“ሊያሆና እና የተሰበረው ቀስት፣” የመፅሐፈ ሞርሞን ታሪኮች [2023 (እ.አ.አ)]
ሊያሆና እና የተሰበረው ቀስት
የጌታን እርዳታ መፈለግ
የሌሂ እና የእስማኤል ቤተሰቦች ለብዙ አመታት በምድረበዳ ተጉዘዋል። ጌታ በመልካሙ የምድር ክፍል መራቸው። በመንገድ ላይ ማደን እና ምግብ መሰብሰብ ነበረባቸው። ጉዞው ከባድ ነበር።
ቤተሰቦቹ ትእዛዛቱን ከጠበቁ ወደ ጥሩ ምድር እንደሚመራቸው ጌታ ቃል ገባላቸው። ምድሪቱን እንዴት እንደሚያገኙ አያውቁም ነበር፣ ነገር ግን እርሱ ይመራቸዋል።
በአንድ ማለዳ ሌሂ ከድንኳኑ ውጭ የነሐስ ኳስ በማግኘቱ ተገረመ። ኳሱ ሊያሆና ይባል ነበር። በሊያሆና ውስጥ ያለው አንድ ቀስት ቡድኑ ሊጓዝበት የሚገባውን መንገድ ይጠቁም ነበር። አንዳንድ ጊዜ የጌታ መልእክቶች በሊያሆና ላይ ተፅፈው ያገኙ ነበር። በዚህ መንገድ ነበር ጌታ የመራቸው።
1 ኔፊ16፥10፣ 16፣ 26–29፤ አልማ 37፥38
አንድ ቀን ኔፊ እያደነ ሳለ፣ የብረት ቀስቱ ተሰበረ። ቤተሰቦቹ ያለሱ ምግብ ማግኘት አልቻሉም። የኔፊ ወንድሞች በእርሱ እና በጌታ ተቆጡ።
ሁሉም በጣም ደክመው እና ተርበው ነበር። አንዳንዶቹ አዝነው እና አጉረምርመው ነበር። እንራባለን ብለው ፈርተው ነበር። ሌሂም እንኳን በጌታ ላይ አጉረመረመ።
ኔፊ ከእንጨት የተሠራ አዲስ ቀስት እና ፍላጻ ሠራ። ጌታ ምግብ እንዲያገኝ እንደሚረዳው እምነት ነበረው።
ኔፊ ለማደን የት መሄድ እንዳለበት ሌሂን ጠየቀው። ሌሂ ስላጉረመረመ ተጸጸተ። ንስሀ ገባ እንዲሁም ጌታ እንዲረዳው ጠየቀ። ጌታም ሌሂ ሊያሆናውን እንዲመለከት ነገረው። መልእክት ተጽፎበት ነበር። ሊያሆናው የሚሰራው በጌታ ላይ እምነት ሲኖራቸው እና ትእዛዛቱን ሲያከብሩ ብቻ እንደሆነ ቤተሰቦቹ ተረዱ።
እነርሱን በጉዞአቸው ለመርዳት ጌታ በሊያሆና ላይ ያለውን መልእክት አንዳንድ ጊዜ ይቀይራል። ሊያሆናው ኔፊ የት ማደን እንዳለብት ለማወቅ ረዳው። የሚመገቡት ምግብ አመጣ፣ እናም ሁሉም ደስተኞች ነበሩ። ንስሀ ገቡ እንዲሁም ጌታን አመሰገኑ።