“ኔፊ ወንድሞቹ እና ሌሂ” የመፅሐፈ ሞርሞን ታሪኮች [2023 (እ.አ.አ)]
ኔፊ፣ ወንድሞቹ እና ሌሂ
ከሰማይ ድምፅን መስማት
ኔፊ እና ሌሂ ሁሉም ሰው ስለኢየሱስ ክርስቶስ ወንጌል እንዲያውቅ የሚፈልጉ ወንድማማቾች ነበሩ። ኔፋውያን እና ላማናውያን ጦርነት ላይ ነበሩ፣ ነገር ግን ወንድማማቾቹ ከሁለቱም ቡድኖች የመጡ ሰዎችን ያስተምሩ ነበር። አንድ ቀን ሰዎችን ለማስተማር ሲጓዙ፣ የላማናውያን ሰራዊት ወደ እስር ቤት አስገቧቸው።
ሔለማን 3፥20–21፣ 37፤ 4፥4–5፤ 14፤ 5፥4–21
ከብዙ ቀናት በኋላ፣ ሠራዊቱ ኔፊን እና ሌሂን ለመግደል ወደ እስር ቤቱ መጣ።
ማንም ሰው ኔፊን እና ሌሂን ከመጉዳቱ በፊት፣ ዙሪያቸውን እሳት ከቧቸው ታየ። እሳቱ አላቃጠላቸውም። ይልቁንም እግዚአብሔር ጠበቃቸው። ከዚያም መሬቱ ተንቀጠቀጠ። የእስር ቤቱ ግንቦች ሊወድቁ ያሉ ይመስል ነበር። ብዙም ሳይቆይ፣ በእስር ቤቱ ውስጥ ያሉትን ሌሎች ሰዎች ሁሉ የደመና ጭጋግ ሸፈነ። ሰዎቹ በጣም ፈሩ።
ከደመናው ጭጋግ በላይ ድምፅ መጣ። ልክ እንደ ሹክሹክታ ጸጥ ያለ ነበር፣ ነገር ግን ሰዎቹ በልባቸው ተሰማቸው። የእግዚአብሔር ድምፅ ነበር። እግዚአብሔር ንስሐ እንዲገቡ ነገራቸው።
መሬቱ እና እስር ቤቱ ይበልጥ ተናወጡ። ድምፁ ዳግም መጥቶ ህዝቡ ንስሐ እንዲገባ ነገራቸው። ሰዎቹ ከደመናው እና ከፍርሃታቸው የተነሳ መንቀሳቀስ አቃታቸው።
ከህዝቡ መካከል አንዱ አሚናዳብ ይባላል። በአንድ ወቅት የእግዚአብሔር ቤተክርስቲያን አባል ነበር። የኔፊ እና የሌሂ ፊት በደመቀ ሁኔታ ማብራት እንደጀመረ አየ። መላዕክትን ይመስሉ ነበር። ሰማይ ላይ ካለ ሰው ጋር እየተነጋገሩ ያሉ ይመስል ነበር። አሚናዳብ ሁሉም ሰዎች ኔፊን እና ሌሂን እንዲመለከቱ ነገራቸው።
ሰዎቹ የጨለማውን ጭጋግ ለማስወገድ ምን ማድረግ እንዳለባቸው አሚናዳብን ጠየቁት። አሚናዳብ ስለ እግዚአብሔር እና ስለ ኢየሱስ የሚያውቀውን አካፈለ። ሰዎቹ ንስሐ እንዲገቡ፣ በኢየሱስ እምነት እንዲኖራቸው እና ወደ እግዚአብሔር እንዲጸልዩ ነገራቸው። ሰዎቹ አሚናዳብን አዳመጡት። ጨለማው እስኪጠፋ ድረስ ጸለዩ።
ከእግዚአብሔር የመጣው እሳት ህዝቡን ሁሉ ቢከባቸውም አላቃጣቸውም። ሰዎቹ በመንፈስ ቅዱስ ተሞሉ እንዲሁም በጣም ደስተኞች ሆኑ። አስደናቂ ነገሮችን ተናገሩ። ድምፁ እንደገና መጣ። በኢየሱስ ባላቸው እምነት ምክንያት ሰላም እንዲኖራቸው ተናገራቸው። መላዕክት መጥተው ህዝቡን ጎበኙ።
ኔፊ፣ ሌሂ እና ሁሉም ሰዎች እስር ቤቱን ለቀው ወጡ። በዕለቱ ያዩትንና የሰሙትን በመላ አገሪቱ ለብዙ ሰዎች ተናገሩ። አብዛኞቹ ላማናውያን አምነው ኢየሱስን ለመከተል መረጡ። በጦርነቱ መዋጋት አቆሙ። ከዚያ ይልቅ ሰዎች በኢየሱስ እንዲያምኑና ንስሐ እንዲገቡ ረዱ።