1 Kuv yog Alafas thiab Aumenkas, Khetos uas yog tus Tswv; muaj tseeb tiag, kuv twb yog tus ntawd, yog qhov chiv keeb thiab qhov kawg, yog tus Txhiv Dim ntawm neeg ntiaj teb.

2 Kuv, uas twb yog Leej Txiv tug, tau ua tiav raws li Leej Txiv lub siab nyiam, ntsig txog kuv—tau ua tiav qhov no xwv kom kuv yuav tswj tau txhua yam los rau kuv tus kheej—

3 Kuv tau ceev lub hwj chim tag nrho cia, twb yog los ua kom Dab Ntxwg Nyoog thiab nws tej hauj lwm puas tsuaj rau thaum lub ntiaj teb kawg, thiab hnub kawg uas tseem ceeb ntawm kev txiav txim, uas kuv yuav txiav txim rau cov neeg ntawm lub ntiaj teb, txiav txim rau txhua tus neeg raws li nws tej hauj lwm thiab tej uas nws tau ua.

4 Thiab muaj tseeb tiag txhua tus neeg yeej yuav hloov siab lees txim los sis raug kev txom nyem, vim kuv, Vajtswv, tsis muaj qhov kawg.

5 Yog li ntawd, kuv tsis thim tej kev txiav txim uas kuv yuav txiav, tiam sis kev txom nyem yuav tawm mus, kev quaj, kev nyiav, thiab kev tom hniav qees, muaj tseeb tiag, mus rau cov uas nyob ntawm kuv sab tes laug.

6 Txawm li ntawd los, twb tsis sau tseg hais tias kev tsim txom no yuav tsis paub kawg, tiam sis twb sau tseg hais tias yog kev tsim txom uas tsis muaj qhov kawg.

7 Hais dua, twb muaj sau cia hais tias yog kev raug txim hnyav nyob mus ib txhis; yog li ntawd tej lus no yeej meej dua li lwm cov vaj lug kub, xwv kom yuav tshoov noob neej lub siab, tag nrho huv si rau kuv lub npe lub yeeb koob.

8 Yog li ntawd, kuv mam qhia qhov txuj ci uas neeg paub tsis txog no rau nej, vim yeej tsim nyog rau nej kom paub zoo tib yam li kuv cov thwj tim.

9 Kuv hais lus rau nej cov uas tus Tswv xaiv ua txoj hauj lwm no, ib yam li twb yog ib tug neeg, kom nej yuav nkag tau los rau ntawm kuv qhov chaw so.

10 Vim, saib seb, qhov txuj ci uas neeg tsis paub txog txoj kev ua zoo li Vajtswv, tseem ceeb kawg nkaus! Vim, saib seb, kuv yog tus tsis muaj qhov kawg, thiab txoj kev rau txim uas muab los ntawm kuv txhais tes yog txoj kev rau txim uas tsis muaj qhov kawg, vim Tsis Muaj Qhov Kawg yog kuv lub npe. Yog li ntawd—

11 Kev rau txim nyob mus ib txhis yog Vajtswv txoj kev rau txim.

12 Kev rau txim tsis muaj qhov kawg yog Vajtswv txoj kev rau txim.

13 Yog li ntawd, kuv txib kom koj hloov siab lees txim, thiab ua raws li tej lus txib uas koj tau txais los ntawm kuv tus tub qhe Joseph Smith, tus Hluas, txhais tes los, los ntawm kuv lub npe;

14 Thiab twb yog los ntawm kuv lub hwj chim loj tag nrho koj thiaj tau txais tej ntawd;

15 Yog li ntawd kuv txib koj kom hloov siab lees txim—hloov siab lees txim, tsam kuv muab tus pas ntawm kuv lub qhov ncauj, thiab kuv txoj kev npau taws, thiab kuv txoj kev chim siab nplawm koj, ces koj tej kev txom nyem yuav mob heev—mob npaum li cas los koj tsis paub, heev npaum li cas los koj tsis paub, muaj tseeb tiag, nyuaj ris npaum li cas los koj tsis paub.

16 Vim saib seb, kuv, Vajtswv, tau raug tej yam no rau tag nrho sawv daws, xwv kom lawv yuav tsis raug txom nyem yog hais tias lawv hloov siab lees txim;

17 Tiam sis yog hais tias lawv tsis hloov siab lees txim ces lawv yeej yuav raug txom nyem ib yam li kuv;

18 Txoj kev raug txom nyem uas tau ua rau kuv, uas twb yog Vajtswv, tus zoo tshaj plaws ntawm tag nrho sawv daws, kom tshee hnyo vim yog txoj kev mob, thiab los ntshav ntawm txhua lub qhov hws, thiab raug txom nyem tag nrho sab cev nqaij daim tawv thiab sab ntsuj plig—thiab tau ua kom kuv tsis xav haus lub khob dej iab, thiab tsum—

19 Txawm li ntawd los, cia Leej Txiv tau lub yeeb koob, thiab kuv tau haus thiab ua tiav kuv tej kev npaj rau noob neej.

20 Yog li ntawd, kuv txib koj dua kom hloov siab lees txim, tsam kuv siv kuv lub hwj chim loj tag nrho los txo koj lub hwj chim; thiab kom koj lees koj tej kev txhaum, tsam koj raug tej txim uas kuv tau hais los no, ntawm ib qho uas me dua ntais, muaj tseeb tiag, twb yog ib qho me tshaj plaws uas koj tau saj thaum kuv thim kuv tus Ntsuj Plig.

21 Thiab kuv txib koj kom koj txhob tshaj tawm dab tsi li tsuas yog kev hloov siab lees txim xwb, thiab tsis txhob muab tej yam no qhia rau neeg ntiaj teb kom txog thaum kuv pom zoo lawm tso.

22 Vim lawv noj tsis taus nqaij lub sij hawm no, tiam sis lawv yuav tsum haus mis; yog li ntawd, lawv yuav tsum tsis txhob paub tej yam no, tsam lawv piam sij mus.

23 Kawm los ntawm kuv, thiab mloog kuv tej lus; taug kev raws kuv tus Ntsuj Plig txoj kev siab mos siab muag, ces koj yeej yuav muaj kev kaj siab lug vim yog los ntawm kuv.

24 Kuv yog Yexus Khetos; kuv tau los raws li Leej Txiv lub siab nyiam, thiab kuv ua li nws lub siab nyiam.

25 Thiab ntxiv, kuv txib koj kom koj tsis txhob ntshaw koj tus neeg zej zog tus poj niam; los yog nrhiav muab koj tus neeg zej zog txoj sia txo.

26 Thiab ntxiv, kuv txib koj kom koj tsis txhob khuv xim koj tej teej tug, tiam sis cia li muab hlo coj mus them luam Phau Ntawv Maumoos, uas muaj txoj kev tseeb thiab Vajtswv txoj lus—

27 Qhov uas yog kuv txoj lus mus rau Lwm Haiv Neeg, kom tsis ntev yuav mus rau cov Neeg Yudais, uas cov Neeg Lamas yog cov seem tshuav ntawm lawv, kom lawv yuav ntseeg txoj moo zoo, thiab kom lawv tsis txhob tos ib tug Mexiyas los uas twb los lawm.

28 Thiab ntxiv, kuv txib koj kom koj yuav tsum thov Vajtswv nrov nrov thiab thov hauv koj lub siab; muaj tseeb tiag, ua rau neeg ntiaj teb pom thiab ua ntsiag to yus tus kheej, thaum nrog sawv daws thiab thaum koj ib leeg xwb.

29 Thiab koj yuav tsum tshaj tawm tej moo zoo siab, muaj tseeb tiag, tshaj tawm tej no rau saum tej roob, thiab rau saum txhua qhov chaw siab, thiab rau tag nrho cov neeg uas pub rau koj mus ntsib.

30 Thiab koj yuav tsum ua tej no nrog kev txo hwj chim tag nrho, nrog kev tso siab rau kuv, es tsis txhob cem cov neeg uas cem.

31 Thiab koj yuav tsum tsis txhob tham txog tej ntsiab cai nyuaj to taub, tiam sis koj yuav tsum tshaj tawm kev hloov siab lees txim thiab kev ntseeg tus Cawm Seej, thiab kev zam txim rau tej kev txhaum los ntawm kev cai raus dej, thiab los ntawm hluav taws, muaj tseeb tiag, twb yog ntawm tus Vaj Ntsuj Plig Dawb Huv.

32 Saib seb, qhov no yog lus txib tseem ceeb thiab lus txib kawg uas kuv yuav muab rau koj ntsig txog qhov no; vim qhov no yuav txaus rau koj ua txhua hnub lawm, kom txog kiag hnub kawg ntawm koj lub neej.

33 Thiab koj yuav tau txais kev nyuaj siab yog hais tias koj tsis mloog tej lus ntuas no, muaj tseeb tiag, twb yog txoj kev puas tsuaj ntawm koj tus kheej thiab tej teej tug.

34 Muab ib feem xyuam ntawm koj tej teej tug mus, muaj tseeb tiag, ib feem kiag ntawm koj tej av tej teb, thiab muab tag nrho tsuas yog tseg tej yug koj tsev neeg xwb.

35 Them qhov nuj nqis uas koj tau sib yeem lus nrog tus luam ntawv lawm. Tso koj tus kheej tawm ntawm kev ua cev qhev.

36 Ncaim ntawm koj lub tsev thiab chaw nyob mus, tsuas yog thaum koj yuav xav pom koj tsev neeg xwb;

37 Thiab hais lus qhib lug rau txhua tus; muaj tseeb tiag, qhia, ntuas, tshaj tawm qhov tseeb, twb yog nrog ib lub suab nrov nrov, nrog ib lub suab xyiv fab hlo, hais nrov nrov tias—Hauxanas, hauxanas, cia li qhuas tus Tswv uas yog Vajtswv lub npe!

38 Thov Vajtswv tas mus li, thiab kuv mam pub kuv tus Ntsuj Plig nplua mias los rau koj, thiab koj yuav tau tej koob hmoov ntau heev—muaj tseeb tiag, twb ntau tshaj li uas koj tau tej nyiaj tej kub ntawm lub ntiaj teb thiab tej khoom uas txawj puas tsuaj mus.

39 Saib seb, koj puas muaj peev xwm nyeem qhov no es tsis xyiv fab hlo thiab tsis muaj lub siab luag nyav?

40 Los sis koj puas muaj peev xwm mus tau ntev zog zoo li ib tug coj kev dig muag?

41 Los sis koj puas muaj peev xwm txo hwj chim thiab ua siab mos siab muag, thiab coj koj tus kheej raws li laj lim tswv yim rau kuv? Muaj tseeb tiag, cia li los cuag kuv koj tus Cawm Seej. Amees.