Tshooj 133
Kev tshwm sim uas tus Yaj Saub Joseph Smith tau txais, nyob hauv Hiram, Ohio, lub Kaum Ib Hlis Ntuj hnub tim 3, xyoo 1831. Nyob hauv zaj lus qhia ua ntej txoj kev tshwm sim no, Joseph Smith zaj keeb kwm hais tias, “Nyob rau lub sij hawm no tau muaj ntau yam uas cov Txwj Laug xav paub ntsig txog txoj kev tshaj tawm txoj Moo Zoo mus rau neeg ntiaj teb, thiab ntsig txog txoj kev sib sau; thiab xwv kom peb yuav taug kev raws nraim txoj kev kaj uas tseeb, thiab kom peb txais lus qhia los saum ntuj los, thaum hnub tim 3 ntawm lub Kaum Ib Hlis Ntuj, xyoo 1831, kuv tau nug tus Tswv thiab tau txais txoj kev tshwm sim tseem ceeb raws li no.” Thaum xub thawj cov kws kho ntawv muab tshooj no sau ntxiv tom kawg rau hauv phau Lus Qhuab Qhia thiab Kev Khi Lus tiam sis tom qab no lawv muab los ua ib tshooj ntxiv.
1–6, Tus Tswv txib Haiv Neeg Ntseeg kom npaj rau txoj Kev Los Zaum Ob; 7–16, Tus Tswv txib txhua tus neeg kom khiav tawm hauv Npanpiloos, los mus rau Xi-oos, thiab npaj rau hnub tseem ceeb ntawm tus Tswv; 17–35, Nws yuav sawv saum Roob Xi-oos, tej thooj av teb chaws hauv lub ntiaj teb yuav hloov los ua ib daim av, thiab tej xeem neeg Ixayees yuav rov qab los; 36–40, Joseph Smith muab txoj moo zoo txum tim rov qab los kom coj mus tshaj tawm rau tag nrho neeg ntiaj teb; 41–51, Tus Tswv yuav coj txoj kev pauj los rau cov neeg phem; 52–56, Twb yog xyoo rau cov uas Nws tau txhiv dim; 57–74, Yuav xa txoj moo zoo tawm mus cawm Haiv Neeg Ntseeg thiab mus ua txoj kev puas tsuaj rau cov neeg phem.
1 Cia li mloog, auj nej uas yog cov neeg ntawm kuv lub koom txoos, tus Tswv nej tus Vajtswv hais li, thiab cia li mloog tus Tswv txoj lus ntsig txog nej—
2 Tus Tswv uas yuav los nrawm nroos rau hauv nws lub tuam tsev; tus Tswv uas yuav coj txoj kev foom tsis zoo los txiav txim rau neeg ntiaj teb; muaj tseeb tiag, rau tag nrho tej haiv neeg uas hnov qab Vajtswv, thiab rau tag nrho cov tsis mloog Vajtswv lus nyob hauv nej.
3 Vim nws yuav thws nws txhais npab dawb huv rau txhua haiv neeg lub qhov muag pom, thiab tag nrho cov neeg nyob thoob plaws lub ntiaj teb yuav pom lawv tus Vajtswv txoj kev cawm seej.
4 Yog li ntawd, nej cia li npaj, nej cia li npaj, auj kuv cov neeg; ua kom nej tus kheej dawb huv; nej cia li sib sau los ua ke, rau hauv thaj av Xi-oos, auj nej uas yog cov neeg ntawm kuv lub koom txoos, tag nrho nej cov uas tus Tswv txib kom nyob.
5 Nej cia li tawm ntawm Npanpiloos mus. Nej cov uas nqa tus Tswv tej cuab yeej yuav tsum huv.
6 Cia li hu nej tej kev sib txoos dawb huv, thiab ib tug cia li hais lus rau ib tug ntau zaus. Thiab cia txhua tus neeg hu txog tus Tswv lub npe.
7 Muaj tseeb tiag, kuv hais tseeb rau nej dua tias, lub sij hawm tau los txog lawm thaum tus Tswv lub suab hais rau nej tias: Nej cia li tawm ntawm Npanpiloos mus; nej cia li sib sau tawm hauv tej haiv neeg los, ntawm plaub ceg kaum ntuj los, ntawm ib sab ntuj mus rau lwm sab.
8 Xa cov txwj laug ntawm kuv lub koom txoos mus rau tej haiv neeg uas nyob deb; mus rau tej koog pov txwv hauv dej hiav txwv; xa mus rau tej pej kum teb; hu txhua haiv neeg, xub hu Lwm Haiv Neeg, ces tom qab ntawd hu cov Neeg Yudais.
9 Thiab saib seb, thiab xyuas seb, nov yog zaj uas lawv yuav tshaj tawm, thiab yog tus Tswv lub suab rau txhua haiv neeg tias: Nej cia li mus lawm tim thaj av Xi-oos, kom tej ciaj ciam ntawm kuv cov neeg yuav dav tuaj, thiab kom nws tej ceg txheem ntseeg yuav muaj zog tuaj, thiab kom Xi-oos yuav nthuav mus rau tej thaj tsam ib puag ncig.
10 Muaj tseeb tiag, cia lus tshaj tawm cia li mus rau txhua haiv neeg hais tias: Cia li tsim los thiab sawv thiab mus cuag tus Nraug Vauv; saib seb thiab xyuas seb, tus Nraug Vauv twb yuav los; nej cia li tawm mus cuag nws. Npaj nej tus kheej rau hnub tseem ceeb ntawm tus Tswv.
11 Yog li ntawd, cia li xyuas, vim nej twb tsis paub hnub twg los yog teev twg.
12 Yog li ntawd, cia lawv cov uas nyob nrog Lwm Haiv Neeg khiav los mus rau Xi-oos.
13 Thiab cia cov uas los ntawm Yudas khiav mus rau hauv Yeluxalees, rau saum tej roob ntawm tus Tswv lub tsev.
14 Nej cia li tawm hauv tej teb chaws mus, uas twb yog Npanpiloos, hauv plawv ntawm txoj kev phem, uas yog Npanpiloos ntawm sab ntsuj plig.
15 Tiam sis tus Tswv hais tseeb li no, nej tsis txhob maj maj thaum khiav, tiam sis cia li npaj txhua yam ua ntej tso; thiab tus uas mus, tsis txhob cia nws tig saib rov tom qab nyob tsam kev puas tsuaj ceev yuav los rau nws.
16 Cia li mloog thiab hnov, auj nej cov neeg ntawm lub ntiaj teb. Mloog ua ke, nej uas yog cov txwj laug ntawm kuv lub koom txoos, thiab cia li hnov tus Tswv lub suab; vim nws hu txhua tus neeg, thiab nws txib txhua tus neeg nyob qhov txhia chaw kom hloov siab lees txim.
17 Vim saib seb, tus Tswv uas yog Vajtswv tau xa tus tim tswv uas tshaj nrov nrov saum nruab ntug, hais tias: Nej cia li npaj tus Tswv txoj kev, thiab ua kom nws tej kev ncaj, vim lub sij hawm nws yuav los twb ze lawm—
18 Thaum tus Me Nyuam Yaj yuav sawv saum Roob Xi-oos, thiab muaj ib puas plaub caug plaub txhiab leej nrog nws, thiab muaj nws Txiv lub npe sau rau saum lawv tej hauv pliaj.
19 Yog li ntawd, nej yuav tsum npaj rau tus Nraug Vauv txoj kev los; nej cia li mus, nej cia li tawm mus cuag nws.
20 Vim saib seb, nws yuav sawv saum lub roob Ntoo Txiv Roj, thiab rau saum tej dej hiav txwv loj, uas twb yog tej dej tob heev, thiab rau hauv tej koog pov txwv hauv hiav txwv, thiab rau hauv thaj av Xi-oos.
21 Thiab nws yuav ua nws lub suab tawm hauv Xi-oos mus, thiab nws yuav hais lus hauv Yeluxalees tuaj, thiab yuav hnov nws lub suab nyob hauv txhua haiv neeg;
22 Thiab yuav yog ib lub suab nrov zoo li lub suab dej tsaws tsag, thiab zoo li lub suab xob quaj nrov, uas yuav phua rhe tej roob, thiab yuav nrhiav tsis tau tej vos hav.
23 Nws yuav txib tej dej tob heev, thiab tej dej yuav ntws rov qab mus rau tej teb chaws qaum teb, thiab tej koog pov txwv yuav hloov los ua ib daim av;
24 Thiab thaj av Yeluxalees thiab thaj av Xi-oos nyias yuav rov qab tig mus rau nyias qhov chaw, thiab lub ntiaj teb yuav zoo li puag thaum ub ua ntej tau muab lub ntiaj teb faib.
25 Thiab tus Tswv, uas twb yog tus Cawm Seej, yuav sawv nrog nws cov neeg, thiab yuav kav txhua tus tib neeg.
26 Thiab tus Tswv yuav nco qab txog lawv cov uas nyob sab teb chaws qaum teb; thiab lawv cov yaj saub yuav hnov nws lub suab, thiab lawv yuav tsis nyob lawv twj ywm ntxiv lawm; thiab lawv yuav tsoo cov pob zeb, thiab cov dej khov yuav ntws los vim lawv lub yeeb haum.
27 Thiab yuav rhawv ib txoj kev loj loj sawv los nyob hauv tej dej tob heev.
28 Lawv cov yeeb ncuab yuav los ywj rau lawv,
29 Thiab nyob tom tej roob moj sab qhua yuav muaj tej pas dej cawm neeg txoj sia tawm tuaj; thiab tej av qhuav qhawv yuav tsis ua tej av qhuav dej lawm.
30 Thiab lawv yuav nqa lawv tej nyiaj tej kub nplua nuj los muab rau Efala-is tej me nyuam, uas yog kuv cov tub qhe.
31 Thiab tej ciaj ciam ntawm tej pov roob kav ib txhis yuav tshee hnyo vim lawv lub yeeb haum.
32 Thiab lawv yuav txhos caug ntua nyob qhov ntawd thiab yuav tau yeeb koob ntoo, uas twb yog nyob hauv Xi-oos, los ntawm tus Tswv cov tub qhe tes, uas yog Efala-is cov me nyuam.
33 Thiab lawv lub siab yuav puv nkaus hu tej zaj nkauj xyiv fab kav ib txhis.
34 Saib seb, nov yog tus Vajtswv kav ib txhis txoj koob hmoov rau cov xeem neeg Ixayees, thiab txoj koob hmoov zoo zog rau saum Efala-is taub hau thiab nws cov neeg.
35 Thiab kuj yog li no rau cov uas yog xeem Yudas, tom qab lawv raug mob, tus Tswv yuav muab lawv hloov ua dawb huv rau tus Tswv pom, los nyob ntawm nws xub ntiag txhua hnub thiab txhua hmo, nyob mus ib txhiab thiab ib txhis.
36 Thiab nim no, tus Tswv hais tseeb tias, xwv kom nej yuav paub txog tej yam no, auj cov neeg nyob hauv lub ntiaj teb, kuv tau xa kuv tus tim tswv ya saum nruab ntug, uas muaj txoj moo zoo uas kav ib txhis, tus uas tau tshwm los rau ib txhia thiab tau muab txoj moo zoo rau neeg, tus uas yuav tshwm los rau ntau leej uas nyob hauv lub ntiaj teb.
37 Thiab yuav muab txoj moo zoo no tshaj tawm mus rau txhua haiv neeg, txhua xeem neeg, txhua yam lus, thiab txhua yam neeg.
38 Thiab Vajtswv cov tub qhe yuav mus, ua ib lub suab hais nrov nrov tias: Cia li hwm Vajtswv thiab muab yeeb koob rau nws, vim lub sij hawm ntawm nws txoj kev txiav txim twb los txog;
39 Thiab teev tiam tus uas tsim ntuj, thiab ntiaj teb, thiab dej hiav txwv, thiab tej qhov dej txhawv—
40 Hu txog tus Tswv lub npe txhua hnub thiab txhua hmo, hais tias: Auj kheev lam koj yuav qhib plho rooj ntug, kheev lam koj yuav nqis los, kom cov roob yuav ntws los vim koj lub yeeb haum.
41 Thiab yuav tso tej no rau saum lawv cov taub hau; vim tus Tswv lub yeeb haum yuav zoo ib yam li cov hluav taws yaj ntshis uas muab hlawv, thiab zoo ib yam li cov hluav taws uas ua rau tej dej npau.
42 Auj tus Tswv, koj yuav nqis los ua kom koj cov yeeb ncuab paub koj lub npe, thiab txhua haiv neeg yuav tshee hnyo vim koj lub yeeb haum—
43 Thaum koj ua tej yam txaus ntshai heev, tej yam lawv xav tsis txog;
44 Muaj tseeb tiag, thaum koj nqis los, thiab cov roob ntws los vim koj lub yeeb haum, koj yuav ntsib tus uas xyiv fab thiab ua tej hauj lwm ncaj ncees, tus uas nco ntsoov txog koj coj raws koj lub neej.
45 Vim txij thaum chiv keeb ntawm lub ntiaj teb los yeej tsis tau muaj neeg lub pob ntseg tau hnov los yog tau paub, thiab tsis tau muaj ib lub qhov muag tau pom, ntxiv rau ntawm koj, auj Vajtswv, koj tau npaj tej yam tseem ceeb heev rau tus uas tos rawv koj.
46 Thiab neeg yuav hais tias: Tus uas los ntawm Vajtswv saum ntuj ceeb tsheej los yog leej twg, tus uas hnav tsoos tsho liab ploog; muaj tseeb tiag, los saum tej thaj tsam uas neeg tsis paub los, nws hnav nws cev tsoos tsho muaj yeeb koob, tus uas los nrog nws lub hwj chim uas loj heev?
47 Thiab nws yuav hais tias: Kuv yog tus uas tau hais lus ncaj ncees, muaj hwj chim cawm neeg dim.
48 Thiab tus Tswv yuav hnav nws cev tsoos tsho liab, thiab nws cev tsoos tsho yuav zoo li tus uas tsuam kua txiv hmab hauv lub rhawv.
49 Thiab lub yeeb koob ntawm nws lub yeeb haum yuav loj heev ces lub hnub yuav nraim nws lub ntsej muag vim txaj muag, thiab lub hli yuav tsis ci, thiab cov hnub qub nyias yuav poob cuag tsi saum nyias qhov chaw los.
50 Thiab yuav hnov nws lub suab hais tias: Kuv tau tsuj lub rhawv tsuam kua txiv hmab kuv tib leeg, thiab tau coj kev txiav txim los rau txhua tus neeg; thiab tsis muaj leej twg nrog kuv ua li;
51 Thiab kuv tau tsuj lawv vim kuv npau taws, thiab kuv tau tsuam lawv vim kuv chim siab, thiab kuv tau muab lawv cov ntshav tsuag rau saum kuv cev tsoos tsho, thiab tsuas tag rau kuv cev tsoos tsho; vim hnub no yog hnub muab kev pauj uas tau muaj nyob hauv kuv lub siab.
52 Thiab nim no lub xyoo ntawm cov uas kuv tau txhiv dim twb los txog; thiab lawv yuav cav txog lawv tus Tswv txoj kev muaj siab zoo siab hlub, thiab tag nrho tej uas nws tau foom pub rau lawv raws li nws txoj kev zoo, thiab raws li nws txoj kev muaj siab zoo siab hlub, mus ib txhiab thiab ib txhis li.
53 Nws tau raug tag nrho tej kev txom nyem uas lawv raug. Thiab tus tim tswv ntawm nws xub ntiag tau cawm lawv dim; thiab los ntawm nws txoj kev hlub, thiab ntawm nws txoj kev khuv leej, nws tau txhiv lawv dim, thiab tau txhawb lawv, thiab tau ris lawv txhua lub sij hawm yav thaum ub;
54 Muaj tseeb tiag, Enauj thiab, thiab lawv cov uas tau nrog nws; cov yaj saub uas nyob ua ntej Enauj; Nau-as thiab, thiab lawv cov uas nyob ua ntej nws; Mauxes thiab, thiab lawv cov uas nyob ua ntej nws;
55 Thiab txij Mauxes los txog Eliyas, thiab txij Eliyas los txog Yauhas, cov uas tau nrog Khetos thaum nws sawv rov los, thiab cov thwj tim dawb huv, nrog rau Anplaham, Ixaj, thiab Yakhauj, yuav tau nyob ntawm tus Me Nyuam Yaj xub ntiag.
56 Thiab haiv neeg ntseeg tej qhov ntxa yuav qhib; thiab lawv yuav sawv los thiab mus sawv ntawm tus Me Nyuam Yaj sab tes xis, thaum nws yuav sawv saum Roob Xi-oos, thiab rau hauv lub nroog dawb huv, lub Yeluxalees Tshiab; thiab lawv yuav hu zaj nkauj qhuas tus Me Nyuam Yaj, txhua hnub thiab txhua hmo mus ib txhiab thiab ib txhis li.
57 Thiab vim yog rau qhov no, xwv kom neeg thiaj tau txais tej lub yeeb koob uas hais tias yuav muab qhia tshwm sim los, tus Tswv thiaj tau xa qhov txhij txhua ntawm nws txoj moo zoo los, nws txoj kev khi lus uas kav ib txhis, piav kom meej thiab yooj yim to taub—
58 Los npaj cov qaug zog rau tej yam uas yuav tshwm sim nyob hauv lub ntiaj teb, thiab rau tus Tswv txoj hauj lwm nyob rau hnub uas cov qaug zog yuav ua rau cov txawj ntse poob ntsej muag, thiab pawg neeg tsawg yuav hloov los ua ib haiv neeg muaj zog, thiab ob leeg yuav ua rau kaum tawm txhiab tug khiav.
59 Thiab los ntawm cov neeg qaug zog ntawm lub ntiaj teb tus Tswv yuav muab tej haiv neeg sib cais los ntawm nws tus Ntsuj Plig lub hwj chim.
60 Thiab vim yog rau qhov no thiaj tau muab cov lus txib no; twb tau txib kom ceev tej lus txib no tawm ntawm cov neeg ntiaj teb txij hnub uas tau muab tej lus txib no los, tiam sis ziag no yuav tsum coj tej lus txib no mus rau txhua tus neeg—
61 Thiab qhov no yog raws li tus Tswv lub siab xav thiab siab nyiam, tus uas kav txhua tus tib neeg.
62 Thiab tus uas hloov siab lees txim thiab hloov nws tus kheej ua dawb huv rau tus Tswv pom ces tus Tswv yuav muab txoj sia nyob mus ib txhis rau tus ntawd.
63 Thiab cov uas tsis mloog tus Tswv lub suab yuav raug tej uas tus yaj saub Mauxes tau sau cia lawm, hais tias lawv yuav raug muab txiav tawm ntawm cov neeg mus.
64 Thiab tej uas tus yaj saub Malakis tau sau cia hais tias: Vim, saib seb, hnub ntawd yuav los uas yuav kub ib yam li ib lub qhov cub, thiab tag nrho cov neeg khav txiv, muaj tseeb tiag, thiab tag nrho cov neeg ua phem, yuav ua quav nyab npleg; thiab hnub uas los ntawd yuav muab lawv hlawv, Ib Tsoom Tub Rog tus Tswv hais li, nws yuav tsis tseg lawv tej cag los sis tej ceg li.
65 Yog li ntawd, tus Tswv yuav teb li no rau lawv:
66 Nyob rau hnub uas kuv tau los rau kuv cov neeg ntawd, tsis muaj ib tug neeg nyob hauv nej txais yuav kuv, thiab nej raug ntiab tawm.
67 Thaum kuv rov qab hu dua tsis muaj nej ib tug twg teb li; txawm li ntawd los twb tsis tau thim kuv txhais npab hlo li kom kuv txhob txhiv tau, los yog thim kuv lub hwj chim kom txhob cawm tau.
68 Saib seb, thaum kuv cem kuv ua rau cov dej hiav txwv qhuav. Kuv ua rau tej dej ntws qhuav li tej tiaj suab puam; lawv cov ntses tsw lwj iab nqhoob, thiab tuag vim nqhis dej.
69 Kuv ua rau saum ntuj dub nciab, thiab muab ntaub tsaj los qhwv lub ntuj.
70 Thiab nej yuav txais tej yam no los ntawm kuv txhais tes—nej yuav tuag nrog kev tu siab.
71 Saib seb, thiab xyuas seb, tsis muaj leej twg yuav cawm nej dim; vim nej tsis mloog kuv lub suab thaum kuv nyob saum ntuj hu nej; nej tsis ntseeg kuv cov tub qhe, thiab thaum xa lawv tuaj rau nej nej tsis txais yuav lawv.
72 Yog li ntawd, lawv tau muab zaj lus tim khawv pav thiab tau muab txoj kev cai khi, thiab nej tau raug coj mus rau txoj kev tsaus ntuj.
73 Cov no yuav mus rau nraum qhov chaw tsaus ntuj nti, qhov uas muaj kev quaj, thiab kev nyiav, thiab kev tom hniav qees.
74 Saib seb tus Tswv nej tus Vajtswv tau hais li. Amees.