“አልማ በሞርሞን ውሀ አጠገብ፣” የመፅሐፈ ሞርሞን ታሪኮች [2023 (እ.አ.አ)]
አልማ በሞርሞን ውሀ አጠገብ
የእግዚአብሔር ህዝብ መሆን
አልማ ኖህ ለሚባል ንጉሥ ካህን ነበር። አልማ የእግዚአብሔር ነቢይ የሆነውን አቢናዲ በኖህ ከመገደል ለማዳን ሞከረ። ነገር ግን ኖህ በአልማ ተናደደ፣ ሊገድለውም ፈለገ። አልማ ለደህንነቱ ሲል ከኖህ ሸሸ። ቀን በነበረ ጊዜ፣ አልማ የሞርሞን ውሃ ተብሎ በሚጠራ ቦታ አጠገብ ተደበቀ።
አልማ አቢናዲ ስለ ኢየሱስ ክርስቶስ ያስተማረውን አመነ። ኃጢአቱንና ስህተቶቹን ይቅር ይለው ዘንድ እግዚአብሔርን ጠየቀ።
አልማ ከሰዎች ጋር በድብቅ በመገናኘት ስለ ኢየሱስ አስተማራቸው። እርሱም ሊሰማ የፈለገን ሁሉ አስተማረ።
ብዙ ሰዎች አልማን አመኑት። አልማ ሲያስተምር ለመስማት ወደ ሞርሞን ውሃ ሄዱ።
ያመኑት የእግዚአብሔር ሰዎች ተብለው ለመጠራት፣ የተቸገሩትን ለመርዳት እና ለሰዎች ስለ እግዚአብሔር ለመናገር ፈለጉ። ስለዚህ አልማ እንዲጠመቁ ጋበዛቸው። በመጠመቅ፣ እርሱን ለማገልገል እና ትእዛዛቱን ለመጠበቅ ከእግዚአብሔር ጋር ቃል ኪዳን ይገባሉ። በምላሹ፣ እግዚአብሔር በመንፈሱ ይባርካቸዋል።
ሰዎቹም በጣም ደስተኞች ነበሩ። እጆቻቸውን በማጨብጨብ መጠመቅ እንደሚፈልጉ ተናገሩ። አልማ እያንዳንዳቸውን በሞርሞን ውሃ አጠመቃቸው። ሁሉም በእግዚአብሔር መንፈስ ተሞሉ እንዲሁም እግዚአብሔር ለእነሱ ያለው ፍቅር ተሰማቸው። የክርስቶስ ቤተክርስቲያን አባላት ሆኑ።
ኖህ አንዳንድ ሰዎች አገሩን ለቀው እየወጡ እንደሆነ ተመለከተ። እንዲመለከቷቸው አገልጋዮቹን ላካቸው። አገልጋዮቹ፣ ሰዎች የአልማን ትምህርት ለመስማት ወደ ሞርሞን ምድር ሲሄዱ አዩ። ኖህ በጣም ተናደደ። አልማን እና እሱ የሚያስተምረውን ህዝብ እንዲገድሉ ሰራዊቱን ላከ።
ስለ ሠራዊቱ እግዚአብሔር አልማን አስጠነቀቀ። በእግዚአብሔር እርዳታ አልማ እና ህዝቡ ምድሩን በደህና ለቀው ወጡ። ሰራዊቱ ሊይዟቸው አልቻሉም። ለስምንት ቀናት ያህል በምድረ በዳ ተጉዘው ወደ ውብ ምድር መጡ። እዚያም አዳዲስ ቤቶችን ሠሩ። አልማ ህዝቡን አስተማረ፣ እነሱም ለእግዚአብሔር የገቡትን ቃል ኪዳን ጠበቁ።