1 Ib yam li kuv tau hais rau nej nyob hauv kuv tsab ntawv ua ntej kuv tau ncaim kuv qhov chaw mus, hais tias tej lub sij hawm kuv yuav sau ntawv rau nej thiab muab lus qhia txog ntau yam rau nej, ziag no kuv rov qab hais ntxiv txog lub ntsiab lus ntawm txoj kev cai raus dej rau cov tuag, vim lub ntsiab lus ntawd pheej nyob rawv hauv kuv lub cim xeeb, thiab ua rau kuv xav txog ntau heev, txij thaum kuv tau raug kuv cov yeeb ncuab caum.

2 Kuv sau ob peb lo lus kev tshwm sim tuaj rau nej txog ib tug teev ntawv. Kuv twb tau muaj ob peb lub tswv yim ntxiv txog qhov no, uas ziag no kuv ua pov thawj rau. Qhov ntawd yog, qhov tau tshaj tawm nyob hauv kuv tsab ntawv ua ntej hais tias yuav tsum muaj ib tug teev ntawv, tus uas nws qhov muag tau pom, thiab kuj yuav tsum hnov ntawm nws ob lub pob ntseg, kom nws yuav ceev cov ntawv ceev xwm txheej tseeb tseeb rau tus Tswv.

3 Nim no, hais txog qhov no, yuav nyuaj heev kom tib tug teev ntawv mus ua tag nrho tej hauj lwm nyob rau txhua lub sij hawm. Kom lug dhau qhov uas nyuaj no, yeej tsa tau ib tug teev ntawv rau ib pawg ntseeg nyob hauv lub nroog, tus uas paub txaus los sau tej ntaub ntawv kom thwj; thiab kom nws sau raws nraim thiab tib yam nkaus thaum nws sau tej uas tau ua, ua pov thawj rau nws tej ceev xwm txheej hais tias nws ob lub qhov muag tau pom, thiab nws ob lub pob ntseg tau hnov, sau hnub tim thiab tej lub npe, thiab ntxiv mus, thiab zaj keeb kwm ntawm tag nrho tej yam uas lawv tau ua; yog hais tias muaj neeg nyob ntawd, sau kom tau li peb leeg lub npe, cov uas muaj peev xwm ua pov thawj rau tej uas tau ua ntawd yog hais tias nug txog, xwv kom los ntawm ob los yog peb tug tim khawv lub qhov ncauj thiaj yuav tsa tau txhua lo lus.

4 Ntxiv ntawd, cia muaj ib tug tuam teev ntawv rau lub koom txoos, es muab lwm cov ceev xwm txheej no rau nws, muab ua ke nrog cov ntawv pov thawj muaj lawv tus kheej lub npe kos rau, ua pov thawj hais tias cov ntawv ceev xwm txheej lawv tau sau yeej tseeb tiag. Tom qab ntawd tus tuam teev ntawv rau lub koom txoos mam sau cov ntawv ceev xwm txheej rau hauv lub koom txoos phau ntawv, nrog rau cov ntawv pov thawj thiab tag nrho cov tim khawv lub npe, nrog rau nws tus kheej zaj lus hais tias nws yeej ntseeg zaj lus hais thiab cov ntawv ceev xwm txheej saum toj no tias muaj tseeb, los ntawm nws txoj kev paub cov txiv neej ntawd tus xeeb ceem thiab lawv tej hauj lwm cov ntseeg tsa lawv ua. Thiab thaum ua qhov no tiav rau lub koom txoos phau ntawv lawm, cov ntawv ceev xwm txheej yeej dawb huv ib yam, thiab yuav ua rau txoj kab ke tij lim ib yam nkaus li nws tau pom kiag ntawm nws ob lub qhov muag thiab tau hnov kiag ntawm nws ob lub pob ntseg, thiab tau muab qhov no sau cia rau hauv lub koom txoos phau ntawv ceev tej xwm.

5 Nyaj nej yuav xav hais tias tus txheej txheem ua tej yam no nruj heev; tiam sis kuv qhia rau nej hais tias tsuas yog ua raws li Vajtswv lub siab nyiam xwb, los ntawm kev ua raws li txoj kab ke thiab kev npaj uas tus Tswv tau tsa thiab npaj ua ntej ntuj tsim teb raug, rau txoj kev cawm seej ntawm cov tuag lawm uas tsis tau paub txog txoj moo zoo.

6 Thiab ntxiv, kuv xav kom nej nco ntsoov hais tias Yauhas tus uas txais kev tshwm sim tau xav txog tib lub ntsiab lus no ntsig txog cov tuag, thaum nws tshaj tawm, zoo li nej yuav pom tau muab sau cia rau hauv Tshwm Sim 20:12—Thiab kuv tau pom cov tuag, tsis hais tus hlob tus yau, sawv ntawm Vajtswv xub ntiag; thiab muaj tej phau ntawv uas muab nthuav; thiab muaj dua ib phau ntawv uas muab nthuav, uas yog phau ntawv txheeb txoj sia; thiab cov tuag tau raug txiav txim raws li tej yam uas tau muab sau cia nyob hauv tej phau ntawv ntawd, raws li tej yam lawv ua.

7 Nej yuav pom nyob hauv cov lus no hais tias muaj tej phau ntawv uas muab nthuav; thiab muaj dua ib phau ntawv uas muab nthuav, uas yog phau ntawv txheeb txoj sia; thiab cov tuag tau raug txiav txim raws li tej yam uas tau muab sau cia nyob hauv tej phau ntawv ntawd, raws li tej yam lawv ua; yog li ntawd, cov ntawv tau hais no yeej yog cov ntawv uas ntim tej ceev xwm txheej txog tej yam lawv ua, thiab hais txog tej ceev xwm txheej uas tau sau cia nyob hauv lub ntiaj teb. Thiab phau uas yog phau ntawv txheeb txoj sia yog phau ceev xwm txheej uas tau sau cia nyob saum ntuj ceeb tsheej; lub ntsiab cai sib dhos nkaus zoo heev nrog lo lus qhuab qhia uas tau txib nej nyob hauv txoj kev tshwm sim hauv tsab ntawv kuv tau sau tuaj rau nej ua ntej kuv ncaim kuv qhov chaw mus—kom tag nrho tej uas nej sau yuav muab sau cia nyob saum ntuj ceeb tsheej.

8 Nim no, lub ntsiab ntawm txoj kab ke no yog los ntawm lub hwj chim ntawm lub pov thawj hwj, los ntawm txoj kev tshwm sim txog Yexus Khetos, es los ntawm lub hwj chim ntawd ces thiaj pub kom txhua yam uas nej muab khi ua ke nyob hauv ntiaj teb ces yuav muab khi ua ke nyob saum ntuj ceeb tsheej, thiab txhua yam uas nej muab daws nyob hauv ntiaj teb ces yuav muab daws nyob saum ntuj ceeb tsheej. Los yog hais tias, yog ho to taub cov lus txhais ntawd txawv, txhua yam uas nej muab sau cia nyob hauv ntiaj teb ces yuav muab sau cia nyob saum ntuj ceeb tsheej, thiab txhua yam uas nej tsis muab sau cia hauv ntiaj teb ces yuav tsis muab sau cia nyob saum ntuj ceeb tsheej; vim nej cov tuag yuav raug txiav txim raws li muaj nyob hauv tej phau ntawv, raws li tej yam uas lawv tus kheej ua, saib lawv tus kheej puas tau mus ua tej kab ke rau lawv tus kheej, los yog lawv tus sawv cev ua, raws li txoj kab ke uas Vajtswv tau npaj rau lawv txoj kev cawm seej txij thaum ua ntej ntuj tsim teb raug, raws li tej ceev xwm txheej uas lawv tau ceev ntsig txog lawv cov tuag.

9 Tej zaum ib txhia xav tias qhov peb hais txog no yog cov lus qhuab qhia tawv heev—ib lub hwj chim uas muab sau cia los yog muab khi ua ke nyob hauv ntiaj teb thiab khi ua ke nyob saum ntuj ceeb tsheej. Txawm li ntawd los, nyob rau txhua lub caij nyoog tso txoj cai, thaum twg tus Tswv tau muab lub pov thawj hwj los ntawm kev tshwm sim tseeb los rau ib tug txiv neej los yog ib pab txiv neej twg nyob hauv ib lub caij nyoog, ces yeej ib txwm muab lub hwj chim no. Yog li ntawd, txhua yam uas cov txiv neej ntawd tau ua los ntawm txoj cai, los ntawm tus Tswv lub npe, thiab tau ua raws li txoj cai thiab raws nraim li kev cai, thiab tau ceev ib zaj ceev xwm txheej zoo thiab meej pem txog tej ntawd, ces yam ntawv tau hloov los ua ib txoj kev cai nyob hauv ntiaj teb thiab nyob saum ntuj ceeb tsheej, thiab muab tshem tsis tau, raws li tus tswv Yehauvas tej lus tshaj tawm. Tej no yog tej lus tseeb. Leej twg thiaj hnov?

10 Thiab ntxiv, rau tej uas hais tas los no, xav txog Mathais 16:18, 19: Kuv hais rau koj thiab hais tias, Koj yog Petus, thiab kuv yuav txhim tsa kuv lub koom txoos rau saum lub pob zeb no; thiab tej qhov rooj ntawm ntuj txiag teb tsaus yuav kov tsis yeej kuv lub koom txoos. Thiab kuv yuav muab cov yawm sij ntawm lub nceeg vaj ceeb tsheej rau koj: thiab txhua yam uas koj muab khi ua ke nyob hauv ntiaj teb ces yuav muab khi ua ke nyob saum ntuj ceeb tsheej; thiab txhua yam uas koj muab daws nyob hauv ntiaj teb ces yuav muab daws nyob saum ntuj ceeb tsheej.

11 Nim no qhov neeg tsis paub txog uas tseem ceeb thiab loj ntawm tag nrho tej no, thiab qhov zoo tshaj plaws ntawm tag nrho tej uas muaj nyob ntawm peb xub ntiag, yog nyob ntawm txoj kev txais lub hwj chim ntawm lub Pov Thawj Hwj Dawb Huv. Vim tus uas tau muab tej yawm sij no rau twb tsis nyuaj rau tus ntawd txais tau kev paub tseeb txog txoj kev cawm seej ntawm noob neej, tag nrho rau cov tuag thiab cov ciaj.

12 Los ntawm tej no thiaj yog yeeb koob thiab sam xeeb, thiab kev tsis txawj tuag thiab txoj sia nyob mus ib txhis—Txoj kab ke ua kev cai raus dej, es muab raus rau hauv xwv kom piv tau zoo li ntawm cov tuag, kom ib lub ntsiab cai zoo raws lwm lub ntsiab cai; qhov uas muab raus rau hauv dej thiab tawm hauv dej los twb zoo ib yam li txoj kev sawv rov los ntawm cov tuag tawm hauv lawv qhov ntxa los; yog li ntawd, tau tsim txoj kab ke no los ua kev sib txuas nrog txoj kab ke ua kev cai raus dej pub rau cov tuag, vim yog zoo ib yam li ntawm cov tuag.

13 Yog li ntawd, thiaj tau ua lub dab ua kev cai raus dej ua lub cim piv txog lub qhov ntxa, thiab tus Tswv tau txib kom ua nyob rau sab hauv qab ntawm qhov chaw uas cov ciaj swm tuaj sib txoos ua ke, kom qhia tau txog cov ciaj thiab cov tuag, thiab kom txhua yam nyias muaj nyias txoj kev sib xws, thiab kom ib yam yuav zoo raws li lwm yam—kom yam uas nyob hauv ntiaj teb no yuav zoo raws li yam uas nyob saum ntuj, ib yam li Povlauj tau tshaj, 1 Kauleethaus 15:46, 47, thiab 48:

14 Txawm li ntawd los thawj lub cev tsis yog lub cev ntawm sab ntsuj plig, tiam sis yog lub cev ntawm nqaij daim tawv; thiab lub cev tom qab thiaj yog ntawm sab ntsuj plig. Tus neeg thib ib yog muab av puab, yog neeg ntiaj teb; tus neeg thib ob yog tus Tswv los saum ntuj ceeb tsheej los. Ib yam li tus neeg ntiaj teb, cov neeg ntiaj teb kuj zoo ib yam li nws; thiab ib yam li tus neeg ceeb tsheej, cov neeg ceeb tsheej los kuj zoo ib yam li nws. Thiab ib yam li tej ceev xwm txheej hauv ntiaj teb no txog nej cov tuag, uas tau muab sau cia, ces kuj muaj tej ceev xwm txheej nyob saum ntuj ceeb tsheej tib yam li ntawd thiab. Yog li ntawd, qhov no yog lub hwj chim muab khi thiab muab txis ua ke, thiab, ib lub ntsiab txhais hais tias, cov yawm sij ntawm lub nceeg vaj, uas muaj tus yawm sij ntawm kev txawj ntse.

15 Thiab nim no, kuv cov kwv tij thiab cov muam uas kuv hlub, cia kuv hais tseeb rau nej tias tej no yog tej ntsiab cai ntsig txog cov tuag thiab cov ciaj uas hais txog peb txoj kev cawm seej, uas yeej tsis zoo yog nej saib tsis muaj qab hau. Vim yuav tsum muaj lawv txoj kev cawm seej thiaj li muaj peb txoj kev cawm seej, ib yam li Povlauj hais ntsig txog cov yawg koob—hais tias tsis muaj peev xwm ua kom lawv zoo tag nrho yog hais tias tsis muaj peb—thiab tsis muaj peev xwm ua kom peb zoo tag nrho yog hais tias tsis muaj peb cov tuag.

16 Thiab nim no, ntsig txog txoj kev cai raus dej rau cov tuag, kuv yuav muab dua ib nqe lus Povlauj tau hais, 1 Kauleethaus 15:29: Yog tsis muaj li ntawd cov neeg uas ua kev cai raus dej pab rau cov tuag yuav ua li cas, yog hais tias cov tuag tsis sawv rov qab los li? Ua li cas lawv tseem ua kev cai raus dej rau cov tuag ua dab tsi thiab?

17 Thiab ntxiv, txuas rau nqe lus no kuv yuav muab ib nqe lus uas ib tug yaj saub tau hais lawm rau nej, tus uas tau muab nws lub qhov muag ntsia ntsoov rau txoj kev txum tim lub pov thawj hwj rov qab los, muab tej yeeb koob ua tshwm sim los nyob hauv hnub nyoog kawg, thiab los ntawm ib txoj kev tseem ceeb yam zoo kawg nkaus xav tsis thoob ntawm txhua yam muaj nyob hauv txoj moo zoo uas kav ib txhis, uas yog, txoj kev cai raus dej pub rau cov tuag; vim Malakis hais, hauv tshooj kawg, nqe 5 thiab 6 hais tias: Saib seb, kuv yuav xa tus yaj saub Eliyas los rau nej ua ntej hnub tseem ceeb thiab txaus ntshai ntawm tus Tswv yuav los: Thiab nws yuav muab cov yawg koob lub siab tig mus rau cov me nyuam, thiab muab cov me nyuam lub siab tig mus rau cov yawg koob, yog tsis ua li ntawd kuv yuav los nplawm lub ntiaj teb nrog kev foom tsis zoo.

18 Tej zaum kuv txhais tau meej pem zog qhov no, tiam sis yeej meej pem txaus rau kuv lub hom phiaj lawm. Txaus rau peb paub hais tias, ziag no, ib txoj kev foom tsis zoo yuav nplawm lub ntiaj teb yog hais tias tsis muaj ib txoj kev twg los ham sib txuas cov txiv rau cov me nyuam, rau ib yam twg los yog lwm yam—thiab saib seb yam ntawd yog dab tsi? Yam ntawd twb yog txoj kev cai raus dej pub rau cov tuag. Vim tsis muaj peev xwm ua kom peb zoo tag nrho yog tsis muaj lawv; thiab tsis muaj peev xwm ua kom lawv zoo tag nrho yog tsis muaj peb. Thiab yuav tsis muaj peev xwm ua kom lawv thiab peb zoo tag nrho yog hais tias tsis muaj cov uas tau tuag thaum tseem ntseeg txoj moo zoo; vim yuav tsum muaj qhov no nyob hauv txoj kev nkag los ntawm lub caij nyoog tso txoj cai uas muaj txhij txhua, lub caij nyoog tso txoj cai uas nim no pib muaj, kom yuav muaj txoj kev sib txuas tau tag nrho thiab txhij txhua thiab zoo tag nrho, thiab kev muab tej caij nyoog tso txoj cai, thiab tej yawm sij, thiab tej lub hwj chim, thiab tej lub yeeb koob coj los ham ua ke, thiab muab ua tshwm sim txij thaum Adas lub caij nyoog los txog rau lub sij hawm ziag no. Thiab tsis yog li no xwb, tiam sis tej yam uas yeej tsis tau muab ua tshwm sim los li txij thaum ntuj tsim teb raug los, tiam sis tau muab nraim ntawm cov neeg txawj ntse, yuav muab tej ntawd ua tshwm sim los rau cov me nyuam mos liab thiab cov uas tseem noj mis, nyob hauv lub caij nyoog foom pub txhua tsav txhua yam.

19 Nim no, peb hnov dab tsi nyob hauv txoj moo zoo uas peb tau txais? Ib lub suab ntawm kev zoo siab! Ib lub suab ntawm kev hlub tshua los saum ntuj ceeb tsheej los; thiab ib lub suab ntawm kev tseeb tawm hauv av los; tej moo zoo siab rau cov tuag; ib lub suab ntawm kev zoo siab rau cov ciaj thiab cov tuag; tej moo zoo siab ntawm kev xyiv fab heev. Tus uas txhais ko taw zoo nkauj kawg nyob rau saum tej roob yog tus uas coj tej moo zoo ntawm tej yam zoo los thiab hais rau Xi-oos hais tias, Nej tus Vajtswv kav! Ib yam li tej lwg saum roob Kalemees, Vajtswv txoj kev txawj ntse yuav nqis los rau lawv ib yam li ntawd!

20 Thiab ntxiv, peb hnov dab tsi? Tej moo zoo siab los pem Khumaulas los! Maulaunais, uas yog ib tug tim tswv los saum ntuj ceeb tsheej los, tus tshaj tawm txog tej uas tau muaj raws li cov yaj saub tau hais—phau ntawv uas yuav muab ua tshwm sim los. Tus Tswv ib lub suab nyob hauv hav zoov hauv Fayette, Seneca ciaj ciam av, tshaj tawm txog peb tug tim khawv uas yuav mus ua pov thawj txog phau ntawv! Mikhayees lub suab nyob ntawm ntug dej Susquehanna, uas paub tau tus dab phem thaum nws ua ib tug tim tswv ci ntsa iab tshwm sim los! Lub suab ntawm Petus, Yakaunpaus, thiab Yauhas nyob hauv lub hav zoov nruab nrab ntawm Harmony, Susquehanna ciaj ciam av, thiab Colesville, Broome ciaj ciam av, nyob ntawm tus dej Susquehanna, uas tshaj hais tias lawv tuav cov yawm sij ntawm lub nceeg vaj, thiab ntawm lub caij nyoog tso txoj cai uas muaj txhij txhua!

21 Thiab ntxiv, Vajtswv lub suab nyob hauv Txiv Whitmer tus laus lawm chav tsev, hauv Fayette, Seneca ciaj ciam av, thiab rau lwm lub sij hawm, thiab hauv ntau qhov chaw los ntawm txhua txoj kev tsiv teb tsaws chaw thiab tej kev txom nyem ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg no! Thiab Mikhayees, uas yog tus thawj tim tswv, lub suab; Khali-ees, thiab Lafi-ees, thiab lwm tus tim tswv lub suab, txij ntawm Mikhayees los yog Adas los mus txog lub sij hawm no, sawv daws tshaj tawm lawv lub caij nyoog tso txoj cai, lawv tej cai, lawv tej yawm sij, lawv tej sam xeeb, lawv lub yeeb haum thiab yeeb koob, thiab lub hwj chim ntawm lawv lub pov thawj hwj; muab ib nqe lus ntxiv rau ib nqe lus, ib ntsiab cai ntxiv rau ib ntsiab cai, muab me ntsis nim no thiab muab me ntsis lwm hnub; muab kev nplij siab rau peb los ntawm kev tshaj tawm tej uas yuav muaj los, kom txhawb peb txoj kev cia siab!

22 Cov kwv tij, peb yuav tsis mus lawm yav tom ntej nrog txoj hauj lwm tseem ceeb ua luaj no los? Cia li mus lawm yav tom ntej thiab txhob thaub qab. Ua siab loj, cov kwv tij; thiab cia li mus, mus tsis tu ncua kom txog thaum yeej! Nej lub siab cia li xyiv fab, thiab cia li zoo siab heev. Cia lub ntiaj teb pib hlo hu nkauj. Cia cov tuag hais loo tej nkauj qhuas nyob mus ib txhis rau tus Vaj Ntxwv Emanu-es, tus uas tau tsa, ua ntej muaj lub ntiaj teb, qhov uas ua rau peb muaj peev xwm txhiv lawv dim tawm hauv lawv lub tsev kaw los; vim cov neeg raug kaw yuav dim plaws.

23 Cia cov roob qw rau txoj kev xyiv fab, thiab tag nrho tej vos hav qw nrov nrov; thiab tag nrho tej hiav txwv thiab tej teb nqhuab qhia tej txuj ci uas xav tsis thoob ntawm nej tus Vaj Ntxwv Ib Txhis! Thiab tej dej, thiab tej me nyuam dej, thiab tej dej me me ntws los zoo siab hlo. Cia tej hav zoov thiab tag nrho tej ntoo nram tiaj qhuas tus Tswv; thiab tej pob zeb khov quaj rau txoj kev xyiv fab! Cia lub hnub, lub hli, thiab tej hnub qub thaum kaj ntug txoog hu nkauj ua ke, thiab tag nrho Vajtswv tej tub qw rau txoj kev xyiv fab! Thiab cia tag nrho tej uas tsim muaj nyob mus ib txhis tshaj tawm nws lub npe mus ib txhiab thiab ib txhis! Thiab kuv hais ntxiv tias, lub suab peb hnov saum ntuj ceeb tsheej los muaj yeeb koob heev, tshaj tawm rau peb lub pob ntseg txog lub yeeb koob, kev cawm seej, thiab lub sam xeeb, thiab kev tsis txawj tuag, thiab txoj sia nyob mus ib txhis; tej nceeg vaj, tej nom tswv, thiab tej hwj chim!

24 Saib seb, twb yuav txog hnub tseem ceeb ntawm tus Tswv lawm; thiab leej twg yuav tiv taus hnub uas nws los, thiab leej twg yuav sawv tau thaum nws tshwm sim los? Vim nws yuav zoo li tus kws nchuav nyiaj lub qhov cub, thiab zoo li tus ntxhua khaub ncaws tej tshuaj. Thiab nws yuav zaum zoo li ib tug kws nchuav nyiaj thiab kws ua kom nyiaj dawb; thiab nws yuav ua kom Levis cov tub dawb huv, thiab muab lawv txhuam zoo li kub thiab nyiaj, xwv kom lawv yuav coj ncaj ncees muab tau kev tiam rau tus Tswv. Yog li ntawd, cia peb uas yog ib lub koom txoos thiab ib pab neeg, thiab yog Tsoom Haiv Neeg Ntseeg hauv Hnub Nyoog Kawg, coj ncaj ncees muab ib txoj kev tiam rau tus Tswv; thiab cia peb muab ib phau ntawv muaj peb cov tuag tej ceev xwm txheej uas zoo txaus tsim nyog txais yuav tag nrho coj mus rau hauv nws lub tuam tsev dawb huv, thaum ua tiav lawm.

25 Cov kwv tij, kuv muaj ntau yam hais rau nej txog lub ntsiab lus no; tiam sis nim no yuav muab xaus rau lub sij hawm no, thiab mam hais txog lub ntsiab lus no mus ntxiv nyob lwm lub sij hawm. Kuv, ib yam li ib txwm, yeej yog nej tus tub qhe uas txo hwj chim thiab tus phooj ywg uas tsis hloov ib zaug li,