1 Saib seb, thiab mloog lub suab ntawm tus uas muaj hwj chim tag nrho, tus uas kav ib txhiab kav ib txhis, uas twb yog Alafas thiab Aumenkas, qhov chiv keeb thiab qhov kawg.

2 Saib seb, tus Tswv hais tseeb li no rau nej tias, auj nej cov uas yog txwj laug ntawm kuv lub koom txoos, cov uas tau tuaj sib txoos rau qhov chaw no, cov uas tus Tswv zam txim rau nej nej tej kev txhaum lawm ziag no, vim kuv, tus uas yog tus Tswv, zam txim rau tej kev txhaum, thiab hlub tshua rau cov uas lees lawv tej kev txhaum nrog lub siab txo hwj chim;

3 Tiam sis kuv hais tseeb rau nej tias, tsis tas kom tag nrho kuv pab txwj laug mus sai sai saum nplaim dej mus, thaum uas cov neeg nyob ob sab dej tab tom piam sij los ntawm txoj kev tsis ntseeg.

4 Txawm li ntawd los, kuv tau cia muaj li ntawd kom nej yuav ua pov thawj; saib seb, muaj ntau yam kev plhom sij nyob rau hauv cov dej, thiab tseem yuav muaj ntxiv tom qab no mus;

5 Vim kuv, tus uas yog tus Tswv, los ntawm kuv txoj kev chim siab, tau tshaj tawm ntau yam kev puas tsuaj rau hauv cov dej; muaj tseeb tiag, thiab feem ntau yog rau hauv cov dej no.

6 Txawm li ntawd los, txhua tus tib neeg nyob hauv kuv txhais tes, thiab tus uas rau siab ntseeg nyob hauv nej yuav tsis piam sij los ntawm cov dej.

7 Yog li ntawd, tsim nyog kom kuv tus tub qhe Sidney Gilbert thiab kuv tus tub qhe William W. Phelps mus tsuag tsuag rau nkawd tej dej num thiab ntiag tug hauj lwm.

8 Txawm li ntawd los, kuv yuav tsis cia neb mus kom txog thaum neb raug qhuab ntuas rau tag nrho neb tej kev txhaum tso, xwv kom neb yuav koom ib lub siab, kom neb thiaj tsis piam sij thaum tseem ua phem;

9 Tiam sis nim no, kuv hais tseeb tias, kuv xav tias tsim nyog uas neb yuav tsum mus. Yog li ntawd cia kuv ob tug tub qhe Sidney Gilbert thiab William W. Phelps coj pab neeg uas yav tas los nkawd tau coj, thiab cia lawv mus nrawm nroos kom lawv thiaj ua tau lawv ntiag tug hauj lwm, thiab los ntawm kev ntseeg lawv yuav kov yeej;

10 Thiab npaum li uas lawv rau siab ntseeg tus Tswv yuav tsom kwm lawv, thiab kuv, tus uas yog tus Tswv, yuav nrog lawv.

11 Thiab cia cov seem tshuav nqa tej uas tsim nyog siv ua khaub ncaws.

12 Cia kuv tus tub qhe Sidney Gilbert nqa tej uas tsis tsim nyog siv nrog nws, raws li nej pom zoo.

13 Thiab nim no, saib seb, vim yog zoo rau nej kuv tau muab ib lo lus txib rau nej ntsig txog tej yam no; thiab kuv, tus uas yog tus Tswv, yuav tham nrog nej zoo li tham nrog cov neeg thaum ub.

14 Saib seb, kuv, tus uas yog tus Tswv, thaum chiv keeb tau foom koob hmoov rau cov dej; tiam sis nyob hauv hnub nyoog kawg, los ntawm kuv tus tub qhe Yauhas lub qhov ncauj, kuv foom tsis zoo rau cov dej.

15 Yog li ntawd, lub sij hawm yuav los txog thaum tsis muaj leej twg uas yuav nyab xeeb nyob hauv cov dej.

16 Thiab lwm hnub neeg yuav hais tias tsis muaj leej twg muaj peev xwm mus hauv dej lawm pem thaj av Xi-oos, tsuas yog cov uas muaj siab ncaj ncees xwb.

17 Thiab, vim kuv, tus uas yog tus Tswv, tau foom tsis zoo rau thaj av thaum chiv keeb, ces twb ib yam li ntawd thaum hnub nyoog kawg kuv tau foom koob hmoov rau, thaum txog lub sij hawm, pub rau kuv haiv neeg ntseeg siv, kom lawv yuav tau txais txoj kev nplua mias nyob haud.

18 Thiab nim no kuv muab ib lo lus txib rau nej tias kuv hais dab tsi rau ib tug ces kuv hais rau sawv daws, kom nej yuav ceeb toom nej cov kwv tij ua ntej ntsig txog cov dej no, kom lawv tsis txhob tuaj hauv dej tuaj, tsam lawv txoj kev ntseeg poob thiab lawv mag tej ntxiab;

19 Kuv, tus uas yog tus Tswv, tau tshaj tawm, thiab tus ua kev puas tsuaj mus saum tej nplaim dej no, thiab kuv tsis thim tej lus tshaj tawm no.

20 Kuv, tus uas yog tus Tswv, tau chim siab rau nej nag hmo, tiam sis hnub no kuv txoj kev chim siab tig mus lawm.

21 Yog li ntawd, cia cov uas kuv tau hais lus txog, uas yuav mus nrawm nroos—kuv hais dua rau nej tias, kom lawv cia li mus nrawm nroos.

22 Thiab tsis ua li cas rau kuv, tom qab ib nyuag ntus, yog hais tias lawv ua tau lawv ntiag tug hauj lwm, txawm lawv yuav mus hauv dej los yog saum nruab nqhuab mus; tom qab no mus cia qhov no mus raws li lawv kev txiav txim ib yam li twb muab qhia rau lawv paub.

23 Thiab nim no, hais txog kuv cov tub qhe Sidney Rigdon, Joseph Smith, tus Hluas, thiab Oliver Cowdery, cia lawv tsis txhob los saum dej los ntxiv, tsuas yog los saum tus kwj deg los xwb, thaum rov los mus rau lawv lub tsev; los yog hais tias, kom lawv tsis txhob los saum dej los, tsuas yog los hauv tus kwj deg los xwb.

24 Saib seb, kuv, tus uas yog tus Tswv, tau npaj ib txoj kev rau kuv haiv neeg ntseeg taug; thiab saib seb, nov yog txoj kev—hais tias tom qab lawv ncaim tus kwj deg kom lawv yuav tsum mus saum nruab nqhuab mus, rau qhov kuv txib lawv kom mus thiab mus lawm pem thaj av Xi-oos.

25 Thiab lawv yuav ua zoo li cov neeg Ixayees, tsa lawv tej tsev pheeb suab ntaub taug kev.

26 Thiab, saib seb, lo lus txib no nej yuav tsum muab rau tag nrho nej cov kwv tij.

27 Txawm li ntawd los, yog muab hwj chim rau leej twg txib cov dej, rau tus ntawd tus Ntsuj Plig twb pub kom nws paub tag nrho Vajtswv tej kev;

28 Yog li ntawd, cia nws ua raws li tus Vajtswv uas muaj sia zees nyob tus Ntsuj Plig txib nws, txawm yog nyob saum nruab nqhuab los yog nyob hauv dej, xws li kuv yuav ua tom qab no mus.

29 Thiab twb muab txoj kev rau haiv neeg ntseeg qhia rau nej, los sis txoj kev taug uas muab rau haiv neeg ntseeg ntawm tus Tswv pab neeg.

30 Thiab ntxiv, kuv hais tseeb rau nej, kuv cov tub qhe, Sidney Rigdon, Joseph Smith, tus Hluas, thiab Oliver Cowdery lawv yuav tsum tsis txhob qhib lawv lub qhov ncauj nyob hauv tej pawg neeg phem kom txog thaum lawv mus txog tim Cincinnati tso.

31 Thiab nyob qhov chaw ntawd lawv yuav tsa lawv lub suab rau Vajtswv tawm tsam cov neeg ntawd, muaj tseeb tiag, rau tus uas nws txoj kev chim siab twb npau tawm tsam lawv tej kev phem, ib co neeg uas twb yuav luag siav rau txoj kev puas tsuaj.

32 Thiab dhau tim qhov chaw tid, cia lawv mus cuag lawv cov kwv tij tej pawg neeg, vim lawv cov kwv tij tej pawg neeg xav tau dag zog pab ntau tshaj cov neeg phem tej pawg neeg.

33 Thiab nim no, ntsig txog cov seem tshuav, cia lawv mus thiab tshaj tawm txoj lus rau tej pawg neeg phem, npaum li uas yuav pub ua;

34 Thiab npaum li uas lawv ua qhov no lawv yuav ntxuav tau lawv tej tsoos tsho, thiab lawv yuav tsis muaj qhov ceb rau kuv pom.

35 Thiab cia lawv mus ua ke, los yog ob leeg ua ib khub, raws li lawv pom zoo, tsuas kom kuv tus tub qhe Reynolds Cahoon, thiab kuv tus tub qhe Samuel H. Smith, uas kuv txaus siab rau, tsis txhob sib faib kom txog thaum nkawd rov los txog nkawd ob lub tsev tso, thiab qhov no yog rau kuv ib lub hom phiaj tseem ceeb.

36 Thiab nim no, kuv hais tseeb rau nej tias, yog kuv hais dab tsi rau ib tug ces kuv hais rau sawv daws, cia li zoo siab, cov me nyuam yaus; vim kuv nyob nrog nraim nej, thiab kuv tsis tau tso nej tseg;

37 Thiab rau qhov nej tau txo nej lub hwj chim rau kuv, ces tej koob hmoov ntawm lub nceeg vaj yog nej li.

38 Muab siv sia ntawm duav thiab xyuas ntsoov thiab ua tiag tiag, tos ntsoov rau hnub Neeg Leej Tub yuav los, vim nws yuav los rau lub sij hawm nej xav tsis txog.

39 Thov Vajtswv tas mus li kom nej txhob pib raug haub ntxias, kom nej yuav nyob rawv hnub nws los, txawm yog tseem ciaj los sis tuag lawm. Twb yog li ntawd. Amees.