“አልማ እና ህዝቡ፣” የመፅሐፈ ሞርሞን ታሪኮች [2023 (እ.አ.አ)]
አልማ እና ህዝቡ
በአስቸጋሪ ጊዜያት ከእግዚአብሔር የሚመጣ ኃይል
አልማ እና ህዝቦቹ ውብ በሆነች ምድር ይኖሩ ነበር። ዘር ዘሩ እንዲሁም ቤት ሠሩ። አልማ የእግዚአብሔር ካህን ነበር። ህዝቡ እርስ በርስ እንዲዋደድ አስተማረ። ሰዎቹ አልማን ሰሙ፣ የእግዚአብሔርንም ትእዛዛት ጠበቁ። ቤተሰቦቻቸው ትልቅ ሆኑ፣ ከተማም ሠሩ።
አንድ ቀን፣ የላማናውያን ሰራዊት መጣ። የት እንዳሉ አያውቁም ነበር። ላማናውያን፣ አልማ ወደ ቤታቸው የሚወስዳቸውን መንገድ እንዲያገኙ ከረዳቸው የአልማን ህዝቦች እንደሚተው ቃል ገቡ። አልማ ላማናውያን እንዴት ወደ ምድራቸው መመለስ እንደሚችሉ አሳያቸው።
ላማናውያን የገቡትን ቃል ሳይጠብቁ ቀሩ። ይልቁንም፣ መሬቱን በመቆጣጠር ጠባቂዎች የአልማን ሰዎች እንዲጠብቁ አደረጉ። እንዲሁም አሙሎን የሚባል ኔፋዊ በአልማ ህዝብ ላይ እንዲነግስ አደረጉ። አሙሎን የሐሰተኛ ካህናት መሪ ነበር። እሱና ካህናቱ የእግዚአብሔርን ነቢይ ገደሉ፣ እንዲሁም ሌሎች ብዙ መጥፎ ድርጊቶችን ፈጸሙ።
ሞዛያ 17፥12–13፣ 23፥31–32፣ 37–39፣ 24፥9
አሙሎን በአልማ ተናደደ። የአልማን ህዝቦች በጣም ከባድ ስራ እንዲሠሩ አደረጋቸው፣ ለእነርሱም ክፉ ነበር። ይህ ለአልማ ህዝቦች አስቸጋሪ ነበር።
እነርሱም እግዚአብሔር እንዲረዳቸው ጸለዩ። አሙሎን ጸሎታቸውን እንዲያቆሙ ነገራቸው። የሚጸልይ ሁሉ ይገደላል አለ።
አልማ እና ህዝቡ ድምጻቸውን ከፍ አድርገው መጸለይን አቆሙ። ይልቁንም በልባቸው ጸለዩ። እግዚአብሔር ጸሎታቸውን ሰማ። አጽናናቸው እንዲሁም እንዲያመልጡ እንደሚረዳቸው ቃል ገባላቸው። እግዚአብሔር ከባዱ ስራቸው ቀላል ሆኖ እንዲሰማቸው አደረገ። ሰዎቹ እግዚአብሔርን ሲሰሙ ታጋሾች እና ደስተኞች ሆኑ። እርሱ እየረዳቸው እንደሆነም አወቁ።
የአልማ ሰዎች በእግዚአብሔር ታመኑ እንዲሁም በእርሱ ላይ ታላቅ እምነት ኖራቸው። አንድ ቀን እግዚአብሔር የመሄጃ ጊዜያቸው እንደደረሰ ነገራቸው። በዚያ ምሽት፣ አልማ እና ህዝቡ ተዘጋጁ። እንስሶቻቸውንና ምግባቸውን ሁሉ ሰበሰቡ። በማለዳ፣ እግዚአብሔር ላማናውያን ላይ ከባድ እንቅልፍ ጣለባቸው። ከዚያም አልማ እና ህዝቡ አመለጡ፤ ቀኑን ሙሉም ተጓዙ።
በዚያ ምሽት ሁሉም ወንዶች፣ ሴቶችና ልጆች እግዚአብሔርን አመሰገኑ። እግዚአብሔር ብቻ ሊረዳቸው እንደሚችል ያውቁ ነበር። ለብዙ ቀናት ከተጓዙ በኋላ ወደ ዛራሔምላ ምድር መጡ። ኔፋውያን ተቀበሏቸው፣ አልማም በኢየሱስ ክርስቶስ ስለማመን ሁሉንም ሰው አስተማረ። ብዙ ሰዎች አምነው ተጠመቁ።