1 Khetos lub Koom Txoos txoj kev sawv los nyob rau hauv hnub nyoog kawg no, uas tau muaj ib txhiab yim pua thiab peb caug xyoo txij thaum peb tus Tswv thiab tus Cawm Seej Yexus Khetos tau los muaj cev nqaij daim tawv, tau muab lub Koom Txoos tsim thiab muab tsa raws li tej kev cai ntawm peb lub teb chaws, raws li Vajtswv lub siab nyiam thiab tej lus txib, thaum lub hlis thib plaub thiab hnub rau—

2 Tej lus txib uas tus Tswv muab rau Joseph Smith, tus Hluas, tus uas Vajtswv tau hu thiab tsa ua ib tug thwj tim rau Yexus Khetos, los mus ua thawj tug txwj laug rau lub koom txoos no;

3 Thiab rau Oliver Cowdery, tus uas Vajtswv hu los ua Yexus Khetos ib tug thwj tim thiab, los ua tus txwj laug thib ob ntawm lub koom txoos no, thiab tus uas nws txhais tes tau tsa;

4 Thiab qhov no yog raws li txoj kev tshav ntuj ntawm peb tus Tswv thiab tus Cawm Seej Yexus Khetos, tus uas muaj yeeb koob tag nrho, ziag no thiab mus ib txhis li. Amees.

5 Tom qab tau qhia tseeb tseeb rau tus thawj txwj laug no hais tias nws tau txais kev zam txim rau nws tej kev txhaum, nws tau rov sib rig dua nrog tej kev tsis muaj nuj nqis ntawm lub ntiaj teb.

6 Tiam sis tom qab nws hloov siab lees txim, thiab txo nws lub hwj chim tiag tiag, vim yog los ntawm txoj kev ntseeg, Vajtswv tau xa ib tug tim tswv dawb huv los txhawb pab nws, tus tim tswv uas lub ntsej muag ci li xob laim, thiab tus uas cev tsoos tsho huv thiab dawb tshaj tag nrho lwm yam dawb tib si;

7 Thiab tau muab tej lus txib rau nws uas tau tshoov nws siab;

8 Thiab tau muab hwj chim los saum ntuj los rau nws, los ntawm tej kev uas tau npaj tseg ua ntej, los mus txhais Phau Ntawv Maumoos;

9 Phau ntawv uas muaj ib co ceev xwm txheej ntawm ib haiv neeg uas tau poob lawm, thiab qhov txhij txhua ntawm Yexus Khetos txoj moo zoo mus rau Lwm Haiv Neeg thiab mus rau cov Neeg Yudais thiab;

10 Phau ntawv uas Vajtswv muab los ntawm kev tshoov siab, thiab muab qhia rau lwm cov neeg paub los ntawm cov tim tswv tej kev los txhawb pab, thiab lawv tshaj tawm mus rau neeg ntiaj teb—

11 Ua pov thawj rau neeg ntiaj teb hais tias cov vaj lug kub dawb huv muaj tseeb, thiab hais tias Vajtswv yeej tshoov neeg lub siab thiab hu lawv los ua nws txoj hauj lwm dawb huv hauv hnub nyoog no thiab tiam neeg no, ib yam li tej tiam neeg thaum ub;

12 Yog li ntawd qhia tau hais tias nws yog tib tug Vajtswv nag hmo, hnub no, thiab mus ib txhis li. Amees.

13 Yog li ntawd, vim muaj tej tim khawv uas muaj zog npaum li ntawd, los ntawm tej ntawd neeg ntiaj teb yuav raug txiav txim, twb yog tag nrho cov uas yuav los paub txog txoj hauj lwm no tom qab no mus.

14 Thiab cov uas txais qhov no nrog txoj kev ntseeg, thiab coj ncaj ncees, yuav tau txais ib lub meej mom ntawm txoj sia nyob mus ib txhis;

15 Tiam sis cov uas ua lawv lub siab tawv qhawv tsis ntseeg, thiab xyeej txoj hauj lwm no, qhov ntawd yuav tig mus ua lawv tus kheej tej kev raug txim—

16 Vim tus Tswv uas yog Vajtswv tau hais li ntawd; thiab peb, uas yog cov txwj laug ntawm lub koom txoos, tau hnov thiab ua tim khawv rau tus Muaj Yeeb Haum ntsa iab nyob saum ntuj cov lus, nws tau yeeb koob nyob mus ib txhiab thiab ib txhis li. Amees.

17 Los ntawm tej yam no peb paub hais tias yeej muaj ib tug Vajtswv nyob saum ntuj ceeb tsheej, tus uas tsis muaj qhov kawg thiab nyob mus ib txhis li, kav ib txhiab kav ib txhis yog tus Vajtswv uas yeej tsis hloov li, tus txhim teeb lub ntuj thiab lub teb, thiab txhua yam uas muaj nyob haud;

18 Thiab paub tias nws tau tsim tib neeg, txiv neej thiab poj niam, raws li nws tus kheej tus yam ntxwv thiab ua kom muaj zoo nkaus li nws, nws tsim lawv;

19 Thiab muab tej lus txib rau lawv kom lawv hlub nws thiab ua hauj lwm rau nws, tib tug Vajtswv tseeb thiab muaj sia zees nyob, thiab hais tias tsim nyog lawv yuav tsum teev tiam nws tib leeg xwb.

20 Tiam sis los ntawm kev ua txhaum rau tej kev cai dawb huv no tib neeg thiaj ua raws li sab cev nqaij daim tawv xav tau thiab ua li dab phem ua, thiab hloov los ua ib co neeg poob mus li.

21 Yog li ntawd, tus Vajtswv uas Muaj Hwj Chim Tag Nrho thiaj tau muab nws Tib Leeg Tub los, raws li twb tau sau cia rau hauv cov vaj lug kub uas nws tau muab.

22 Nws raug tej kev ntxias tiam sis nws tsis quav ntsej tej ntawd.

23 Nws raug muab ntsia rau saum ntoo khaub lig, tau tuag, thiab tau sawv rov qab los thaum hnub peb;

24 Thiab nce mus dua saum ntuj ceeb tsheej, mus zaum ntawm Leej Txiv sab tes xis, mus kav nrog lub hwj chim loj tag nrho raws li Leej Txiv lub siab nyiam;

25 Kom tag nrho cov uas yuav ntseeg thiab ua kev cai raus dej los ntawm Yexus Khetos lub npe dawb huv, thiab nyiaj mus kom txog thaum kawg nrog txoj kev ntseeg, yuav txais kev cawm dim—

26 Tsis yog cov uas ntseeg tom qab Yexus Khetos tau los muaj cev nqaij daim tawv hauv lub caij nyoog nruab nrab xwb, tiam sis tag nrho cov uas txij thaum chiv keeb los, twb yog tag nrho cov uas tau muaj ua ntej nws los, cov uas ntseeg cov yaj saub dawb huv tej lus, cov uas hais lus thaum lub txiaj ntsim Vaj Ntsuj Plig Dawb Huv tshoov lawv lub siab, cov uas ua tim khawv tseeb txog Yexus Khetos ntawm txhua yam, ces cov ntawd yuav tau txoj sia nyob mus ib txhis li.

27 Ib yam nkaus rau cov uas yuav los tom qab, cov uas yuav ntseeg Vajtswv tej txiaj ntsim thiab tej kev hu los ntawm tus Vaj Ntsuj Plig Dawb Huv, uas ua pov thawj txog Leej Txiv thiab Leej Tub;

28 Leej Txiv, Leej Tub, thiab Vaj Ntsuj Plig Dawb Huv yog ib tug Vajtswv, tsis muaj qhov kawg thiab nyob mus ib txhis li, tsis muaj qhov xaus. Amees.

29 Thiab peb paub hais tias txhua tus neeg yuav tsum hloov siab lees txim thiab ntseeg Yexus Khetos lub npe, thiab tuav nws lub npe teev tiam Leej Txiv, thiab ntseeg nws lub npe nyiaj mus kom txog thaum kawg, yog tsis li ces lawv yuav txais tsis tau kev cawm dim nyob hauv Vajtswv lub nceeg vaj.

30 Thiab peb paub hais tias txoj kev hloov kom tsis muaj txim uas yog los ntawm peb tus Tswv thiab Cawm Seej Yexus Khetos txoj kev tshav ntuj yeej ncaj thiab tseeb;

31 Thiab peb kuj paub hais tias txoj kev hloov ua dawb huv uas yog los ntawm peb tus Tswv thiab tus Cawm Seej Yexus Khetos txoj kev tshav ntuj yeej ncaj thiab tseeb, rau txhua tus uas siv tag nrho lawv lub dag lub zog thiab lub siab los hlub thiab ua hauj lwm rau Vajtswv.

32 Tiam sis tej zaum yeej yuav muaj tib neeg poob ntawm txoj kev tshav ntuj thiab khiav tawm ntawm tus Vajtswv uas muaj sia zees nyob mus;

33 Yog li ntawd kom cov ntseeg ua zoo xyuas thiab thov Vajtswv tas mus li, tsam lawv poob mus rau txoj kev ntxias;

34 Muaj tseeb tiag, thiab kom cov uas twb hloov ua dawb huv lawm ua zoo xyuas thiab.

35 Thiab peb paub hais tias tej yam no muaj tseeb thiab muaj raws li Yauhas tej kev tshwm sim, twb tsis tau ntxiv dab tsi rau, thiab tsis tau muab dab tsi tshem tawm ntawm qhov uas yuav muaj los yav tom ntej uas muaj nyob hauv nws phau ntawv, tej vaj lug kub dawb huv, los sis tej kev tshwm sim ntawm Vajtswv uas yuav muaj los tom qab no mus los ntawm lub txiaj ntsim thiab hwj chim ntawm tus Vaj Ntsuj Plig Dawb Huv, uas yog Vajtswv lub suab, los sis cov tim tswv tej kev los txhawb pab.

36 Thiab tus Tswv uas yog Vajtswv tau hais li ntawd; thiab cia li muab lub sam xeeb, lub hwj chim thiab lub yeeb koob rau nws lub npe dawb huv, ziag no thiab ib txhis li. Amees.

37 Thiab ntxiv, los ntawm kev txib rau cov ntseeg ntsig txog tus txheej txheem ua kev cai raus dej—Tag nrho cov uas txo lawv hwj chim rau Vajtswv, thiab xav ua kev cai raus dej, thiab los nrog lub siab mob thiab lub siab xav ua zoo, thiab ua rau cov ntseeg pom hais tias lawv tau hloov siab lees txim tiag tiag rau tag nrho lawv tej kev txhaum, thiab txaus siab ris Yexus Khetos lub npe, muaj kev txiav txim siab yuav ua hauj lwm rau nws kom txog thaum kawg, thiab qhia los ntawm tej uas lawv ua hais tias lawv twb tau txais los ntawm Khetos tus Ntsuj Plig los ua rau lawv txais kev zam txim rau lawv tej kev txhaum, ces yuav txais cov no los mus rau hauv nws lub koom txoos los ntawm kev cai raus dej.

38 Tej dej num ntawm cov txwj laug, cov pov thawj, cov xib hwb, cov diskas, thiab cov mej zeej ntawm Khetos lub koom txoos—Ib tug thwj tim yog ib tug txwj laug, thiab Vajtswv hu nws los muab neeg ua kev cai raus dej;

39 Thiab tsa lwm cov txwj laug, cov pov thawj, cov xib hwb, thiab cov diskas;

40 Thiab foom koob hmoov rau cov mov mog thiab cov cawv txiv hmab—ob qho piv txwv txog Khetos lub cev thiab cov ntshav—

41 Thiab pom zoo rau cov uas ua kev cai raus dej nkag los mus rau hauv lub koom txoos, los ntawm kev tso tes rau saum taub hau muab txoj kev cai raus ntawm hluav taws thiab ntawm tus Vaj Ntsuj Plig Dawb Huv, raws li tej vaj lug kub hais;

42 Thiab mus qhia, mus piav, mus ntuas, muab ua kev cai raus dej, thiab saib xyuas cov ntseeg;

43 Thiab pom zoo rau cov ntseeg los ntawm kev tso tes rau saum taub hau, thiab kev muab tus Vaj Ntsuj Plig Dawb Huv;

44 Thiab ua tus coj rau tag nrho tej kev sib ntsib.

45 Cov txwj laug yuav tsum coj tej kev sib ntsib raws li tus Vaj Ntsuj Plig Dawb Huv coj lawv kev, raws li tej lus txib thiab tej kev tshwm sim ntawm Vajtswv.

46 Tus pov thawj tej dej num yog mus qhuab qhia, mus qhia, mus piav, mus ntuas, thiab muab neeg ua kev cai raus dej, thiab foom koob hmoov rau lub cim nco txog,

47 Thiab mus xyuas txhua tus mej zeej tom tsev, thiab ntuas kom lawv thov Vajtswv nrov nrov thiab ntsiag to thiab kom ua tag nrho tsev neeg tej dej num.

48 Thiab nws kuj tsa tau lwm cov pov thawj, cov xib hwb, thiab cov diskas thiab.

49 Thiab nws yuav tsum ua tus coj ntawm tej kev sib ntsib thaum tsis muaj ib tug txwj laug nyob ntawd;

50 Tiam sis thaum muaj ib tug txwj laug nyob ntawd, tus pov thawj tsuas mus tshaj tawm txoj moo zoo, mus qhia, mus piav, mus ntuas, thiab muab neeg ua kev cai raus dej xwb,

51 Thiab mus xyuas txhua tus mej zeej tom tsev, ntuas kom lawv thov Vajtswv nrov nrov thiab ntsiag to thiab kom ua tag nrho tsev neeg tej dej num.

52 Tus pov thawj yuav tsum pab tus txwj laug ua tag nrho tej dej num no yog thaum uas tsim nyog ua.

53 Tus xib hwb tej dej num yog saib xyuas cov ntseeg txhua lub sij hawm, thiab nyob nrog lawv thiab txhawb lawv lub zog;

54 Thiab xyuas kom tsis txhob muaj kev ua phem nyob hauv lub koom txoos, thiab kom txhob muaj kev ib leeg ua nyuaj nyuaj rau ib leeg, thiab kom txhob dag, txhob taug xaiv, thiab txhob hais lus phem txog lwm tus;

55 Thiab xyuas kom cov ntseeg ib sij tuaj sib ntsib ua ke, thiab xyuas kom tag nrho cov mej zeej ua lawv tej dej num thiab.

56 Thiab tus xib hwb yuav tsum los coj tej kev sib ntsib thaum tsis muaj tus txwj laug los yog tus pov thawj tuaj nyob ntawd—

57 Thiab cov diskas yuav pab tus xib hwb txhua lub sij hawm ntawm tag nrho nws tej dej num nyob hauv lub koom txoos, yog thaum uas tsim nyog ua.

58 Tiam sis cov xib hwb thiab cov diskas tsis muaj cai muab neeg ua kev cai raus dej, foom koob hmoov rau lub cim nco txog, los yog tso tes rau saum taub hau;

59 Tiam sis lawv yuav tsum mus ceeb toom, piav, ntuas, thiab qhia, thiab caw tag nrho sawv daws kom los cuag Khetos.

60 Yuav tsum muab txhua tus txwj laug, tus pov thawj, tus xib hwb, los sis tus diskas tsa raws li Vajtswv tej txiaj ntsim thiab tej kev hu uas pub rau nws; thiab yuav tsum muab nws tsa los ntawm tus Vaj Ntsuj Plig Dawb Huv lub hwj chim, uas nyob hauv tus neeg uas tsa nws.

61 Ob peb tug txwj laug ntawm Khetos lub koom txoos no yuav tau mus sib ntsib hauv rooj sab laj ib zaug txhua peb lub hlis, los sis tej lub sij hawm raws li tej rooj sab laj ntawd yuav qhia los yog yuav hais kom muaj;

62 Thiab nyob rau hauv tej rooj sab laj ntawd yuav tsum ua tej hauj lwm hauv lub koom txoos uas yuav tsum ua thaum ntawd.

63 Cov txwj laug yuav tsum tau txais lawv daim ntawv tso cai los ntawm lwm cov txwj laug los, los ntawm kev tsa tes pom zoo ntawm cov ntseeg uas lawv zwm nrog, los yog nyob hauv tej rooj sab laj.

64 Txhua tus pov thawj, tus xib hwb, los yog tus diskas, tus uas ib tug pov thawj muab tsa, yuav tau txais ib daim ntawv pov thawj ntawm tus neeg uas muab nws tsa thaum lub sij hawm ntawd, daim ntawv pov thawj uas yog thaum muab rau ib tug txwj laug lawm, ces yuav cia nws muaj tug txais tau ib daim ntawv tso cai, uas yuav cia nws muaj txoj cai rau nws los ua tej dej num uas Vajtswv hu nws ua, los sis nws mam txais daim ntawv pov thawj nyob hauv lub rooj sab laj.

65 Yuav tsum tsis txhob muab ib tug neeg tsa rau ib lub luag hauj lwm twg ntawm lub koom txoos no, yog hais tias tsis tau tsa tes pom zoo los ntawm ceg ntseeg ntawm lub koom txoos uas tau tsim muaj nyob qhov chaw ntawd;

66 Tiam sis cov txwj laug uas tswj hwm, cov npisov uas ncig mus ua hauj lwm, cov sab laj hlob, cov pov thawj hlob, thiab cov txwj laug, kuj muaj lub cib fim tsa lwm tus, nyob rau tej qho uas tsis muaj ib ceg ntseeg ntawm lub koom txoos es yuav muaj taus txoj kev tsa tes pom zoo.

67 Yuav tsum muab txhua tus thawj tswj hwm ntawm lub pov thawj hwj hlob (los sis tus txwj laug uas tswj hwm), tus npisov, tus sab laj hlob, thiab tus pov thawj hlob, tsa los ntawm pawg sab laj hlob txoj kev qhia ua los sis hauv lub tuam rooj sab laj.

68 Qhov dej num ntawm cov mej zeej tom qab tau txais lawv ua kev cai raus dej—Cov txwj laug los sis cov pov thawj yuav tsum muaj sij hawm txaus los piav txhua yam ntsig txog Khetos lub koom txoos rau lawv kom lawv to taub, ua ntej lawv txais lub cim nco txog thiab txais kev pom zoo los ntawm qhov uas cov txwj laug tso tes rau saum lawv taub hau, xwv kom yuav ua txhua yam tiav raws txheej txheem.

69 Thiab cov mej zeej yuav tsum ua qhia rau cov ntseeg, thiab rau cov txwj laug pom hais tias lawv yeej tsim nyog rau qhov ntawd, los ntawm kev ua neej thiab kev hais lus ncaj ncees, xwv kom yuav muaj hauj lwm thiab txoj kev ntseeg raws li tej vaj lug kub qhia—taug kev dawb huv rau tus Tswv pom.

70 Txhua tus mej zeej ntawm Khetos lub koom txoos uas muaj me nyuam yuav tsum coj lawv tuaj rau cov txwj laug kom cov ntseeg pom, thiab lawv yuav tso lawv txhais tes rau saum cov me nyuam taub hau los ntawm Yexus Khetos lub npe, thiab foom koob hmoov rau lawv los ntawm nws lub npe.

71 Yuav tsis muaj peev xwm txais tau ib tug twg los nkag rau Khetos lub koom txoos yog hais tias nws tsis tau muaj hnub nyoog paub tab rau ntawm Vajtswv, thiab tsis tau muaj peev xwm paub hloov siab lees txim.

72 Yuav tsum muab tag nrho cov uas hloov siab lees txim ua kev cai raus dej raws li tus txheej txheem nram no—

73 Tus neeg uas Vajtswv hu thiab tau txoj cai los ntawm Yexus Khetos los muab neeg ua kev cai raus dej, yuav nrog tus neeg uas tau npaj nws tus kheej los mus ua kev cai raus dej nkag mus rau hauv cov dej, thiab yuav hu txog nws lub npe thiab hais li no: Vim kuv tau txais txoj cai los ntawm Yexus Khetos, kuv muab koj ua kev cai raus dej los ntawm Leej Txiv, thiab ntawm Leej Tub, thiab ntawm tus Vaj Ntsuj Plig Dawb Huv lub npe. Amees.

74 Tom qab ntawd ces nws yuav muab tus neeg ntawd raus rau hauv dej, ces rov qab tawm hauv dej sawv los.

75 Tsim nyog kom cov ntseeg ib sij tuaj sib ntsib ua ke mus noj mov mog thiab haus cawv txiv hmab kom nco txog tus Tswv Yexus;

76 Ces tus txwj laug los yog tus pov thawj yuav foom koob hmoov rau cov mov mog thiab cov cawv txiv hmab; thiab raws li tus txheej txheem no nws yuav tsum foom koob hmoov rau cov no—nws yuav tsum txhos caug nrog cov ntseeg thiab ua tib zoo thov Leej Txiv hais li no:

77 Auj Vajtswv, Leej Txiv tus uas Nyob Mus Ib Txhis, peb thov koj ntawm koj Leej Tub, Yexus Khetos lub npe, kom koj foom koob hmoov thiab ua kom cov mov mog no dawb huv rau txhua leej txhua tus uas noj, kom lawv yuav noj nco txog koj Leej Tub lub cev, thiab ua tim khawv rau koj, auj Vajtswv, Leej Txiv tus uas Nyob Mus Ib Txhis, hais tias lawv txaus siab ris koj Leej Tub lub npe, thiab nco ntsoov txog nws thiab ua raws li nws tej lus txib uas nws tau muab rau lawv; kom lawv yuav muaj nws tus Ntsuj Plig nrog lawv nyob tas mus li. Amees.

78 Tus txheej txheem foom koob hmoov rau cov cawv txiv hmab—nws kuj yuav muab lub khob los, thiab hais li no:

79 Auj Vajtswv, Leej Txiv tus uas Nyob Mus Ib Txhis, peb thov koj ntawm koj Leej Tub, Yexus Khetos lub npe, kom koj foom koob hmoov thiab ua kom cov cawv txiv hmab no dawb huv rau txhua leej txhua tus uas haus, kom lawv yuav haus nco txog koj Leej Tub cov ntshav, uas tau nrog theej lawv; kom lawv yuav ua tim khawv rau koj, auj Vajtswv, Leej Txiv tus uas Nyob Mus Ib Txhis, hais tias lawv nco ntsoov txog nws, kom lawv yuav muaj nws tus Ntsuj Plig nrog lawv nyob. Amees.

80 Thaum muaj ib tug mej zeej ntawm Khetos lub koom txoos ua kev txhaum, los yog pom nws ua tej yam tsis yog, yuav tsum tau sab laj nrog nws raws li cov vaj lug kub qhia.

81 Yog tej dej num ntawm ob peb ceg ntseeg, uas koom ua Khetos lub koom txoos, kom xa ib tug los yog ob peb tug ntawm lawv cov xib hwb mus koom tej rooj sab laj uas cov txwj laug ntawm lub koom txoos tsa muaj,

82 Kom lawv nqa tej npe ntawm ob peb tug mej zeej uas tau los koom nrog lub koom txoos txij thaum lub rooj sab laj zaum tas los; los yog kom ib tug pov thawj xa mus; es kom ib tug txwj laug muab tag nrho cov ntseeg ntawm lub koom txoos tej npe, sau rau hauv ib daim ntawv khaws rau hauv ib phau ntawv, tus uas cov txwj laug tej lub sij hawm yuav teem kom ua txoj hauj lwm no;

83 Thiab nqa tej npe, yog hais tias muaj ib tug mej zeej twg raug muab ntiab tawm ntawm lub koom txoos, kom thiaj muab tau lawv tej npe ntawd tshem tawm hauv lub koom txoos cov ntaub ntawv ceev lub npe mus.

84 Tag nrho cov mej zeej uas tsiv tawm ntawm pawg ntseeg ntawm qhov chaw uas lawv nyob, yog mus rau ib pawg ntseeg uas tsis paub lawv, cov mej zeej no yuav tsum nqa ib daim ntawv pov thawj hais tias lawv yog mej zeej thiab lawv coj zoo, daim ntawv pov thawj uas muaj ib tug txwj laug los sis ib tug pov thawj suam npe rau yog hais tias tus mej zeej uas txais daim ntawv no yeej paub tus txwj laug los sis tus pov thawj zoo, los sis cov xib hwb los yog cov diskas ntawm ceg ntseeg suam npe rau daim ntawv los tau.