd, auj tus Tswv, cawm koj cov neeg kom dim ntawm cov neeg phem txoj kev puas tsuaj; ua kom koj cov tub qhe muaj peev xwm muab txoj kev cai zwm cia, thiab khi hlo txoj lus tim khawv, kom lawv yuav npaj txhij rau hnub uas yuav kub hnyiab.

47 Peb thov koj, Leej Txiv Dawb Huv, kom nco ntsoov txog cov uas raug muab ntiab khiav los ntawm cov neeg hauv Jackson ciaj ciam av, Missouri, tawm ntawm tej av uas yog lawv qub txeeg qub teg, thiab auj tus Tswv, muab tus quab ntawm kev txom nyem uas tau muab rau lawv no tshem tawm.

48 Koj yeej paub, auj tus Tswv, hais tias cov neeg phem quab yuam thiab tsim txom lawv; thiab peb lub siab phwj yeev nrog kev tu siab vim yog lawv tej nra hnyav heev.

49 Auj tus Tswv, koj yuav cia cov neeg no ris txoj kev txom nyem no ntev npaum li cas, thiab cia lawv cov neeg tsis muaj txim lub suab quaj nce tuaj txog koj lub pob ntseg, thiab cia lawv cov ntshav ua tim khawv nce tuaj txog koj, thiab tseem tsis muab koj txoj lus tim khawv ua tshwm sim pab lawv?

50 Thov hlub tshua, auj tus Tswv, rau pab neeg phem, uas tau ntiab koj cov neeg tawm, kom lawv yuav tsis txhob nyiag tej khoom ntxiv, kom lawv yuav hloov siab lees txim rau lawv tej kev txhaum yog hais tias nrhiav tau txoj kev hloov siab lees txim;

51 Tiam sis yog hais tias lawv tsis ua li ntawd, thov thws koj txhais npab, auj tus Tswv, thiab txhiv qhov uas koj tau tsa ib lub Xi-oos rau koj cov neeg dim.

52 Thiab yog hais tias ho tsis zoo li ntawd, kom lub hom phiaj ntawm koj cov neeg txhob ploj rau koj pom, thov kom koj txoj kev chim siab yuav npau, thiab koj txoj kev npau taws los raug lawv, kom lawv yuav raug puas tsuaj, tag nrho cag thiab ceg, tawm hauv qab ntuj no mus;

53 Tiam sis npaum li uas lawv yuav hloov siab lees txim, koj ua zoo thiab hlub tshua, thiab muab koj txoj kev npau taws tig mus thaum koj ntsia koj tus Pleev Roj lub ntsej muag.

54 Thov hlub tshua, auj tus Tswv, rau tag nrho tej haiv neeg hauv lub ntiaj teb; hlub tshua txog tej nom tswv kav peb thaj av; thov kom tej ntsiab cai, uas peb cov yawg koob hwm thiab ua siab loj tiv thaiv, uas hu ua tus Txhooj Lij Choj ntawm peb thaj av, kom muab tsa muaj nyob mus ib txhis.

55 Nco txog tej vaj ntxwv, tej tub vaj ntxwv, tej nom tej tswv, thiab cov neeg loj nyob hauv ntiaj teb, thiab txhua haiv neeg, thiab tej koom txoos, tag nrho cov neeg pluag, cov xav tau kev pab, thiab cov raug txom nyem nyob hauv lub ntiaj teb;

56 Kom lawv lub siab yuav mos muag thaum koj cov tub qhe tawm hauv koj lub tsev mus, auj Yehauvas, mus ua tim khawv txog koj lub npe; kom lawv tej kev ntxub ntxaug yuav zam kev rau qhov tseeb, thiab kom sawv daws yuav nyiam koj cov neeg;

57 Kom tag nrho cov neeg thoob ntiaj teb yuav paub hais tias peb, uas yog koj cov tub qhe, tau hnov koj lub suab, thiab hais tias koj tau xa peb mus;

58 Xwv kom los ntawm tag nrho cov neeg no, uas yog koj cov tub qhe, uas yog Yakhauj cov tub, yuav sau tau cov ncaj ncees tawm los mus txhim tsa ib lub nroog dawb huv rau koj lub npe, ib yam li koj tau txib lawv.

59 Peb thov kom koj tsa tej ceg txheem ntseeg ntxiv los rau Xi-oos ntxiv rau ceg no uas koj twb tau tsa, kom txoj kev muab koj cov neeg sau los ua ke yuav dov mus yam muaj hwj chim loj thiab muaj yeeb haum, kom yuav ua koj txoj hauj lwm sai sai kom thiaj ncaj ncees.

60 Nim no tej lus no, auj tus Tswv, peb tau hais rau koj, ntsig txog tej kev tshwm sim thiab tej lus txib uas koj tau muab los rau peb, cov uas txheeb ze nrog Lwm Haiv Neeg.

61 Tiam sis koj yeej paub hais tias koj muaj ib txoj kev hlub tiag tiag rau cov neeg Yakhauj, cov uas raug tawg khiav ri niab mus rau saum tej roob rau ib lub sij hawm ntev, nyob hauv ib hnub pos huab thiab tsaus.

62 Yog li ntawd peb thiaj thov kom koj muaj kev hlub tshua rau cov neeg Yakhauj, kom Yeluxalees, txij teev no mus, yuav pib txais kev txhiv dim;

63 Thiab kom tus quab ntawm kev ua qhev yuav pib raug tshem tawm ntawm Daviv tsev neeg mus;

64 Thiab kom cov neeg Yudas yuav pib rov qab mus rau tej thaj av uas koj tau muab rau Anplaham, uas yog lawv yawg koob.

65 Thiab ua kom cov seem tshuav ntawm Yakhauj, cov uas raug foom tsis zoo thiab raug mob vim yog lawv txoj kev ua txhaum, yuav hloov siab ntawm lawv txoj kev ua neeg qus thiab lim hiam los mus rau qhov txhij txhua ntawm txoj moo zoo uas kav ib txhis;

66 Xwv kom lawv yuav muab lawv tej cuab yeej tua neeg tso pov tseg, thiab tseg lawv tej kev ntxeev siab.

67 Thiab thov kom tag nrho cov seem tshuav ntawm Ixayees uas tau tawg khiav ri niab, cov uas raug ntiab mus thoob plaws lub ntiaj teb, los paub qhov tseeb, ntseeg tus Mexiyas, thiab txais kev txhiv dim ntawm kev quab yuam, thiab xyiv fab rau koj.

68 Auj tus Tswv, nco ntsoov koj tus tub qhe, Joseph Smith, tus Hluas, thiab tag nrho nws tej kev txom nyem thiab kev tsim txom—nco txog qhov uas nws tau khi lus nrog Yehauvas, thiab tau cog lus rau koj, auj Yakhauj tus Vajtswv Muaj Hwj Chim—thiab tej lus txib uas koj tau muab los rau nws, thiab hais tias nws tau ua siab dawb paug sib zog ua raws li koj lub siab nyiam.

69 Thov hlub tshua, auj tus Tswv, rau nws tus poj niam thiab cov me nyuam, kom yuav muab lawv tsa sawv nyob ntawm koj xub ntiag, thiab koj txhais tes uas tsom kwm yuav muab lawv tshwj tseg.

70 Thov hlub tshua tag nrho lawv tej txheeb ze, xwv kom lawv tej kev ntxub ntxaug yuav tu mus thiab raug tshoob mus ib yam li dej nyab; kom lawv yuav hloov siab los ntseeg thiab txais kev txhiv dim nrog cov Neeg Ixayees, thiab paub hais tias koj yog Vajtswv.

71 Nco ntsoov, auj tus Tswv, cov thawj tswj hwm, twb hais tag nrho cov thawj tswj hwm ntawm koj lub koom txoos, kom koj sab tes xis yuav tsa lawv, nrog rau tag nrho lawv tsev neeg, thiab lawv cov txheeb ze, kom lawv lub npe yuav kav ib txhis thiab kom yuav nco qab lawv lub npe nyob mus ib txhis ntawm ib tiam neeg mus rau ib tiam.

72 Nco ntsoov tag nrho koj cov ntseeg, auj tus Tswv, nrog rau tag nrho lawv tsev neeg, thiab tag nrho lawv cov txheeb ze, nrog rau tag nrho lawv cov neeg muaj mob thiab neeg txom nyem, nrog rau tag nrho cov neeg pluag thiab cov siab mos siab muag hauv lub ntiaj teb; xwv kom lub nceeg vaj, uas koj tau tsa uas tsis yog neeg tsa, yuav hloov los ua ib lub roob loj loj thiab puv lub ntiaj teb;

73 Kom koj lub koom txoos yuav tawm tom lub hav zoov ntawm txoj kev tsaus ntuj los, thiab ci tuaj zoo nkauj li lub hli, kaj li lub hnub, thiab txaus ntshai npaum li ib pab tub rog kwv chij;

74 Thiab kom hnav zam zoo li tus nkauj nyab rau hnub uas koj yuav qhib plho rooj ntug ceeb tsheej, thiab ua rau tej roob ntws los ntawm koj xub ntiag, thiab rau tej vos hav sawv tuaj, rau tej chaw siab thiab qis tiaj tus; xwv kom koj lub yeeb koob yuav puv lub ntiaj teb;

75 Kom thaum lub raj hlau yuav nrov rau cov tuag, yuav coj peb nrog huab cua los cuag koj, kom peb yuav tau nrog tus Tswv ua ke ib txhis li;

76 Xwv kom peb tej tsoos tsho yuav huv, kom peb yuav hnav tej cev thav ntxwv ntawm kev ncaj ncees, nrog tej nplooj toov laj nyob hauv peb tes, thiab meej mom yeeb koob rau saum peb taub hau, thiab tau kev xyiv fab nyob mus ib txhis rau tag nrho peb tej kev txom nyem.

77 Auj tus Tswv Vajtswv uas Muaj Hwj Chim Tag Nrho, thov hnov peb tej lus thov, thiab teb peb saum ntuj ceeb tsheej los, uas yog koj qhov chaw nyob dawb huv, qhov chaw uas koj zaum saum lub rooj theej kiab, nrog yeeb koob, sam xeeb, hwj chim, yeeb haum, muaj zog, kev kav, kev tseeb, kev txim lij, kev txiav txim, kev hlub tshua, thiab txoj kev zoo tag nrho uas tsis paub kawg, kav ib txhiab kav ib txhis.

78 Auj hnov, auj hnov, auj hnov peb, auj tus Tswv! Thiab teb tej lus thov no, thiab txais txoj kev fij lub tsev no rau koj, tes hauj lwm ntawm peb txhais tes, uas peb tau txhim tsa los rau koj lub npe;

79 Thiab lub koom txoos no thiab, muab koj lub npe zwm rau. Thiab pab peb los ntawm koj tus Ntsuj Plig lub hwj chim, kom peb yuav muab peb lub suab koom nrog cov xelafees ci ntsa iab nyob ib puag ncig koj lub rooj theej kiab, nrog lub suab qhuas, hu nkauj Hauxanas rau Vajtswv thiab tus Me Nyuam Yaj!

80 Thiab cia cov no, koj cov neeg uas pleev roj rau, muab txoj kev cawm seej hnav, thiab koj haiv neeg ntseeg qw nrov nrov rau txoj kev xyiv fab. Amees, thiab Amees.