13-р бүлэг
Зениф
Зениф хэсэг нифай хүнтэй хамт Зарахемла дахь гэрээ орхиж, нэгэн цагт бусад нифайчуудын амьдарч байсан Нифай гэдэг газар руу аялжээ.
Тэнд леменчүүд амьдарч байгааг тэд олж мэдсэн. Зениф хаантай нь ярилцахаар өөрийн дөрвөн эрийг дагуулан, хот руу оров. Тэд хаан Леменээс газар нутагт нь амьдарч болох эсэхийг асуусан.
Түүний хоёр хотыг эзэмшиж болно гэж Лемен хаан тэдэнд хэлэв. Хаан тэднийг боолоо болгохын тулд газар нутагтаа амьдруулахыг хүсэж байжээ.
Зенифийн хүмүүс байшин барьж, хотуудынхаа эргэн тойрны хэрмийг засав. Тэд олон төрлийн үр тариа, жимс тарьжээ. Мөн тэд мал сүрэгтэй байлаа.
Хаан Лемен нифайчуудыг дэндүү хүчирхэгжиж байгаа тухай ард түмэндээ хэлэв. Удалгүй олон лемен хүн нифайчууд руу довтлон, тэдний мал сүрэг болон тарианаас хулгайлахаар явав.
Нифайчууд Нифай хот руу зугтсан. Тэнд Зениф ард түмнээ нум сум, сэлэм, бороохой, дүүгүүр зэргээр зэвсэглээд, леменчүүдтэй байлдахаар явав.
Нифайчууд байлдахаасаа өмнө Бурханаас тусламж гуйн залбирав. Бурхан нифайчуудыг нэмэлт хүчээр адисалж, улмаар тэд леменчүүдийг ялав.
Байлдааны дараа Зениф нифайчуудын хотуудын эргэн тойронд харуул тавив. Тэр ард түмэн, мал сүргээ леменчүүдээс хамгаалахыг хүсэж байлаа.
Нифайчууд олон жил амар амгалан амьдрав. Эрчүүд нь талбайд ажиллаж, эмэгтэйчүүд нь утас ээрч, хувцас оёдог байлаа.
Хаан Лемен нас барж, хүү нь хаан болов. Шинэ хаан нифайчуудтай байлдуулахаар их цэргээ илгээсэн.
Нифайчууд Их Эзэнээс дахин хүч чадал олж авав. Тэд олон лемен хүнийг устгасан ба үлдсэн хэсэг нь зугтжээ.