“ሻምበል ሞሮኒ እና ዛራሔምና፣” የመፅሐፈ ሞርሞን ታሪኮች [2023 (እ.አ.አ)]
ሻምበል ሞሮኒ እና ዛራሔምና
ጦርነት እና በሰላም ለመኖር ቃል ኪዳን
ዛራሔምና የላማናውያን ሠራዊት መሪ ነበር። በኔፋውያን ላይ መግዛት እና ህዝቡን እንዲያገለግሉ ለማድረግ ፈለገ። ዛራሔምና ሰራዊቱ ኔፋውያንን እንዲያጠቃ መራ።
ኔፋውያን ቤታቸውን፣ ቤተሰባቸውን እና ሃይማኖታቸውን ለመጠበቅ ፈለጉ። ላማናውያን የሚገዟቸው ከሆነ ጌታን ማምለክ እንደማይችሉ ያውቁ ነበር። ኔፋውያን ጠላቶቻቸውን ለመዋጋት መረጡ።
የኔፋውያን ሠራዊት ሻምበል የሆነ ሞሮኒ የሚባል ሰው ነበር። ሞሮኒ ሠራዊቱ ለውጊያ ዝግጁ መሆናቸውን አረጋገጠ።
የሞሮኒ ወታደሮች መሳሪያ አመጡ፣ እንዲሁም ሞሮኒ እነሱን ለመጠበቅ ጠንካራ ጥሩር እና ጋሻ ሰጣቸው።
ሞሮኒ ላማናውያንን ለመውጋት ሠራዊቱን ይዞ ሄደ። ነገር ግን ላማናውያን ኔፋውያን ጥሩር እና ጋሻ እንዳላቸው ባዩ ጊዜ ለመዋጋት ፈሩ። ላማናውያን ሥሥ ልብስ ብቻ ነበራቸው እንዲሁም የሚከላከላቸው ትጥቅ አልነበራቸውም።
ላማናውያን ሸሹ። ወደ ሌላ የኔፋውያን ምድር በድብቅ ለመግባት ሞከሩ። ሞሮኒ የት እንደሄዱ የማያውቅ መስሏቸው ነበር።
ነገር ግን ላማናውያን እንደሸሹ፣ ሞሮኒ እንዲከተሏቸው ሰላዮችን ላከ።
ከዚያም ሞሮኒ ለነቢዩ አልማ መልእክት ላከ። አልማ ላማናውያን ምን ለማድረግ እንዳሰቡ ጌታን እንዲጠይቅ ፈለገ። ጌታ፣ ላማናውያን ማንቲ የተባለ ደካማ ምድርን ለማጥቃት እንዳቀዱ ለአልማ ነገረው። ሞሮኒ አልማን አዳመጠ። ከላማናውያን ጋር ለመዋጋት ሠራዊቱን መራ።
ሠራዊቱ ተዋጋ። ላማናውያን በጣም ጠንካሮች እና ቁጡዎች ነበሩ። ኔፋውያን ላማናውያንን ፈርተው ስለነበር ሊሸሹ ፈለጉ። ነገር ግን ሞሮኒ ቤተሰቦቻቸውን እና እምነታቸውን አስታወሳቸው፣ ስለዚህ መዋጋታቸውን ቀጠሉ።
ኔፋውያን ለእርዳታ ወደ ጌታ ጸለዩ። ጌታ ጸሎታቸውን ሰማ፣ ታላቅም ኃይል ሰጣቸው። አሁን ላማናውያን ፈሩ። እነርሱም ወጥመድ ውስጥ ገቡ፣ ማምለጥም አልቻሉም። ሞሮኒ ላማናውያን እንደፈሩ ባየ ጊዜ፣ ወታደሮቹ ውጊያ እንዲያቆሙ ነገራቸው። ሞሮኒ ላማናውያንን መግደል አልፈለገም።
ሞሮኒ፣ ላማናውያን ኔፋውያንን ዳግም ላለመዋጋት ቃል የሚገቡ ከሆነ መሄድ እንደሚችሉ ለዛራሔምና ነገረው። ዜራሔምና ተቆጣ፣ ውጊያውን ለመቀጠል ሞከረ፣ ነገር ግን የሞሮኒ ወታደሮችን ማሸነፍ አልቻለም። ከዚያም ዛራሔምና እና ሠራዊቱ በሰላም ለመኖር ቃል ገቡ፣ ሞሮኒም እንዲሄዱ ለቀቃቸው።