4-р бүлэг
Гуулин ялтаснууд
Нифайг ах нарынхаа хамт Иерусалим руу буцаж очихыг Их Эзэн хүсэж байгаа тухай Лихай Нифайд хэлэв. Тэд Лебен гэгч эрээс гуулин ялтаснуудыг авах ёстой байв.
Гуулин ялтаснууд бол маш чухал цэдгүүд байсан. Тэдгээр нь Лихайн өвөг дээдсийн тухай өгүүлэхээс гадна Бурханы бошиглогчдоороо дамжуулан илчилж байсан үгсийг агуулдаг байв.
Лемен, Лемүел хоёр гуулин ялтаснуудыг авчрахын тулд буцаж явахыг хүсэхгүй байлаа. Тэд үүнийг хийхэд дэндүү хэцүү гэж хэлж байв. Тэд Их Эзэнд итгэхгүй байсан.
Нифай Их Эзэнийг дуулгавартай дагахыг хүсэж байв. Тэр Лебенээс гуулин ялтаснуудыг авахад Их Эзэн түүнд болон ах нарт нь тусална гэж мэдэж байлаа.
Лемен, Лемүел, Сам, Нифай нар гуулин ялтаснуудыг авахаар Иерусалим руу буцаж явав.
Лемен Лебен дээр очоод, түүнээс ялтаснуудыг гуйжээ.
Лебен ихэд хилэгнэж, Леменд гуулин ялтаснуудыг өгсөнгүй. Лебен Леменийг алахыг хүссэн боловч Лемен зугтаж амжжээ.
Лемен юу болсон тухай дүү нартаа ярьжээ. Тэр айж, бууж өгөхийг хүсэн, аглаг буйдад байгаа аав дээрээ буцаж очихыг хүсэж байлаа.
Тэд гуулин ялтаснуудгүйгээр буцаж явж болохгүй гэдгийг Нифай хэлэв. Тэр ах нартаа Их Эзэнд илүү итгэлтэй байх юм бол гуулин ялтаснуудыг авах боломжтой байх болно гэж хэллээ.
Нифай болон түүний ах нар Иерусалим дахь хуучин гэртээ очиж, ялтаснуудыг сольж авахын тулд өөрсдийн алт, мөнгийг авлаа.
Тэд Лебенд эд баялгаа үзүүлж, ялтаснуудаар солихыг санал болгов. Лебен алт мөнгийг нь хараад, авахыг хүсэж, тэднийг хөөн гаргажээ.
Лебен хүмүүстээ Лихайн хөвгүүдийг алахыг тушаав. Нифай болон түүний ах нар зугтаж, агуйд нуугдлаа. Лебен тэдний алт мөнгийг авчээ.
Лемен, Лемүел хоёр Нифайд ихэд уурлаж, Сам тэр хоёрыг саваагаар зодов.
Тэнгэр элч үзэгдэн, Лемен, Лемүел хоёрт боль гэж тушаав. Их Эзэн ялтаснуудыг авахад тэдэнд тусална гэж тэр хэлэв. Мөн Нифайг ах нарынхаа удирдагч болно гэж хэллээ.
Нифай ах нартаа Их Эзэнд итгэлтэй байж, Лебенээс болон түүний хүмүүсээс айхгүй байх хэрэгтэй гэж хэлэв. Тэр мөн ах нартаа Иерусалим руу эргэж явахыг уриалав.
Тэр орой Нифайн ах нар Нифайг хотын хашаан дотор нууцаар ороход гадна талд нь нуугдаж байлаа. Тэр Лебений байшин руу алхав.
Нифай Лебений байшинд дөхөж ирээд, нэг согтуу хүн газар хэвтэж байхыг харав. Тэр хүн нь Лебен байв.
Нифай Лебений сэлмийг хараад, сугалан авав. Ариун Сүнс Нифайд Лебенийг ал хэмээн хэлсэн ч тэр түүнийг алахыг хүссэнгүй.
Ариун Сүнс Нифайд гуулин ялтаснуудыг авахын тулд Лебенийг ал хэмээн дахин хэллээ. Лихайн гэр бүлд сайн мэдээнээс суралцахын тулд ялтаснуудыг авах нь маш их хэрэгтэй байлаа.
Нифай Ариун Сүнсийг дуулгавартай дагаж, Лебенийг алжээ. Дараа нь Нифай Лебений хувцас, хуяг дуулгыг өмсөв.
Нифай Лебений гэрт орж, Зорам гэгч Лебений зарцтай тааралдав. Нифай яг л Лебентэй адил харагдаж мөн ярьж байв.
Тэр Зорамд гуулин ялтаснуудыг авчрахыг тушаав. Зорам Нифайг Лебен гэж бодож байсан тул түүнд ялтаснуудыг өгөв. Нифай Зорамд өөрийг нь дагаж явахыг тушаав.
Лемен, Лемүел, Сам нар Нифайн ирж явааг хараад, ихэд айцгаав. Учир нь тэд түүнийг Лебен гэж боджээ. Тэд зугтаж эхэлсэн боловч Нифайг дуудахад зогсоцгоов.
Зорам Нифайг Лебен биш гэдгийг мэдээд, зугтахыг оролджээ. Нифай Зорамыг барьж авч, хэрэв өөрийг нь дагаж аглаг буйд руу явбал түүнд гар хүрэхгүй гэж амлав.
Зорам зөвшөөрлөө. Нифай болон түүний ах нар Зорамыг мөн гуулин ялтаснуудыг авч, Лихай, Сариа хоёр дээр эргэж ирэв.
Тэд гуулин ялтаснуудыг Лихайд өгөв. Лихай, Сариа хоёр хөвгүүд нь эсэн мэнд эргэж ирсэнд баяртай байлаа. Тэд бүгд баярлаж, Бурханд талархлаа илэрхийлэв.
Лихай гуулин ялтаснуудыг уншив. Тэдгээр нь Адам, Евагийн мөн дэлхийн Бүтээлтийн талаар өгүүлж байлаа. Тэдгээр нь олон бошиглогчийн үгсийг агуулсан байв.
Лихай, Нифай хоёр Их Эзэнийг дуулгавартай дагасандаа мөн гуулин ялтаснуудыг авах боломжтой байсандаа баяртай байлаа.
Лихайн гэр бүл ялтсан дээрх зарлигуудыг үр хүүхдүүддээ заахын тулд гуулин ялтаснуудыг авч явахаар ачаандаа баглав.