38-р бүлэг
Ерөнхий шүүгчийг алсан нь
Ёс бус хүмүүс нифайчуудын дээрх шүүгчид болов. Тэд ёс бус хүмүүсийг биш, харин зөв шударга хүмүүсийг шийтгэж байв.
Нифай ард түмний дунд маш их ёс бус байдал байгааг хараад, харамсаж байлаа.
Нэг өдөр тэрээр цэцэрлэгийнхээ цамхаг дээр гараад залбирч байжээ. Түүний цэцэрлэг Зарахемла дахь зах руу явдаг гол замын хажууд байдаг байв.
Гол замаар өнгөрөн явж байгаа хүмүүс Нифайн залбирлыг сонслоо. Түүнийг яагаад ийм их гунигтай байгааг гайхан, олон хүн цугларсан байв.
Нифай уг хүмүүсийг хараад, тэдний ёс бус байдалд харамсаж байгаагаа хэлэв. Тэр тэдэнд наманчил гэж хэллээ.
Хэрэв тэднийг нүглээ наманчлахгүй бол дайснууд тэдний гэр орон, хотуудыг эзэлж, Их Эзэн тэдэнд дайснуудтайгаа тэмцэхэд нь туслахгүй гэж сэрэмжлүүлэв.
Нифайчууд леменчүүдээс илүү ёс бус болж байна, учир нь нифайчууд зарлигуудыг заалгасан боловч дуулгавартай дагахгүй байна хэмээн Нифай хэлэв.
Хэрэв нифайчууд нүглээ наманчлахгүй бол устгагдах болно гэж тэр хэлсэн.
Тэнд зарим нэг ёс бус шүүгч байв. Тэдний мөн тэдний хуулийн эсрэг ярьсан зүйлийнх нь төлөө Нифайг шийтгэхийг тэд хүмүүсээс хүсэв.
Зарим хүн ёс бус шүүгчидтэй санал нэгдэж байв. Бусад нь Нифайд итгэж байсан ба түүнийг бошиглогч гэдгийг мөн үнэнийг ярьсан гэдгийг мэдэж байлаа.
Тэднийг Бурханы эсрэг боссон бөгөөд хэрэв наманчлахгүй бол удахгүй шийтгэгдэх болно гэж Нифай хүмүүст хэлсэн.
Нифай хүмүүст явж ерөнхий шүүгчээ ол гэж хэлсэн. Мөн шүүгчийн албан тушаалыг нь булаан авахыг хүссэн дүү нь түүнийг алчихсан, тэр одоо цусан дундаа хэвтэж байгаа гэж хэллээ.
Олны дундаас таван залуу ерөнхий шүүгчээ олж харахаар гүйв. Нифайг Бурханы бошиглогч гэдэгт тэд итгэдэггүй байсан.
Тэд ерөнхий шүүгч Сизромыг цусандаа холилдон хэвтэж байхыг хараад, айсандаа газарт унав. Одоо л тэд Нифайг бошиглогч байж гэдгийг мэджээ.
Сизромын зарц нар ерөнхий шүүгчээ аль хэдийн олсон байсан бөгөөд хүмүүст хэлэхээр гүйсэн байв. Тэд буцаж ирээд, газарт хэвтэж байгаа таван залууг олж харжээ.
Хүмүүс өнөөх таван хүнийг Сизромыг алсан гэж бодов.
Тэд уг таван хүнийг шоронд хийсэн ба ерөнхий шүүгчийг алагдсан мөн түүнийг алсан алуурчид шоронд орсон гэсэн зарыг хот даяар тараажээ.
Маргааш нь хүмүүс ерөнхий шүүгчийг оршуулах газар руу явав. Нифайн цэцэрлэгт байсан шүүгчид нөгөө таван залууг хаана байгааг асуужээ.
Шүүгчид яллагдаад байгаа алуурчдыг харахыг хүсэв.
Алуурчид хэмээн яллагдаад буй таван эр Нифайн цэцэрлэгээс гүйж гаран, ерөнхий шүүгч рүү очсон эрс байлаа.
Нифайн хэлсэнчлэн ахлах шүүгчийг цусандаа хутгалдан хэвтэж байхыг олж харсан гэдгээ уг таван хүн хэлэв. Тэгэхэд шүүгчид Сизромыг алуулахаар хэн нэгнийг явуулсан гэж Нифайд ял тулгажээ.
Нифайг бошиглогч гэдгийг мэдэж байсан таван эр шүүгчидтэй маргалдсан боловч тэд сонссонгүй. Тэд Нифайг хүлэв.
Хэрэв ерөнхий шүүгчийг алахаар хуйвалдсан гэдгээ хэлбэл мөнгө өгч, амийг нь өршөөнө гэж шүүгчид Нифайд хэлэв.
Нифай шүүгчдэд ёс бус явдлаа наманчил гэж хэлсэн. Дараа нь тэр тэднийг Сийнтум гэгч Сизромын дүү дээр оч гэж хэлэв.
Сийнтумаас өөрийг нь Нифайтай нийлж Сизромыг алахаар хуйвалдсан эсэхийг асуу гэж Нифай хэлсэн. Сийнтум “үгүй” гэж хариулах болно гэж Нифай хэлэв.
Дараа нь шүүгчид Сийнтумаас ахыгаа алсан эсэхийг нь асууна. Сийнтум “үгүй” гэж хариулах боловч шүүгчид түүний нөмрөгөөс цусны толбо олох болно.
Тэгэхэд Сийнтум чичирч, цонхийно. Эцэст нь тэр ахыгаа алснаа хүлээх болно гэж Нифай хэлэв.
Шүүгчид Сийнтумын гэрт очиход, бүх зүйл Нифайн хэлсний дагуу болсон. Нифай болон өнөөх таван залуу суллагдав.
Хүмүүс Нифайгаас холдон явахдаа зарим нь түүнийг бошиглогч, зарим нь бурхан гэж байв. Нифай тэднийг ёс бус хэвээрээ байгаад харамсан, гэр рүүгээ явлаа.