1 Muaj tseeb tiag, tus Tswv hais li no rau koj kuv tus tub qhe Joseph, hais tias rau qhov koj tau nug kuv kom paub thiab to taub saib kuv, tus uas yog tus Tswv, ua li cas pom zoo kuv cov tub qhe Anplaham, Ixaj, thiab Yakhauj, ib yam li kuv cov tub qhe Mauxes, Daviv thiab Xalumoos thiab, ntsig txog rau txoj ntsiab cai thiab lus qhuab qhia ntawm lawv txoj kev muaj ntau tus poj niam thiab tej niam yau—

2 Saib seb, thiab xyuas seb, kuv yog tus Tswv nej tus Vajtswv, thiab yuav teb koj ntsig txog qhov no.

3 Yog li ntawd, npaj koj lub siab los txais thiab cia li ua raws li tej lus qhia uas kuv tab tom yuav muab rau koj; vim rau txhua tus uas tau muab txoj kev cai no qhia rau lawv los lawv yuav tsum ua raws li txoj kev cai ntawd.

4 Vim saib seb, kuv muab ib txoj kev khi lus tshiab thiab kav ib txhis ua tshwm sim los rau nej; thiab yog nej tsis coj raws li txoj kev khi lus ntawd, ces nej yuav raug txim; vim tsis muaj ib tug muaj peev xwm xyeej txoj kev khi lus no thiab tseem cia nkag mus rau hauv kuv lub yeeb koob.

5 Vim txhua tus uas yuav tau ib txoj koob hmoov ntawm kuv yuav tsum coj raws li txoj kev cai uas tau muab tsa rau txoj koob hmoov ntawd, thiab tej uas yuav tsum ua rau qhov ntawd, raws li tau tsa ua ntej ntuj tsim teb raug.

6 Thiab hais ntsig txog txoj kev khi lus tshiab thiab kav ib txhis, tau tsa qhov no los rau qhov txhij txhua ntawm kuv lub yeeb koob; thiab tus uas tau txais qhov txhij txhua ntawd yuav tsum thiab yuav coj txoj kev cai, yog tsis li ces nws yuav raug txim, tus Tswv uas yog Vajtswv hais li.

7 Thiab kuv hais tseeb rau nej tias, tej uas yuav tsum muaj ntawm txoj kev cai no yog tej no: Txhua txoj kev khi lus, kev cog lus, kev sib pom zoo, kev yuav tsum ua, kev lav lus, kev lav ris, kev ua kev cai, kev sib txuas, kev sib koom, los yog kev zeem tos, uas tsis yog ua thiab muab khi tseg cia los ntawm tus Ntsuj Plig Dawb Huv ntawm kev cog lus, los ntawm tus uas tau pleev roj rau, rau tiam neej no thiab tib yam nkaus rau tag nrho tiam nyob mus ib txhis li, thiab qhov dawb huv tshaj thiab, los ntawm kev tshwm sim thiab lus txib uas muab los ntawm tus kuv tau pleev roj rau los, tus kuv tau tsa nyob hauv ntiaj teb no los tuav lub hwj chim no (thiab kuv tau tsa kuv tus tub qhe Joseph los tuav lub hwj chim no nyob hauv hnub nyoog kawg, thiab ib lub sij hawm twg tsuas muab lub hwj chim thiab cov yawm sij ntawm lub pov thawj hwj no rau ib tug neeg tuav xwb), ces tsis muaj kev tij lim, hwj chim, los yog peev xwm khi tau ua ke thaum cov neeg tuag sawv rov los thiab tom qab ntawd, vim txhua txoj kev cog lus uas tsis yog ua raws li qhov no ces yuav muaj qhov kawg thaum neeg tas sim neej.

8 Saib seb, tus Tswv uas yog Vajtswv hais tias, kuv lub tsev yog lub tsev muaj chaw txawb chaw rau, thiab tsis yog ib lub tsev ntxhov hnyo.

9 Tus Tswv hais tias, Kuv puas yuav txais ib txoj kev tiam, uas tsis yog ua los ntawm kuv lub npe?

10 Los sis kuv puas yuav txais los ntawm nej tes tej yam uas kuv tsis tau txib?

11 Thiab tus Tswv hais tias, Kuv puas yuav txib nej, tsuas yog los ntawm kev cai xwb, uas kuv thiab kuv Txiv twb tau muab tsa rau nej lawm, ua ntej muaj lub ntiaj teb?

12 Kuv yog tus Tswv nej tus Vajtswv; thiab kuv muab lo lus txib no rau nej tias—yuav tsis muaj leej twg los cuag tau Leej Txiv tsuas yog los ntawm kuv los sis ntawm kuv txoj lus, uas yog kuv txoj kev cai, tus Tswv hais li.

13 Thiab tus Tswv hais tias txhua yam uas nyob hauv lub neej no, txawm hais tias tau tsa los ntawm neeg, los ntawm kev tswj hwm, los yog tej nom tswv, los yog tej lub hwj chim, los yog tej uas muaj suab muaj npe, txawm yog dab tsi los xij, uas tsis yog los ntawm kuv los sis ntawm kuv txoj lus los, ces yuav raug muab rhuav, thiab yuav tsis muaj nyob tom qab neeg tuag lawm, tsis hais thaum lub sij hawm los yog tom qab kev sawv rov los, tus Tswv nej tus Vajtswv hais li.

14 Vim txhua yam uas tseem nyob yog los ntawm kuv; thiab txhua yam uas tsis yog los ntawm kuv yuav tshee hnyo thiab puas tsuaj mus.

15 Yog li ntawd, yog ib tug txiv neej yuav ib tug poj niam rau nws nyob hauv ntiaj teb, thiab nws tsis yog yuav tus poj niam los ntawm kuv los yog ntawm kuv txoj lus, thiab nws khi lus nrog tus poj niam ntev li uas nws nyob hauv lub neej no thiab tus poj niam nrog nws, nkawd txoj kev khi lus thiab kev sib yuav tsis tij lim thaum nkawd tuag, thiab thaum nkawd tas sim neej no; yog li ntawd, nkawd tsis khi ua ke los ntawm ib txoj kev cai twg thaum nkawd tawm hauv lub ntiaj teb mus.

16 Yog li ntawd, thaum nkawd tas sim neej no nkawd tsis sib yuav thiab tsis muab nkawd sib yuav; tiam sis yuav muab nkawd tsa ua tim tswv saum ntuj ceeb tsheej, uas yog cov tim tswv uas ua tub qhe los muab kev txhawb pab, los txhawb pab rau cov tsim nyog tau lub yeeb koob siab tshaj, thiab loj tshaj mus ib txhis.

17 Vim cov tim tswv no tsis tau coj raws li kuv txoj kev cai; yog li ntawd, lawv tsis muaj peev xwm huaj vam, tiam sis nyob nrug ras thiab nyob ib leeg, tsis muaj kev tsa nto, muaj lawv txoj kev cawm dim, mus rau tag nrho kev nyob mus ib txhis li, thiab txij no mus lawv tsis yog vaj tswv, tiam sis yog Vajtswv cov tim tswv mus ib txhiab thiab ib txhis.

18 Thiab ntxiv, kuv hais tseeb rau nej tias, yog ib tug txiv neej yuav ib tug poj niam, thiab sib khi lus nrog tus poj niam rau tiam neej no thiab tag nrho tiam nyob mus ib txhis, yog hais tias txoj kev sib khi lus ntawd tsis yog los ntawm kuv los yog ntawm kuv txoj lus, uas yog kuv txoj kev cai, thiab yog tsis muab khi tseg cia los ntawm tus Ntsuj Plig Dawb Huv ntawm txoj kev cog lus, los ntawm tus uas kuv tau pleev roj thiab tsa rau lub hwj chim no, ces kev sib khi lus ntawd twb tsis tij lim thiab tsis leej thaum nkawd tas sim neej no, vim nkawd tsis yog muab zwm ua ke los ntawm kuv, thiab ntawm kuv txoj lus, tus Tswv hais li; thaum nkawd tas sim neej lawm, yuav tsis txais txoj kev khi lus ntawd nyob saud, vim tau tsa cov tim tswv thiab cov vaj tswv nyob saud, cov uas nkawd yuav hla tsis dhau; yog li ntawd, nkawd txais tsis tau kuv lub yeeb koob ua lawv tug; vim kuv lub tsev yog ib lub tsev muaj chaw txawb chaw rau, tus Tswv uas yog Vajtswv hais li.

19 Thiab ntxiv, kuv hais tseeb rau nej tias, yog ib tug txiv neej yuav ib tug poj niam los ntawm kuv txoj lus, uas yog kuv txoj kev cai, thiab los ntawm txoj kev khi lus tshiab thiab kav ib txhis, thiab muab khi rau nkawd los ntawm tus Ntsuj Plig Dawb Huv ntawm txoj kev cog lus, los ntawm tus uas tau pleev roj rau, tus uas kuv tau muab lub hwj chim no thiab cov yawm sij ntawm lub pov thawj hwj no; thiab yuav hais rau nkawd tias—Neb yuav sawv los nyob hauv thawj txoj kev sawv rov los; thiab yog hais tias tom qab thawj txoj kev sawv rov los, nyob hauv txoj kev sawv rov los tom ntej; thiab yuav tau tej rooj theej kiab, tej nceeg vaj, tej nom tswv, thiab tej lub hwj chim, tej kev kav, txhua qhov chaw siab thiab qis—ces yuav muab sau cia rau hauv tus Me Nyuam Yaj Phau Ntawv Txheeb txoj Sia, hais tias nws yuav tsis tua neeg uas yog ua rau tus uas tsis txhaum nqaij ntuag ntshav nrog, thiab yog nej coj raws li kuv txoj kev khi lus, thiab tsis tau tua neeg uas yog ua rau tus uas tsis txhaum nqaij ntuag ntshav nrog, nkawd yeej yuav tau tag nrho txhua tsav txhua yam uas kuv tus tub qhe tau hais rau nkawd, rau tiam neej no thiab tag nrho tiam nyob mus ib txhis; thiab yuav tij lim tag nrho thaum nkawd tas sim neej no; thiab nkawd yuav hla dhau cov tim tswv, thiab cov vaj tswv, uas tau tsa nyob rau saud, mus rau nkawd txoj kev tsa nto thiab yeeb koob nyob hauv txhua yam, ib yam li tau muab khi cia rau nkawd taub hau, uas lub yeeb koob yog qhov muaj txhij txhua thiab ib txoj kev muaj tub ki ntxiv mus ib txhiab thiab ib txhis.

20 Thaum ntawd lawv yuav ua vaj tswv, vim lawv tsis muaj qhov kawg; yog li ntawd lawv yuav nyob kav ib txhiab kav ib txhis, vim lawv nyob mus tsis tas; thaum ntawd lawv yuav siab dua txhua yam, vim txhua yam ywj rau lawv. Thaum ntawd lawv yuav ua vaj tswv, vim lawv muaj hwj chim tag nrho, thiab cov tim tswv ywj rau lawv.

21 Kuv hais tseeb tseeb rau nej tias, tsuas yog nej coj raws li kuv txoj kev cai xwb tsis li ces nej tsis muaj peev xwm txais tau lub yeeb koob no.

22 Vim lub rooj vag yeej nqaim, thiab txoj kev yeej ti uas coj neeg mus rau txoj kev tsa nto thiab kev muaj neej mus ntxiv, thiab tsawg tus thiaj nrhiav tau txoj kev ntawd, vim nej twb tsis txais yuav kuv nyob hauv lub ntiaj teb thiab nej twb tsis paub kuv.

23 Tiam sis yog hais tias nej txais yuav kuv nyob hauv lub ntiaj teb, ces nej yeej paub kuv, thiab yuav tau txais nej txoj kev tsa nto; kom kuv nyob qhov twg los nej yuav nyob qhov ntawd thiab.

24 Nov yog tej txoj sia nyob mus ib txhis—kom paub tib tug Vajtswv uas muaj tswv yim thiab tseeb, thiab Yexus Khetos, tus uas nws txib los. Kuv yog nws. Yog li ntawd, nej cia li txais kuv txoj kev cai.

25 Lub qhov rooj loj, thiab txoj kev dav yog qhov uas coj mus rau tej kev tuag; thiab muaj coob leej uas mus rau qhov ntawd, vim lawv tsis txais yuav kuv, thiab lawv tsis coj raws li kuv txoj kev cai.

26 Kuv hais tseeb tseeb rau nej tias, yog ib tug txiv neej yuav ib tug poj niam raws li kuv txoj lus, thiab muab nkawd khi tseg cia los ntawm tus Ntsuj Plig Dawb Huv ntawm txoj kev cog lus, raws li kuv txoj kev tsa ua, thiab yog nkawd ib tug twg ho ua txhaum ib yam kev txhaum twg los yog ua txhaum txoj kev khi lus tshiab thiab kav ib txhis qhov twg, thiab txhua yam kev thuam, thiab yog hais tias nkawd tsis tau tua neeg uas yog ua rau tus uas tsis txhaum nqaij ntuag ntshav nrog, txawm li ntawd los nkawd yuav sawv los nyob hauv thawj txoj kev sawv rov los, thiab txais tau nkawd txoj kev tsa nto; tiam sis nkawd sab cev nqaij daim tawv yuav raug puas tsuaj, thiab tus Tswv yuav tso lawv kom raug Dab Ntxwg Nyoog txoj kev tsim txom kom txog hnub txhiv dim, tus Tswv uas yog Vajtswv hais li.

27 Txoj kev hais lus saib tsis taus tus Vaj Ntsuj Plig Dawb Huv, qhov uas yuav tsis zam txim rau nyob hauv lub neej no los sis tas sim neej no los yog qhov hais tias nej tua neeg uas yog nej ua rau tus uas tsis txhaum nqaij ntuag ntshav nrog, thiab pom zoo muab kuv tua pov tseg, tom qab nej tau txais kuv txoj kev khi lus tshiab thiab kav ib txhis, tus Tswv uas yog Vajtswv hais li; thiab tus uas tsis coj raws li txoj kev cai no yeej yuav tsis muaj peev xwm nkag tau mus rau hauv kuv lub yeeb koob, tiam sis tus ntawd yuav raug txim, tus Tswv hais li.

28 Kuv yog tus Tswv koj tus Vajtswv, thiab yuav muab txoj kev cai ntawm kuv lub Pov Thawj Hwj Dawb Huv rau koj, ib yam li tau muab los ntawm kuv thiab kuv Txiv ua ntej muaj lub ntiaj teb.

29 Anplaham tau txais txhua yam, txhua yam uas nws tau txais lawm, los ntawm kev tshwm sim thiab lus txib, los ntawm kuv txoj lus, thiab tau txais nws txoj kev tsa nto thiab zaum rau saum nws lub rooj theej kiab, tus Tswv hais li.

30 Anplaham tau txais tej kev cog lus ntsig txog nws cov tub ki—koj twb yog los ntawm cov tub ki ntawd, uas yog, kuv tus tub qhe Joseph—uas yuav tsum muaj mus ntxiv ntev npaum li uas tseem muaj lawv nyob hauv lub neej no; thiab ntsig txog Anplaham thiab nws cov tub ki, tas sim neej no lawm los lawv yuav muaj ntxiv mus; nyob hauv lub neej no los sis tas sim neej no lawm los lawv yuav muaj ntxiv coob npaum li cov hnub qub suav tsis txheeb; los yog, txawm hais tias nej yuav suav cov xuab zeb nyob nram ntug dej hiav txwv los nej yeej suav tsis tag.

31 Txoj kev cog lus no los kuj yog rau nej thiab, vim nej twb yog los ntawm Anplaham los, thiab lo lus cog tseg yog muab rau Anplaham; thiab los ntawm txoj kev cai no kuv Txiv tej hauj lwm thiaj muaj mus ntxiv, qhov uas nws ua rau nws tus kheej txais lub yeeb koob.

32 Yog li ntawd, nej cia li mus thiab ua tej yam uas Anplaham ua; nej cia li ua raws nraim li kuv txoj kev cai ces yuav cawm nej dim.

33 Tiam sis yog hais tias nej tsis ua raws nraim li kuv txoj kev cai ces nej tsis muaj peev xwm txais tau txoj kev cog lus ntawm kuv Txiv, uas nws cog lus rau Anplaham.

34 Vajtswv tau txib Anplaham, thiab Xalas tau muab Hankas rau Anplaham ua poj niam. Thiab vim li cas nws ua li ntawd? Vim qhov no yog txoj kev cai; thiab los ntawm Hankas los tau muaj ntau haiv neeg coob. Yog li ntawd, tau ua kom muaj raws li tej kev cog lus, nrog rau lwm yam, los ntawm qhov no.

35 Yog li ntawd, Anplaham puas raug txim? Kuv hais tseeb rau nej tias, Tsis raug, vim kuv, tus uas yog tus Tswv, txib kom ua.

36 Tus Tswv txib Anplaham kom muab nws tus tub Ixaj txi; txawm li ntawd los, tau sau tseg tias: Koj yuav tsum tsis txhob tua neeg. Txawm li cas los, Anplaham twb tsis xyeej, thiab tau suav rau nws hais tias yog kev ncaj ncees.

37 Anplaham muaj tej niam yau, thiab lawv tau muaj me nyuam rau nws; thiab tau suav rau nws hais tias yog kev ncaj ncees, vim tau muab lawv rau nws, thiab nws coj raws li kuv txoj kev cai; ib yam li Ixaj thiab Yakhauj nkawd twb tsis ua lwm yam dab tsi li tsuas yog tej uas tau txib nkawd ua xwb; thiab vim nkawd twb tsis ua lwm yam dab tsi li tsuas yog tej uas tau txib nkawd ua xwb, nkawd tau txais nkawd txoj kev tsa nto, raws li tej kev cog lus, thiab zaum saum lub rooj theej kiab, thiab tsis yog cov tim tswv tiam sis yog cov vaj tswv.

38 Daviv kuj muaj ntau tus poj niam thiab tej niam yau thiab, thiab kuv ob tug tub qhe Xalumoos thiab Mauxes thiab, thiab kuv lwm cov tub qhe coob leej, txij thaum chiv keeb ntawm kev tsim los txog lub sij hawm no; thiab lawv tsis tau ua txhaum dab tsi li tsuas yog tej uas lawv tsis tau txais los ntawm kuv los xwb.

39 Daviv cov poj niam thiab cov niam yau yog kuv muab rau nws, los ntawm kuv tus tub qhe Nathas txhais tes, thiab lwm cov yaj saub uas tau muaj cov yawm sij ntawm lub hwj chim no; thiab nyob hauv tej yam no nws twb tsis tau ua txhaum ib qho rau kuv li tsuas yog rau Uliyas thiab nws tus poj niam xwb; thiab yog li ntawd nws thiaj tau poob ntawm nws txoj kev tsa nto, thiab tau txais nws tug; thiab nws yuav tsis tau lawv ua nws tug thaum tas sim neej no, vim kuv muab lawv rau lwm tus lawm, tus Tswv hais li.

40 Kuv yog tus Tswv nej tus Vajtswv, thiab kuv tau muab ib txoj hauj lwm tsa rau koj, kuv tus tub qhe Joseph, thiab muab txhua yam txum tim rov qab los. Koj xav tau dab tsi ces cia li nug, thiab yuav muab rau koj raws li kuv txoj lus.

41 Thiab ib yam li koj tau nug ntsig txog kev deev luag poj luag txiv, kuv hais tseeb tseeb rau koj tias, yog hais tias ib tug txiv neej tau ib tug poj niam raws li txoj kev khi lus tshiab thiab kav ib txhis, thiab yog hais tias nws ho mus nrog lwm tus txiv neej, tiam sis kuv tsis tau muab rau nws los ntawm txoj kev pleev roj dawb huv, ces tus poj niam ntawd tau deev luag txiv thiab yuav raug puas tsuaj.

42 Yog hais tias nws tsis yog los ntawm txoj kev khi lus tshiab thiab kav ib txhis, thiab nws mus nrog lwm tus txiv neej, ces nws tau deev luag txiv.

43 Thiab yog hais tias nws tus txiv mus nrog lwm tus poj niam, thiab ua ntej ntawd twb tau cog lus, ces nws tau rhuav nws txoj kev cog lus thiab tau deev luag poj.

44 Thiab yog hais tias tus poj niam tsis tau deev luag txiv, tiam sis twb tsis txhaum thiab tsis tau rhuav nws txoj kev cog lus, thiab nws yeej paub, thiab kuv muab ua tshwm sim rau koj, kuv tus tub qhe Joseph, thaum ntawd koj yuav muaj hwj chim, los ntawm lub hwj chim ntawm kuv lub Pov Thawj Hwj Dawb Huv, coj tus poj niam mus thiab muab nws rau tus uas tsis tau deev luag poj tiam sis tau coj ncaj tsis tu tsis tseg; vim yuav muab nws tsa los kav ntau leej.

45 Vim kuv tau muab cov yawm sij thiab lub hwj chim ntawm lub pov thawj hwj rau koj, yog li ntawd kuv thiaj li txum tim txhua yam rov qab los, thiab ua txhua yam los rau koj paub thaum txog lub sij hawm uas pom zoo lawm.

46 Thiab kuv hais tseeb tseeb rau koj tias, txhua yam uas koj muab khi tseg cia hauv ntiaj teb ces yuav muab khi tseg cia saum ntuj ceeb tsheej; thiab txhua yam uas koj muab khi ua ke nyob hauv ntiaj teb no, los ntawm kuv lub npe thiab ntawm kuv txoj lus, tus Tswv hais li, ces yuav muab khi ua ke nyob mus ib txhis nyob rau saum ntuj ceeb tsheej; thiab txhua tus tej kev txhaum uas koj zam txim rau nyob hauv ntiaj teb ces yuav muab zam txim rau mus ib txhis nyob rau saum ntuj ceeb tsheej; thiab txhua tus tej kev txhaum uas koj suav nyob hauv ntiaj teb ces yuav muab suav nyob saum ntuj ceeb tsheej.

47 Thiab ntxiv, kuv hais tseeb tias, koj foom koob hmoov rau tus twg los kuv yuav foom koob hmoov rau tus ntawd, thiab koj foom tsis zoo rau tus twg los kuv yuav foom tsis zoo rau tus ntawd, tus Tswv hais li; vim kuv, tus uas yog tus Tswv, yog koj tus Vajtswv.

48 Thiab ntxiv, kuv hais tseeb rau koj, kuv tus tub qhe Joseph, hais tias txhua yam uas koj muab nyob hauv ntiaj teb, thiab koj muab ib tug neeg twg rau leej twg nyob hauv ntiaj teb, los ntawm kuv txoj lus thiab raws li kuv txoj kev cai, ces qhov ntawd yuav tau tej koob hmoov thiab tsis tau tej kev foom tsis zoo, thiab nrog rau kuv lub hwj chim, tus Tswv hais li, thiab yuav tsis raug txim nyob hauv ntiaj teb thiab nyob saum ntuj ceeb tsheej.

49 Vim kuv yog tus Tswv koj tus Vajtswv, thiab yuav nrog koj nyob kom txog ntua qhov kawg ntawm lub ntiaj teb, thiab tag nrho kev nyob mus ib txhis; vim kuv muab koj txoj kev tsa nto khi tseg cia rau koj, thiab npaj ib lub rooj theej kiab rau koj nyob saum kuv Txiv lub nceeg vaj, nrog rau koj yawg koob Anplaham.

50 Saib seb, kuv twb pom koj tej kev txi, thiab yuav zam txim rau tag nrho koj tej kev txhaum; kuv twb pom koj tej kev txi los ntawm kev mloog lus rau tej uas kuv tau hais rau koj. Yog li ntawd, cia li mus, thiab kuv yuav qhib ib txoj kev rau koj khiav dim, ib yam li kuv tau txais yuav Anplaham txoj kev muab nws tus tub Ixaj tiam.

51 Kuv hais tseeb rau koj: Ib lo lus txib kuv muab rau kuv tus ntxhais qhev Emma Smith, uas yog koj tus poj niam, tus uas kuv tau muab rau koj, kom nws nyob twj ywm thiab txhob ua qhov uas kuv tau txib koj kom muab rau nws ua; vim kuv tau ua qhov ntawd, tus Tswv hais li, los sim neb ob leeg lub siab, ib yam li kuv tau sim Anplaham lub siab, thiab xwv kom kuv yuav txib kom neb yuav tsum ua ib txoj kev tiam, los ntawm kev khi lus thiab kev txi.

52 Thiab cia kuv tus ntxhais qhev, Emma Smith, txais yuav tag nrho cov uas tau muab rau kuv tus tub qhe Joseph, thiab cov uas kuv pom tias yog neeg tsim txiaj thiab dawb huv; thiab cov uas tsis dawb huv, tiam sis tau hais tias lawv dawb huv, yuav raug puas tsuaj, tus Tswv uas yog Vajtswv hais li.

53 Vim kuv yog tus Tswv neb tus Vajtswv, thiab neb yuav tsum ua raws li kuv lub suab; thiab kuv pub rau kuv tus tub qhe Joseph kom muab nws tsa ua tus kav ntau yam; vim nws tau rau siab ntso rau ob peb yam, thiab txij no mus kuv yuav txhawb nws zog.

54 Thiab kuv txib kuv tus ntxhais qhev, Emma Smith, kom nyob nrog thiab npuab kuv tus tub qhe Joseph, thiab txhob nyob nrog thiab npuab lwm tus hlo li. Tiam sis yog hais tias nws tsis coj raws li lo lus txib no ces nws yuav raug puas tsuaj, tus Tswv hais li; vim kuv yog tus Tswv koj tus Vajtswv, thiab yuav ua kom nws puas tsuaj yog hais tias nws tsis coj raws li kuv txoj kev cai.

55 Tiam sis yog hais tias nws tsis coj raws li lo lus txib no, ces kuv tus tub qhe Joseph yuav tsum ua txhua yam rau nws, twb yog raws li Joseph tau hais; thiab kuv yuav foom koob hmoov rau Joseph thiab ua kom Joseph huaj vam thiab muab ib puas npaug rau nws nyob hauv lub neej no, ntawm cov niam thiab cov txiv, cov kwv cov tij thiab cov nkauj cov muam, tej vaj tsev thiab tej liaj teb, tej poj niam thiab tej me nyuam, thiab tej meej mom ntawm tej txoj sia nyob mus ib txhis nyob hauv tej ntuj uas nyob mus ib txhis.

56 Thiab ntxiv, kuv hais tseeb tias, cia kuv tus ntxhais qhev zam txim rau kuv tus tub qhe Joseph tej kev txhaum; thiab tom qab ntawd ces kuv yuav zam txim rau kuv tus ntxhais qhev tej kev txhaum, tej uas nws tau ua txhaum rau kuv; thiab kuv, tus Tswv uas yog koj tus Vajtswv, yuav foom koob hmoov rau nws, thiab ua kom nws huaj vam, thiab ua kom nws lub siab xyiv fab.

57 Thiab kuv rov qab hais dua, cia kuv tus tub qhe Joseph tsis txhob muab nws tej teej tug tshem ntawm nws tes mus, tsam muaj yeeb ncuab tuaj thiab ua kom nws puas tsuaj; vim Dab Ntxwg Nyoog nrhiav kev ua kom puas tsuaj; vim kuv yog tus Tswv nej tus Vajtswv, thiab nws yog kuv tus tub qhe; thiab saib seb, thiab xyuas seb, kuv nrog nws nyob, ib yam li kuv tau nrog Anplaham, nej tus yawg koob nyob, kom Joseph tau txoj kev tsa nto thiab yeeb koob.

58 Nim no, hais txog txoj kev cai ntawm lub pov thawj hwj, muaj ntau yam ntsig txog qhov no.

59 Tseeb tiag, yog hais tias kuv Txiv hu ib tug txiv neej, ib yam li hu Aloos, los ntawm kuv tus kheej lub suab, thiab los ntawm tus uas tau xa kuv los lub suab, thiab kuv tau muab cov yawm sij ntawm lub hwj chim pov thawj hwj no rau nws ua vaj txiaj ntsim, yog hais tias nws ua ib yam dab tsi los ntawm kuv lub npe, thiab raws li kuv txoj kev cai thiab los ntawm kuv txoj lus, ces nws yuav tsis ua txhaum, thiab kuv yuav hais tias nws tsis muaj txim.

60 Yog li ntawd, tsis txhob pub ib tug twg cem kuv tus tub qhe Joseph; vim kuv yuav hais tias nws tsis muaj txim; vim nws yuav ua txoj kev txi uas kuv kom nws ris rau nws tej kev ua txhaum, tus Tswv nej tus Vajtswv hais li.

61 Thiab ntxiv, hais ntsig txog txoj kev cai ntawm lub pov thawj hwj—yog hais tias ib tug txiv neej twg yuav ib tug ntxhais nkauj xwb, thiab xav yuav dua ib tug, thiab thawj tug muab txoj kev tso cai, thiab yog hais tias tus txiv neej ntawd yuav tus thib ob, thiab nkawd yog nkauj xwb, thiab tsis tau cog lus hais tias nws yuav lwm tus txiv neej, ces tus txiv neej ntawd tsis muaj txim; nws tsis yog deev luag poj vim twb tau muab nkawd rau nws lawm; nws twb tsis yog deev luag poj yog nrog cov uas yog nws tug thiab tsis yog lwm tus li.

62 Thiab yog hais tias txoj kev cai no muab kaum tus nkauj xwb rau nws, nws tsis yog deev luag poj, vim lawv yog nws tug, thiab twb tau muab lawv rau nws lawm; yog li ntawd nws tsis muaj txim.

63 Tiam sis yog hais tias kaum tus nkauj xwb ntawd ib tug twg, tom qab yuav nws lawm, es ho mus nrog lwm tus txiv neej, ces nws tau deev luag txiv, thiab yuav raug puas tsuaj; vim tau muab lawv rau tus txiv neej kom huaj vam mus puv nkaus lub ntiaj teb, raws li kuv lo lus txib, thiab ua kom muaj raws li txoj kev cog lus uas kuv Txiv tau muab ua ntej ntuj tsim teb raug, thiab rau lawv txoj kev tsa nto nyob hauv tej ntuj uas nyob mus ib txhis, kom lawv yuav yug tau tib neeg; vim los ntawm qhov no kuv Txiv txoj hauj lwm yuav mus ntxiv, xwv kom yuav muab yeeb koob rau nws.

64 Thiab ntxiv, kuv hais tseeb tseeb rau nej tias, yog ib tug txiv neej twg uas tuav cov yawm sij ntawm lub hwj chim no muaj ib tug poj niam, thiab nws muab txoj kev cai ntawm kuv lub pov thawj hwj qhia rau nws poj niam, ntsig txog tej yam no, ces nws poj niam yuav ntseeg thiab yuav txhawb nws, tsis li ces nws yuav raug puas tsuaj, tus Tswv nej tus Vajtswv hais li; vim kuv yuav ua kom tus poj niam ntawd puas tsuaj, vim kuv yuav ua rau kuv lub npe muaj yeeb koob rau tag nrho cov uas txais thiab coj raws li kuv txoj kev cai.

65 Yog li ntawd, kuv pom tias yog raws li txoj kev cai, yog hais tias tus poj niam tsis txais txoj kev cai no, qhov uas tus txiv txais tau txhua tsav txhua yam uas kuv, tus Tswv uas yog nws tus Vajtswv, yuav muab rau nws, vim tus poj niam tsis ntseeg thiab tsis txhawb tus txiv raws li kuv txoj lus; ces tom qab ntawd tus poj niam hloov los ua tus neeg ua txhaum; thiab tus txiv dim tes ntawm Xalas txoj kev cai, tus uas tau txhawb Anplaham raws li txoj kev cai thaum kuv tau txib Anplaham kom mus coj Hankas los ua poj niam.

66 Thiab nim no, hais ntsig txog txoj kev cai no, kuv hais tseeb tseeb rau koj tias, kuv yuav muab ntxiv ua tshwm sim los rau koj, tom qab no mus; yog li ntawd, cia qhov no txaus rau lub sij hawm no. Saib seb, kuv yog Alafas thiab Aumenkas. Amees.